The sultan of darkness🥀عود الورد🥀

#10

🌿مولات السالف خلات سلطان الظلام تالف🌿

🌿قصة:عود الورد «سلطان الظلام »🌹

        🌿للكاتبة:⚜️عواطف بالحفيض🌹

        🌿 البارت:🕯️ العاشر🕯️🌹

يارب وشنو درت ما بيا ماعليا، حتى لقيت راسي  فعقدة ملها لاساس ولا راس ، ياربي انا غير ولية شوف من حلي ومن حال أبا اللي خضو يتسنى فيا

    وقفوها قربوها لوحد التكية، وربطو ليها رجليها مع ايديها اما هي فشلت ،اش عند الميت مايدير قدام غسالو...  تضرب  فرجليها  مع الأرض وتبكي حتى من دموعها نشفو، نهار على خوه تبكي... وترغب وتسنى الفرج  والعاصفة تزول والخاطر تصفى كما قال هد الظلام لمانو لا جن ولا انس  ،.....
من داك نهار  اللي لقات راسها فداك البيت وهي فيه..  ملت من الحيوط اللي تشوف فيهم ويشوف فيها ، ماتعرف اليل من النهار ولا الصباح من العشية ....بقات تما حتى جاء وحد النهار تحل الباب ودخل سلطان الظلام ، غير شافتو وقفات  على رجليها متمتمت ماحلت فمها، ماطلبت رجاء ،ماشكات همها ...سلمت امرها الله العالي اللي قادر يفكها ...

بقا كيشوف فيها شحال بعينو الحمراء... وحدة هي اللي باينة اما لأخرى عليها غطأ بالكحل

سلطان الظلام: العاصفة هدأت والحكام وقتو وصلات والخاطر من جهتك فالقبيلة صفات
    هنا طحت على رجليها كتبكي... وتهرنن «هو قصد بلي توحد فالقبيلة مابقا كيقلب عليها، وتقطع الياس والامل فخروجها سلمت امرها الله، مسحت دموعها  ....اول مرة زين الورد كتشجع وتواجه سلطان الظلام ،اللي مركب الرعب فكاع القبيلة، من الصغير لكبير

زين الورد: على أرض الله واقفة وفقصرك جالسة  ولحكامك انا جاهزة  غير طلق صراحي

      صفق جوج تصفقات بيديه لأول مرة ترد لهم البال كانو بحال الشب  البلدي، اللي شافهم وشاف وجهو ميقولش جني...  دخلو هدوك الرجال اللي لبسين الكحل هزين جوج صينيات مغطين حطوهم فوق وحد الطابلة ديال العود ...وخا قديمة لكن كتبان زوينة  ..خرجوا ، قرب سلطان الظلام لدوك صينيات زول الغطا عليهم ونطق :

سلطان الظلام: يالله ازين الورد بنت العطار ختاري تفاحة من بين تفاحات  وختاري ورقة من ورق الشجر... وزهرك هو  اللي غادي يقرر مصيرك
  فالاول ترددت «قالت :هذا غير كيضحك عليا عرفني هبيلة ولية داكشي علاش ايديرها بيا »
غير نطق بصوت كيخلع مرة أخرى زعزعها وهي تقرب لصينيات بزوجهم وحدا عامرة بالتفاح حمر، وحدة عامرة بورق الشجر .... بقات كتشوف فالتفاحات وكتطلب الله... زهرها يكون بحال حجر الواد الحملة، اللي جات تنقيه وتخليه يبري كالقمرة فالليل... وتخرج من هد جهنم تاع الويل ،هزات تفاحة ، وخدات وحدة من ورقة الشجر، فتحت عينيها  كتشوف فعينو الحمراء اللي كتخلع انطق:
 
سلطان الظلام: كولي التفاح ازين الورد 
زين الورد: «كتعجب» واش دبا ختاريت تفاح باش ناكلو 
سلطان الظلام: دري بالكلام وبركا من قلة الشي وكثرةالفهامة

   عضات التفاحة بقات كتكل فيها... حتى حست بشي ورقة  خرجت ديك الورقة اللي بحال جلد من فمها ...مكتوب عليها حروف مفرقة غير هد المرة فهمتها ... قراتها حست بحال شي  واحد  صمرها بتصرفيقة... تخلعت مامتيقاش بلي  زهرها مكوز  كالشعير المخرق .... نزلو دموعها حلات ديك الورقة ديال شجار، لعلى وعسى تعطيها شوية الضوء قراتها، حتى هي وهنا فشلات بدأت كتبكي ،عرفت بلي زهر المغلوب مامنو هروب...
يتبع