🌿مولات السالف خلات سلطان الظلام تالف🌿
🌿قصة:عود الورد «سلطان الظلام »🌹
🌿 للكاتبة:⚜️عواطف بالحفيض⚜️🌹
🌿 البارت:🕯️الثالث والعشرين 🕯️🌹
فالنهار لاخور اللي ايكون نهار طويل عليها، خايفة كتحس بالرجفة فقلبها... فيقات باها فطرو جمعت الدار عدلت حوايجها... داق الباب مشا باها حل، كانو زوج من الخدم ديال السلطان قاسم قالو ليه الكلام لأمر به السلطان، لبست حوايجها كانت عبارة عن كسوة ديال مها الله يرحمها بالخضر درت حيك ديالها واللتام ، وخرجت ركبوها فواحد الهودج مزيون كلو ورد، كانت كتشوف فزينة اللي طلات عليها كتشير ليها بيدها و مدتها فيها زين الورد بقا فيها الحال ....هنا عرفت باللي فعلا كما قال لولين صحبتك هي ركبتك لتهزك وطلعك وتهبطك، اما الباقي بحالهم بحال شي قناع، إلا مايجي شي نهار ويبان اصلهم ،حيدت هد الافكار لكن غير كتفكر حريرتها وكتخنق معرفت شنو ادير ولا فين غادية الافكار كتمشي وتجي فراسها
«الى مقدرت بركة لآلة خيرة تنفع و فضحني قدام العادي والبادي ولات سيرتي على كل لسان شنو ندير؟ »
...طريق كاملة وهي كتفكر حتى كرشها ضراتها من الخلعة من بعد مدة ديال الطريق، حبسو ونزلو الهودج وعرفت بلي وصلو لقبيلة ايت زم نزلت من الهودج كانو بزااف الناس واقفين وكيستقبلو فالضياف ويرحبو بهم هالروايح، هالبخور ،هالجْمال ديال العرس خرجت لالة مغنية لبسة زين القفاطن وحاطة قتيب على راسها ديال حرير الدودة،كترحب بيها معها جوج باين عليهم خدمات من لونهم
لالة مغنية: مرحبا بالزين والهبة نهار كبير هذا
زين الورد:سلمت عليها.... الله ينور مقامك الآلة مغنية
الآلة مغنية:ولاواه دبا قولي ليا إما اولا خالتي
زين الورد:هههه وخا اخالتي
حطات ليها واحد البانيو فيه الماء وسط منو خاتم ودبليج قالت ليها تحط رجليها وسط ماء ديال النقرة باش يبقى زوجها ديما صافي ...
اما زين الورد كتقول مع راسها «ويلي ياربي كيفاش ايكون صافي وحريرتي حريرة»
...من بعد جبدت ليها وحد البلغة مذهبة لبستها ،ودخلوها لوحد البيت بالزغاريت والصلاة والسلام على نبينا رسول الله، كانت فيه وحد المرأة بشرتها سوداء وغليضة باين عليها شي نكافة اللي كتقاد لعرايس
جلست ودخلت معاها لالة مغنية
لالة مغنية: سالكة بغيتك دري ليا احسن تقاد لمرات السلطان
سالكة: هي لمتعود امات سيدي
خرجت لالة مغنية مشات تشوف ولدها ،اللي كيجهز فراسو وفرحان فرحتو معطيها لحد ...بسيف ،ميفرح وهو ايتزوج بلي دات عقلو وقلبو ...دخلت لقاتو بكامل اناقتو وسامتو لمعروف باللي اجمل ولد فولاد سلطان جبران، هو قاسم مني كان فعمر الصغر والطيش كان صياد وكانو البنات كلهم كيحمقو عليه، ومني عرفوه رجع وقرر يتزوج كاين لنذبت راسها وحضها عليه
لالة مغنية: تبارك الرحمن ماشاء الله أولدي وتاج راسي ربي يحفضك من العين
سلطان قاسم: كيف جيتك الآلات السلطانات
لالة مغنية: ماشاء الله خايفة عليك من العين
سلطان قاسم :باس ليها راسها وايدها ....لهلا يخطيك اميمتي...
يتبع....
أنت تقرأ
The sultan of darkness🥀عود الورد🥀
Fantasíaقصة بالدريجة المغربية تحكي عن فتاة ستقع بين يدي رجل خفي اسمه سلطان الظلام رهينة فيطلب منها أشياء لكي يدعها تغادر فما هي هذه الاشياء ياترى؟؟؟ قصة #خيالية#رومانسية#رعب#تشويق
