ذات النقاب الاسود 7
الصبح :-
طبعا كان صباح سيمستر جديد ع كل طلاب درنه ..
محمد في داره يغير في لبسه
وعائشة وطيبة حتى هما في دارهم يغيرو في لبسهم
وحتى منصف في داره يغير باش يمشي الشغل ..
جهزو البنات وخوهم وطلعو هما التلاته بالسيارة ..
حطو طِيبة اول وحدة زي العادة ..
طِيبة : نزلت من السيارة تلفتت ع يسارها لقت فُلك حتى هيا كيف نازلة من السيارة ابتسمو لبعض وسلمو ع بعض وخشو مع بعض ..
اول ما خشو جت عينهم ع الشجرة اللي في وسط المعهد شجرة كبيرة وحواليها زي لكراسي الخشبيات قعمزو عليهم هما الزوز ..
طِيبة : باين عليها بداية حلوة !
فُلك : اي حتى انا ارتحت هلبا ، هدا كان مكان قروب انسام صح ؟
طِيبة : لا مش هدا المكان ورانا .. هونا ناقشين حتى اساميهم .. تصدقي مع ان قعدت معاهم يومين بس ، لكن تعجب فيا صداقتهم
فُلك : ابتسمت .. صح تحسيها بنية صافية ومافيش خبث ابدا في عقول الولاد
طِيبة : ابدا معاذ ومعاوية ما شفت منهم الا كل خير .. تصدقي ؟ انسام نهدرز معاها ديما في النت قالتلي انه معاوية يبيني بس هوا مايبيش يدير شي مايرضيش الله وقعد يسأل هل انا مرتبطة مخطوبة ويبي يستفسر عليا اكتر لكن انا مطنشة ومدايرة الحولة
فُلك : لاحظت ..من نظرته ليك حسيت .. بس اللي يحب بجد يجي من الباب
طِيبة : هدا هوا
فُلك : لو خطبك توافقي ؟
طِيبة : نستخير .. يمكن نرتاح ويمكن لا
فُلك : اممممم عين العقل
طِيبة : فتحت شنطتها وطلعت تليفونها بتشوف الساعة
فُلك : شافت للخلفية لقت شاب عسكري وسيم حاطاته خلفية استغربت .. بيبا .. من يكون هوا
طِيبة : تلفتتلها وابتسمت .. مجاهد خوي
فُلك : عسكري هوا ؟
طِيبة : هزت راسها وابتسمت
فُلك : هدا هوا اللي قريبه منه هلبا ؟
طِيبة : ايه خوي الكبير
فُلك : ربي يحفظهولك
طِيبة : سلمك .. وضحكت وقالت .. ويحفظ شيخنا
فُلك : ردت عليها بضحكة.. تسلمي
———————
اميرة : ناضت الصبح ناشطه ورايقة خشت الحمام وبدلت البجامة اللي تلبس فيها ديما للنوم ونضفاته وخلاته يلمع وطلعت اضم ع الخفيف لان الحوش كان مضموم من الليل بعد ما كملت ضمان نشفت الحوش و المطبخ وحطت بكرج القهوة ع النار ووتت زوز مقات واحد اسود وواحد لونها المفضل موف .. حطتهم في سفرة صغيرونة وحلوة وصبت فيهم القهوة بعد ما غلت وطلعتها الصالة وخشت دار النوم بتنوض عصام لقاته مهناش ع السرير بعدين شافت ضي طالع من الحمام عرفاته انه خش طلعت وولت لصالة وقعدت تشرب في قهوتها ..
عصام : طلع من الحمام بعد ما فرش سنونه وبدل حوايجه مشي قدام الزيانه سرح شعره وبخ عطره وبعدها طلع من الدار للصالة .. كانت عاطية بالضهر شعرها كان ملفوف كوده فوق تتفرج ع الناس اللي اطوف حول الكعبة وتشرب من مقها
