ذات النقاب الاسود 14
عصام : واقف قدام الباب ويتفرج عليها وهيا مش معدله عليه وتمشط في شعرها .. اميرة
اميرة : فتحت قجر الزيانه وردت المشط في مكانه وناضت من ع الكرسي من غير ما ترد
عصام : اميرة ؟
اميرة : مشت للسرير اتكت وغمت روحها
عصام : تعفلق مشي قدم للدولاب طلع منه توته وقربعه وطلع من الدار وقربع الباب
كل تقربيعه كان قلب اميره قريب يطلع من مكانه من خوفها لكن ماوضحتش
عصام لبس حوايجه ومشي لصالون الصالة فتحه وداره زي السرير واتكى عليه وغمض عيونه وهوا متعفلق .
—————————
ابرار : جميلة كلمتني قالت صارلها ظرف مش ح تجي المستشفى ! من بيشد اوسمه واوس؟
محمد : وهوا مغمض عيونه .. حطيهم عند عيشه
ابرار : عيب قاعدة مع فلك ووراها صغارها وراجلها وخوها ومرت خوها وبنتهم ونزيد اني عليهم بصغاري
محمد : تو نحطوهم عند امي
ابرار : باهي ارقد انت تعبان غدوا نديرو راي
محمد : ارقدي حتى انتِ
ابرار : غطت روحها كويس .. تصبح على خير
محمد : شبه راقد.. عخير
———————————
عائشة : غسلت الماعين وضمت الكوجينة وطلعت منها لقت اسراء والصغار يتفرجو ع التلفزيون مشتلهم وهيا تقول .. هيا ياسمحين ع النوم
الصغار ناضو من ع الكنبه
عائشة سكرت التلفزيون نزلت قامت رزان وقالت هيا تعالو هي .. ومشو
———————————
فلك : حطت يدها ع كتفه .. مجاهد
مجاهد فتح عيونه وهوا مخلوع .. خيرك في حاجة توجع فيك؟
فلك : اهدى اهدى نبي نهدرز معاك بس
مجاهد : ارتاح ورخي روحه .. ااه هدرزي ياقلبي هدرزي
فلك : ملاحظ روحك انك الايام هادي مش ع بعضك ومتاكلش ؟ خيرك ؟ من لما روحت من عند ضرار وانت جوك متفركس ؟ فيهم حاجة
مجاهد : تنهد وقال .. مافيهم شي .. شاغليني نبي في اقرب وقت نحاول نوفرلهم الامان بس
فلك : سكتت
مجاهد : سكت شويه حتى هوا بعدين قال .. السبوعين الجايات مش ح نكون موجود .. اسف هلبا يافلك عارف روحي مقصر معاك هلبا وقتي كله نخدم فيه
فلك : قربت وحضناته .. البلاد اهم ياقلبي .. انت تخدم باش توفر الراحه لجميع السكان ، منكونش انانيه وتكون ليا بس .. اني لما تكون درنه وليبيا في امان نكون انا مرتاحه اكتر وفرحانه ان بطلي قدر يوفر الامان
مجاهد : غمض عيونه وهوا يقول .. هانت .. بإدن الله عن قريب نتحررو من شرهم للأبد
فلك : بإدن الله .. وغمضت عيونها حتى هيا ..
————————————
مصطفى : يستف حوايجه وهوا يفكر وباله مشغول لعند ما رن تليفونه شاف لقاها عائشة سكر عليها وعاود ..
عائشة : اهلا
مصطفى : يامرحبا .. شن الجو
عائشة : الحمد الله كويسه شن جوك انت
مصطفى : مستاااحشك.. امتى بترجعيلي عاد بديت نغار منه مجاهد واخدك مني
عائشة : ضحكت وقالت .. حتى انا مستاحشاتك والله .. غير عمتي انتصار عندها شغل ف الحوش بإدن الله غدوا تكمله وتجي تبات مع فلك واني نجيك
مصطفى : ابتسم وقال .. كيف كان اليوم
عائشة : حلو هلباا .. لكن زعلت منك معقوله تجي لعند هني وما تشوفنيش
مصطفى : متمشيش معاي تزلبيخه ربع ساعة هادي راه ضروري يوم كااامل معاك وان شاء الله يسدني
عائشة : وهيا تضحك .. اي اي لخبطني بكلامك
مصطفى : ضحك وقالها .. والله ما نكدب را
عائشة : ابتسمت وقعدت ساكته
مصطفى : الوو ! القطوس كلي لسانك ؟
عائشة : ضحكت وقالت .. لالا لساني قاعد في. مكانه
مصطفى : باهي ياحلوة هدرزي شن درتي ليوم ..
——————
