ذات النقاب الاسود 11
في الليل :-
ناس ساهرة تتكلم في التليفون !
وناس راقدة ما تندري عليها منين زارقة !
وناس غاطسة في قرايتها !
وفي اللي ساهر مقضيها هدرزة مع شريك حياته !
وناس ساهرة من كتر الالم !
كل حد في هالدنيا ساهر على خاطر حاجة ..
عندنا هني شخص مقعمز في البلكونه حاط سماعات في ودانه ويسمع في اغاني ومرة مرة يمسح في الدموع اللي اطيح ..
بسنت : طلعت البلكونه .. بهار
بهار : مستمرة تشوف للنجوم وتمسح في دموعها
بسنت : تنهدت وجت قعمزت جنبها
بهار : تلفتتلها وبعدها تلفتت لقدام ..
بسنت : نحب واحدة من السماعات .. بهار ! لأمتى ؟
بهار : بصوت خافت طالع منها .. مانعرفش
بسنت : خلاص عاد .. هوا سيبك وما خلا مادار فيك من نظرات ومن تجاهل خيرك انتي ميته عليه ؟
بهار : انا السبب يا بسنت كله من انانيتي .. كنت نعرف انه مسلم وانه مستحيل يشوف لوحدة ملحدة بس مع هكي استمريت نكلم فيه وسمحت لمشاعري انها تطور
بسنت : كلنا نغلطو يا بهار .. عمتي من بكري مشغوله عليك هيا وعمي من الصبح وهما يقولولي خيرها خيرها وانا طايحة نكدب وخلاص
بهار : رشفت خشمها ومسحت دموعها ..
بسنت : تي انتي توا قاتله روحك عليه تلقيه هوا ساهرلك مع وحدة ويكلم فيها!
بهار : بصوت باكي .. مستحيل
بسنت : ضحكت بهزوة .. رورتي عمرك ما توتقي في راجل وتقولي مستحيل .. الدكورة بسلامتهم ما يعرفوش المستحيل .. وغنا عليهم هداكا الراجل وقال خوانين مافيكم عقيدة .. كل خميس مع وحدة جديدة !
————
طِيبة : شني مخطر عليك ترقدي هني الليلة ؟
محمد : هكي اضايقت في الدار
طِيبة :تنهدت وطفت السهارة
الزوز متمددين ع ضهرهم وعيونهم في السقف وكل واحد فيهم في عالمه الخاص ..
طِيبة : محمد
محمد : بصوت ناعس .. نعم
طِيبة : كيف حال هديكا البنت .. بهار يمكن
محمد : تنهد من وسط قلبه.. فوتي سيرتها خير
طِيبة : بتسأل .. ان شاء الله خير
محمد : ضحك بهزوة وقال .. طلعت وحدة كافرة .. ماشاء الله عندي حظ خلا حاجة تصير معاي ماعمرها صارت لواحد في الدنيا .. مسلم ، يحب ملحدة .. هه .. ياعليك حالة وخلاص
طِيبة : وعلامات الدهشة مرسومة ع وجها .. بجد تحكي ؟
محمد : تعرفي ؟ ياريت لو كانت بصارة ولا مقلب منها ..
كنت وقتها كنت ح نكون اسعد انسان في الدنيا .. في الليالي الاولى كنت نستنى في اتصالها تكلمني وتقولي يامحمد مقلب واسفه .. لـٰكن اكتشفت انه مهوش مقلب .. ومسح الدمعة اللي نزلت منه
طِيبة : ان شاء الله ربي يفرج عليك يارب ويبعتلك بنت الحلال اللي تصونك .. الله غالب قضاء وقدره
محمد : تنهد .. اللهم لا اعتراض .. وغمض عيونه .. خلاص ارقدي هي
طِيبة : تصبح على خير
محمد : على خير ..
——————
انتصار : والله ما توقعته يرفض .. بنية زيها الواحد يرفضها هوا
فُلك : هوا مش رافضها .. هوا رافض الزواج ..قتلك هوا بعضمة لسانه قالي انه معجب بيها وقال لولا انه انا رافض فكرة الزواج كنت خطبتها اليوم قبل غدوا
انتصار : واااكك ياربي الصبر الولد هـٰدا بيجنني .. علاش رافض فكرة الزواج كانه يفهمني نخليه فحاله .. سألته يومها انت مشيت درت تحليل ولقيت حاجة مطمنش قالي لا سألته في حد في بالك قالي لا تي مالا شن يبي ولدي مش فاهمة .. تقولي عليه مداير جريمة وكان تجوز ودار عيلة ينكشف ويموت ..سكتت وبعدين قالت .. بعيد الشر
فُلك : تنهدت .. خلاص خليه براحته .. يمكن صايرتله فوبيا من قصة الزواج
انتصار : ميديرناش انا وبوه مقياس للزواج .. حتي كانت تجربة فاشلة وانا تزوجت واحد ما ينفعش .. مش ضروري حتى هوا كان تزوج يكون ما ينفعش .. الله يهديك ياضرار ياولدي الله يهديك ..
