Lord of the Mysteries[Myanmar Translation]

အခန်း (၅) : အစီအရင်

အလကား? အလကားရတဲ့ပစ္စည်းတွေက စျေးအကြီးတတ်ဆုံးပဲ!

ကျိုးမင်ရွေ့ တိတ်တဆိတ်ရေရွတ်လိုက်ပြီး မည်သည့်အရာပင်ဖြစ်နေပါစေ မည်သည့် ထပ်ဆောင်းဝန်ဆောင်မှုများကိုမှ သူဝယ်ယူမည်မဟုတ်ဟု ဆုံးဖြတ်လိုက်သည်။

သူအားလုံးကို ပြတ်ပြတ်သားသားငြင်းဆိုရမည်။

တကယ်ကြီး တတ်တယ်ဆို ငါဒီကို ဝိညာဥ်ကူးပြောင်းလာတယ်ဆိုတာကို ဟောကြည့်စမ်း !

ထိုသို့တွေးရင်း မျက်နှာတွင် ဆေးနီဆေးဝါခြယ်သထားသည့် အမျိုးသမီးနောက် ကျိုးမင်ရွေ့ လိုက်သွားကာ ခပ်နိမ့်နိမ့်ရွက်ဖျင်တဲထဲသို့ ခါးကိုင်းကာ ဝင်ရောက်လိုက်သည်။

ရွက်ဖျင်တဲ၏အတွင်းပိုင်းမှာ အလွန်အမင်းမှောင်မိုက်နေပြီး ကြိုကြားကြိုကြားမှ စိမ့်ဝင်နေသော အလင်းတန်းငယ်များဆီမှ အလင်းရောင်သာရှိသည်။ ခပ်ဖျော့ဖျော့အလင်းရောင်အောက်တွင် စက္ကူကဒ်များဖြင့် ဖုံးလွှမ်းနေသည့် စားပွဲတစ်လုံးအား မှုန်ဝါးဝါးမြင်ရနိုင်သည်။ ဤအခြင်းအရာသည် ထိပ်ချွန်ဦးထုပ်နှင့် အမျိုးသမီးအတွက် မည်သည့်သက်ရောက်မှုမျှ မရှိချေ။ စားပွဲဆီသို့ သူမပတ်သွားနေစဥ် သူမ၏ အနက်ရောင်ဂါဝန်ရှည်သည် ရေပေါ်မျှောလွင့်နေသကဲ့သို့ လျှပ်ပြေးသွားသည်။ တစ်ဖက်ခြမ်း၌ သူမထိုင်လိုက်ပြီး ဖယောင်းတိုင်တစ်တိုင်အား ထွန်းညှိလိုက်သည်။ မှိန်ပျပျအဝါရောင်မီးတောက်မှာ မှိတ်တုပ်မှိတ်တုပ်ဖြစ်နေသဖြင့် ရွက်ဖျင်တဲ၏ အတွင်းပိုင်းမှာ တစ်ချိန်တည်း လင်းလိုက်မှောင်လိုက်ဖြစ်နေသကဲ့သို့ပင်။ လေထုထဲ၌ လျှို့ဝှက်ဆန်းကြယ်သော အငွေ့အသက်တို့ ချက်ခြင်းပင် ပို၍တိုးပွားလာသည်။

ကျိုးမင်ရွေ့ တိတ်ဆိတ်စွာထိုင်ချလိုက်ပြီး စားပွဲပေါ်ရှိ တားရော့ကဒ်များဆီသို့ အကြည့်ဝေ့လိုက်ရာ သူရင်းနှီးနေသောကဒ်များဖြစ်ကြသည့် "မှော်ဆရာ" ၊ "ဇောက်ထိုးဆွဲခံရသူ" ၊ "စောင့်ထိန်းခြင်း" အစရှိသည့် ကဒ်များအား တွေ့လိုက်ရသည်။

ရိုဇယ်လ်ကတကယ်ကြီး 'စီနီယာ'များဖြစ်နေမလား....

သူကောငါ့လို တရုတ်နိုင်ငံသားပဲလား သိချင်လိုက်တာ....