Lord of the Mysteries[Myanmar Translation]

အခန်း (၇) : ခေါ်ဝေါ်မှု သင်္ကေတ

"မင်းတို့ငါ့ကို သူရူးလို့ ခေါ်လို့ရတယ်"

ရိုးရှင်းသောအဖြေမှာ ခဏအတွင်း ခန်းမကျယ်ထဲထွက်ပေါ်လာပြီး မြူခိုးငွေ့ကြားထဲ လွင့်ပြယ်သွားသည်။ သို့သော် ထိုအသံမှာ အော်ဒရီနှင့် အယ်လ်ဂျာ၏နှလုံးသားထဲ ဆက်လက်ရိုက်ခတ်ကာ လှိုင်းများထန်စေသည်။

သူတို့ထိုကဲ့သို့သော ခေါ်ဝေါ်မှုအား လုံးဝမမျှော်မှန်းထားခဲ့သော်ငြား ထိုသူမှာ ထိုအမည်နှင့်ထိုက်တန်သည်ဟု သူတို့ခံစားရသည်။ ဤခေါ်ဝေါ်မှုမှာ လျှို့ဝှက်ဆန်းကြယ်ပြီး အင်အားကြီးထူးဆန်းသည့်တစ်စုံတစ်ဦး၏ ပုံရိပ်အတွက် ပြီးပြည့်စုံပေသည်။

စက္ကန့်အနည်းငယ်တိတ်ဆိတ်သွားပြီးနောက် အော်ဒရီမတ်တပ်ရပ်ကာ သူမစကတ်အား အနည်းငယ်မ၍ ဒူးကိုကွေးကာ ကျိုးမင်ရွေ့အား အရိုအသေပြုလိုက်သည်။

"မြင့်မြတ်လှပါတဲ့လူကြီးမင်းသူရူး ကျွန်မတို့ အရောင်းအဝယ်အတွက် မျက်မြေသက်သေဖြစ်ပေးဖို့ရာ ခွင့်တောင်းမှုအတွက် ကျွန်မကို ခွင့်ပြုပေးနိုင်မလားရှင့်"

"ဒါဘာမှမဟုတ်ပါဘူး" ကျိုးမင်ရွေ့  သူ၏ အဆင့်အတန်းနှင့် ကိုက်ညီသည့်ပုံစံဖြင့် ပြန်ဖြေနေချိန်တွင် သူ့စိတ်တို့မှာ တစ်ဝီဝီမြည်နေပေသည်။

"ကျွန်တော်တို့ ဂုဏ်ယူရမှာပါ လူကြီးမင်းသူရူး" အယ်လ်ဂျာလဲ မတ်တပ်ရပ်လိုက်သည်။ သူ၏ညာဖက်လက်အား ရင်ဘက်ပေါ်တွင်ထား၍ ခါးအားအနည်းငယ်ညွှတ်ကိုင်းလိုက်သည်။

ကျိုးမင်‌ရွေ့ညာဖက်လက်အား အသာနိမ့်ပြကာ ပြုံးလိုက်သည်။

"ဆက်လုပ်ကြ မင်းတို့နှစ်ယောက်"

အယ်လ်ဂျာခေါင်းငြိမ့်ပြကာ ထိုင်ချလိုက်ပြီး အော်ဒရီအားကြည့်လိုက်သည်။

"မင်းငါးမန်းသရဲသွေးကိုရခဲ့မယ်ဆိုရင် တစ်ယောက်ယောက်ကို ပရစ်ဇစ်ဆိပ်ကမ်း ၊ နှင်းဆီဖြူမြို့နယ် ၊ ပယ်လီကန်လမ်းက စစ်သည်တော်နှင့်ပင်လယ်ဘားဆီ တစ်ယောက်ယောက်ကို ပို့ခိုင်းပေး။ သူဌေးဝီလီယံကို ဒါ'ကပ်ပတိန်' လိုချင်တဲ့ဟာလို့ ပြောလိုက်"

"ငါလက်ခံရရှိကြောင်းသေချသွားတာနဲ့ ဆေးရည်အညွှန်းကိုပို့ဖို့ ငါ့ကိုလိပ်စာပေးမလား ဒါမှမဟုတ် မင်းကိုဒီမှာပဲ တိုက်ရိုက်ပြောပေးရမလား"

အော်ဒရီခဏမျှတွေးလိုက်ပြီးနောက် အပြုံးဖြင့်ပြောလိုက်သည် "ကျွန်မပိုပြီးလုံခြုံတဲ့နည်းလမ်းကိုသုံးပါ့မယ်။ ဒီမှာပဲလုပ်ရအောင်ပါ ကျွန်မမှတ်ဉာဏ်ကောင်းမကောင်းစမ်းသပ်ရာကျပေမဲ့"

လူကြီးမင်းသူရူးက ဤအရောင်းအဝယ်အတွက် သက်သေလုပ်ပေးရန် သဘောတူလိုက်လေရာ ယခုကဲ့သို့သော "စုဝေးပွဲ" နောက်တစ်ခေါက်ရှိဦးမည်ဟု ဖော်ပြနေချေသည်။

ထိုအတွေးဖြင့် သူမခေါင်းကို ရုတ်တရက်လှည့်ကာ ကျိုးမင်ရွေ့အား တောက်ပသောမျက်လုံးများနှင့် ကြည့်လိုက်သည်။ စိတ်ဝင်စားစွာဖြင့် သူမတိုက်တွန်းလိုက်သည် "လူကြီးမင်းသူရူး ဒီလို"စမ်းသပ်မှုမျိုး ထပ်ပြီးလုပ်ချင်သေးလားရှင့်"

အယ်လ်ဂျာသူမတိုက်တွန်းမှုအား အေးဆေးစွာနားထောင်နေလိုက်သည်။ သူသည်လဲ တိုက်တွန်းမှု၏သွေးဆောင်မှုကို ခံထားရပါ၏။ သူခပ်မြန်မြန်ပင် သံယောင်လိုက်လိုက်သည်။ "လူကြီးမင်းသူရူး ဒီလို'စုဝေးပွဲ'မျိုးကို လူကြီးမင်စိတ်ဝင်စားစရာကောင်းတယ်လို့ မထင်မိဘူးလား? လူကြီးမင်းစွမ်းအားတွေက ကျွန်တော်တို့စိတ်ကူးနိုင်စွမ်းကိုကျော်လွန်နေပေမဲ့ လူကြီးမင်းနားမလည်တဲ့ ဒါမှမဟုတ် မကျွမ်းကျင်တဲ့ အပိုင်းတွေရှိလာနိုင်ပါတယ်။ ကျွန်တော့်မျက်နှာချင်းဆိုင်ကသူက မြင့်မြတ်တဲ့အဆင့်အတန်းနဲ့ အမျိုးသမီးငယ်လေးဆိုတာ သိသာပါတယ်။ ကျွန်တော့်မှာလဲ ကျွန်တော့်ရဲ့ထူးခြားတဲ့ အတွေ့အကြုံတွေ ၊ အတွေးအမြင်တွေ ၊ ကြားခံတွေနဲ့ အရင်းအမြစ်တွေရှိပါတယ်။ တစ်နေ့ကျရင် ကျွန်တော်တို့နှစ်ယောက်လုံး လူကြီးမင်းကို စိတ်မချမ်းမသာဖြစ်စေမဲ့ အသေးအဖွဲကိစ္စလေးတွေကို ကူညီဖြေရှင်းပေးနိုင်လောက်ပါတယ်"

သူ၏အမြင်အရ သူဤနေရာသို့ သတိပေးခံရခြင်းမရှိ တွန်းလှန်နိုင်စွမး်မရှိဘဲ ဆွဲခေါ်လာခံရခြင်းသည် လူကြီးမင်းသူရူးတွင် ထိန်းချုပ်နိုင်စွမ်းအလုံးစုံရှိနေကြောင်း သိသာစေသည်။ 'စုဝေးပွဲ' တွင် ပါဝင်ဖို့ရာမှာ သူငြင်းဆိုလို့ရသည့်အရာမဟုတ်ပေ။ သို့ဖြစ်ရာ သူ၏ ပြုသမျှနုခံရမည့် အခွင့်မသာသည့်အခြေအနေကို ကာမိဖို့ရာ ဤတွေ့ဆုံမှုမှ ရနိုင်သလောက်အကျိုးအမြတ်ကိုထုတ်ခြင်းသည်သာ သာ၍ကောင်းပေသည်။

စားပွဲရှည်တွင်ထိုင်နေသော လူသုံးယောက်မှာ မတူညီသောနောက်ခံ ၊ အရင်းအမြစ် ၊ သတင်းအချက်အလက်ရရှိရာနေရာနှင့် ဆန်းပြားသောတန်းခိုးနယ်ပယ်ကို နားလည်မှုတို့ရှိနေသည်။ အကယ်၍သူတို့သာ ပတ်သတ်ဆက်ဆံပြီး အနည်းငယ်မျှလက်တွဲလုပ်ဆောင်ပါက မမျှော်မှန်းနိုင်သည့် တိုင်းတာ၍မရနိုင်သောသက်ရောက်မှုများကို ရရှိနိုင်လောက်သည်။

ယခုလေးတင် ညှိနှိုင်းပြီးသည့် အရင်းအမြစ်အရောင်းအဝယ်က ဥပမာပင်ဖြစ်သည်။ နောက်ထပ်ဥပမာတစ်ခုမှာ အကယ်၍ သူတစ်စုံတစ်ဦးကို သတ်ချင်လျှင်ဖြစ်သည်။ သူနှင့် လက်တွေ့ဘဝတွင် ပတ်သတ်ပုံမရသည့် စုဝေးပွဲ၏အဖွဲ့ဝင်များအား လွယ်လွယ်ကူကူပင် အကူအညီတောင်းလိုက်၍ရသည်။ စုံစမ်းစစ်ဆေးရေးသမားများအား အပြည့်အဝလမ်းကြောင်းလွှဲလိုက်နိုင်သည်။

မြင့်မြတ်တဲ့အဆင့်အတန်းနဲ့ အမျိုးသမီးငယ်....ငါ့ရဲ့အပြူအမူနဲ့ လေသံက ဒီလောက်တောင်သိသာနေလား? အော်ဒရီတစ်ယောက်တစ်ချက်တွေသွားကာ ပါးစပ်အဟောင်းသားဖြစ်သွားသော်ငြား ချက်ခြင်းပင် အသိပြန်ဝင်ကာ တွန့်ဆုတ်မှုမရှိခေါင်းငြိမ့်ပြလိုက်သည်။


"လူကြီးမင်းသူရူး ကျွန်မဒါကို အရမ်းကောင်းတဲ့အကြံဉာဏ်လို့ ထင်ပါတယ်။ ဒီစုဝေးပွဲပုံမှန်ဖြစ်လာမယ်ဆိုရင် လူကြီးမင်းအတွက် အဆင်မပြေတဲ့အရာတွေကို ကျွန်မတို့ကိုခိုင်းလို့ရပါတယ်။ အဲဒါက ကျွန်မတို့လုပ်နိုင်တဲ့အတိုင်းအတာမှာ ရှိတယ်ဆိုရင်ပေါ့"

ထိုအကြံဉာဏ်အားကြားကတည်းက ကျိုးမင်ရွေ့မှာ ကောင်းကျိုးဆိုးကျိုးများကို ချင့်ချိန်နေပြီးဖြစ်သည်။ စု‌‌ဝေးပွဲတွေထပ်လုပ်ရင် စည်းကျော်သူတွေရဲ့ လျှို့ဝှက်ချက်တွေနဲ့ပတ်သတ်တဲ့ ဗဟုသုတတွေနဲ့ တခြားဆန်းကြယ်မှုတွေကို ပိုပြီးသိနိုင်မည်ဖြစ်သည်။ သူ၏ဝိညာဥ်ပြန်လည်ပြောင်းကူးရေးအတွက် ကောင်းသည့်အရာပင်။ ဥပမာ 'ပွဲကြည့်ပရိသတ်'ကြောင့် နောက်စုဝေးပွဲတွင် ဆေးရည်အညွှန်းပေါ်လာနိုင်ချေရှိသည်။ ထိုနည်းတူစွာ သူရရှိလိုက်သောအချက်အလက်များသည် သူ၏လက်ရှိဘဝတွင် အသုံးဝင်မည်မှာ အသေအချာပင်။

သို့သော် စုဝေးပွဲများထပ်လုပ်ခြင်းသည် သူ့ကိုယ်သူ ဖော်ထုတ်မိဖို့ရာပိုဖြစ်နိုင်ပြန်သည်။

ဘယ်လောကပဲဖြစ်ဖြစ် အလကားစားရတဲ့ထမင်းဆိုတာ တကယ်မရှိဘူးပဲ....ကျိုးမင်ရွေ့ ညာဖက်လက်ကို ဆန့်တန်းကာ စားပွဲရှည်အား လက်ချောင်းများဖြင့် တတောက်တော်ခေါက်လိုက်ပြန်သည်။

စုဝေးပွဲအတွက် ခေါ်ယူမှု ရုတ်သိမ်းမှုတို့မှာ သူ့လက်ထဲရှိနေသည်ဟူသောအချက်အား ထည့်တွက်ပါက ဖော်ထုတ်မိဖို့ရာ အခွင့်အလမ်းများမှာ သူ့ထိန်းချုပ်မှုအောက်တွင်ရှိနေပေသည်။ ကောင်းကျိုးကဆိုးကျိုးထက် ပိုများလေရာ ကျိုးမင်‌ရွေ့ ခပ်မြန်မြန်ပင် ဆုံးဖြတ်ချက်ချလိုက်သည်။

စားပွဲအားခေါက်နေခြင်းအား ရပ်လိုက်ပြီး ထိုသူနှစ်ဦး၏ မျှော်လင့်စောင့်စားနေကြသော အကြည့်များကိုကြည့်ကာ ပြုံးလိုက်သည်။

"ငါက မျှတတဲ့အလဲအလှယ်မျိုးကို သဘောကျတဲ့သူမျိုး"

"မင်းတို့ရဲ့ အကူအညီက ဆုလာဘ်ပေးမခံရတာမျိုး မဖြစ်စေရဘူး"

"တနင်္လာနေ့တိုင့် နေ့လည်သုံးနာရီမှာ တစ်ယောက်တည်းရှိနေဖို့ မင်းတို့ကြိုးစားကြ။ ငါစမ်းသပ်မှုနည်းနည်းထပ်လုပ်ပြီး တချို့အရာတွေကို သဘောပေါက်သွားရင် မင်းတို့စောပြီး ခွင့်တိုင်လို့တောင် ရလောက်မယ်။ မင်းတို့မသင့်တော်တဲ့အခြေအနေတွေ ဖြစ်မှာစိတ်ပူစရာမလိုတော့ဘူး"

ဤသည်မှာ အယ်လ်ဂျာနှင့် အော်ဒရီ၏ တိုက်တွန်းမှုအား သဘောတူညီလိုက်သည့် သဘောပင်။

အော်ဒရီမှာ ဆယ့်ခုနစ်နှစ်ပြည့်ပြီးကာစဖြစ်သည်။ တစ်ဘဝလုံးအလိုလိုက်ထားခံရလေရာ သူမတွင် မိန်းကလေးငယ်၏စရိုက်များရှိသည်။ သို့ဖြစ်ရာ သူရူး၏ အဖြေကိုကြားသည့်အခါ သူမလက်သီးဆုပ်ကာ ရင်ဘတ်ရှေ့တွင် လက်သီးလက်မောင်း သာသာလေးတန်းမိလိုက်သည်။

အယ်လ်ဂျာပြောသည်ကိုမစောင့်တော့ဘဲ အော်ဒရီတစ်ယောက် မျက်လုံးတဖြတ်ဖြတ်လက်စွာဖြင့် စိတ်လှုပ်ရှားစွာပြေသည် "ဒါဆို ကျွန်မတို့ ကျွန်မတို့ကိုယ်ကျွန်မတို့ ခေါ်ဖို့ နာမည်လေးတွေ ပေးကြမလား? ကျွန်မတို့ စကားပြောရင် နာမည်အရင်းသုံးလို့မဖြစ်ဘူးလေ"

ငါဘယ်သူလဲဆိုတာ လူကြီးမင်းသူရူးကို လိမ်လို့ရမှာမဟုတ်ပေမဲ့ ငါ့မျက်နှာချင်းဆိုင်ကသူက အန္တရာယ်နည်းနည်းရှိတယ်။ ငါဘယ်သူလဲဆိုတာသူ့ကိုပေးသိလို့မဖြစ်ဘူး။

"အကြံကောင်းတယ်" ကျိုးမင်ရွေ့သက်သာရိုးရှင်းစွာ ပြန်ဖြေလိုက်သည်။

သူမအတွေးများတဝီဝီလည်သွားရင်း သူမခေါင်းထဲပေါ်လာသည့်အတွေးများအား သူမပြောလိုက်သည်။

"လူကြီးမင်းက တားရော့ကဒ်က ဆင်းသက်လာတဲ့ လူကြီးမင်းသူရူး။ ဒီတော့ အချိန်အကြာကြီးဆက်လုပ်မဲ့ အတည်တကျ လျှို့ဝှက်'စုဝေးပွဲ'အတွက် ကျွန်မတို့ အခေါ်အဝေါ်တွေကို ညီတူညာတူထားသင့်တယ်။ ဟုတ်ပြီ ကျွန်မလဲ တားရော့ကဒ်ကနေ တစ်ခုရွေးလိုက်မယ်"

သူမ၏လေသံမှာ မြူးတူးလာသည်။

"ကျွန်မဆုံးဖြတ်လိုက်ပြီ။ ကျွန်မအခေါ်အဝေါ်က 'တရားမျှတမှု'"

တားရော့မေဂျာကဒ် ၂၂ ကဒ်ထဲမှ တစ်ခုဖြစ်သည်။

"လူကြီးမင်းကရော" အော်ဒရီသူ့မျက်နှာချင်းဆိုင်တွင် ထိုင်နေသည့် 'လုပ်ဖော်ကိုင်ဖက်'အား ရယ်ပြလိုက်သည်။

အယ်လ်ဂျာအနည်းငယ်မျက်နှာမဲ့သွားပြီး ချက်ခြင်းပင်ပြေလျော့သွားသည်။

"‌ဇောက်ထိုးဆွဲခံရသူ"

နောက်ထပ်မေဂျာကဒ်ပင်။

"ဟုတ်ပြီ ကျွန်မတို့က တားရော့အဖွဲ့ကို တည်ထောင်တဲ့ အဖွဲ့ဝင်တွေလို့ သတ်မှတ်လို့ရပြီ" အော်ဒရီဦးစွာပျော်ပျော်မြူးမြူးဖြင့် ပြောလိုက်မိပြီးကာမှ မြူဆိုင်းနေသည့် ကျိုးမင်ရွေ့အား ကြောက်ရွံ့စွာကြည့်လိုက်သည် "အဲဒါအဆင်ပြေရဲ့လား လူကြီးမင်းသူရူး"

ကျိုးမင်ရွေ့ သဘောကျစွာ ခေါင်းခါလိုက်သည်။

"ဒီလိုအသေးအဖွဲကိစ္စတွေကို မင်းတို့ဘာသာ ဆုံးဖြတ်လို့ရတယ်"

"ကျေးဇူးတင်ပါတယ်" အော်ဒရီမှာ သိသိသာသာပင် ပျော်မြူးနေချေသည်။

ထို့နောက် သူမအယ်လ်ဂျာကိုကြည့်လိုက်သည်။

"လူကြီးမင်း ဇောက်ထိုးဆွဲခံရသူ လိပ်စာကို တစ်ခေါက်ပြန်ပြောပေးလို့ရမလား? ကျွန်မမေ့သွားမှာစိုးလို့"

"ကိစ္စမရှိဘူး" အယ်လ်ဂျာမှာ အော်ဒရီအလေးအနက်ထားပုံအား လွန်စွာပင်စိတ်တိုင်းကျကာ လိပ်စာအား နောက်တစ်ခေါက် ပြန်ပြောလိုက်သည်။

သူ့ဘာသာသုံးကြိမ်တိတ်တိတ်လေး ပြန်ရွတ်ပြီးနောက် ‌အော်ဒရီ စိတ်လှုပ်ရှားစွာဖြင့် ထပ်ပြောပြန်သည် " တားရော့ကဒ်တွေကို ဧကရာဇ်ရိုဇယ်လ်က ဂိမ်းအနေနဲ့ထွင်ခဲ့တာလို့ ကျွန်မကြားဖူးတယ်။ တကယ်တမ်းက အဲဒါတွေက အနာဂတ်ကို ကံကြမ္မာဖတ်နိုင်တဲ့စွမ်းအင် တစ်ခါတည်းပါလာမဟုတ်ဘူးလား"

"ဟင့်အင်း အချိန်တော်တော်များများမှာ ကံကြမ္မာဖတ်တယ်ဆိုတာ လူတွေဆီကလာတာ။ လူတိုင်းမှာ စိတ်ပိုင်းဆိုင်ရာစွမ်းအင်ရှိတတ်ကြတယ်။ အဲဒါက လူတွေကို ဝိညာဥ်လောကနဲ့ သဟဇာတဖြစ်စေပြီး ပိုပြီး မြင့်တဲ့တစ်နေရာက သူတို့နဲ့ပတ်သတ်တဲ့ အချက်အလက်တွေနဲ့ ဆက်သွယ်ပေးတယ်။ ဒါပေမဲ့ သာမန်လူတွေက ဒါတွေကိုသတိမထားမိနိုင်ဘူး။ သူတို့ လက်ခံရရှိတဲ့ သင်္ကေတတွေကို အဓိပ္ပာယ်ဖော်နိုင်ဖို့ဆို ပိုလို့တောင် ဝေးသေး။ ဒီအချက်အလက်တွေက ကံကြမ္မာဖတ်တဲ့ပစ္စည်းကိရိယာတွေအကူအညီနဲ့မှ ပေါ်လာနိုင်တယ်။ ဥပမာတစ်ခုပေးမယ် အိပ်မက်တွေနဲ့ အိပ်မက်အဓိပ္ပာယ်ကောက်ပေးတဲ့သူတွေ" အယ်လ်ဂျာ ကျိုးမင်ရွေ့အား တစ်ချက်ကြည့်လိုက်ပြီး သူ့ထံမှမည်သည့်ခွန်းတုံ့ပြန်မှုမှ မရှိကြောင်းတွေ့လေရာ သူအော်ဒရီအဆိုအား ငြင်းဆိုလိုက်သည်။ "တားရော့ကဒ်တွေက တကယ်တမ်း အဲဒီလို ကိရိယာတွေပဲ။ ငါတို့တွေကို ကူပြီး သင်္ကေတတွေကို လွယ်လွယ်ကူကူ တိတိကျကျ အဓိပ္ပာယ်ကောက်နိုင်ဖို့ သင်္ကေတဝါဒနဲ့ ယုတ္တိတန်တဲ့အရာတွေကို တားရော့ကဒ်တွေက သုံးတယ်"

ကျိုးမင်ရွေ့ ဂရုမစိုက်သကဲ့သို့ပေါ်နေသော်ငြား အမှန်တကယ်တော့ သူ့မှာ သေချာစွာနားထောင်နေပေ၏။ ထိုအချိန်သို့ရောက်မှသာ သူ၏ဗလာနတ္ထိဖြစ်နေသောစိတ်အလျင်မှာ ဖြေးဖြေးချင်း စတင်လေးလံလာပြီး သူ၏ခေါင်းမှာ တဆစ်ဆစ်ကိုက်ခဲလာသည်။

"သ‌ဘောပေါက်ပြီ" အော်ဒရီခေါင်းငြိမ့်ပြလိုက်သည်။ ထို့နောက် သူထပ်ပြောလိုက်သည် "ကျွန်မပြောချင်တာ အဲဒါမဟုတ်ဘူး။ ကျွန်မတားရော့ကဒ်တွေကို သံသယဝင်နေတာ မဟုတ်ဘူး။ ဒါပေမဲ့ ကျွန်မကြားဖူးတာ ဧကရာဇ်ရိုဇယ်လ်က တကယ်တမ်း လျှို့ဝှက်ဆန်းကြယ်တဲ့ နောက်ထပ်ကဒ်တစ်စုံကိုထွင်ခဲ့သေးတယ်တဲ့။ အဲဒါတွေက မသိနိုင်တဲ့စွမ်းအင်တွေကို သင်္ကေတပြုတဲ့ စက္ကူကဒ်တွေတဲ့။ သူအဆုံးသတ်ထားတာ စုစုပေါင်း နှစ်ဆယ့်နှစ်ကဒ်ရှိပြီး နောက်ပိုင်းကျတော့ သူကအဲဒီကဒ်တွေကို မှီငြမ်းပြီး ဂိမ်းကစားရင်သုံးတဲ့ တားရော့မေဂျာကဒ် နှစ်ဆယ့်နှစ်ကဒ်ကို တီထွင်ခဲ့တာတဲ့။ ကျွန်မပြောတာမှန်လား"

သူမကျိုးမင်ရွေ့အား ကြည့်နေသည်မှာ လျှို့ဝှက်ဆန်းကြယ်သည့် လူကြီးမင်းသူရူးထံမှ အဖြေရချင်နေသည့်ပုံပင်။

ကျိုးမင်ရွေ့လုပ်သည်မှာ ဘာမှမပြောဘဲ ပြုံးနေရုံသာ။ စမ်းသပ်စစ်ဆေးနေသကဲ့သို့ သူ၏အကြည့်တို့အား ဇောက်ထိုးဆွဲခံရသူဆီ ပို့လိုက်သည်။

အယ်လ်ဂျာအလိုအလျောက်ခါးကိုမတ်လိုက်ပြီး အသံဩဩဖြင့်ပြောသည် "အမှန်ပဲ။ ပြေကြတာ ဧကရာဇ်ရိုဇယ်လ်က ပြစ်မှားခြင်းသင်ပုန်းကို မြင်ဖူးပြီး အဲဒီစက္ကူကဒ်အစုံက နတ်ဘုရားတို့ရဲ့ လမ်းနှစ်ဆယ့်နှစ်သွယ်ဆီက နက်နဲတဲ့ဆန်းကြယ်မှုတွေ ပါဝင်တယ်တဲ့"

နတ်ဘုရားတို့ရဲ့ လမ်းနှစ်ဆယ့်နှစ်သွယ်..." အော်ဒရီ တောင့်တမှုအပြည့်ဖြစ်သော လေသံဖြင့် လိုက်ရွတ်မိသည်။

ထိုအချိန်တွင် ကျိုးမင်ရွေ့၏ ခေါင်းကိုက်ဝေဒနာမှာ ပြင်းထန်လာသည်။ သူ၏ ကြက်သွေးနီရောင်ကြယ်များနှင့် မီးခိုးဖြူရောင်မြူခိုးငွေ့ကြား မမြင်ရသည့် ဆက်သွယ်မှုမှာ စတင်ယိုယွင်းလာကြောင်း သူခံစားမိသည်။

"ဟုတ်ပြီ ဒီနေ့ စုဝေးပွဲအတွက် တော်လောက်ပြီ" ဆုံးဖြတ်ချက်ချက်ခြင်းချပြီးနောက် အသံဩဩဖြင့် သူပြောလိုက်သည်။

"ဆန္ဒအတိုင်းပါပဲ" အယ်လ်ဂျာ ကျိုးနွံစွာဖြင့် ခေါင်းညွှတ်လိုက်သည်။

"ဆန္ဒအတိုင်းပါပဲ" အော်ဒရီ ဇောက်ထိုးဆွဲခံရသူအတိုင်း လိုက်လုပ်လိုက်သည်။

သူမတွင် မေးခွန်းနှင့် အတွေးအများအပြားကျန်ရှိနေသေးလေရာ ခဏနှင့် အဆုံးမသတ်ချင်ပေ။

ဆက်သွယ်မှုအား ဖြတ်တောက်လိုက်ချိန်တွင် သူအပြုံးဖြင့်ပြောလိုက်သည် "နောက်စုဝေးပွဲကို စောင့်စားရအောင်"

ကြက်သွေးနီရောင်အလင်းရောင် ဒီရေလှိုင်းလို ယုတ်လျော့သွားသည်နှင့် 'ကြယ်များ' မှာ တဖန်တောက်ပလာသည်။ အော်ဒရီနှင့် အယ်လ်ဂျာတို့ လူကြီးမင်းသူရူးစကားကို ကြားသည်နှင့် သူတို့၏ပုံရိပ်တို့မှာ ဝေဝါးသွားပြီး လွင့်ပျောက်သွားသည်။

ချက်ခြင်းပင် 'ပုံရိပ်'မှာ ပြယ်ပျက်သွားပြီး မီးခိုးရောင်မြူခိုးတို့တွင် တိတ်ဆိတ်မှု ပြန်လည်ကြီးစိုးသွားသည်။

ကျိုးမင်ရွေ့မှာမူ လျင်လျင်မြန်မြန်ပင် သူ့ကိုယ်သူလေးလံလာသည်ဟု ခံစားလိုက်ရသည်။ သူ၏ပတ်ဝန်းကျင်မှာ ဖြတ်ခနဲဖြစ်သွားပြီး သူ့မျက်လုံးတို့မှောင်မိုက်မှုနှင့် ကြုံဆုံကာ ကျိန်းစက်သောနေရောင်ဆီသို့ ပြောင်းလဲသွားသည်။

သူသည် သူ့တိုက်ခန်းအလယ်တွင် ရပ်နေဆဲပင်။

"ဒါအိပ်မက်လိုပဲ....အဲဒီမြူဆိုင်းနေတဲ့ လောကကဘာကြီးလဲ....အခုလေးတင်ဖြစ်သွားတဲ့ ပြောင်းလဲမှူတွေကို ဘယ်သူကဒါမှမဟုတ် ဘယ်လိုစွမ်းအင်မျိုးက ဖန်ဆင်းလိုက်တာလဲ...." ကျိုးမင်ရွေ့ ခပ်သာသာ သက်ပြင်းချမိသည်။ သူ၏ခြေထောက်များတွင် ခဲဆွဲထားသကဲ့သို့ စာကြည့်စားပွဲဆီသို့လျှောက်သွားရင်း သူ့မှာလုံးဝခေါင်းစားနေပေသည်။

အပြင်တွင်ထားထားသည့် အိပ်ဆောင်နာရီအားကောက်ယူလိုက်ပြီး အချိန်မည်မျှကုန်သွားကြောင်း စစ်ကြည့်လိုက်သည်။

"အချိန်က တူတူပဲ ကုန်တယ်" ကျိုးမင်ရွေ့ အကြမ်းဖျင်းမှတ်ချက်ချလိုက်သည်။

သူ၏အိပ်ဆောင်နာရီအားချလိုက်ပြီးနောက် တဆစ်ဆစ်ကိုက်ခဲနေသော ခေါင်းကိုက်ဝေဒနာအား သူဆက်လက်သည်းမခံနိုင်တော့ကြောင်း သတိထားမိသွားသည်။ ထိုင်ခုံပေါ်တွင်ထိုင်ချလိုက်ပြီး ခေါင်းကိုငုံ့ကာ သူ၏နားထင်များကို ဘယ်ဖက်လက်မနှင့် လက်ခလယ်ကိုသုံး၍ နှိပ်နှယ်နေလိုက်သည်။

အချိန်အတော်ကြာပြီးနောက် ရုတ်တရက်သက်ပြင်းချကာ မန်ဒရင်းစကားဖြင့်ပြောလိုက်မိသည် "ကြည့်ရသလောက်တော့ ငါပြန်သွားနိုင်ဦးမယ် မထင်ဘူး..."

ဘာမှကိုမသိသောသူကသာ အကြောက်အရွံ့မရှိနေနိုင်မည်။ ယခုကဲ့သို့သော အံ့ဩဖွယ်ကောင်းသည့် အဖြစ်အပျက်အား မျက်မြင်ကြုံလိုက်ရပြီး စည်းကျော်သူများနှင့်  လျှို့ဝှက်ဆန်းကြယ်သောလောကအကြောင်း သိရှိလိုက်ရပြီးနောက် ကျိုးမင်ရွေ့ ကံတက်ယကြာအား ရှေးဟောင်းဖေးဆက်စ်ဘာသားစကားနှင့် လိုအန်ဘာသာစကားအားသုံး၍ အလောတကြီး မစမ်းရဲတော့ပေ။

ဘယ်လိုအ‌ခြေအနေမျိုး ထပ်ဖြစ်မလဲဆိုတာ ဘယ်သူသိမလဲ။ ပိုပြီး ထူးဆန်းကြောက်ဖို့ကောင်းတာဖြစ်ချင်ဖြစ် ဒါမှမဟုတ် တကယ့်ငရဲတောင်ဖြစ်သွားနိုင်သေးတယ်။

"အနည်းဆုံးတော့ ငါဂမ္ဘီရပညာကို ကောင်းကောင်းနားလည်သဘောပေါက်မှပဲ စမ်းသင့်တယ်" ကျိုးမင်‌ရွေ့ အကူအညီမဲ့စွာ တွေးမိသည်။

ကံကောင်းစွာပင် အဆိုပါ စုဝေးပွဲက သူ့အားအကူအညီပေးနိုင်လောက်သည်။

နောက်တစ်ဖန်တိတ်ဆိတ်သွားပြီနောက် သူ့ကိုယ်သူ မနှစ်မြို့မှု ၊ စိတ်ပျက်မှု ၊ နာကျင်မှု ၊ စိတ်သောကစသည်တို့နှင့် ပြည့်နှက်နေသည့် လေသံဖြင့် ရေရွတ်မိသည် "အခုချိန်ကစပြီး ငါကခလိုင်းပဲ"

…

ခလိုင်းသူ့ဆီမှ အပျက်သဘောဆောင်သော ခံစားချက်များအား ဖယ်ထုတ်ပစ်ဖို့ရာ သူ၏ဖြေရှင်းချက်များ အကြံဉာဏ်များဆီ အာရုံစိုက်ဖို့ အကောင်းဆုံးကြိုးစားလိုက်သည်။

ဘေးကနေပြီးတော့ 'ပွဲကြည့်ပရိသတ်' ဆေးရည်အညွှန်းကို ရကောင်းရလောက်ပါရဲ့....

ယခုလေးတင်ဖြစ်သွားသည့် 'စုဝေးပွဲ' မှာ အမှန်တကယ်ကိုပင် စွဲမက်စရာကောင်းချေသည်။ ကမ္ဘာတစ်ဝှမ်း မတူညီသောနေရာများတွင် နေနေကြသည့် လူများသည် ကီလိုမီတာရာချီကို လျော့ချကာ မျက်နှာချင်းဆိုင်ဆွေးနွေး၍ တစ်ယောက်လိုအပ်မှုကို တစ်ယောက်ကူညီပေးနိုင်ကြပေသည်။ အမ်း ပြောတော့မှ ဒါနည်းနည်းလေးတော့ ကြားဖူးနေသလိုပဲ...

ခလိုင်းခဏဆာ ကြက်သေသေသွားပြီးမှ ရယ်မောမိလိုက်သည်။ နားထင်အားဖိရင်း ခပ်ကြိတ်ကြိတ်ပြောမိသည် "ဒါဆိုရှယ်မီဒီယာပဲမဟုတ်ဘူးလား?"