Lord of the Mysteries[Myanmar Translation]

အပိုင်း (၈) : ခေတ်သစ်

ဝှစ်!

သည်းထန်စွာကျဆင်းနေသော မိုးရေတို့အား လေပြင်းကအဖော်ပြုသည်။ လူထွားကြီးထံတွင် အကစားခံနေရသည့်နှယ် ရွက်တိုင်သုံးခုနှင့် ရွက်လှေမှာ ရေလှိုင်းများကြား လူးလွန့်နေသည်။

အယ်လ်ဂျာဝေလ်ဆန်၏မျက်လုံးအတွင်းမှ ကြက်သွေးနီရောင်အလင်းစမှာ ပျောက်ကွက်သွားပြီဖြစ်သည်။ သူ့ကိုယ်သူ ကုန်းပတ်ပေါ်တွင် မည်သည်မှ ပြောင်းလဲမရှိဘဲ ဆက်လက်ရပ်နေသေးကြောင်း တွေ့ရှိသွားသည်။

ချက်ခြင်းပင် သူ့လက်ဖဝါးထဲရှိ ဆန်းကြယ်သည့်သဏ္ဌာန်နှင့် ဖန်ပုလင်းမှာ ကွဲအက်သွားပြီး အတွင်းမှ ဆီးနှင်းတို့မှာ မိုးရေနှင့်အတူ အရည်ပျော်သွားသည်။ စက္ကန့်အနည်းငယ်အတွင်းမှာတွင် ထိုအံ့ဩစရာကောင်းသည့် ရှေးဟောင်းပစ္စည်းတည်ရှိခဲ့ကြောင်း သက်သေတို့မှာ ပျောက်ကွက်သွားတော့သည်။

ခြောက်ထောင့်ရှိသော သလင်းကျောက်သဖွယ်နှင်းပွင့်တစ်ခု အယ်လ်ဂျာ၏လက်ဖဝါးပေါ်တွင် ပေါ်လာသည်။ ထို့နောက် ထိုနှင်းပွင့်မှာ လျင်လျင်မြန်မြန်ပင် ဖျော့တော့လာပြီး အသားထဲစုပ်ယူခံလိုက်ရသည့်နှယ် အပြီးတိုင် ပျောက်ကွယ်သွားသည်။ အယ်လ်ဂျာ တစ်ခုခုကို တွေးတောနေသည့်နှယ် မသိမသာခေါင်းညိတ်လိုက်သည်။ သူ ငါးမိနစ်တိတိတွေတွေကြီးရပ်ကာ တိတ်ဆိတ်နေခဲ့သည်။

တစ်ဖက်သို့လှည့်လိုက်ပြီး အခန်းဆီသို့သွားလိုက်သည်။ ဝင်ခါနီးတွင် အလားတူလျှပ်စီးသင်္ကေတနှင့် ဝတ်ရုံကိုဝတ်ထားသော လူတစ်ယောက် အခန်းထဲမှ ထွက်လာသည်။

အဆိုပါ ရွှေ့ရောင်ဖျော့ဖျော့ဆံပင်များနှင့် ယောကျာ်းကရပ်သွားပြီး အယ်လ်ဂျာအား ကြည့်လိုက်သည်။ သူ၏ညာဖက်လက်သီးအား ရင်ဘတ်တွင်ကပ်၍ ပြောလိုက်သည် "မုန်တိုင်းသင့်အား အဖော်ပြုပါစေ"

အယ်လ်ဂျာတူညီသောစကား တူညီသောအပြုအမူအား ပြန်လုပ်ပြလိုက်သည်။ သူ၏ အချိုးအစားပြေပြစ်သော ခက်ထန်သည့် မျက်နှာပေါ်တွင် မည်သည့်ခံစားချက်မှ ရှိမနေချေ။