Lord of the Mysteries[Myanmar Translation]

အပိုင်း (၃) : မလီဆာ

သူ၏အကြံအစည်အား အတည်ပြုလိုက်ပြီးနောက် ကျိုးမင်ရွေ့မှာ ချက်ခြင်းပင် စိတ်ပိုင်းဆိုင်ရာချိုင်းထောက်တစ်ခုရသွားသည့်နှယ်။ သူ၏ကြောက်ရွံ့မှုများနှင့် စိတ်မသက်မသာဖြစ်မှုတို့သည် သူ့စိတ် ထောင့်တစ်နေရာသို့ ကန်ထုတ်ခြင်းခံလိုက်ရသည်။

သို့မှသာ ခလိုင်း၏ မှတ်ဉာဏ်အပိုင်းအစများအား သေချာစွာလေ့လာရန် သူစိတ်ကူးရတော့သည်။

ကျိုးမင်ရွေ့ အကျင့်ဖြစ်နေသကဲ့သို့ မတ်တပ်ရပ်လိုက်ပြီး ပိုက်လိုင်းဗားခလုတ်ကို ပိတ်လိုက်သည်။ နံရံကပ်မီးအိမ်တဖြည်းဖြည်းမှိန်သွားကာ နောက်ဆုံးမီးငြိမ်းသွားသည်အထိ သူစောင့်ကြည့်ပြီးမှ ပြန်ထိုင်ချလိုက်သည်။ ခြောက်လုံးပြူးသေနတ်၏ ကြေးဝါကျည်ဆလင်ဒါအား မသိလိုက်မသိဘာသာဖြင့် ဟိုရွေ့ဒီရွေ့လုပ်ရင်း သူ့နားထင်အား သူနှိပ်နယ်နေမိသည်။ ကြက်သွေးရောင်ခြယ်အမှောင်ထုကြားထဲတွင် သူသည် ရုပ်ရှင်ရုံထဲမှ အာရုံအစူးစိုက်ထားဆုံး ပွဲကြည့်ပရိသတ်တစ်ဦးနှယ် သူ၏မှတ်ဉာဏ်များအားဖြေးညှင်းစွာ ပြန်လည်စဥ်းစားနေသည်။

ကျည်ဆန်ကခေါင်းအားထုတ်ချင်းပေါက်သွားလေလို့လားမသိ ၊ ခလိုင်း၏မှတ်ဉာဏ်တို့သည် မှန်ကွဲစများနှယ်ဖြစ်နေသည်။ မှတ်ဉာဏ်များက ဆက်စပ်မှုမရှိရုံသာမက သိသာစွာပျောက်ဆုံးနေသောအပိုင်းအစများစွာလဲရှိနေသည်။ ဥပမာများမှာ ဤလက်ရာမြောက်သောခြောက်လုံးပြူးသေနတ် သူ့ပိုင်ဆိုင်မှုထဲသို့ရောက်လာပုံ ၊ သူအမှန်တကယ်သတ်သေသွားသည်လား သို့မဟုတ်အသတ်ခံရသည်လားနှင့် မှတ်စုစာအုပ်ထဲမှ'ငါအပါအဝင်အားလုံးသေလိမ့်မည်'ဟူသောစာ၏ အဓိပ္ပာယ် သို့တည်းမဟုတ် မတော်တဆမှုမဖြစ်ခင်နှစ်ရက်တွင် သူထူးထူးဆန်းဆန်းတစ်ခုခုထဲဝင် ပါဝင်ခဲ့ခြင်းရှိမရှိ စသည်တို့နှင့် သက်ဆိုင်သောမှတ်ဉာဏ်များပင်ဖြစ်သည်။

အဆိုပါမှတ်ဉာဏ်များမှာ အပိုင်းပိုင်းအစစဖြစ်နေရုံသာမက ပျောက်ဆုံးနေသည့် အပိုင်းများလည်းရှိနေသည်။ သူသိသင့်သိထိုက်သောပညာဗဟုသုတများမှာလဲ ထိုနည်းတူပင်။ ယခုလိုအခြေအနေမျိုး၌ ခလိုင်းတစ်ယောက်တက္ကသိုလ်ပြန်တက်ပါက ဘွဲ့ရဖို့မှာ မဖြစ်နိုင်လောက်ဟု ကျိုးမင်ရွေ့ယုံကြည်သည်။ သူ့မှာ တက္ကသိုလ်ပရဝုဏ်ကို ခွဲခွာလာသည်မှာ ရက်ပိုင်းမျှသာရှိသေးပြီး တစ်ချက်လေးမှပင် မနားထားသော်ငြား။