🔸️حلقة 10
🔸️نهلة_تحكي:
حطيت القلم من يدي و عديت عينيا عليهم...من بكري يحكيو على حفلة عيد الميلاد لي تخص طفلة تقرا معانا...لميت أوراقي باش نخرج من المكتبة وقفتني وحدة منهم تحكي
دينا:نهلة ياااخي ماكش باش تجي معانا ؟
أنا:لااا ديناا...عيد ميلاد سعيد مسبقا
دينا:مستحيل...أصلا أنا قررت نعمل الحفلة بكري باش الكل يحضر و ما يتأخر حتى حد منكم بسببي
أنا:نعرف أما منجمش نحضر
دينا:توقعت أنو إحنا أصحاب و ماكش باش ترفض جملة
كبست على صاكي بيديا زوز...كي لقيت نفس الكلام منهم هوما زادة...خذيت نفس نحكي
أنا:باهي...أما لازمني نعطي خبر لبابا و أمي
تبسمت و هزتلي براسها باهي..بعدت عليهم شوية و طلبت أمي لي كانت جنب بابا و خذيت الإذن منهم خاطرني ما نحب نكون في حتى مشكلة مبعد...رجعت عندها نحكي
أنا:أنا باش نمشي معاكم...أما مانيش باش نبقى طول القعدة...باهي ؟
دينا:أكيد عزيزتي...حتى كان تحب نوصلك أنا مبعد
تبسمت و هزيتلها براسي باهي...كملت راجعت معاهم بقية الدروس..قبل ما نمشيو للمطعم..أصلا متوقعتش أنها باش تعمل عيد ميلادها في مكان هكاا...جبدت الكرسي و قعدت...ضيقت عينيا مستغربة كي لمحت مالك و زوز من أصحابو لي قعدو معانا...غزرتلها نحكي
أنا:دينا علاش مخبرتنيش أنو فما أولاد معانا
دينا:متوقعتش أنو الموضوع يقلقك...خاطرنا في نفس القروب
مالك:مكنتش نعرف أنك باش تتقلق مني لهدرجة
جبد الكرسي و قعد بجنبي...خذيت نفس طويل نهدي في روحي...خاطرني ما نحب نكون في حتى مشكلة معاه...غزرلي يحكي
مالك:أنا مقصدتش لي صار قبل العطلة و ملقيتش فرصة باش نعتذر منك زاادة
أنا:ما صار شي
مالك:معناها مفما حتى مشكلة بيناتنا
أنا:أكييد
غزرت لنادل لي حط الطلبات اللي وصات عليهم و دورت راسي شوية...خاطرني حسيت روحي تخنقت بالقعدة هاذي...قلبي خض بالقاوي أول ما جات عيني عليه و عليها فرد وقت...للحظة حسيت أنو الدنيا دارت بيا الكل و مفهمتش شنوة اللي قاعد يصير بالظبط حطيت يدي على رقبتي باش نجم نهدي روحي...صافح شكون و قعدو معاهم على نفس الطاولة...غزرلي يحكي
مالك:إنتي لباس ؟
عديت عينيا على وجهو و هزيتلو براسي إيه..ضيق عينيه يحكي
مالك:كأنها صدفة خايبة ؟ توقعت أنو عندك علاقة معاه بسبب اللي صار آخر فترة في المحطة
أنا:نظن أنو الموضوع هذا ميهمكش
هزلي براسو إيه و سكت وين لقيت روحي نتابع فيه من بعيد أصلا ملاحظش وجودي..غير هكا منجمتش نركز مع الحفلة جملة...غزرتلي تحكي
دينا:نهلة إنتي لباس ؟
هزيتلها براسي إيه و تبسمت...ضيقت عينيها تحكي
دينا:ما كليت حتى شي...كان تحب على حاجة أخرى نوصيهم عليها
أنا:أنا لبااس دينا...جيست تاعبة شوية و كهو
مديت يدي لكأس العصير و كبست عليه..باش نقص من التوتر لي خلقتو لروحي..خاصة أنهم كانو يستناو في الكعكة باش يحتفلو..منحبش عيد ميلادها يفسد بسببي...غزرلي يحكي
مالك:نظن مش لازم تعمل في روحك هكا...مدام هو مش مهتم لوجودك و ملاحظش أنك هوني زادة
هزيت راسي شوية و عديت عينيا عليهم من بعيد دخلت بعضي أكثر..كي شفتهم يضحكو...غير هكا وترني وجود مالك بجنبي..عاود غزرلي يحكي
مالك:توقعت أنك مهتمة بالأستاذ بيرم أكثر من الشخص هذا
قحرتلو و مديت يدي باش نحط العصير لي منعرفش كيفاش تكب على الطاولة...هزيت روحي وقفت في لحظة و غزرتلهم نحكي
أنا:منقصدش لي صااار
وقفت في جرتي و شدتني من يدي...تحكي
دينا:ميسالش عزيزتي...هاني باش نجي معاك لتوالات
أنا:مش لازم تو نمشي وحدي...عيشك ديناا
جبدت روحي منهم و هزيت راسي شوية...وين جات عيني في عينو...غزرلي مصدوم...كأنو متوقعش وجودي هوني...و غزرتلها ليها زادة...هزتني و حطتني في لحظة فقت من سرحتي على صوت مالك يحكي
مالك:تنجم تمشي وحدك ؟
هزيتلو براسي إيه و بعدت عليه...توجهت لتوالات بعد ما سألت النادل...سكرت الباب ورايا و غسلت وجهي ورا بعضو...خاطرني حسيت روحي باش نطرشق من الفازة لي صارت...طلعت راسي شوية و عديت عينيا على وجهي...متوقعتش نطيح في الموقف كيما هذا جملة و لا حتى نشوفو معاها مرة أخرى و أول إحتمال جا في بالي...أنو رجعلها بعد اللي صار معانا آخر مرة...خاصة أنو محاولش يحكي معايا و لا حتى يقرب مني كي العادة...كبست على الرخامة نحكي
أنا:هدي رووحك نهلة...إنتي تحررت منو و ماكش مظطرة تعيش نفس الشي مرة أخرى بسببو هو
جبدت المناديل بيدي و مسحت وجهي..الشي الوحيد
لي خممت فيه إني نخرج من هوني و كهو...خاطر مانيش مستعدة نتحمل وجود مالك و لا حتى المنظر لي ريتو بكري...رجعت عندهم وين لقيتهم جابو كعكة الميلاد..بقيت دقايق لي طفات شموعها و هزيت صاكي نحكي
أنا:سامحني دينا...أما لازمني نمشي توا
دينا:تقلقت من حاجة ؟
أنا:لاا و عيد ميلاد سعيد مرة أخرى عزيزتي
مالك:تحب نوصلك ؟
أنا:لااا
حاول يعترض طريقي بأسئلة أخرى...كبست على صاكي أكثر و بعدت عليه..زربت في خطواتي من غير ما نغزر لطاولتهم...خرجت من المطعم وين تصادفت بالمطر لي كان يصب بقوة...غير هكا حسيت روحي ضايعة و معرفتش وين لازمني نمشي باش نلقى طاكسي..خلط عليا يحكي
مالك:نههلة..يزي من عنادك و خليني نوصلك وين باش تمشي في الجو هذا ؟
أنا:أبعد عليا و كهو
زربت في خطواتي باش نبعد..جبدني من يدي بالوقت يحكي
مالك:مااكش باش تلقى طاكسي هوني و مفماش محطة قريبة زادة...نعرف أنك مش قد بعضك...أكا علاش مانيش باش نخليك تمشي وحدك
عديت عينيا على وجهو من غير حتى كلمة...خاطر بالرسمي لقيت روحي ضايعة و معرفتش شنوة لازمني نعمل بالظبط.
أنت تقرأ
فصول الحب
Romanceتدُور الأحداث حولْ قلبيْنِ: قلبٌ يُكابرُ فيتنكَّرُ و قلبٌ يعشقُ فيعبَثُ و قلْبيْنِ آخريْنِ: قلبٌ يُحاوِل فلا يُصيب و قلبٌ غِرٌّ لا يُقاوم و ما بينهُما قِصصٌ من العشقِ بصدد التكوِّن و رِحلةٌ طويلةُ المدى حتى يتعانَقَا كِلَا القلبانِ. "فصول الحُبّْ" م...
