🔸️حلقة 4
🔸️إدريس_يحكي:
طيشت المنشفة من يدي و ترميت في وسط السرير نحس في راسي باش يطرشق من ظغط الخدمة و مع هكا منجمتش نرقد...لي خلاني نخرج من البيت للكوجينة...حضرت قهوتي و دخلت لصالة...أصلا عندي برشا مقعدتش في داري هكا...حطيت ماتش و تكيت لتالي...أما تفكيري كان بعيد برشاا...وين لقيت روحي نراجع في حساباتي و أغلاطي من جديد تكيت راسي لتالي و سرحت في الماضي مرة أخرى وين دخلت عندي بمجموعة أوراق في يدها و قعدت بجنبي حطيت المخدة ورا ظهرها نحكي
أنا:ألف مرة نقلك سايس روحك كي تقعد
نهلة:أنا لبااس...المهم توا هو أنك تركز معايا
طفيت التلفزة و عديت عينيا على وجها مستغرب نظمت الأوراق على الطاولة و غزرتلي تحكي
نهلة:شد هاذي تراه
نزلت راسي شوية نقرا في الأسئلة لي مكتوبين في الورقة...هزيت حاجبي مستغرب و غزرتلها نحكي
أنا:نهلة شنوة هذا ؟
نهلة:في الأول أنت باش تحفظ التعليمات لي هوني الكل و بعد تجاوب على الأسئلة لي في الورقة
أنا:مزلت مفهمتكش
نهلة:الدورات لي حضرتها أونلين بخصوص البيبي لازمك تحضرها و مدام أنت ديما مشغول...قررت نعطيك دروس خاصة و هكا ميكونش فما مشاكل بعد الولادة
أنا:مشاكل شنية ؟ شبيه البيبي ؟ آخر مرة قالت الدكتورة أنو صحتكم لبااس
نهلة:مفما حتى مشكلة...نقصد أنو تكون عندك معلومات كيفاش تتعامل معاه
أنا:مكنتش نعرف أنو المهمة صعيبة لهدرجة
نهلة:أنت باش تحفظ التعليمات لي في الأوراق هاذي و بعد تجاوب على الأسئلة
أنا:هذوما الكل ؟
هزتلي براسها إيه...وين لقيت روحي مجبور نحفظ كل التعليمات لي موجودين أكثر من مرة...ضيقت عينيا مستغرب نحكي
أنا:الورقة هاذي تحكي على الغيرة بين الأطفال..نظن عندنا واحد إحنا...ملا نأجلو المعلومات لي هوني حتى يجي الطفل الثاني
نهلة:مانيش مجنونة باش نجيب طفل آخر منك
أنا:بالله ؟
خطفتلي الورقة من يدي و حطتها على جنب...تحكي
نهلة:ركز في بقية التعليمات...لازمك تكون مسؤول على البيبي أنت زادة
أنا:بااهي...هاني من بكري نحفظ فيهم
نهلة:مدام هكا جاوب على الأسئلة تراه
أنا:توا ؟
نهلة:مممم تواا
حطت الستيلو في يدي و تكات لتالي تستنى فيا كبست على الورقة...و حاولت نجاوب على الحاجات لي مزالت في راسي...غزرتلها كي حسيتها متقلقة و ضيقت عينيا نحكي
أنا:شبيك ؟
نهلة:والله من بكري و هو يضرب فيا
حطيت الورقة و عديت يدي على كرشها...وين حسيت بيه و هو يتحرك...هزيت عينيا في وجها نحكي
أنا:شنوة لازمني نعمل في الحالة هاذي ؟ مفما حتى تعليمة في الأوراق
نهلة:التعليمات الكل...بعد ما يجي لدنيا مش قبل
أنا:باهي فهمت عليك
نهلة:جاوبت على الأسئلة الكل ؟
أنا:مش الكل...فما حاجات لازمني نعاودهم
نهلة:أففف منك إدرييس...علاش هكاا...ملا كي يجي كيفاش تهتم بيه
أنا:متخاافش...نحفظهم مبعد...أما توا لازمني نهتم بأمو قبل كلشي
نهلة:والله أنا نعرف كيفاش نهتم بروحي
عديت عينيا على تفاصيل وجها و نزلت بيهم لشفايفها...كبست على كرشها أكثر و بستها منهم نحكي
أنا:نعرف أنو صغرونتي قوية و تنجم تهتم بروحها أما الفر_خ لي في الثنية ماخو حقو فيك و متعبك برشاا زادة
جبدت روحها مني شوية و هزت عينيها في وجهي تحكي
نهلة:إدريس...منحبكش تقرب مني بحجة الصغير اللي بيناتنا أماان
خذيت نفس و عديت صوابعي على خدها...نحكي
أنا:الصغير اللي بيناتنا ما عندو حتى علاقة...و حتى لو مكانش موجود...أنا نحب نبدا معاك من أول و جديد
غزرتلي مستغربة...تبسمت و عديت صوابعي على خدها نحكي
أنا:نحب على فرصة جديدة لعلاقتنا
نهلة:و السبب ؟
أنا:خاطرني منجمش نشوف حياتي من غيرك
نهلة:إدريس...ياخي وليت تشرب في النهار زادة ؟
أنا:أناا في وعيي نهلة و نعرف شنوة اللي قاعد نقول فيه...نعرف أنو كلامي غريب برشا بالنسبة ليك أما نحبك تعطيني فرصة و باش نعوضك على كلشي خسرتو بسببي
غزرتلي من غير حتى كلمة...تبسمت كي حسيت بيه تحرك مرة أخرى و غزرتلها نحكي
أنا:ولدي مواافق على الموضوع
نهلة:والله أنت لتوا ماكش مؤهل باش تربي صغير مدامك منحمتش تحفظ كلشي
ضحكت و نزلت عليها شوية...بستها من كرشها نحكي
أنا:متخاافش عزيزتي...هاني باش نخلي الأوراق عندي و نعاودهم الكل
نهلة:يكوون أحسن...حتى ندى و وليد باش نعطيهم أسئلة
أنا:مكنتش نعرف أنو ولدي باش يفرض عليهم قوانين خاصة...كان تسمع سعاد تتجلط
نهلة:زعمة باش تولي تحبو ؟
أنا:ميهمنيش عزيزتي...عندو أمو و بوه أهم من أي شخص آخر في الدنيا
تبسمت و هزتلي براسها باهي...حليت عينيا على صوت التلفزة بعد ما سجلو هدف و هزيت روحي وقفت للحظة حسيت روحي تخنقت...حليت البالكون و خرجت..وقفت فيه شوية نسترجع في أنفاسي...غزرتلي منيرة تحكي
منيرة:وينو خووك ؟
أنا:متقوليش أنو موصيك تراقب شكون ؟
منيرة:لااا أما نساالو سيقاارو و لتوا مخذيتوش منو
أنا:برا خوذ باكو من موسى على حسابي
منيرة:والله كان لازم أنا لي نكبش فيك و نعرس بيك مش بنت مااجدة
أنا:هكااا نحلو أنا وياك وحدة مخابرات
منيرة:مش هذا كلامك كي تجي تنسنس عليها عندي
أنا:علاش عندي غيرك أناا
منيرة:ملا خمم في الفكرة...متلقاش أحسن مني
غمزتني و مشات...ضحكت بالوقت...بالرسمي خلاتني نتفرهد شوية...دورت راسي شوية و غزرت لشباك بيتها لي كان مسكر...وين إرتحت شوية...خاطر بالرسمي وليت نخاف من فكرة أنو فما شكون يهز راسو و تج عينو عليها...مانيش ناقص مشاكل بخصوص الشباك زادة
أنت تقرأ
فصول الحب
Lãng mạnتدُور الأحداث حولْ قلبيْنِ: قلبٌ يُكابرُ فيتنكَّرُ و قلبٌ يعشقُ فيعبَثُ و قلْبيْنِ آخريْنِ: قلبٌ يُحاوِل فلا يُصيب و قلبٌ غِرٌّ لا يُقاوم و ما بينهُما قِصصٌ من العشقِ بصدد التكوِّن و رِحلةٌ طويلةُ المدى حتى يتعانَقَا كِلَا القلبانِ. "فصول الحُبّْ" م...
