🔸️حلقة 11
🔸️نهلة_تحكي:
حليت عينيا على نهار جديد...بعدت شعري من وجهي و تبسمت...اللي صار من يومين كان مستحيل بالنسبة ليا...متوقعتش أنو أمورنا باش تتصلح بالسرعة هاذي بعد آخر عركة بيناتنا...هزيت روحي وقفت باش نخرج من البيت...أما صوت وجدي و هو ينادي عليه..خلاني نقرب ناحية الشباك من غير ما نحس...هزيت الريدو شوية و عديت عينيا عليه..كان واقف يحكي مع وجدي...هز راسو على غفلة و غزرلي...تبسمت و دخلت بعد ما مشى...غزرت لتليفوني مع صوت الميساج
هزيتو في يدي و حليتو نقرا فيه <<صباح النور حبي> تبسمت و حطيتو من يدي...نزلت اللوطة بعد ما غسلت وجهي و قعدت مع أمي..غزرتلي تحكي
ماجدة:ماكش باش تخبرني شنية سر الإبتسامة هاذي
أنا:شي أمي...جيست مرتاحة و كهو
ماجدة:يا ريت نشوفك كل يوم هكا يا روحي
أنا:نعرف إني تعبتك معايا برشا أمي و منعرفش كيفاش باش نعوضك على هذا الكل
ماجدة:كلشي يهمني هو إني نشوفك فرحانة و ناجحة في حياتك
أنا:نعررف و نوعدك أنو اللي صار في الماضي مستحيل يتكرر مرة أخرى
ماجدة:نعرف عزيزتي و توا نحبك تكملي فطورك الكل
تبسمت و هزيتلها براسي إيه...كملت فطوري و تفكيري في اللي صار من شوية...غزرت لأمي نحكي
أنا:أنا باش نكمل البحث لي عندي توا
ماجدة:باهي...و أنا باش نكمل الحلو لي عندي...كان تحب وصل شوية منو لبيرم مبعد
أنا:إذا كان بابا هوني خليه هو يوصلو منعرفش اذا باش نجم نخرج من بيتي اليوم...ورايا برشا قراية
ماجدة:باهي يا روحي مش مشكلة
تبسمت و بستها قبل ما نخرج...اليوم بالذات منحبش نخلق مشكلة جديدة بسبب بيرم...خاصة أنو هو عطلة اليوم و باش يبقى في القهوة مع الحسابات متاعو كي العادة...تفقدت تليفوني...وين لقيتو طلبني مرتين...جيت باش نعاود نطلبو...أما سمعت عركة في الحومة...لي خلاني نحل الشباك بالوقت...دقات قلبي قوات و خفت من فكرة أنو هو بيناتهم...خاصة كي لمحت وليد بيناتهم عديت دقايق واقفة مصدومة و معرفتش شنوة نعمل بالظبط...ريتو كي تدخل في لحظة و جبد وليد بقوة بعدو عليهم و دزو لتالي يصيح عليه...وين فهمت أنو هو اللي كان في وسط العركة..خذيت نفس طويل نهدي في روحي و كبست على طرف الشباك...خفت من فكرة أنو يرجع يتعارك معاهم من جديد...أصلا نخاف منهم العركات هذوما خاصة كي يكون هو جزء فيها...سيب خوه و تلفت لطفل لآخر يحذر فيه و على شعرة باش يضربو زادة...تنهدت براحة بعد ما دخل مع خوه لدار و قعدت على الكرسي بالوقت...كبست على تليفوني و طلبتو من غير ما نخمم...أما مردش عليا...هزيت روحي وقفت...نمشي و نجي على أعصابي...هزيت عليه أول ما طلبني و قربت من الشباك نحكي
أنا:شنية صاار ؟ و شبيك خرجت مرة أخرى...ياخي أنت باش تتعارك من جديد ؟
إدريس:حاول تاخو نفس حبي...ساعة توقعت باش تصبح عليا...مش تحكي معايا بالطريقة هاذي
أنا:إدريييس أماان ياخي أنت باش تفركهم عليا توا ؟
إدريس:لاا يا روحي...أما بالرسمي توقعت نسمع حاجات أخرى منك و بالنسبة للعركة أنا جيست تدخلت باش متكبرش الحكاية بيناتهم أكثر و حذرت وليد باش ميكررش اللي صار
أنا:والله منظنش باش يسمع النصيحة منك أنت متكونش نسيت العركات متاعك ؟
إدريس:نذكرك أنو أغلبها كانت بسببك ؟
أنا:والله أنت لي تشعل وحدك و تتسرع قبل ما تفهم اللي قاعد يصير
إدريس:نهلة...شبيك متغشة مني هكا عزيزتي ؟
أنا:أنا جيست منحبش نشوف الحاجات هذوما جرايرك نحس في روحي مش قد بعضي تواا
إدريس:أناا لبااس حبي و مفما حتى شي يستدعي الخوف هذا الكل
أنا:أنت باش توعدني أنك ماكش باش ترجع تتعارك معاهم من جديد
هز راسو شوية و غزرلي من بعيد...يحكي
إدريس:وعد يا روحي...غير هكا منحبش اللي صار يقلقك جملة
أنا:باهي...و أنت خليك بعيد عليهم
إدريس:أكثر شي فقدتو في غيابك هو إهتمامك هذا
أنا:على أساس كنت نخنقك بإهتمامي الزايد بيك
إدريس:كنت نكذب وقتها...خاطرني كنت خايف نغرق فيك أكثر...أما في الأخير إستسلمت لقلبي و نظن هذا كان أحسن شي عملتو في حياتي لتوا
تبسمت و عديت عينيا عليه من بعيد...دقات قلبي قوات و أنا نشوف في وجدي لي كان ينادي عليه من بعيد غزرلي يحكي
إدريس:أنا باش نمشي توا صغرونتي...رد بالك على روحك و يا ريت تهز عليا المرة الجاية و متخلينيش نستنى برشا
أنا:متنساش أنك وعدتني
إدريس:تهنى عزيزتي
أنا:باهي...رد بالك على روحك أنت زادة
إدريس:باهي
ضحك و هزلي براسو باهي...نزلت تليفوني و علقت عليه...بقيت نتبع فيه بعينيا لين دخل للقهوة...وين بديت نسترجع في أنفاسي لي تقطعت جراير العركة لي صاارت...نزلت الريدو و سكرت الشباك...عاودت قعدت و تكيت لتالي...تبسمت و أنا نتذكر في كلامو يعني حسب ما نتذكر تعارك بسببي أكثر من مرة و آخر عركة في الحومة كانت وقت مشيت لصيدلي لي في آخر النهج خاطر الدوا متاعي وفى و كنت بحاجتو بسبب الحمل و لازمني نشربو في الموعد منجمتش نستناه لين يرجع و وليد كان غايب زادة أكا علاش إظطريت نخرج وحدي خذيت الدوا و خرجت...وين لاحظت في شكون يتبع فيا...و واضح أنو مش في وعيو...غير هكا هو معروف بالمشاكل متاعو في الحومة...حاولت نزرب قص عليا كي وقف قدامي يحكي
سامي:ملا القطوسة خايفة مني
أنا:أبعد من ثنيتي
نزل راسو شوية و غزر لكرشي...فرد وقت عدا يدو على وجهو يحكي
سامي:سامحني مكنتش نعرف أنك معرسة
أنا:أبعد علياا و كهوو
هزيت راسي شوية مع صوت كرهبتو...شد الفران بقوة لدرجة أنو كان باش يدخل فيه...لو أنو موقفش في آخر لحظة...حل الباب و نزل...قرب منو في لحظة و دزو لتالي بقوة...يحكي
إدريس:فااااش تعممل ●●●●●
سامي:و أنت شنية مقلقك في الموضوع
مد يدو و ضربو بالوقت...وخرت لتالي مروهجة و معرفتش شنوة اللي قاعد يصير...حسيتو هبل عليه في لحظة...وقت دزو على الكرهبة و كمل يضرب فيه و يحكي
إدريس:أنت بأي صفففففة تحكي مع مرررتي يااا ساااقط...كيفاش تتجرأ و تتعرضلهااا
سامي:مكنتش نعررف أنهااا معرسة
إدريس:بالله ؟
ضربو مرة أخرى قبل ما يجاوبو و شعلت بيناتهم أكثر لدرجة أنو وليد منجمش يبعدو عليه...فكوهم بعد ما تدخلو الكل...جبد روحو منهم و عدا يدو على خشمو يمسح في الدم...وسط هذا الكل لقيت روحي عاجزة باش نتصرف...قرب مني في لحظة يحكي
إدريس:أمشي قدامي تواا
خذيت نفس و سبقتو لدار...أول ما دخلت عرضتنا تحكي
سعاد:شنية عملت زااادة ؟ ياااخي ديما بمشاكلك إنتي ؟
إدريس:الصبرر يااا ربي...شمدخلك إنتي أمي...ياااخي باش تحاسبها و أنا وااقف...ساعة شكون معرس بيهاا أنا و لا إنتييي ؟
سعاد:زاايد وليت متحشمش و ترد الكلام في وجهي جرايرها
إدريس:ماانيش نااقص أنا تواا
جبدت روحي منو و طلعت من غير ما ندخل في نقاشهم...خلط عليا و سكر الباب يحكي
إدريس:وين مشيت ؟
أنا:الدوا متاعي وفى و اظطريت نخرج...خاطر لازمني نشربو في الوقت
إدريس:علاش معنديش علم ؟ كان خبرتني نجيبهولك معايا
أنا:تليفونك مسكر و بالنسبة لطفل لي ضربتو إعتذر قبل ما توصل بعد ما لاحظ إني حبلة
إدريس:معناهااا عادي عندك يحكي معاك لو مكنتش معرررسة...أصلا لي صار ماهوش باش يتعدااالو بالساهل
أنا:معناها تحب تباصي جرايرو ؟ ياخي ريت روحك كيفاش كنت تضرب فيه ؟
إدريس:خليك خااارج الحكاااية و معاادش تخرج وحدك خااااصة الوقت هذا ؟
أنا:باش ترجع غشك فيا توا ؟
إدريس:مفهوووم كلاامي ؟
هزيتلو براسي إيه و غزرت لدم لي مزال نازل من خشمو...مد يدو شوية باش يوقفو و نحى الفاست متاعو...بعدت عليه و جبت البوات فرماسي...بقيت نستنى فيه لين خرج من بيت البانو...هز راسو شوية و غزرلي...خذيت نفس نحكي
أنا:نظن لازمك إسعافات أولية بعد اللي صار
إدريس:تفضل أسعفني ملاا
أنا:لازمك تقعد الأول
غزرلي و سبقني لصالة...جبد كرسي الطاولة و قعد حطيت البوات من يدي و بللت القطن بالدوا...و حطيتو على طرف حاجبو...نحكي
أنا:ياخي كان لازم منها العركة هاذي...أصلا واضح الطفل مش في وعيوو و يمكن المشكلة تكبر مبعد
إدريس:ما عندو ما يعمل و حسابو مزال مكملش
ظغطت على الجرح أكثر...جبد روحو شوية و غزرلي يحكي
إدريس:شنووة زاادة ؟
أنا:أنت باش تسكر المشكلة هاذي تواا و ماكش باش تتعارك مع حتى حد زادة
إدريس:يااخي حاول يضرك ؟
أنا:لااا...أصلا تراجع أول ما لاحظ إني حبلة...و زيد هاك عطيتو حقو بالزايد
غمضت عينيا كي حط يديه زوز على كرشي...وين تحرك الصغير بالوقت...كأنو حس بيه...تبسم يحكي
إدريس:هاو يتحرك
أنا:يتحرك من الفجعة لي كليتها جرايرك
إدريس:وليت أنا الغالط توا ؟
أنا:ممم غاالط...خاطرك ديما تتسرع و متحاولش تفهم الحكاية
إدريس:والله أناا هكا...نجم نتحمل كلشي إلا أني نشوف شكون يقرب لمرتي و لا لأختي...غير هكا يحمد ربي لقى شكون يفكو من يدي
أنا:الصبر منك...على أساس باش تسكر المشكلة هاذي ؟
إدريس:بااهي...مقصدتش إني نخوفك...أنا جيست منجمتش نتقبل لي صاار...و حتى لو كنت مش معرسة معندوش حق يخلط عليك بالطريقة هذيكا
أنا:منظنش كنت باش تعمل نفس العركة هاذي لو ما كان فما حتى شي يجمعنا
إدريس:بالله ؟ نسيت قداش من مرة نوحل جرايرك
أنا:أما الوضع كان باش يختلف...خاطر تكون مربوط بمرا أخرى
إدريس:إرتباطي بغيرك مكانش باش يبدل الوضع مستحيل نخلي شكون يضرك و أنا موجود
أنا:يكثر خيرك...أصلا أنت حر إذا حبيت ترتبط بغيري
إدريس:بالله ؟ علاش أنا قلت باش نرتبط بغيرك ؟
جبدت روحي منو شوية باش نبعد عليه...كبس على كرشي أكثر يحكي
إدريس:خليك...مزلت نحس بيه و هو يتحرك
أنا:تعبت و نحب نرتاح شوية
دور يديه زوز على ظهري و كبس عليا أكثر...يحكي
إدريس:إنتي لباس مش هكا ؟
هزيتلو براسي إيه و مديت يدي شوية...حطيتها على راسو من التالي أول ما باسني من كرشي و تبسم يحكي
إدريس:بعد شهور باش تولي تعاني من نسخة مني زادة
أنا:والله باش نتأكد أنو ولدي ماهوش باش يكون همجي كيفك
إدريس:بالله ؟ ملا متنساش تخبرو أنك حبيت الهمجي هذاا من صغرك
أنا:ممم باش نخبرو أنها كانت غلطة عمري
هز روحو وقف و عدا عينيه على وجهي..مد يدو شوية و عدا صوابعو على خدي يحكي
إدريس:خبرو بكلشي و متنساش تقولو أنو بوه ندم برشا و فاق مأخر...و قاعد يحاول باش يصلح لي تكسر الكل
أنا:يمكن ماهوش ضروري الكلام هذا...خاصة إذا بوه إرتبط بأخرى
إدريس:تعرف أنو هذا مستحيل يصير
أنا:هاك قلتها من شوية
إدريس:بالله باش تحرف كلامي توا ؟
أنا:كمل نظف جروحك...أنا باش نمشي نرتاح شوية
جبدني من يدي و عنقني قبل ما نبعد عليه...تبسمت خاطرني حسيتو مش قد بعضو بعد كلامنا...يمكن هذا أهم شي تذكرتو من الليلة هذيكا..تبسمت مرة أخرى بعد ما رجعت للواقع و تكيت راسي لتالي بالوقت..كانت فما قدامنا فرصة أفضل من هاذي باش تتحسن حياتنا..لولا النهار لي قلب بيناتنا كلشي في لحظة..غير هكا نحس في روحي مرتاحة عاللخر خاطر الوضع بيناتنا تحسن على قبل...خاصة أني ولا مرة توقعت باش تجمعنا فرصة أخرى بعد طلاقنا و اللي صار بيناتنا الكل..خاصة أنو علاقتنا ولات ممنوعة و مستحيلة بالنسبة لعيلتي و عيلتو زادة
أنت تقرأ
فصول الحب
Romanceتدُور الأحداث حولْ قلبيْنِ: قلبٌ يُكابرُ فيتنكَّرُ و قلبٌ يعشقُ فيعبَثُ و قلْبيْنِ آخريْنِ: قلبٌ يُحاوِل فلا يُصيب و قلبٌ غِرٌّ لا يُقاوم و ما بينهُما قِصصٌ من العشقِ بصدد التكوِّن و رِحلةٌ طويلةُ المدى حتى يتعانَقَا كِلَا القلبانِ. "فصول الحُبّْ" م...
