صافح الود قلبي يوم جيتك

2

تقدمت تفتح الشنطه تأشر : ايوه عندي
تقدم تيّـام يناظر بـ اوجان الي شكلها ابداً مب شكل ولد وحول نظره للشنطة يشيل الكفر وساعدوه العيال وقاموا يحاولون يساعدون اوجان
وقف سطام الي طول الوقت يناظر بـ اوجان : ولد
لفت اوجان الي كانت تساعدهم : سم
سطام وهو يلعب بشنبه : شسمك انت ؟
اوجان : ها ؟ اسمي اسمي .. وليد
قالت على طول الاسم الي جاء براسها
سطام بطرف عين : اهاا ، ما شاء الله وانا اسمي سطام
اوجان : تشرفت
لفوا العيال على اوجان بعدما انتهوا : تفضل تفضل عندنا اقلط
اوجان وهي تكمل تمثيل : لا لا مشكورين عـ ..
قاطعها بندر : والله لا تقلط عندنا !
اوجان وهي تبيها من اول ومستحيل ترفض : ها ؟ ابشر ما طلبت شي دامك حلفت بالله ياولد
حطت الاغراض بالسياره ومشت معهم وهم يتعرفون عليها على بال ما يوصلون
تيّـام : اجل تقول اسمك وش ؟
اوجان لفت تناظره : وليد
خلف : الا وليد بسألك
ما لفت اوجان لأنها مب متعوده على الاسم
خلف طقها بكتفها : وليد !
لفت اوجان : سلامات شفيك
خلف : بسألك
اوجان وهي تمشي وراهم وجنبها خلف وتيّـام : قل وش عندك
خلف بلقافه : شفيك كذا مره نحيف وضعيف ؟ ما تاكل انت ؟
اوجان بسخافه : لا اعيش على الطاقه الشمسيه
ضحك خلف وهو يمد يده ويصفق بيدها : جوي السخيفينن
توجعت اوجان وهي تبعد يدها وترجع شوي لورا على اليمين وتصقع بـ تيّـام
تيّـام مسكها قبل تطيح : سلامات سلامات شفيك يا ولد
خلف ناظره : نحيف مره ذا ريش تمسكه يطيح
اوجان عدلت وقفتها : لا لا مافيني شي
وصلوا وعلى طول دخلوا بيت الجد لمجلس الرجال
جلست اوجان وجابوا لها مويه وعرفوا العيال على اسمائهم وجاء الجد والاباء يوم دروا عنها يحسبونها ( ولد )
الجد : وش قصتك انت يا ولدي ؟
حكت لهم قصة من راسها وتتكلم بصيغة مذكر ، ان ما تعرف اهلها ولا عندها اهل اساساً من وهي صغيره بمعنى ( مجهولة الابوين ) وصارت تفر بالشوارع تدور وضايعه وما تدري عن شي ولأول مره تجي لهذي المنطقة وصادفت انها جات لديرتهم
الجد صدقها وابتسم : اجل حياك الله يا ولدي من اليوم ورايح بنعاملك مثل عيالنا وابواب البيوت كلها مفتوحه لك يا ولدي
هنا ابتسمت اوجان ان الخطة نجحت
لف الجد على احفاده : خذوه معكم وفروا به وعاملوه مثل اخوكم وخويكم يعيالي ، لا اوصيكم !
العيال قاموا : ابشر
اوجان وقفت وهي ما تدري وش السالفه
خلف مسكها من ظهرها يمشيها : شفيك انت ؟ امش
اوجان توترت من لمساته : لوين ؟
خلف ناظر لقدام : بنروح لغرفتنا
اوجان : اها انتوا كلكم بغرفة وحده ؟
خلف : ايه
اوجان : ما شاء الله انتوا لوحدكم قبيلة كيف بغرفة وحده
خلف لف عليها : ها ؟
اوجان : ها ؟
غير خلف الموضوع بحماس : ماعلينا يرجال تنزلي فيفا ؟
اوجان : ها ؟ اي اي ان شاء الله
مسكها بحماس يشيلها يركض للغرفة واخيراً لقى الي نفس جوه ويلعب معه
ولحقوه العيال : ولد تعال شفيك ترا مب لعبه ؟
ركضوا وراه يوقفونه : نزله عيب احترم الرجال !!
دخل خلف بعدما حط اوجان متجاهل العيال وهو ينط للسوني يشغل اللعبه وتجلس اوجان جنبه ويعطيها اليد ، وهي تناظر ولا هي فاهمه شي : ولد
خلف وهو مشغول يشغل اللعبه : ها
اوجان : ما قلت لي شسمك ؟
خلف : اسمي خلف
شغل اللعبه وكانت اوجان تسأله عشان يضيع الوقت وخلف مشغول : ولد خلف
خلف لف : ها ، ها شتبي
اوجان : لا تصارخ طيب ! كنت بقولك ما اعرف العب
خلف لف يناظرها وهو يتأملها : يحياتي ماتعرف وماتبي احد يصارخ عليك
وقف يتأملها وخافت منه ومن نظراته و وقفت بسرعه : شرايك شرايك نلعب غميضه
خلف قفل السوني : يبوي انت مره مب حق فيفا وسوني صح ؟ قلها من الاخير
شمقت اوجان وجلست : يخوي طفش طفش مو حلوه
لف يحط يده على كتفها يتكي عليها ويطقطق عليها : يقلبي انت !
قام عامر من نومه بسبب صوت العيال العالي : يعيال خفضوا اصواتكم لا اقوم افقع عيونكم الليله !
لف يناظر بـ اوجان بفجعه : من انت ؟
ايهم : ذا وليد خوينا الجديد
عامر خفض صوته وحط راسه يبي ينام : اها
ايهم لف لـ اوجان : وليد امش معنا بنفر بالسيارة تبي معنا ؟
اوجان لفت تناظر خلف الي مزعجها : ايه ايه يلا
وقفت ومشوا العيال ومشت معهم وخلف ناشب لها طول الوقت الى ما وصلوا السيارة وكانت صغيره
اوجان : كيف بتكفينا ذي ؟
خلف : اص من قبل ما تجي وحنا نروح ونجي فيها وتكفي
اوجان : كيف ؟
خلف : سهله نص بالشنطه ونص بالنص وفوق بعض وزحمه وعادي
انصرعت اوجان وهي توها تشوف حياة العيال وتحسبها حلوه وسهله
مشت بتركب و وقفت الى ما ركبوا كلهم وبقوا هي وتيّـام ، وجلس تيّـام وأشر لها تجلس
اوجان : مافي مكان
عدل جلسته وهو يأشر لحضنه ويقولها : لا ياشيخ اركب بس
الوضع كان زحمه وحر والعيال فوق بعض
ركبت بتوتر بحضن تيّـام وحاولت جداً انها ما تلصق فيه
قفل تيّـام الباب ومسكت بالكرسي الامامي ومشى ايهم وخافت اوجان من سرعته رغم انه ماشي بمكان فاضي الا انه سارع مره ومع اللفات تمسك بـ تيّـام وتيّـام يوم شافها مفجوعه من السرعه لف على ايهم : ايهم هد يولد امش زين وخفف السرعه شوي
ايهم خفض صوت الاغاني وضحك : شفيك ، خايف ؟
تيّـام : الخواف الي هنا مصروع منك
خلف لف على اوجان : من حقه ما تعود لسى
من عناد ايهم زاد السرعه دبل وتيّـام مسك اوجان من خصرها عشان مع اللفات ما تطيح ، وهي كانت شوي وتبكي بسبب انها تخاف من السرعه
اوجان بلحظة غضب : وجع وجع جعلك بحادث يا حقير !
مسكت بـ تيّـام وارتمت بحضنه وضحك ايهم وهو يخفف السرعه شوي شوي والعيال كلهم يناظرون بـ اوجان الي الوضع مشكوك فيها بالمره
خلف : يا درج هد علينا
نزلوا العيال يوم وصلوا للمطعم
ايهم : اليوم عازمكم على حسابي عشان وليد بس !
و وقف جنب اوجان بالضبط : وعشان ارضيك
عامر مسك اوجان من كتفها يضربها بخفيف : الله يا وليد حظك يالمحظوظ ايهم ما يسويها معنا الا مره بالسنه واحياناً لا
توجعت اوجان وبعدت عنهم ومشت من جنب تيّـام لأن تحسه عكسهم ومب زيهم يضربها كل شوي ويمون بزياده
-
" بـعـد وقـت "
تغدوا وطلعوا من المطعم و وقفت اوجان يوم انتظرها تيّـام تجلس : هذي المره اركب بالشنطه ولا اركب قدام
نط ثنيان : انا بركب قدام !
مسكه تيّـام : لا خلك مكانك انت دب ذا مره نحيف
ساعد اوجان الي تأففت وركبت وقفل الباب ومشى ايهم
ناظرت اوجان للمكان الي جنب تيّـام : ولد زحف
تيّـام : مافي مكان
وقفت بشويش وهي تدفه وتجلس : مافي مكان اجل
تيّـام : يا نحفك
اوجان : قل ما شاء الله !
تيّـام لف وجهه : ما شاء الله
-
" بـعـد سـاعـات - بـالـغـرفـة "
دخل الجد وهو يطفي عليهم كل شي بنص الوناسه وسحب الجوالات واليد حق السوني
لف الجد لـ اوجان وخلف : خلف قم حط له فراش هناك
أشر بمكان جنب تيّـام : هنا
خلف : يا جد خله ينفع نفسه بنفسه
الجد بحده : خلف قم !
قامت اوجان : خلاص عادي انا اقوم
طلعت الفراش وهي تحطه جنب تيّـام بالمكان الفاضي
الجد : والله يا وليد مافيه بطانيه ومخده زايده لكن عادي تشارك انت وتيّـام
اوجان بتوتر : تمام عادي
تيّـام : يا جد بطانيتي صغيره ما تكفيني انا لوحدي تبيه يتلحف معي ؟
الجد لف على احفاده : لا اسمع حسكم يلا ناموا وانت يا تيّـام ان جيت مره ثانيه ولقيتك مو معطيه نص اللحاف لا ادبجك بهذي العصا فهمت ؟
لف لخلف الي وقف : لوين ان شاء الله ؟
خلف : ابي الحمام
انسدحت اوجان وكانت مره مو متعوده على الوضع وشاركها تيّـام بالبطانيه وحست انه لطيف ، لكن انصدمت انه يوم طلع الجد سحب اللحاف كله
اوجان : ولد !
تيّـام : انا بردان
اوجان سحبت نص البطانيه بشويش
وسحبها تيّـام كلها بقوه
اوجان : طيب حتى انا بردانه
لف تيّـام عليها : وشو ؟
اوجان : اقصد بردان !
رجع تيّـام وجلست هي بدون بطانيه وحاولت تنام
شوي ولفت على تيّـام : تعطيني ولا اعلم جدي
ناظرها تيّـام الي كان حاط راسه على الجهة اليمين بجهتها : علمه
تأففت و وقفت وتقدمت لعند زر المكيف وقفلته
العيال بصراخ : لييه ؟؟
انخرشت ولفت بسرعه : برد
ايهم وقف وتقدم لعندها : لا ياشيخ
اوجان رفعت حاجبها : بردان من حقي اطفي المكيف صح ؟
ايهم وهو يطقطق على صوتها : لا يحبيبي غلط
رجع لصوته الطبيعي وفتح المكيف : رح تدفى مع تيّـام
عقدت حواجبها : طيب ياحمار الحين المكيف يخرب
ناظر عامر لـ ايهم وهو من البدايه كان يناظر اوجان : خلاص خلوه والله انه على نياته و واضح لطيف شفيكم عليه
لف عليه ايهم : انكتم
تنهدت اوجان وناظرت تيّـام الي ناظرها
تيّـام : وشفيك لا يكون زعلت ؟
اوجان : على وش
تيّـام ابتسم : تعال تعال كنت امزح معك والله
تقدمت اوجان بشويش وانسدحت ولحفها تيّـام ببطانيته ورجع انسدح ، وانسدحوا العيال كلهم والكل نام
-
" الصـبـاح "
صحت على ازعاج الجد وهو يقومهم يفطرون
قامت معهم وراحت للحمام ( اكرم القارئ ) تغير الثوب وتلبس ثوبها الثاني وتطلع تغسل يدها وتجلس جنب جدها بعيد عن العيال والرجال ( ابائهم )
واخذ الجد يناولها الاكل ويغصبها تاكل : كل كل ياولدي عشان تطول وتضخم
ضحكوا العيال على كلمات جدهم الاخيره وجدهم اساساً مب متقصد ولا هو صدق يشوفها ولد
ومستغرب من نحفها الزايد وطولها القصير مقارنة بالعيال
قامت بعد شوي من الاكل تبي تغسل يدها ، وهي ما تحب تاكل واجد عشان ما تخرب وزنها الي بالحقيقه مناسب لطولها وعمرها : الحمدلله
مسكها الجد : وين وين ؟ كل يا ولد ما كليت زين
مسكوها العيال الي جنبها وقعدوها غصب : جدي قال كل يعني كل
جلست وهي على اعصابها ما تبي تنفجر وتتغصب اللقمه وهي ما تبي
-
" بـعـد الاكـل "
الجد : يلا يا عيال على شغلكم
طلعوا العيال كلهم ومسكوا معهم اوجان : امش معنا
اوجان : ها ؟ وش شغلتكم انتوا
ايهم : انت امش معنا اليوم ما بتسوي شي بكرا تبدا معنا
اوجان وهي ترجع لورا : اجل ما ابي اروح معكم
ايهم مسكها ومشاها قدامهم : امش امش قدامنا
مشوا مسافه ماهي بعيده ولا هي قريبه مره و وصلوا للمكان الي ما تدري اوجان وش هو
ايهم : نص يروحون يسقون المزرعة ونص يرعون الحلال يلا
مشوا العيال يترتبون و وقفت هي يوم شافت كلب يمشي باتجاهها وصرخت يوم قرب مره لعندها : ياعيالل
ركضت نحوهم بسرعه والكلب يركض وراها وهي تصارخ ومفجوعه من الكلب و وقفت عند تيّـام وخلف
ضحك خلف : شفيك ؟ خايف من الكلب يا خواف
ناظروهم العيال وضحكوا يوم شافوا اوجان ماسكه بثوب تيّـام
تيّـام مسك الكلب بحكم انه يحبه ويعرفه وهو الي رباه والكلب يسمع لكلامه ، ولف على العيال الي مسكوا اوجان يجلسونها : بروح اسوي شغله واجي
ايهم مسك الكلب وابتسم : اجل لا تتأخر
راح تيّـام و وقفوا العيال بعدما ربطوا اوجان ولصقوا لصقه بفمها عشان ما تصارخ وجلسوها : اجل تخاف من الكلب ها ؟
عامر جلس متربع امام وجه اوجان بالضبط وتكتف : اليوم بتاخذ اول درس من درس الرجوله
لفوا العيال يأشرون لـ ايهم يترك الكلب يتجهه يتضارب مع اوجان
ايهم مشى ومعه الكلب يقرب من اوجان الي شوي وتبكي
ضحكوا العيال ومنهم ايهم وهو يقرب اكثر واكثر وتحاول اوجان تبعد
قاطعهم الجد الي جاء يشيك عليهم : يعيالل
فكوا اوجان بسرعه وتركوا الكلب يرجع لمكانه ومسكوا اوجان معهم وركضوا يرجعون لشغلهم
اوجان بينها وبين نفسها : اوريكم يعيال الكـ.ـلب !
جاهم الجد وهو يناظر شغلهم وشافوا العيال وهم يحاولون يعلمون اوجان الشغل من بعيد ويكلمونها
وهم من قريب جالسين يهددون اوجان لا تعلم جدهم
اوجان لفت لجدها الي كان يناديها من بعيد : وليد
اوجان ركضت لعنده تترك عيال عمها الي يهددونها لا تروح : سم يا جد
ابتسم الجد : كيف الاوضاع مع العيال يا ولدي ؟
اوجان ناظرت العيال ورجعت تناظر جدها وكبت العفش كله : وانا يا جد عندي فوبيا من الكلاب يعني اخاف منهم
تلاشت ابتسامة جدهم وناظر العيال يناديهم : تعالوا تعالوا !
جو العيال وهم يناظرون اوجان ويتمنون انها سمعت كلامهم ولا قالت له : وش سويتوا له بسرعه
جو العيال يتكلمون وقاطعهم الجد : وبدون كذب لأن العلم وصل لي
عامر وهو يناظر اوجان بغضب : يا جد من حقنا نعلمه الرجوله الناعم والخكري ذا
اوجان وهي صايده الجو : انت الخكري ، حدك !
الجد سكتهم وناظر عامر : مالك دخل بشي يخصه هو يا عامر ، واحترموا الرجال يعيال ولا حرمتكم من كلشي تحبونه ، ولا اشوفكم مره ثانيه متضاربين قدامي
العيال : ابشر يا جد
مشى الجد معهم : بشيك على شغلكم قدامي يلا
لفوا العيال و وراهم الجد الي جنبه اوجان
وقفوا يوم وقف جدهم ولفوا له : حطوا لي الفرشه هنا وجيبوا دلة القهوة
ابتلشوا العيال ان جدهم بيجلس عندهم لين ينتهون
ركض خلف : ابشر يا جد
وراح يجيب الفرشه وقهوة جده
واعطى جده وراح يكمل مع العيال وامر الجد اوجان تجلس
وبالفعل جلست بأمر من جدها : سم
الجد : كلمني عنك اكثر
صب لها القهوة وعطاها : انا ؟
الجد : ايه
اوجان شربت القهوة : مثل وش
الجد : عمرك ؟
اوجان ما عجبتها القهوة بالمره لأنها بدون سكر لكن لفت لجدها : ها ؟ عمري 19
جلست تسولف لجدها وتذكرت على طول ابوها : الا يا جد اسألك عادي ؟
الجد : عادي
اوجان : تعرف رجال اسمه سعد علي ؟ ( ابوها )
الجد ناظرها بحده : تعرفه ؟ من وين تعرفه ؟
اوجان : ها ، كان خوي ابوي قبل
الجد : تعرف عنه شي ؟
اوجان : ايوه اخر اخباره سمعت انه توفى
الجد بعدم مبالاه قدامها وناظر للارض : الله يرحمه
اوجان : تعرفه ؟
الجد شرب قهوته ونطق : لا
اوجان همهمت وهي تعرف انه يكذب
ناظروا العيال اوجان وجدهم الي كانوا يسولفون
خلف : يعيال والله ما اخليه
ثنيان بطقطقه : وش بتسوي له يا قوي انت
خلف : بنتظره الين يجي الغرفه وبدعسه
سطام : هذا وانت اول ما جاء انت استقبلته وصادقته وتشوفه خويك الي تعرفه من سنين
خلف : يخسي ، شوف كيف قلب جدنا علينا وهو غريب
العيال : صادق
مساعد : اسمعوا ، ننتظره يجي معنا ونقفل الغرفة وندعسه ونكسر خشمه سمعتوا ؟
العيال : تم
خلف : صح ولو هو رجال يمد يده ، منها نطلع حرتنا ومنها يتعلم الرجولة
-
" بـعـدمـا انـتـهـوا "
اتجهوا لـ اوجان بعدما راح جدهم
مساعد : وليد امش معنا بنروح ناكل تعال معنا والله ما نخليك يالخوي
قامت اوجان بحسن نيه : ايه والله اني جيعان
راحت معهم وهي على نياتها ومستغربه انها ما عاد شافت تيّـام من ذيك اللحظه الي راح فيها
ولفت على خلف : وين تيّـام ؟
خلف ناظرها ورجع يناظر الطريق : ما ادري
لفت تسأل العيال وكلهم ما يدرون عنه ، ومشت الى ما وصلوا للغرفة وانصدمت يوم دفوها ودخلت اول وحده ودخلوا بعدها وقفلوا الباب : ايه انت جيت بنفسك وتبيها لنفسك
تقدموا بيجلدونها وانصدموا يوم ابعدت لورا وتقدم خلف وصكته بكف يلف وجهه : بعدوا عني ولا علمت جدي
ضحك ايهم : يا حبيب جدو انت ، هد لا تصير بنوته
اوجان رفعت الثوب مستعده تضارب : ولد ابوك قرب
تقدم ايهم اولهم وجاء صفقها بكف وصفقته بكفين وتقدموا العيال كلهم ضدها وكل ما انجلدت جلدتهم دبل الجلدات الي يجلدونها
قاطعهم تيّـام الي دخل يدور عليهم وانصدم من شافهم حول اوجان الضعيفه ويجلدونها
و وقف يناظرها يوم طرحت اثنين وجالسه تجلد الباقي وانصدم انها بذا الجسم الضعيف مره وجالسه تجلد 8 عيال وطرحت نصهم
ضحك تيّـام : يعيال والله ما هقيتها منكم
وقف خلف الي كان مطروح بالارض : ها ترا جالسين نمزح معه وندربه
ما صدق تيّـام وتقدم وتعدى العيال ومسك اوجان من ثوبها : امش برا
مشت معه وفكت يده منها وطلعوا لبرا : سلامات شفيك وش السالفه عشان يجلدونك ؟
اوجان ما تحملت وقالت له كل شي من بداية ما جابوا الكلب حولها الى ما جابوها للغرفة يجلدونها والدمعه بعيونها : يحسبوني ولد يجلدوني !
تيّـام : ايش ؟
اوجان بخوف مع دموع : اقصد يعني هم كثار ضدي وجالسين يجلدوني
تيّـام ضحك وتكى على الجدار : احلف ؟ يخوي دخلت الغرفة لقيتك طارحهم كلهم
ضحكت بنص بكائها : يعني شوي من مهاراتي الي تعلمتها وانا صغير
تقدم حضنها وبيده يلعب بشعرها الحرير القصير ويده الثانيه ورا بظهرها يطبطب عليها
وهي توترت مره من قربه وحاولت تبعد
ابعد تيّـام يوم حس فيها وغير الموضوع : يلا امش
مسحت دموعها ومسك يدها ومشوا
-
" بـعـد يـومـيـن - الـمـغـرب "
كان عندهم عزيمه ودخلت هي بعدما لبست ثوبها الابيض والشماغ ودخلت تسلم عليهم واحد واحد وجلست جنب جدها بعدما عرفت عن نفسها
الجد : يا وليد رح صحي العيال
اوجان لفت : ها ؟ انا
الجد : ايه امش
اوجان : ابشر