صافح الود قلبي يوم جيتك

10

لفت اوجان ونزلت ثوبها وهي تضرب الي حاشرته بالزاويه كف بكل قوتها بيدها السالمه وتركته وهي تأشر على اخوياء خلف : وانتوا روحوا لفصولكم واتركوا الزبايل هنا
بالفعل صار الي صار وشال مساعد خلف ومشت اوجان تساعده وهي تاخذ المفتاح ويطلعون برا وتشغل السيارة ويركب مساعد خلف ورا وركبت اوجان قدام وراح مساعد مكان السياق ، واخوياء خلف راحوا للحمامات ( اكرم القارئ ) وهم يمسحون التراب وشوي من الدم بوجيههم ويرجعون لفصولهم
-
" بـالـمـسـتـشـفـى "
وصل مساعد بسرعه للمستشفى وهو يقفل السيارة وينزلون اوجان ومساعد ويشيلون خلف للطوارئ واول ما دخلوا جو الاطباء سريع وحطوا خلف بالسرير و ودوه للغرفة وراح مساعد يكلم المُمرضين والاستقبال ، اما اوجان على طول راحت للحمام ( اكرم القارئ ) وغسلت يدينها و وجهها وشوي من شعرها من قدام ونشفت يدها وطلعت وجلست بالكراسي وجاء مساعد بعد وقت وجلس بجنبها وهو يفتح الكيس ويعطيها مويه واخذ مويته
اوجان وهي تفتح غطاء المويه : وين كنت ؟
مساعد وهو يشرب المويه لف عليها : بالبقاله
تنهدت اوجان : بتعلم جدي بالسالفه
مساعد رفع كتوفه وقفل غطاء المويه : مدري
لف ثواني ورجع ناظرها : بس اكيد كذا ولا كذا يا بنعلمه يا بيدري بنفسه
اوجان شربت المويه وحست انها هدت شوي وحست براحه والمكان شوي هدوء ونص ازعاج وصوت اطفال واهل واصوات الاطباء وازعاج الاجهزه والابواب
اخذت نفس عميق وعدلت جلستها واخذت جوالها وصادفت ان صديقتها امواج راسله لها ، اخذت الفرصه ان مساعد راح للحمام يتوضى لأن شوي ويأذن الظهر واخذت جوالها وحطت مويتها على جنب وهي ترد على اتصال امواج وتحط رجل على رجل
امواج : وحشتينيي
اوجان : كذابه الصبح كنت اكلمك ، وحشتك بسرعه
امواج بضحك : ايوه ، وينك ؟
اوجان لفت تناظر : بالمستشفى
امواج تغيرت ملامحها : فيك شي ؟ سلامتك شفيك يا بنت
اوجان : لا ما فيني غير العافيه ، خلف توجع شوي
امواج : ايش السالفه ؟
بدت اوجان تقولها كل شي من البدايه للنهايه
امواج بحزن : اووه ! يقلبي
اوجان ضحكت ورفعت حاجبها : يقلبي ؟
امواج : بالغلط
جلسوا يسولفون واول ما لاحظت اوجان ان مساعد قدامها وشوي ويجيها
اوجان : بقفل مساعد جاء
قفلت بسرعه وحطت جوالها بجيبها وهي تناظر بـ مساعد الي تقدم لعندها : من تكلم
اوجان : شدخلك
مساعد ناظرها : ايه صح مالي دخل ، طيب يلا امش الحين يأذن
اوجان توترت : ايش ؟
مساعد بـ استغراب : وشو الي ايش ؟ اقولك بيأذن قم الحق توضى نلحق نصلي
اوجان قامت وهي تستغفر ربها وتدعي بالمغفره
-
" بـعـد صـلاة الـظـهـر "
طلعت وهي تدري ان صلاتها مب صحيحه وكل ما خطت خطوة كانت تستغفر وتسبح ، وكان بجنبها مساعد ومشوا الى الكراسي وجلسوا وصادفوا العيال
اوجان : يمه وش جابكم ؟
عامر : كيف وش جابنا ؟ ولد عمنا ذا
اوجان : يا اهبل اقصد كيف وصلكم العلم
عامر : المستشفى دقوا علينا
اوجان لفت بعدما عرفت كيف جو وجلست وجلس بجنبها مساعد وكان مرا لاصق فيها بسبب الزحمة ، ولحسن حظ اوجان بعد ان جنبها على اليمين عامر وانحشرت بينهم هو ومساعد الي جالس يسارها
قامت بسرعه يوم لاحظت تيّـام الي يناديها : هلا ؟
أشر لها تجلس بجنبه ، ويوم ناظرت لقت ان فيه شوي مساحه تكفيها و وافقت بسرعه وهي تجلس جنبه وتناظره لثواني وبعدها شتت نظرها ، لكن ما مرت دقايق الا ورجعت تتأمله
تيّـام لاحظ تأملها له وناظرها : لا يكون عاجبك وجهي
اوجان استوعبت : نعم ؟ من زين وجهك
ضحك تيّـام : قل الصدق
اوجان بكذب : لا بس شامتك ، وشنبك حلوين اما انت لا
ناظرها ثنيان الي كان جالس جنب تيّـام : اها تحب شنبه لأن ماعندك شنب ؟
اوجان عقدت حواجبها : شدخل
ثنيان : صدق انت ليه ما عندك شنب
اوجان : وش ذي الاسأله التافهه
ثنيان : ياخي حلاوة الرجال شنبه
اوجان : هد علينا ، ترا شنبك خفيف وكلها شعرتين
ثنيان غير الموضوع : لا يكون عشانك صغير ، كم عمرك ؟
اوجان : انا ؟
ثنيان : لا انا ، ايه انت
اوجان : عمري 19
ثنيان ضحك : اكبر من خلف وما عندك شنب ؟ انت تدري خلف عنده شنب وهو اصغر منك
رجعت ظهرها : مالك دخل يالملقوف
تيّـام : ثنيان اص ، واهجد لا اقوم لك الحين !!
سكت ثنيان وهو كاتم ضحكته ، واما اوجان تكتفت وهي تحط راسها بكتف تيّـام وحاطه رجل على رجل وتناظر بالارض وهي تفكر بموضوع خلف والعيال
واما تيّـام قام يلعب بشعرها الي يحبه ويحب نعومته وشكله القصير ، يحب دايم يلعب بشعرها واوجان تحب الي يلعب بشعرها لأن وقتها تحس بـ استرخاء وشعور حلو ، ف عشان كذا تسمح لـ تيّـام يلعب بشعرها عادي
-
" الـيـوم الـي بـعـده "
نزلوا من السيارة جميعهم ولكن هالمره معاهم الجد وابو خلف ، دخلوا المستشفى وسمحوا فقط لشخصين يدخلون لعند خلف يتطمنون ويشوفون حالته
الجد : اجلسوا يعيالي هنا بنروح انا وصالح ( ابو خلف )
جلسوا العيال بأمر من جدهم وراح جدهم مع عمهم صالح وجلسوا كلهم على جوالاتهم
-
" عـنـد خـلـف "
ابتسم بتعب من دخل جده و وراه ابوه : حيو
ابتسم الجد : السلام عليكم
خلف تحرك وكان بيجلس
مسكه جده بسرعه ورجعه : والله ما تجلس خلك مكانك
سلم خلف على ابوه وجده وجلسوا
الجد بعد صمت لدقايق : الا يابو ايهم ما دقوا مدرسة خلف عليك ؟
صالح : الا والله دقوا ولكم علمتهم السالفه وان عنده عذر
الجد لف على خلف وثم ناظر صالح : يالله يا خلف مدري وش وصله لذي الحاله
تنهد صالح : المضاربات يابوي ، الله يصلحهم ويصلح خلف ويهديه
-
" بـعـد وقـت "
صالح : لا يبه احس ما ينفع
الجد : كيف ما ينفع ؟ الولد حالته حاله وبيخلونه ثلاث ايام ويقولون له داوم ، لكن ان داوم بداله ما ظنتي ينقصونه بالدرجات ويقدر خلف يرتاح لمدة كم اسبوع عالاقل
صالح : يبه الله يهديك ما ينفع والله
الجد بعصبيه لف وجهه : خلاص انا اكلمه اذا وافق خله يداوم بداله وهو اصلاً هيئته مثل هيئة خلف كذا تحسه صغير وقصير ما رح يدرون اساساً بشي ، اما اذا ما وافق خله ينقصون درجاته ويتخرج بمعدل مثل وجهه !
صالح ما قرر يتكلم عشان ما يعصب ابوه اكثر ولف يغير الجو وقام يسولف مع خلف ، مع ان خلف تعبان ويالله ينطق كم حرف بالقوه عشان يجمع كلمة او كلمتين ، لكن صالح بعد شوي قرر يخليه يرتاح ولف على ابوه الي استأذن وطلع ، ورجع لف على خلف الي واضح انه مغمض عيونه ويبي ينام
صالح : انتبه على نفسك يا خلف كلها كم يوم ان شاء الله ونطلعك
خلف ابتسم بخفه وأشر له بيده لأن مو قادر يتكلم ويجمع الحروف
طلع صالح ولحق ابوه
-
" عـنـد الـجـد "
وصل لعند العيال وكان وراه ولده صالح ، لكن ترك الكل وناد اوجان : ولدي وليد
قامت بسرعه : هلا يا جد
الجد ابتسم : الحقني بكلمك دقايق بس
مشى الجد ولحقته اوجان ، وجلس صالح وهو يستغفر ربه
-
" بـرا الـمـسـتـشـفـى "
وقفت يوم وقف الجد وهي تناظره ومستغربه انه نادها هي بس ولحالها ، ما تنكر ان جاها فضول قوي وتبيه يتكلم ، لكن الجد كان يناظر حوله وساكت وكأن يفكر كيف يبدا
رجع وناظرها : يا ولدي وليد ، خلني اقولك الموضوع بدون لف ودوران ، انت تدري ان خلف تعبان وهذا الاسبوع دوام ومستحيل نقدر نغيبه ، ف شرايك تداوم بداله ؟
انخرشت وتوسعت عيونها : انا ؟
الجد : ايوه
وقفت دقايق تفكر بالموضوع ، وعلى طول جاء فبالها العيال الي جلدوا خلف وهنا قررت انها توافق وتناظر جدها : تم
ابتسم الجد : اجل تم بس تراك بتداوم كم اسبوع الين يرتاح خلف ويتعالج ويرجع يداوم هو
اوجان : ابشر يا جد
الجد : ان سألوك انت من قلهم كل شي عادي
هزت راسها بمعنى - ابشر -
مشى الجد يدخل داخل وهو مبتسم و وراه اوجان الي تحمست عشان تاخذ حق ولد عمها
-
" بـعـد وقـت "
كل العيال تطمنوا على خلف وانه بس بيجلس اسبوع بالمستشفى وبعدها بيطلع
الجد : دام انكم تطمنتوا عليه يلا ارجعوا البيت
عامر وهو متكتف ضحك : طرده يا جدي ولا وش ؟
الجد : ما وراكم شغل ؟
تذكروا العيال وقاموا بسرعه وركبوا السيارة وحرك مساعد
مساعد لف عليهم ورجع يكمل الطريق : روحوا لوحدكم انا بروح اجيب حقين المدارس
عامر ضحك : تخيلوا ادرس !
ايهم طقه : ياخوي اص ترا اشغلتنا بكلمتك ذي ، لا تنسى كلنا عندنا كلاس بعد كم يوم ولازم نحظر !
عامر لف عليه : اسألك بالله ؟
ايهم : اي والله ، استانس الحين تراك عاطل
-
" بـالـديـرة - الـعـصـر "
وصلوا و وقف مساعد قدام البيت وهو يقفل السيارة وينزلون العيال كلهم لكنهم ما نزلوا للبيت ، راحوا متجهيين نص للمزرعة ونص للنياق ، بس اوجان سحبت عليهم كلهم بدون ما يدرون ودخلت داخل وهي تحس انها مصدعه وتبي تنسدح وتريح بعيد عنهم وعن سماجتهم ومزاحهم وسوالفهم الي تجيب المرض ، بحكم ان جوها غير عن جوهم وكل شي مختلف عنهم
ولكن وهي داخله صادفت انها عدت من عند مجلس الحريم وبالغلط وقفت يوم شافت وحده من البنات طالعه
شهد ناظرتها بخرشه وهي طالعه من الباب : يمهه
اوجان رفعت يدها مخروشه اكثر من شهد : والله اني مو ولد !
شهد استوعبت كلام اوجان : وشو ؟ اجل وش ذا الثوب ، ومن انت او انتِ ؟
اوجان : ها ؟ شقلت انا
شهد عقدت حواجبها وهي ماهي فاهمه الموضوع : قلتي انك مب ولد ؟