صافح الود قلبي يوم جيتك

9

ريناد : جامعة *** في الشارع ..
بدت تقوله كل شي والمعلومات الى ما فهم هو وبعدها عم الصمت ورجعت ريناد نظرها للدريشة
-
" عـنـد اوجـان "
قالت لصديقتها كل شي الي اسمها - امواج -
وابتسمت يوم تفاعلت معها لكن نصحتها ترجع للمدينة اذا حست ان بتصير مشاكل وجلسوا يسولفون حول الموضوع وصورت لها اوجان العيال وهم راقدين وجلسوا يحشون فيهم وتقولها اوجان العفش كله حتى حق ابوها وسالفه طلال وجدها
جلست ساعات طويله الى ما حست بطفش من القعده بالغرفة ، قررت تطلع للحوش وتدق على امواج عشان محد يسمعها
اوجان : اسمعي دقي علي لكن بكلمك كأنك ولد طيب ؟
امواج : ليه
اوجان : انا ما ادري يمكن احد يدخل يشوفني وانا اسولف ويشكون فيني
ضحكت امواج : تمام
طلعت اوجان للحوش وبالفعل جلست ودقت على امواج وجلسوا يكلمون بعض لساعات وهم مشتاقين لبعض بالحيل
-
" فـي مـدرسـة الـبـنـات - الـحـصـة الـثـالـثـة "
شهد وميمونه كانوا بفصل واحد وجالسين جنب بعض  بأخر الفصل وتحديداً بالزاويه وبنص الحصة كانوا يسولفون ويخططون كل شي وكيف بيمسكون وجن
الاستاذة بنص الشرح بصراخ : يا شهد انتِ وميمونه !
لفوا عليها وسكتوا على اساس انهم ما كانوا يتكلمون
الاستاذة : اوقفوا ! ايش معاكم ؟
وقفوا شهد وميمونه وهم يرفعون يدينهم بمعنى ما معنا شي ، وناظرت شهد بـ ميمونه الي فاطسه ضحك
الاستاذة : ايش قلة الادب دي ، روحوا للادارة يلا
شهد : والله يا استاذة ما معنا شي وشفيك
الاستاذة : لا لا لا انا كدا بوديكم ، امشوا قدامي يلا
لفت على عريفة الفصل : قومي بدالي شويه وجايه
وقفت العريفة وراحت لمكان الاستاذة ، وراحت الاستاذة تلحق البنات يوم تقدموا شهد وميمونه وطلعوا برا الفصل وهم فاطسين ضحك وبقوه
الاستاذة وقفت عندهم : ضحكوني معاكم ؟
ميمونه : يا استاذة انتِ بكبرك تضحكين
فطست شهد ضحك وهي تصفق يدها بيد ميمونه : ايوه ترا جالسين نضحك عليك
الاستاذة بغضب مسكتهم ومشتهم : يا قليلة الادب انتِ وهيا امشوا يلا ! ، ان شاء الله تكتبوا تعهد على ق الادب دي وطريقة كلامكم معي وانا مُعلمتكم
-
" عـنـد الادارة "
الاستاذة بعدما انتهت : وما يحترموني ابداً ويراددوني بكلامهم ولا كأني معلمتهم !
شهد حطت يدينها على خصرها بدلع وحزن وتمثيل : استاذة سميرة تراها تكذب والله حنا ما سوينا شي
سميرة : خلاص هذي المره الاولى تصير واوعدوني انها اخر مره !
لفوا البنات على استاذتهم بـ ابتسامة انتصار ورجعوا لفوا على استاذة سميرة : ابشري
طلعوا البنات ورجعوا للفصل وقبل لا يجلسون دق جرس الفسحه وطالعت شهد بـ ميمونه بفرح وهي تغمز لها ونطوا بحماس وهم يرجعون الكتاب واغراضهم بالشنطة ويناظرون بالاستاذة الي وقفت عند الباب قبل يطلعون
الاستاذة : بكرا بطلعكم اول ناس وتحلوا معايا المسألة واشوفكم بكرا ما تحلوا الواجب ، عند استاذة سميرة سمعتوا ؟
ناظرتها ميمونه وسحبت شهد وسحبوا على الاستاذة وطلعوا يدرورون على وجن من بين البنات الي مسوين زحمه
شهد مسكت يد ميمونه وهي تركض : شوفيها شوفيها
نزلوا من الدرج ولقوا ميمونه ومعها وحده من صديقاتها
طقتها شهد بكتفها ورجعت وجن وهي توقف وترجع لها الضربه وتشمق وتمشي
شهد : وع وشذا ما تعرف تشمق !
تقدمت شهد بعصبيه وهي تشد شوشتها وترجع لورا : تعالي اعلمك يا بنت ..
رفستها ببطنها وطرحتها بالارض وتقدمت ميمونه يوم شافت صديقة وجن جالسه تفزع لـ وجن وتشد شوشة شهد ، ورفستها ميمونه بظهرها وطاحت بالارض وعيونها شوي وتدمع وقامت بسرعه ولفت على ميمونه وهي تمسكها بقوه بيدينها وبسبب اظافرها الطويله توجعت ميمونه لأنها قرصتها بكل قوتها ، لكن ميمونه ما خلتها ومسكت شعرها المفتوح وهي تشده بقوه وصديقة وجن - يارا - قامت عليها وطرحتها بالارض وشافتهم شهد وقامت وخلت وجن وهي تبعد يارا عن ميمونه
تقدمت ميمونه بغضب : خليها يا شهد خليها ، والله ما اكون ميمونه ان ما دْبحتها اليوم !!
-
" عـنـد اوجـان "
قفلت المكالمة واستغربت من وجود مساعد المفاجئ قدامها ، لأن كانت تظنه بشغله
اوجان نزلت جوالها : مب كنت بالشغل ؟
تكتف مساعد وناظرها : ما تبغى تستأذن لـ خلف ؟
اوجان : كان استأذنت له انت
مساعد : قلت له بالصبح لكنه أصر علي الا ويبيك انت
اوجان : تمام ، توديني ؟
مساعد : عشان كذا جيت يلا امش
قامت وحطت جوالها بجيبها ومشت ورا مساعد ، وبعد وقت وصلوا للسيارة وحط مساعد شماغه على كتفه وانصدم يوم شاف اخته وهج ومعها هاجر
وهج وهي تمشي وتناديه : مساعد مساعد ، اصبر
طلع مساعد بسرعه وهو يناظرها : اعوذ بالله وهج شفيك لابسه عباية جدتي ؟ ولوين رايحه انتِ
لف على هاجر وتذكرها ورجع لـ وهج : وهاجر
وهج لفت على هاجر ورجعت ناظرته اخوها : امر طارئ امر طارئ ، ودينا لمدرسة شهد وميمونه سرييع
مساعد فهم الموضوع : اييه ما تبغون جدي وجدتي يدرون بالسالفه ؟ وش سوو شهد وميمونه هالمره
هاجر : وش يعني ؟ اكيد تضاربوا
مساعد ركب : اركبوا بسرعه ، وهذي ثاني مره واخر مره تروحون لمدرسة البنات اشغلتونا ترا
ركبت وهج وركبت بعدها هاجر وقفلت الباب
وهج وهي تعدل العباية الطويله مره : حنا مالنا شغل هن سوسات وراعيات مشاكل وما نبي امهاتنا يدرون لأن ينجلدون وقتها
مساعد شغل السيارة وحرك : لازم ينجلدون عشان يوصلون عند حدهن ولا يزودونها !
وهج : ما يسمعن الكلام مره مستحيل مستحيل بينفع الضرب ، اساساً ما عمره نفع
مساعد ناظر لـ اوجان وتذكر انها موجوده وهز راسه بمعنى - تمام - عشان يقفل الموضوع ولا تتكلم وهج
بنفس الوقت ناظرت وهج بـ اوجان وثم ناظرت هاجر وبصوت خافت : ذا من ؟
هاجر رفعت يدها بمعنى : مثلي مثلك والله ما ادري منهو ذا
قاطعهم مساعد الي لف على اوجان وهو يأشر لها : وليد شوف المنديل تحت جيبه تكفى
ناظرته اوجان ونزلت وهي تاخذ المنديل وتعطيه مساعد
لفت هاجر على وهج وبصوت خفيف ما يسمعونه العيال : اوه اسمه وليد ؟ اسم حلو
وهج بنفس الصوت الخافت : اسمه عادي
-
" بـعـد وقـت "
وقف مساعد السيارة وناظر وهج : يلا انزلوا
نزلوا البنات وقفلوا الباب وتأكد مساعد انهم دخلوا وقدم شوي وهو يمشي و وقف عند باب مدرسة خلف وهو يعطي اوجان كرت العائلة ونزلت اوجان ، توترت مرا يوم تقدمت لعند الباب ولقته مفتوح ودخلت وشافت العيال يمين ويسار متوزعين بكل مكان بالساحه لأن الوقت بوقت الفسحة اساساً
وراحت ولقت شلة عيال قريبين من الباب الي يدخلها جوا المدرسة : ياعيال تعرفون وين المرشد ؟
ناظرها واحد من العيال وهو يبلع لقمته ولف وهو يأشر فوق تحديداً داخل : تطلع من الدرج وتلف على يمينك تلقى باب ادخله ذا غرفة المرشد
شكرته اوجان وطلعت بسرعه وتروح بنفس وصف الولد وبالفعل دخلت الغرفة وكان مكتوب باللوحة فوق - المرشد الطلابي -
اوجان : السلام عليكم
المرشد وهو يكتب بالورق الي قدامه ورفع راسه يناظرها : وعليكم السلام
-
" بـعـد وقـت "
طلعت وهي تدور على خلف بعدما دق الجررس يعلن ان وقت الفسحه انتهى ، ولفت تدور الساحه كلها وما درت وين خلف من كثر العيال ، لكن فجأة ما تدري ليه ولفت ورا المدرسة وقامت تمشي والمدرسة من كبرها تحس انها ضيعت لكنها كملت وهي تناظر يمين ويسار وتدعي انها تلقى خلف بسرعه وتاخذه وتروح
وفجأة صنمت بمكانها يوم شافت المنظر البشع قدامها ، لأول مرا بحياتها صدق تشوف مضاربة العيال الي كانت تحسب انها فله وكم ضربه بسيطه ولكن لا ! ، جالسه تشوف خلف ومعه كم واحد واضح انهم اصحابه ضد اربع عيال اجسامهم ضخمه مقارنة بـ خلف واخوياه ، لكن خلف مرا ما استلسم هو واخوياه ويحاولون قد ما يقدرون انهم يجلدونهم رغم الاصابات
استوعبت اوجان يوم شافت خلف طاح بالارض و وجهه نصه دم ونطقت بصراخ وهي تركض لعندهم : خلف !!
-
" مـدرسـة الـبـنـات "
دخلوا وهج وهاجر وهم يحاولون يتغطون بالعبايات الي اكبر منهم بكثير وطويله شوي والي اصلاً سارقينها من عند جدتهم وامهاتهم ، لفوا على بعض وهم يضحكون
هاجر وهي تكتم ضحكتها : اص اص شوفي البنات كيف يناظرونا امشي بس !
مشوا بسرعه وهم يسألون البنات عن مكتب الاداريه ، وما قصروا البنات و وصفوا لهم المكان وطلعوا و وقفوا يوم وصلوا قريب من الباب وهم يشوفون شهد وميمونه ومعهم بنتين وكلهم جالسين
وهج : نكبونا الله ينكبهم !
طقت الباب ودخلت هي وهاجر وهم يناظرون بـ ميمونه وشهد
سلموا ودخلوا وشرحت لهم الاستاذة كل الي صار تظن انهم صدق اولياء امورهم
وبعدهم بشوي دخلوا امهات وجن ويارا ، وبنهاية الموضوع كله كتبوا الاربع تعهد
ومسكوا هاجر و وهج البنات وطلعوا برا
وهج : انتوا ما تتوبون انتوا ؟
لفت هاجر و وقفت : اصبروا وين غرام
شهد : شدخلها غرام
ميمونه لفت : اصبروا ابغى اروح اجيب شنطتي وعبايتي
لفت عليها شهد : جيبي اغراضي معك
ميمونه اتجهت تمشي للفصل ولفت على شهد : تمام
رجعت لفت شهد على البنات : من الحين بجاوبكم على كلشي عشان ما تعلمون امي ولا ام ميمونه ، ترا البنتين الي داخل وجن ويارا هم الي بدو و ..
وهج قاطعتها : اص بلا كذب كل ما تضاربتوا قلتوا ان البنات بدو ! ، يعني مستحيل تكونون انتم الغلطانات والظالمات ؟
شهد : انتِ اص خليني اكمل ، ترا وجن سبتني وسبت اهلي وقبيلتي كلهم
وهج : هذا عذر هذا ؟
شهد : ايه وعذر قوي بعد
وهج بعصبيه وهي تلف تناظر المدرسة وتشتت نظرها ولفت بسرعه لشهد : ويارا هذي شسوت ؟
شهد : حنا كنا ناويين وجن بس لكن يارا تلقفت والمسكينه الحين مسويه تفزع لخويتها وكتبت تعهد
قاطعتهم ميمونه الي جات واعطت شهد اغراضها
هاجر وهي تمسك راسها : صدعتونا يا بنات ! ، البسوا عبايتكم بسرعه وامشوا
هاجر لفت على وهج : دقي على مساعد شوفيه ينتظرنا برا
بالفعل طلعت وهج جوالها وهي تدق على مساعد
ميمونه وهي تضحك وتناظر بالبنات : يضحك شكلكم انتوا وعبايات جدتي
شهد ضحكت وهي تصفق يدها بيد ميمونه : وربي مرا تضحككك
هاجر بعصبيه : تبونا نعلم جدتي عليكم ؟
سكتوا البنات بسرعه ولفوا واخذوا شنطهم بعدما تغطوا بعبايتهم
نزلت شهد الطرحه من على وجهها يوم وهج انتهت من مكالمتها مع مساعد وهي تقوله يجيهم : الله وهج عادي نصور بجوالك ؟
مسكتهم وهج وهي تجرهم قدامها : امشوا امشوا بس
-
" عـنـد مـسـاعـد "
نزل من السيارة بعدما اتصلت عليه اخته وهج تبيه يجيهم ، وبنفس الوقت حس ان اوجان طولت ونزل ياخذها هي وخلف ويرجع للبنات وياخذهم ويرجعون البيت بدري لأن مستأذن من شغله ولازم يرجع وما يتأخر ، نزل وقفل السيارة وهو يتقدم ويدخل المدرسة ويشوف الساحة فاضيه مرا وقرر ياخذ لفها فيها كلها على امل يلقاهم ، وبالفعل مشى الساحة كلها لكن ما لقاهم
مساعد تنهد : ياليل وين القاهم الحين ؟
لف بسرعه يوم شاف صراخ من ورا المدرسة وركض بسرعه يشوف وش السالفه مع ان الصوت ما كان مألوف ، وصل وهو يشوف خلف طايح بالارض ومليان دم واوجان قايمه على اربع عيال وفيه كم واحد جالس عند خلف يحاولون يقومونه ويرشون عليه مويه ويحاولون يصحونه
رفع مساعد ثوبه وركض بسرعه وتقدم يشيل خلف : وليدد وليد !
لفت عليه اوجان وهي خانقه واحد من العيال : نعم ؟
مساعد بعصبيه : اتركه وامش قدامي بسررعه