※※※
ياريته ياعُمري .. هذا الگَبُر گَبري
بَس القَدَر راد راد راد
أدفِن هَوى أنفاسي .. بِتراب أعَز ناسي
صار الدمع زاد زاد زاد
چان الامل .. طول الأزَل
نگضيهن إسنين العُمُر سويه
نِشتَم سِوه .. حتّه الهِوه
مارِدْت أدِفنِچ بالگَبُر بِدَيّه
رِدتْ الشَمِع .. وإبلا دَمع
والدار تِبقه إبطَلعِتِچ بَهِيّه
وابكل فَجُر .. طول العمر
وَجهِچ يِطُل گبلْ الشمس عليه
يالنايِمه إبگبرِچ .. عمري ولا عُمرِچ
كِل العمر راح راح راح
مِن شَيَّعِت صَبري .. وَي لَيلَة القدرِ
ليلة حِزِن حاد حاد حاد
ياريته ياعُمري .. هذا الگَبُر گَبري
بَس القَدَر راد راد راد
أدفِن هَوى أنفاسي .. بِتراب أعَز ناسي
صار الدمع زاد زاد زاد
بَعدِچ شِلي .. ياحُب عَلي
مابيّه أدِفنِچ بالگبُر وَعوفِچ
يالبيچ أهِم .. مُرّي إبحِلِم
وإمنين أجيب النوم إلي وشوفِچ
يافاطِمه .. إورَب السِمه
من گَبُل يوم الطف شِفتْ طِفوفِچ
أرجِف گِمِت .. وإتهَدّمِت
مِن إيدي كِتبَت عالگَبُر حِروفچ
يا أغله من نَفسي .. يا آية الكُرسي
بَعدِچ علي المات مات مات
گلبي إنرُفَع نَعْشَه .. طير إحترگ عِشّه
ثوب الصبُر باد باد باد
ياريته ياعُمري .. هذا الگَبُر گَبري
بَس القَدَر راد راد راد
أدفِن هَوى أنفاسي .. بِتراب أعَز ناسي
صار الدمع زاد زاد زاد
خام الچِفَن .. وَيّه أم حَسَن
يادنيه من لِبسَت چِفَن لِبَسته
إي والنِزَل .. نوره إبجِبَل
مَرتين چَن وَجه النبي دِفنته
چَفّي الرُفَع .. خيبر وِگَع
وآني الأمِس باب الحِصِن قِلَعته
صِرْت أنحِني .. گِمْت أنثني
حتّه الظَهَر گوّه الظَهَر رُفَعْته
أمشي إويه الاجنازه .. اوفقّاري عِكّازه
ذاك الگبُل سيف سيف سيف
لوما وِصاياها .. چامَيّت إوياها
لومَه الصبُر فاد فاد فاد
ياريته ياعُمري .. هذا الگَبُر گَبري
بَس القَدَر راد راد راد
أدفِن هَوى أنفاسي .. بِتراب أعَز ناسي
صار الدمع زاد زاد زاد
گلبي إنفُطَر .. ظهري إنكِسَر
من غَسَّلِتها وِنلِچَم كَسُرها
گامت تِحِن .. وَسمَع تِوِن
مِن إيد زينب حاوِلَت تِجرها
مَيته إوبِچَت .. وِتنَهِّدَت
من حُضنَت إحسين إوحِضَن صَدرها
وَأشعُر حَفُر .. فاس الگَبُر
يحفر إبروحي مِن حُفَر گبُرها
