موجات حارقة

الجزء 5

الحلقة 33
بقلم لينا صبرينة
رجعت لدار وفاتو ليام ومديت كل وقتي لرفيف وقرايتي هذا مكان غير هوما شاغلين بالي اما هيثم فطيشتو عليا وقتلت حبو نهائيا وهاداك المشكل تاع نيميرو مازادش جبدو معايا وانا ماحبيتش نسقسي وسكرنا على الموضوع لانو من سكوتو باين بلي فهم بلي خاطيني .وروتين ايامنا كان نفسو  كنا نخرجو صباح ندو رفيف لدارهم ويوصلني للجامعة ولعشية معضم الأحيان نرجع وحدي وعمي يجيبلي رفيف لدار باسكو هيثم مرات يتوخر ومرات يبات فسبيطار  __فليل انا مع قرايتي حطيت طابلة فالبيت ومعاها كرسي ونقرا فيها وهو قاعد على سرير يلعب مع رفيف مرات يحاول يجبد لهدرة معايا مي انا كلمة وقص _فردوس راح ندي كونجي وش رايك نروحو  voyage نبدلو شوي الجو _ راه البرد ورفيف صغيرة نخاف تمرض مانريسكيش بيها مانروحش _ ايه عندك حق مالا نأجلوها لصيف خير _مممم_فردوس شوفي ليا _دورت ليه انعم _ كشما خصك نعاونك للقراية علابالي بيك راكي روطار من المرض_ نو مخصنيش نتا علمي وانا ادبية ماتفهمش لقرايتي وانا اصلا قادرة على شقايا نقدر نلحق بيهم مانحتاجش معاونة_  واو شحال متواضعة نتي_ وي حمدلله عندي ثقة في نفسي وفي قدراتي ولا غرت مني _ علاه نغير ربي خلقك غير نتي قارية وفاهمة كيتكوني قدامي  حطي رجليك في الأرض باسكو ليقريتو انا موحال توصليه نتي _قل خيرا تغنم وأصمت تسلم قبل أن تندم _ شفتو تبسم بإستهزاء. كبرتي وليتي تعرفي تهدري _ يكثر خير رخاس لي فاتو على حياتي هوما ليكبروني قبل الوقت  _ملامح وجهو ديراكت تبدلت وحسينو يحاول يحكم في روحو _شكون تقصدي برخاس واش هادي الهدرة ليتقولي فيها قدامي _كاين بزاف من كنت صغيرة وانا نتلاقا بيهم وادا حسيت هدرتي موجهة ليك هذيك حاجة خلاف ترجعلك ليك وتخمامك _قعد غير يشوف فيا  ماقدر يقول والو ومبعد ناض خرج ووجهو راح يتفلق من الغش باسكو موالف غير يتنرفز عليا نخاف ونرجف ونسكت قدامو بصح هذا المرة لقا قدامو وحدة اخرى صدمتو وهاذ الشي واضح عليه_ ناضت تبكي رفيف رحت ليها هزيتها وبدلتلها ورضعتها وقعدت نلعب معاها شوي ونحكي ليسمعني يقول راني نحكي مع انسان كبير بصح هيا غير اميرتي حلوتي ربي يحفظهالي .كيسمعني هيثم دخل علينا بوجه بشوش رفدها من عندي وقعد يلعب معاها .بقيت مركزة عينيا فيه كيكون معاها برك لينحسو انسان طببعي وعندو قلب وحنين .طفيت الضوء رقدها هو في حجرو وحطها فسرير تاعها _هيا غلقي الباب ورايا راني رايح لسبيطار عندي مريض درتلو العملية ومازال مافطنش لازم نرجع نشوفو ونبات تم _تبعتو راح لبس وخرج وغلقت البيبان وراه ورحت كملت قرايتي _لغدوا مارحتش للجامعة اصلا عدت مانروحش يوميا مور الظهر جات وداد عندي قعدنا نشايخو وانا معاها عيطلي فالثلفون هيثم رديت عليه _ سلام فردوس عيطت نسقسي عليكم واش حوالكم _لاباس حمدلله _ماش راح تسقسي عليا _مادام عيطت راك بخير _ايه تحسي براجلك فهمتك .واش ديري _والو غير قاعدة ومعايا وداد راهي جات _مليح سلمي عليا وكاش ماجيب في يدي لعشية _نن والو _ماعليه بسلامة وتهلاو في رواحكم _كوبيت لقيت وداد نطقت .فردوس كيفاه علاقتك بخويا درك_ الحمدلله رانا ملاح لازم نصايرو بعضنا ومتفاهمين_ حمدلله دايما ان شاءالله (عن قصد ماحبيتش نشرحلها وضعيتنا كأني حسيت بلي الغدرة راح تجيني من لقريب قبل لبعيد ) بقينا مقصرين انا وهيا حتا لعشية جاء عمو رابح داها وانا وجدت لعشاء و دخلت دوشت وعدلت روحي مليح وبدلت لرفيف وعدلتها ديتها معايا للكوزينة حطيتها معايا حتى دخل هو لاح سلام و قعد غير يشوف فيا معرفش واش يقول _روح أغسل وهيا تتعشا  راه واجد _هزز براسو وراح دوش ورجع رفد رفيف باسها و قعدنا نتعشاو وعينيا ماحبيتش نطلعهم ليه وجهو عدت مانحملش نشوفو قاعدة معاه جسد بلا روح _فردوس علاه غير ساكتة علاه وليتي ماتهدريش _ماش نافحتلي نهدر هادا ماكان_بقا يتعشى كيكمل مسح ورمى سرفيثة بالغش وخرج_وانا نضت لميت الحالة وهزيت رفيف ورحت للبيت رضعتها  ورقدتها وسهرت مع قرايتي _شفتو دخل شاف مع بنتو وقعد قدامي _فردوس ماش حرام عليك غابنة فيا شهور ونتي بعيدة عليا مانقرب ليك لا والو ماش بزاف عليا _  قعدت نشوف فيه _ واش تشوفي فيا هكدا والله حاب حقي قتلني الجفاف منك _ معندك حتى حق عندي ونقولك حاجة وديرها قاعدة في حياتك للقدام ادا راك راجل وعندك النيف متزيديش تقرب مني ولا تطلب حقك . ياك متقدرش تكون مع انسانة عايفاتك وقلبها هارب منك بصح لاكنت تقدر تفضل أديه كما موالف _ قعد غير يشوف ليا بدون ردة فعل ولا ناض خرج وراح اشومبرة وغلق الباب بالقوة حتا تخلعت رفيف _رجعت رقدتها معايا فالسرير ورقدت معاها بصح تنوض فليل ترضع بزاف وتبكي وهو اول مرة مايجيش يطل عليها ويعاوني ممكن لبارح مارقدتش فالخدمة عليها ماقدرش ينوض .
الحلقة 34
بقلم لينا صبرينة
لغدوا نضت تلاقيتو فالكوزينة صبح عليا رديت عليه وفطرنا ولميت قش رفيف ولبست و داني حطيناها في دارهم ووصلني للجامعة بسكات _قريت وكيكملت لقيتو يعيط قالي اصبري ربع ساعة واخرجي درك نجيك .كيفاتت ربع ساعة خرجت لقيت واحد الجان كان واقف مع صحابو قدام باب الجامعة يشوف ليا ويبسبس ويصفر وانا بقيت نشوف من ومن نحوس على طونوبيل هيثم يبان مازال ماوصلش حتا لقيت هاداك الجان ووقف في وجهي _سمحلي خويا نفوت _عندي مدة وانا نتبع فيك غير بعينيا ماعليش نتعرفو على بعضنا _بعد من طريقي راني متزوجة .جيت نمشي حكمني من يدي _ماتفوتش عليا هادي الكدبة  _حتا شفت هيثم قارا طونوبيل وهبط جاه طاير وحكمو من الجاكيطة تاعو وعطاه كف باين يحرق وصرات كبيرة بيناتهم وهيثم يتحلف فيه كيفاه تهدر وتحكم يد مرتي ليوم ننحرك . طلع فوقو وبدا يضرب .وتلمو صحاب هاداك الجان على هيثم وهجمو عليه كامل بالضرب وواحد ماقدر يفكوهم حتا جاو لابوليس باه فرزوها وهو كانت حالتو مشنشفة الدم من جبينو ويديه وقشو كلو موسخ من تراب .ركبنا وطول طريق يعيط عليا وبعاتب .علاه ماتحطيش الخاتم تاع زواج وينهو ولا حابة تاتيري الناس ليك باه يتبلاوك _الخاتم نحيتو عندي زمان وراه مع ذهب عندك نتا خبيتو _سكت وغير يخبط فالفولو وحالتو الله لا يشوفكم فيه ماش عبد حتا كيوصلنا طلعنا دخلنا ومن زعافو نسينا رفيف ماجبناهاش معانا_بدلت قشي وخرجت شفتو قاعد فوق سرير ويدو مجروحة  حاكم فيها .رحت جبدت الفاصمة ورحت ليه قعدت على ركايبي قابلتو حكمت يدو نقيتلو لجراح وحطيتلو الفاصمة بلا حتى هدرة كنت نتعامل معاه غير بسكات_كنت حاسب راح تجيك على قلبك كيف لعسل وتتشفاي فيا كيتحاماو فيا وعطاوني طريحة _سكت عليه ماجاوبتوش _فردوس راني نهدر معاااك ماش راح تردي عليا ثاني ؟؟_ شفت فيه مليح وتنهدت_ كل واحد يعمل بأصلو وتربيتو ونية صافية وفي الأخير تبقى بابات بنتي ومادابيا متديش تخمامك بعيد .نضت وقفت وشفت معاه وتبسمت بإستهزاء ورحت وخليتو (وفي قلبي مزال لجايك اعظم وكون منشربكش لمرار منستماش فردوس) شوي وجاني قالي بابا ووداد راهم جايبين رفيف وانا قوليلهم راه راقد ماكالاه تفتحي عليا الباب ماش حاب نقابلهم بوجهي هكدا. راح وكما كان الحال جابولي رفيف بتربي خمس دقايق وراحو وهزبت بنتي لحبيبة لحضني ونبوي غير نشوفها نحس دنيا زهاتلي وضحكتلي نقعد غير نحضن فيها ونشم في ريحتها ليماتشبعش. ديتها للبيت حطيتها وقعدت نلعب معاها وهي تضحك وتلاغي .شوي ودخل هيثم راح ليها ديراكت رفدها وقعد يبوس فيها وهو يشوف معاها_فردوس جعت كاش عشاء_ايه كيجاو جابولنا عشاء درك نروح نسخن ونحطلك _رحت للكوزينة سخنتلو وهو لحقني قعد فالطابلة بعد ماسخن سقيتلو لعشاء وحطيتها قدامو وجيت رايحة _أرجعي أقعدي تاكلي معايا مانحبش ناكل وحدي _ ماش درك كينجوع ناكل _رسم ابتسامة خفيفة على وجهو وطلع راسو .لالا قوليلي مرانيش قادرة نقابلك _هيثم نقابلك ولا مانقابلكش ماكانش فرق لأنو وجودك وعدمو نفس الشيئ _تخنزر وضغط على سنيه .ارجعي تاكلي مانعاودش لهدرة مرة ثالة وزيد راكي ترضعي _استغفرت في قلبي ورحت سقيت لروحي و قعدت ناكل بساكت حتى صونا ثلفونو وريبوندا أنعم خير .سكت زمان وقال_ ليوم مانجيكش راني تعبان راح نرقد (فهمتو مع رخيسة تاع صوفيا يعني مازال في خدايمو وماش راح يتعدل ولا يتبدل) زاد قالها بالغش . قتلك اقعدي في داركم ليوم مافيهاش ...صوفيا ماتهبلينيش ديجا عقلي ليوم هاربينو لخيوط أخطي ### _ كوبا وانا كملت عشايا وراح ننفجر من داخل من خماجو ليمازال فيه بصح ماحبيتش نبين اي إهتمام .كيكملت رفدت طبسي غسلتو ورحت لشمبرة رضعت رفيف وبدلتها ورقدتها وسهرت كما العادة مع قرايتي .شوي ودخل عندي لمحتو هاز قهوة في يدو طل على رفيف وقدم ووقف على راسي _فردوس كشما تحتاجي نعاونك _ لالا منحتاج والو شكرا _بصح شوفي فيا علاش تهدري بلاما تشوفي فيا لهذ الدرجة كارهتيني جاوبيني راني نهدر معاك مع انسانة ماش حجرة ؟_تعيش خليني نقرا تلفتها عليا _  اقراي اقراي هذا متعرفي نتي شوفي روحك كيفاش تبدلت عقليتك وطريقتك فالمعاملة _تنهدت وطلعت راسي ليه .هيثم رانييي نقرااا معليش تخليني نركز وماضيعليش وقتي قبل ماتزيد تنوض بنتك؟ _طابس براسو ليا وقرب مني كتر وحكمني من خدي وصبع يمشي فيه في شواربي وقعد يشوف فيا وابتسامة على وجهو وعينيه تاع خير ماش شر كلهم حنية وشوق .
الحلقة 35
بقلم لينا صبرينة
(موالف في بداية زواجنا كيدير هادا الجاست ويقرب مني كنت نتوتر ونرتبك ونحشم منو بزاف ومن حبي ليه ندخل بعضي بصح ليوم كيدارها عادي بقيت باردة بلا اي ردة فعل )_  وشبيكي فردوس وشبيهم عينيك باردين هكذا وعلاه وليتي كما الصنم لااحساس ولا كلام ولا حركة بدون اي فعل من عندك واش كاين _نحيتلو يدو .في رايك نتا واش بدلني زعما ماش عارف السبب حتى تسقسي فيا .درك نقولك بيا الضرب الوحشي لكنت تمدهولي وتخليني وراك مرمية. بيا الإغتصاب تاعك يوميا وانا بدمي ننزف بيا الإهانات والذل ليعيشتهملي وشكوكك ووسواسك وصلوني قريب نخسر بنتي ودرك راني فكرتك مليح بالاك جاك الزهايمر ولا تغسل مخك عليها نسيت وإذا حاب نزيد نفكرك نحكيلك بالتفصيل _ متفكر مليح واش درت موحال ننسى بصح نتي لوقتاه تبقاي شاداتهم عليا راهو فاتو شهور عليهم أنساي _كلامو ضحكني . من نيتك صح ننسى راح يبقا ليدرتو فيا محفور في قلبي ليوم الدين ودرك ليراه جامعنا غير رفيف وديرها مليح في بالك راني قاعدة معاك ماش حبا فيك مام انا كيفك محتمة عليا نبقى معاك على جالها وبس ومذابيك تروح وتخليني نقرا باه ننجح ونبني مستقبل لعمري مانسناكش دير فيا خير وتعاير من فوق _ شاف فيا نظرة حسيتها مبدلة كيشغل فيها لوم وعتاب لنفسو ومنها يحاسب روحو على أفعالو لقديمة وضميرو يفطنو كتر وكتر بصح ضميرو زاد أنبو في اخطاء دارها لغيري وانا دفعث ثمنها  بمشاعري .
فاتو شهرين على هاداك نهار وحنا على نفس الروتين خدمة قراية وتربية ورفيف لكانت معمرتلي وقتي وحياتي وشاغرتلي قلبي وعقلي وكل يوم نشوفها تكبر و تزيان وفيها شبايه هيثم . بصح الحاجة لتبدلت انو هيثم عاد يتقرب مني بطريقة ومعاملة مليحة وحنينة وطيبة ومختلفة على قبل وحتا يطلب فسماح صباح وعشية وطالب انو نعيشو كما اي متزوجين فرحانين ومتهنيين وبقا يحاول و يحاول ومالقا مني غير الصد والرد والرفض وهاد التغيير ليشفتو منو مابدل فيا والو باسكو فاق مع روحو بعد فوات الاوان بعد ماخسرني وقتل اي حاجة تتعلق بيه في قلبي ومازلت شاكة فيه مازال في علاقة مع صوفيا وزيد يخدمو غي نفس المكان تقريبا وفوق هاد الشيئ رجعو جيران عمي عليها ماقدرتش نصدقو ولو كان منظبط من خدمتو لدار وقليل وين يبات فالخدمة ووحتا اتصالاتو بيا كترت مي شكوك مازالت قايمة_جوزت ليكنترول مع هاديك السخانة فشلت موت وزيد المسؤولية تاع دار والتربية تعبوني بصح مانكدبش هو كان واقف معايا على كل حاجة تخصني وهو ليكان يديني ويجيبني ويرجع لخدمتو غير كيكونو عندو عمليات مايجيش ويبعتلي ميساج يعلمني وفليل كيماترقدليش رفيف يسهر معايا ويهزها وحكمها وانا نقرا قرايتي .والحمدلله مجهوداتي ماراحتش باطل وخديت نتيجة ممتازة وطلعت عامي وفرحولي كامل ومن وراها دخل رمضان جوزناه عادي ومرة على مرة نروحو عند عمي نفطرو وعلاقتهم بيه رجعت عادية سيرتو كيعدت مانشكيش وماشافوش لحمي اشكال والوان وترسمت في وجهي ضحكة .قبل العيد بنهار خرجنا انا ورفيف مع هيثم تكسينا وفي كل دورة يقولي هيا تدخلي هنا كاش ماتشري وانا كل مرة نقولو لا مانحتاجش من غير شريت جبة حمراء وصابو وروبة طويلة مع سروال نخرج بيها برك وزاد داني معاه سيف عليا نخيرلو واش يلبس بدوقي وغير يرطب فالحالة باه ينسيني وابتسامتو ليمتنحاش من وجهو _هاديك ليلة كيقالو غدوا العيد هزينا قشنا ورحنا لدار عمي وعاونت وداد سيقنا دار كوميلي ووجدنا الصالون وسينية الحلويات كيكملنا رحنا لبلايصنا لقيتو مع رفيف قاعد _مازالت ساهرة _لالا رقدت وناضت نتي طولتي _هاداوين كملنا هاتهالي نرضعها باه ترقد ياربي نوض بكري _مدهالي وقعد قاعد بجنبي _راح تبقى هنا؟_واش قصدك _والو من غير راح نرضعها ونرقد _ايه رضعي ورقدي شكون حاكمك _سكت عله وعطيتو بضهري وسمعتو كيقال .راهي تغطي في روحها شغل ماش حافضها وانا غريب عليها_كيكملت حطيتها في بلاصتها (حتا في هادي دار دارلها عمي سرير باه كينجو نلقا وين نحطها )دورت وجهي ليه لقيتو متكي ويشوف ليا وليت دورت وجهي وبقيت قاعدة وحطيت راسي في حافة سرير تاع رفيف ماقدرتش نحط راسي قدامو ونقابلو .كيغفات عيني تخلعت كيناض بزربة وينفض في روحو هز ثلفون وشارجاور وتخنزر فيا ووجهو راح يتفلق بالغش .خرج وفهمت عليه بلي ماعجبوش الحال كيماحبيتش نرقد قدامو بصح مايهمنيش فيه تهنيت منو حطيت راسي على لمخدة ورقدت ديراكت .
الحلقة36
بقلم لينا صبرينة
صباح العيد نضت بالحس فشومبرة لقيتو هو واقف عند لقوافاز لابس قميص فالأزرق بقيت نشوف معاه .صح انا ختارت هادا القميص واللون بالزهر برك بصح الصراحة جاه شباب لدرجة ماقدرتش نحي عيني منو .حتا لقيتو قالي صباح الخير _ااا صباح النور علاه نايض بكري ولا انا رقدت بزاف _نن انا برك رايح للجامع نصلي مع بابا وخاوتي _ممم مليح ربي يقبل _آمين _(اول مرة نشوفو رايح يحط راسو على السجادة ويصلي نتمنى ربي يهديه ويعرف طريق الصواب ) _هيا ومبعد راني رايح _خرج وانا رحت دوشت ورجعت لقيت رفيف ناضت رضعتها ولبستلها هاداك هو رحت صليت صلاة العيد وكيكملت رحت لبست انا الجبة الحمراء ليشريتها مطروزة من جيهة الصدر بلكحل وعلى لجناب فيها لاستيك من داخل تتشبح بيه على حساب لاطاي جاتني تحفة .زدت شعري ليسيتو شوي بليسور وحطيت بابيونة كحلة في شعري درك واصل لكتافي ومع مكياج خفافي برك وزدت لبست صابو وشفت روحي فلمرايا ولو بلا ذهب ليناقص وذنيا ورقبتي بصح جيت نقتل بالزين .انا بشرتي بيضاء وشعري كحل وعينيا مارو ومحوتين كبار ونيفي صغيرون وشواربي غوز من عند ربي وجسمي معدول مع طولي نوصل لهيثم لصدرو ولو بالطالو نوصلو غير لكتفو .مي ولو بهادا الزين الرباني بصح مافادش وعيشني جحيم .عليها الزين مايبني ديور و مادا ماجاب الصح كلو فالنية والأخلاق والعقلية ومع كل هادي المواصفات لبنشوفها في روحي  دايما نتفكر والديا بالتحديد كل ماتوصل مناسبة تحكمني غصة في قلبي عليهم .ولو كاين ناس معايا مي نحس روحي وحدي وضايعة كل مرة نعيد ونفرح ونبكي وحدي و مانلقاش حتى شكون في كتافي ولو ليوم بنيت عايلة وراني في وسطهم بصح مازالت ناقصة بزاااف _رحت هزيت رفيف وخرجت عندهم غافرت لخالتي ولوداد ونساء خاوتو  لقيتهم فطرو كملو وانا شهيتي مغلوقة ماقدرتش نفطر .بقينا حنا في بعضنا حتا جاو رجال رحت لعمي غافرتو وخاوتو غافرتلهم غير من لبعيد اما هو كان راح يقرب بصح سبقتو وهززت براسي وقتلو صحا عيدك ودورت وجهي ماقدرتش نقدم ونسلم عليه.بقينا مقصرين مع بعض ورفيف كانت راح ترقد وليت هزيتها دخلتها لشومبرة رضعتها شوي ورقدت .فتحت الباب نخرج لقيتو مقابلني طبعني من صدري بشوي ودخل وغلق الباب_فردوس ياك ليوم راه العيد حتا فالعيد ثاني وماتقريبش ليا تغافريلي _وشبيك نسيت غافرت عليك قبيل  _وعلاه هذاك تغفار مرا لراجلها .في ثانية جبدني لعندو من مسلاني وقرب وجهو لخدي باسني وغافرلي وبقا في نفس الوضعية نحس غير بأنفاسو سخونة في رقبتي وأنا لحمي شوك وجمدت في بلاصتي وهو شوي وجبد روحو وبقا حاكمني وعينيه يزغدو فيا راح ياكلني بيهم_هكذا المتزوجين يغافرو ماش كما نتي قبيل وزيد واش هادا الزين كلو سحرتي عينيا فيك لدرجة كينضتي جيت لحقتك نجري _سكت بقيت غير نشوف ليه _فردوس اهدري جاوبي تناقشي ابتسمي اضحكي في وجهي علاه عابسة وباردة هكا معايا ياك طلبت منك السماح الف مرة عدت نوض بيها نرقد بيها درت كلش باش تسمحيلي علاه مقسحة قلبك عليا ياك كامل نغلطو ربي يغفر ونتي لالا مادابيا نلقا منك تجاوب وتمدي فرصة لزواجنا قتلك حاب ننسى ليفات ونبني معاك حياة مستقرة . ردي عليا خليني نرتاح  ونرتاحو في عيشتنا ونحسو رواحنا متزوجين راه بزاف عليا وعليك مدي فرصة لنفسك قبل ماتمديهالي .فردوووس بلعتي لسانك ماتهبلينش بسكوتك .(كل كلامو تاع درك مالقيتش ليها اجابة او بالأحرى عاهدت نفسي مانزيدش ناقشو ونبعد عليه )_نحا يدو عليا وبعد .تما نتي ليوم ماش راح تهدري اوك ماعليش نبقا موراك حتا نطقك ونلقى منك ردة فعل وتفيدنا لزوج ونرجع قلبك ليا ونرجعك لحياتي وماش راح نستسلم _غير فتح الباب قابلتنا وداد قاتلو جيت نعيطلك جاو ولاد عمي راهم فصالون _ايه راني جيت _هبط وانا هبطت معاه .فليل دوشت بعد مارقدت رفيف ودخلت لاشومبر لقيتو متكسل رحت نشفت شعري بالمنشفة مليح .لقيتو قدم ليا ودورني ليه _واش كاين إذا على حقك ماكانش مانبقاوش نعاودو في نفس الهدرة _العام ليفات كيديتي الباك مقدرتش نباركاك ولا نمدلك كادو تاعك.