موجات حارقة

الجزء2

#موجات_حارقة
#فردوسة
الحلقة الثانية
#بقلمLina_sabrina
طاقتي راحت وانا نقاوم فيه وهو عمل عملتو بكل وحشية  .شوي وحبس تايه وموسع في عينيه تحت رجليا وينهج والعرق يسيل منو طلع راسو ليا وعينيه كانو يحكو على الف ندامة وبلي غلط غلطة عمرو وغلطة ماش راح ننساهالو .هز يدو وبقا يمسح في وجهو وراسو و هز روحو عليا لبس قشو وانا غير نبكي بساكت من سطر ومن حالتي _فردووس فردوووس شوفي ليا هنا  _أنا بقيت مصمرة عجزت حتا باه نزيد ننطق بحرف وهو زاد رجع ليا وبقا يهزز فيا ويخبط بصبعو على وجهي بشوي .فردوووس سامحيني كيقال هكدا استجمعت قوتي و بعدتو عليا و لميت روحي ونضت وهو غير يشوف بالعين_ رحت للدوش ونتمايل راح نتقطع بالسطر الخطوة بسيف نمدها . غلقت لباب وقعدت نبكي على زهري لمسود وين رماني وعلى حياتي لجاية كيفاش راح تكون مع انسان كما هادا ماعرفتش كيفاه قدرت نتخدع فيه وعلاه مارحمنيش وماشفقش عليا وعلى حياتي لقديمة وكيفاه قدر يشك فيا .جامي توقعت من انسان كما هو ناجح ومثقف والناس تشهد على أخلاقو المحترمة والعالية يقدر يخمم في حاجة كما هادي ومع الاخير يعاملني شغل حيوانة تحتو ويجي ويطلب سماح بكل سهولة .معاملتو ليا صدمتني فيه بان بوجه مختلف كان مخبيه عليا وعلينا كامل وفي ليلة وحدة دمر كلشي مليح في عقلي وقلبي _حتا لقيتو يطبطب فالباب . افتحي خليني ندخل عندك . ماحبيتش نرد عليه وهو بقا غير يخبط باه نفتحلو _فردوس شوفي خلاص راني خارج من الدار ماش راح نديرونجيك بصح نتي اغسلي ورجعي لبلاصتك ترقدي ربي يعيشك ماتبقايش لتم _كيسمعت الباب تاع برا تخبط وليت نضت غسلت عليا ودموع على خدي ماحبسوش .كيكملت لفيت روحي بالمنشفة طويلة وخرجت لقيتو قدامي تخلعت _طلع يديه لفوق _ ماتخافيش ماش راح نقرب ليك بصح تحتمت عليا نكدب عليك باه تخرجي من تم مانقدرش نروح ونخليك في هادي الحالة _ماحبيتش نهدر وفت عليه ودخلت شومبرة وغلقتها بالمفتاح وهو سمعتو قال مصيبة وزادت طاحت على راسي .مافهمتش قصد كلامو ادا على زواجنا ولا على دخلتو عليا بهادي طريقة .لبست قشي وهزيت لفراش بدلتو ورقدت وحرقة كبيرة في قلبي كنت حابة نتزوج ونتهنى بصح خرجتلي حاجة خلاف في حياتي ولا يوم تصورت انو هيثم يعاملني هكدا بصح ماش راح نحط عليه اللوم كامل حتا والديا ليهم دور كبير في دمار حياتي وحتى وصلت بيا لهادا الزواج . ربي يسامحكم ويسامح كل واحد دمر ولية وخلى ناس يستشفاو فيها ويشوفو فيها بنظرة ناقصة ونظرة احتقار واشمئزاز كأنو دارت حاجة عيب ولا حرام كأنها شيء قذر وخامج كأنهم هوما كاملين وهي ناقصة،كي شغل هي خيرت حياتها ومصيرها ونساو بلي ربي سبحانو وتعالى هو لي يقرر مصيرنا وقدرنا واوش من عايلة نعيشو فيها وكيفاه يكون شكلنا ومستقبلنا وكلش بالمكتوب حتى ونحاولو نغيرو الواقع والمستقبل بصح مانقدروش ماعندناش سلطة ولا قدرة باش نبدلو حاجة تاع ربي_طول ليل ماغفاتش عيني و بقيت غير نخمم ونتفكر في يامات صغري ومعاناتي ونسترجع في ذكرياتي الأليمة حتى وصلت لنهار ليتعرفت فيه على هيثم ولثم تكركبت حياتي وتخلطت كثر ماراهي مخلطة إنتقلت من مرحلة العذاب والوحدة والحرمان الى لمرحلة العذاب والحزن والذل وتحطيم لأحلامي وآمالي  ___
حياتي تكركبت من كان عمري 5 سنين من نهار أزداد خويا رؤوف تبدلت حياتي وتقلبت من ساسها لراسها ولو كنت صغيرة بصح مازلت نشفى على شوي تفاصيل صغيرة بقاو عالقين وراسخين في راسي .كيخلق خويا والديا حرموني من محبتهم وحتا معاملتهم معايا تغيرت بزاف لدرجة انو كنت نشوف الفرق لكبير بيني وبينو وزيد إهمالهم ليا بطريقة واضحة وانا كنت صغيرة مانفهمش مليح ونحس بالغيرة ونبقا غير نبكي ونحكم في قلبي وكما كان الحال كبرت في وسط هاديك المعيشة الناقصة حنانة وحب وذفئ وإهتمام من الأم والأب وماكنتش عارفة واش هو السبب وكانو كاينين أسئلة في راسي نحب نفهمهم متعلقين بحياتي بصح هوما مايجاوبونيش وأبسط سؤال هو علاه اسمي مغاير على إسمهم . كيوصلت لعمر 11 سنة وحد نهار كنت نقرا فالقسم حتا لقيت روحي تصرعت طيحت فالأرض وسمعي يتقال عليا وهادي الحالة تكررت معايا شحال من خطرة وكل مرة المدير يعيط للأب تاعي يجي يديني باسكو كنت مانطولش ونفطن بصح نحس روحي فابل وضبابة في عينيا ومرات مانحكمش فالتوازن تاع المشي تاعي ونطيح بدون سبب وحتا في كتابة دروسي وقرايتي ماعدتش نقدر نركز مليح ومرات يجيني القيئ ونحس راسي راح ينفجر بالسطر ومانقدرش نهزو_كان بابا يجي يديني وطول طريق يصوغ عليا ويخبط وينفض في روحو و في فمو كلام عييت نفهم مقصودو بيه (ندمت على نهار ليجبتك وعلى نهار ليشفتك فيه ) وانا كينسمع يقول هكدا نبقى غير نبكي بالشهقة وألف سؤال في راسي وهو بقولي اسكتي صوتك مانسمعوش .حتا نعود نسد فالبكى من خوفي منو بصح روحي من داخل تتقطع .
الحلقة 3
بقلم لينا صبرينة
وآخر مرة تغاشيت داوني لسبيطار ولتم بعد يامات عرفت بلي عندي ورم خبيث فالمخ (سرطان الذماغ) بقيت غير نسمع ولو كنت صغيرة بصح قدرت نفهم على طبيب كيقالو بلي حالتها صعيبة وحياتها في خطر وراهي في مرحلة درك حساسة لازمها تبدا فالعلاج في أقرب وقت باه مانخسروهاش وحنا نديرو لي علينا والباقي على ربي _بابا هاداك الوقت كنت نشوف في وجهو فاسد خلاص وغير يروح ويرجع ليا يجيبلي معاه الماكلة ويبقى يشوف معايا وساكت ويعاود يروح بلا مايواسيني ولا يفهمني ولو كنت نسقسيه ونبكيلو بصح مايحبش يجاوب . حتا قالولو تقدر تخرجها وماطولش وتبدا داوي فيها _خرجني غير هو وحدو والام تاعي من نهار دخلت لسبيطار ماشفتش وجها ماجاتني ماحوست عليا .كيدخلنا لدار رحت نجري عندها باه نحضنها بصح هيا صدتني وبعدتني عليها وقاتلي روحي لبيتك بدلي قشك _رحت مكسورة الخاطر حتا لهاديك لعشية سمعتهم يتناقشو مع بعض وهيا قاتلو ماش ملزومين بيها نرجعوها منين جبناها وخلاص مانقدروش على مصاريفها وزيد بزيادة مانحتاجهاش في داري ارميها كما رماوها ليولدوها ضهرو هوما حسو بالبلية وانا جبتها لداري كيف لحمارة درك خلاص وليدي رؤوف مكفينا وموفينا حمدلله _هبطت دمعة من عيني ودخلت عندهم _ماما علاه ترميني ياك انا بنتك دايما نشوف ونسمع لبنات ليقراو معايا يحكو على ماماتهم يقولو كيفاه يحبوهم واش يشرولهم ويخافو عليهم ويحضنوهم ويحبوهم ونتي تقولي لبابا يرميني علاه تعيشي خليني عندك مانقدرش نعيش بعيدة عليكم _شوفي فردوس راكي كبرتي وتفهمي نتي ماش بنتنا من كنتي صغيرة جبناك من المركز تاع اليتامى وتكفلنا بيك ربيناك هادا ماكان عليها إسمنا حنا و رؤوف ماش كما إسمك فهمتي درك نتي ماش بنتنا لا انا يماك لا هادا باباك لا رؤوف خوك _بقيت مصدومة هاداك الوقت فيها وماقدرتش نتقبل الحقيقة حضنتها وبديت نبكي وتهسترت ونقولها انا بنتكم ورؤوف خويا وغير مرضي ليخلاك تكدبي عليا(بقيت غير نحلل فيها باه تتراجع على كلامها ) حتا لقيتها طبعتني جابتني مرمية فالأرض وقاتلي بلاصتك ماش معايا وجدي روحك هاد ليام نرجعوك وهوما يتكفلو بيك حنا مانقدروش على المصاريف تاعك _شفت مع بابا ماهدر والو بقا غير يشوف ويخمم وانا مالقيتش سند غير مخدتي ودموعي _حتا وصل نهار ليدخلت ماما لبيتي وجمعتلي  قشي كامل فهمت بلي ليوم هو يوم الوداع . لبستلي وكلمة مانطقتهاش غير بسكات كيكملت قاتلي روحي وربي يشفيك ويسهلك في حياتك _فهمت عليها ومشيت هادوك الخطوات حسيت بعمري راح تخرج ودعت ماما وخويا والدار غير من لبعيد وغصة ووجع في قلبي داخلي يتحرق ويتقطع بموس حااافي بصح آهاتي واحد ماسمعها  _ركبت وديمارا بابا وطولنا فطريق حتا رقدت .كيوصلنا نوضني هبطني كيلحت عيني للقدام شفت لائحة كبيرة مكتوبة فيها (مركز الطفولة المسعفة ) دخلنا استقبلونا في بيرو وقعدنا مع مرأة كبيرة شوي فلعمر و مكتوبة لوحة صغيرة فالبيرو تاعها بلي هيا مديرة وبقات تحاول فيه باه يتراجع على قرارو _بصح هو بقا رافضني وقالها كل الوثائق ليطلبوني راني درتهم الله غالب طفلة مريضة وانا ماعنديش باه نداويها ماش محتمة عليا _بقاو يحكو مدة وانا مصمرة في بلاصتي ودموعي يهبطو جريان على خدي وهاد الشيئ ماخلاش فيه رحمة ولا شفقة ورجعني معاه بالعكس تخلى وسمح فيا وخلاني وحيدة ومازادش شاف وراه وبقيت وحدي مكسورة نواجه في حياتي المجهولة .جات المديرة حضنتني بكل قوتها وعطاتني حنانتها وقاتلي ابكي يابنتي بالصوت خرجي صوتك ماش مليح تخلي البكى تاعك مسدود داخلك _لتم وليت نبكي ونعيط بالصوت ونشكي في حضنها لقيت ألف دفئ وحنانة كنت محرومة منو هادي سنين وبقات هيا ومعاها شوي نساء يواسو فيا وحتا يبكو معايا .بسيف تكالميت وبدات رحلتي في هادي الدار عاملوني مليح وعرفوني على بزاف بنات كما حالتي بصح صحتي ماخلاتنيش نتأقلم مع الوضع كل يوم نتغاشا ونطيح كل يوم نبات نبكي بالسطر لي في راسي وهوما نسمع فيهم يقولو نسناو  فلسلطات بالاك هاد ليام بجو يدوها ويتكفلو بالعلاح تاعها خير ماتبقا تترمى فسبيطارات واحد مايشوف ليها وتضيع بصح ماكانش رد منهم _حتا جاء يوم الفرج وجاء راجل قال مستعد نتكف بالعلاج تاعها كامل وتكون هيا جنة تاعي ليمخبية عند ربي وادا تقبلو حاب حتا نتكفل بيها ونديها لداري _وكما كان الحال هاداك الراجل قدم الطلب تاعو بصح كانو في وجهو شروط تعجيزية ماقدرش يتكفل بيا ويديني لدارو (وهادي حالة معضم الناس ليحابين يتكفلو بيتامى ومجهولين النسب .الدولة تحطلهم شروط صعيبة وتعجيزية .لتم الضحايا هوما لولاد . لولاد يبقاو بدون اسم ولا أهل ومجهولين )
بصح الشيئ الايجابي انو سمحولو يتكفل بالعلاج تاعي كامل وكيجاء عندي وتعرف عليا عند قرب .لقيتو راجل كبير فالعمر وإسمو عمو رابح وقالي ماتخافيش ولو ماقدرتش نديك معايا لداري وتتعرفي على مرتي وولادي بصح ديريني من ليوم انا باباك ومن ليوم أي حاجة تخصك راح نكون واقف معاك فيها ومايخصك والو وبربي انشاءالله تداوي وتبراي وترجعي خير من كنتي وانا راح نبقى واقف موراك حتا تكبري _وعلاه انا بالتحديد علاه خيرتني انا ليتعاوني مع أني مريضة وكاين بزاف بنات غيري تقدر تتكفل بيهم _مانعرف يابنتي نتي من نهار حكاولي عليك سكنتي راسي وربي بعتني ليك وحبيت ندير خير نلقاه في آخرتي ونتي تلقاي حياة مرتاحة وفيها استقرار  _بقيت نهدر معاه ورتاحت من كلامو بزاف ومن تم بدات رحلة تاعي فالعلاج القاهر وكانت المدة تاعو 3 سنين بدون توقف بصح قرايتي قدرت نكمل فيها بإصرار ومثابرة مني .