موجات حارقة

الجزء 11

الحلقة 105
بقلم لينا صبرينة
فردوس وين رحتي جاوبنيني ماتقلقينيش عليك فردوووس_هيا تهدر وانا حاسة روحي في عالم ثاني شغل في دوامة وراهي تدور بيا مع عينيا فيهم ضبابة وودنيا نسمع منهم غير صونايا قاويا ترن داخلهم راسي تقيل ويلعب بيا جسمي يفيبري في بعضو لدرجة رجليا ماقدروش يحملوني وطيحت وسطر يقطع فيا في كرشي .فالثانية ليطحت فيها بقيت غير نخمم في ضياء وحدو فدار حاولت اني نفتح عينيا ونتحرك بصح ماقدرتش كأني تشليت ومنها غيبت على الوعي _ومن تم مرة على مرة نسمع في اصوات بكا وعياط وهدرة بصح ماقدرتش نفرز واش كاين . ونعاود نغيب على الوعي .مانعرف شحال فات من وقت باه قدرت نفتح عينيا و ماقدرتش نشوف مليح الصورة تقريبا منعدمة .حسيت بيد على راسي تمسح ونفس سخون في وجهي عرفتو هيثم من ريحتو (ريحة راجلك تقدري تفرقيها مابين ملايين الرجال موحال ماتقدريش تعرفيه) همسلي في وذني .فردوسة حبيبتي ماتخافيش راني هنا معاك مايكون غير لخير واسمعيني حبيبي لخبر ليوصلك غالط والله ماتزوجت عليك _ماقدرت نجاوبو ولا نتحرك ولا نشوفو من غير نسمع في صوت راجل بهدر معاه .هيثم لازم ندخلوها لبلوك ومن الاحسن تبقى فاقدة الوعي خير باسكو ردة الفعل تاعها ممكن تكون خطر عليها _ردلو هيثم .يعني ماكانش امل _من تم مازدت شفيت على والو _كيفطنت فتحت عينيا قدرت نشوف شوي شفت هيثم فوق راسي وزوج طبة معاه _فردوس راني هنا معاك شوفي كما نقولك ديري اوك .هيا حركي صبعك برك _ حاولت وحاولت بصح ماقدرت ندير والو هبطت دمعة سخونة كيحسيت روحي تشليت وهو فوق راسي نشوف فيه غير شوي صورتو ماش واضحة مليح .يهدر معايا ومعاهم وحاول يحرك حاجة مني بصح مانفع والو _هيثم خليها ليلة تريح ماتبقاش فوق راسها وغدوا كيروح تأثير دواء ممكن تتحرك عادي علاه راك مقلق_لالا نبقى هنا معاها _ ياهيثم خمم في صلاحها خليها ترتاح لازم يتنحى عليها أي ضغط قدامها _هدرو شوي معاه وقنعوه خرج وانا بقيت وحدي نسمع غير في اصوات ليزاباراي كان كلشي تقيل عليا وحسيت هادي الحالة جازت عليا في زيادة رفيف .ديراكت جاو في بالي بناتي بصح ماعندي حيل لا نتحرك ولا نهدر وعقلي يديا فيا ويجيب مرة نفطن مرة نرقد _كيزدت فطنت لقيت فرملية معايا شافت ليا وقاتلي حمدلله على سلامتك مادام راكي بخير_ كيشغل قدرت نحرك راسي مام يدي ورجليا قدرت واول كلمة قلتلها هيا بناتي _ شافت ليا وخرجت بلا ماتجاوبني حتا دخل طبيب .دارلي محاولات في يديا ورجليا لقا كلشي فيا يتحرك قالي حمدلله على سلامتك _حبيت نوض ماقدرتش وحدي وزيد سطر في كرشي قطعني وفشلني _ لا مادام ماتتحركيش راكي دايرة عملية اصبري حتا تفطني مليح وتحركي بشوي _ حطيت يدي على كرشي لقيتها فارغة ديراكت هبطو دموعي .تعيشو جيبولي بناتي نشوفهم(كنت نهدر بصوت خافت ومتقطع ) _ سكت ومالقا مايجاوب_ ربي يعيشك حابة نشوفهم جيبوهم ليا _ سامحيني مادام الولاد يتعوضو بصح صحتك ماتعوضش الله غالب توام ماتو في كرشك كيضربتك لاطنسيو البركة في راسك _من غير قالها جاني انهيار عصبي قلبت سبيطار بلعياط صوتيي تسرح وصدرتي تشرح غير بلعياط وعضلاتي تفكو .عشت حزن مضاعف وتجرعت ألم موت ضنايا مرة خلاف ماقدرتش نحمل زوج صدمات في وقت واحد من جيهة لخبر ليوصلني عاى هيثم ليكان ضربة قاوية كسرت ضهري ومن جيهة بناتي ليراحو وزدت عشت شعور حرمان لولاد مرة اخرى ماحبستش من لعياط حتا دارولي برا باه تهدنت وبقات روحي من داخل تتقطع طراف طراف ومايحس بالجمرة غير ليكواتو .خرجوني لشمبرة عادية وبقيت فيها مكسورة من كل جيهة .
الحلقة 106
بقلم لينا صبرينة
سمعت صوتو برا يخاصم فيهم .شكون قالكم تخبروها وانا غايب علاه ماتعيطوش قبل _المهم نسمع غير في عياطو مقلبها مانعرف معامن .غير لمحت خيالو داخل دورت وجهي عليه .حسيت بيه كيقدم ليا وقعد قدامي وحكم يدي _فردوسة ماتبكيش ياروحي كينشوفك هكدا والله تقتليني شوفي فيا حبيبي ماديريش هكدا الله غالب ربي ماكتبلهمش يعيشو _شفت معاه لقيت عينيه مدبالين وحومر ووجهو شاحب _فردوس لخبر لوصلتهولك سلوى غالط ماش صحيح ياك مصدقتيني (بقيت نتأمل فيه بحقد و كارهة قربو ليا ومكدباتو )اتحملي حبيبي وربي يعطيينا الصبر على لبنات وتقبلي قضاء الله هكدا كاتبة من عندو _ كيقال هكدا تمنيت نعيط بأعلى صوتي عليهم بصح ماقدرتش ورقاد غلبني ورجعت كلما نفطن نقلب سبيطار بصوتي رجعت ندخل في انهيار عصبي ومرات نحس روحي دخلت في غيبوبة نفشل وقلبي يولي يضرب فالألف حتا رجعو يحطولي دواء باه نعاود نرقد وهيثم يقولي سامحيني لازم نديرولك هكدا باه ماتنضريش ماش حاب نخسرك .كنت جسد بدون روح ومالقيتش الفرصة باه نعاتبو ونواجهو حالتي النفسية كانت ندمرة .حتا عمي وخالتي كيجاو عندي ماقدرتش نهدر معاهم حسيت روحي من داخل ميتة ومشلولة على الهدرة وفاتو ليام على نفس الحالة .حتى رجعت لداري وكانت معايا خالتي وهيثم ليجابني كنت نرقد نقعد ونشوف بالعين وخالتي متهلية في كلشي ومرات تجي تهدر معايا ماتلقاش رد مني . حتا ضياء مسكين يجي عندي نحطو في حضني ونبكي بساكت .بعدها بيومين جات ليا خالتي قاتلي راني رايحة لدار ولعشية نرجع بنتي وهيثم راه معاك وضياء راه راقد فالبيت .هيا راحت وهو دخل عندي باسكو من نهار جابني مازدش شفتو غير نسمع صوتو ونحس بيه فليل يجي يديرلي برا ويخرج _قعد قدامي وجبد لاباراي يقيسلي فلاطنسيو .كيكمل كان راح يديرلي برا في دراعي شفت معاها ومعاه وليت خبطتها عليه جات في وجهو سيلت منو الدم وهو متفاجأ وانا نضت وقفت (بزاف عليا الهدوء ليراه محبسني فيه )_ علاه تقسيلي فلاطنسيو اااه علاااه وعلااه ديرلي فدواء هادا علاه ترقد وتهدن فيا بالدواوات من واش هارب ماش حاب تخلينيي نواجهك حاب تهرب من أسئلتي_ناض وقف .فردوس بلعقل راكي مريضة ماش مليح ليك تطلعلك لاطنسيو راكي سلكتي من الموت _ياريت مت وتهنيت من وجهك ياريت دفنتني مع بناتي _ماتقوليش هكدا عارف واش ليبيك ومخلي هاديك لحكاية حتا تبراي ونهدرو فيها مليح _ واش تهدر ااه واش تقول واش تبرر راك تزوجت ياهيثم درتها بيا وكسرتني وغدرتني علابالك نتا ورخاس كيف كيف_مسح وجهو من دم وقدم ليا وموسعلي عينيه _ يكفييي فردوس صايي مادرت والو وماغدرتش بيك راني ماتزوجتش ولكلام ليوصلك غالط _ واش ليغالط مرتك اسمها ايناس وموالف نسمعك تهدر عليها مع يماك .رحت لفرنسا وديتها معاك واش بقى كلشي تكشف ياهيثم ليخبيتو عليا وحدة برانية كشفتك في دقيقة ونسيت بلي الدنيا صغييرة واخبارك يوصلوني _ ماش هكدا فردوس اقعدي خلينا نهدرو بشوي ونفهمك _ بعد ماتقرب مني ماتوشيني وجاوبني قد سؤالي باسكو نار راهي شاعلة فيا من داخل قولي تزوجت هادي ايناس ورحت معاها لفرنسا؟؟ .صارحني هييثم قولي الحقيقة برك _حط يديه لزوج في صلبو وتنهد تنهيدة طويلة .غمض عينييه وعاود فتحهم هاديك الثانية حسيت بيها عمري طاح _ زواج ماتزوجتش بصح فرنسا ايه راحت معايا بصح غير باه ..._كبول رخيس ماتسواش طحان .شفت بايط تاع دواء قدامي بديت غير نخبط فيه بيهم ونعاير ونبكي ماخليتش حاجة قدامي مالحتهاش عليه ومع الترخاس وجاتني القوة باسكو دواء راح مفعولو وفطنت مع روحي
الحلقة 107
بقلم لينا صبرينة
بلعقل فردوس راني نقولك ماتزوجتش والله غير زواج ماكانش منو _ بصح الوقت ليكدبت فيه عليا نتا رحت معاها  واش يضمنلي بلي صح ماش متزوج يالكداااب _ قسما بالله ماعقدت عليها من غير كريتلها دار يقعدو فيها يماها وبنتها برك وهيا كيتبرا تروح ليها وانا متكفل بكلشي هادا ماكان _ كدااااب كداااب _ماااانيش نكدب صدقيني ادا تحبي نديك للبلدية وشوفي بلي ماعقدت على حتى وحدة _ ممكن ماعقدتش بصح متزوجها بالسر يماها كشفتك يارخيييس _ فردووووس اسكتيي يا### قتلك ماتزوجت لا بالعقد ولا بالفاتحة _ واش يضمن كلامك صحيح نتا من لخر ماتشبعش من نساء عينك زايغة ويكفي ديتها معاك لفرنسا وخلتيني  هنا مخدوعة فيك هازة زوج توام ونتعدب ونتا فرحان وتتمعشق معاها _ اوووف يعني صايي نتي ماش راح تصدقيني وحابة تصدقي واش يقولك راسك وواش سمعتي يااااك علاه ماش حابة ديري الثقة فيا _ باسكو نتا وجه الرخس ماش وجه الثقة فهمت درك انا الغالطة درتلك قيمة وعطيتلك فرصة ونتا ماتستاهلهاش الله يلعنك ياهيثم _هزز براسو ووجهو حمر راح ينفجر وحاكم قبضة يدو .مالا شوفي ليا مليح انا يكفيني اني زدت دفنت بيديا زوج بنات تحت تراب يكفيتي خسرت 4 ولاد من صلبي يكفي اني طول هاد سنين وانا نبرر ونصاير ونحاول ونتجرجر تحت رجليك يكفيني عداب الضمير ليراهو فيا ومتبعني و بسبابك نتي وبسباب عدم ثقتك فيا زدت خسرت بناتي .ودرك راني كلما نشوف في وجهك نتفكر بلي ربي راه يعاقب فيا بضنايا واحد مور خوه .علابالك بلي كينشوف وجهك روحي من داخل تتكوى راني نتعدب عداب جهنم وانا حي. وجهك يفكري في دنوبي كامل ودرك كملتيها عليا بتوام علاه يافردوووس تعرفي حاجة انا ونتي وجوهنا لبعضنا رجعت كوشمااار كل واحد فينا كيشوف وجه خوه نتفكرو غير الماضي لكحل والدليل تاعك هو ثقتك المعدومة فيا صدقتي كلام ناس ديراكت كون جيتي واثقة فيا في هاديك دقيقة ماتصدقيهاش ومايصرا والو ليك وتعيطيلي تفهمي مني بصح نتي ديراكت صدقتيها والدليل هيا لاطنسيو ليضربتك وصلتك للموت وتفرت غير فينا راحو بناتنا ليكنا نوجدولهم باه ييجو راحو كبدتنا وخلاو حريقة في قلوبنا ويبقى مكتوب ربي ماكتبلهمش بصح غاضتني منك بعد كلشي صرا بيناتنا وكلشي فوتناه مع بعض ماكيش مصدقتيني (كان يهدر وعينيه مغرغرين دموع )فردووس انا راسي راح ينفجر لهموم الكل طاحت عليا ومالقيت ليفهمني ويفهم واش راني نتعدب ونتي درك تصدقي تكدبي مايهمنيش ترجع ليك انا تعبت تعااابت ونهار تحبي تسمعي واش عندي نشرحلك اما درك راكي تسمعي لروحك برك  _ هز روحو وخرج من دار وانا قعدت فالأرض نبكي ماتوقعتوش يقولي هادا لكلام ويلومني وزيد آخر شيئ توقعتو يقولي وجهك رجع كوشمار ليا يعني سور كرهني عليها راح يحوس على البديل وماقدرتش نقنع بلي ماش متزوجها علاه لمرا تكدب وتقول راجل بنتي ودير اشاعة لبنتها كون ماجاش صح وبفمو قال راح معاها لفرنسا وزيد كرالهم دار وخبى عليا وكنت آخر من يسمع اكيد فيها إن وراه يكدب وممكن كلامو صح ماش راح نقدر نحط فيه ثقة نهائيا _ بقيت مدة فالأرض نخمم وفالأخير خديت قرار ومايهمنييش العواقب .
الحلقة 108
بقلم لينا صبرينة
جبدت ثلفوني عيطت لحسيبة ليتخدم معايا راجلها يكري ديار وحكيتلها وقلتلها نحتاجك تعاونيني دبريلي دار قاتلي ايه ارواحي لبلاصة لفلانية تلقايني .كوبيت ونضت لبست قشي ولبست لضياء ولميت قشنا في كابة صغيرة هادا كامل والدوخة عقابي .رحت لدواء شربت فيتامينات وماحبيتش نشرب دواء ليركحني خفت ندوخ وطفل في يدي وجبت ورقة كتبت فيها (هيثم راني رحت وماكالاه تحوس عليا خلصت بيناتنا وفض مكتوبنا طلقني وريحني وريح نفسك واتزوج بالانسانة ليتريحك ووليدك ماش راح نحرمك منو راح ييجي يوم ونرجعو لحضنك بصح انا انساني ) هزيت الورقة حطيتها فوق ثلفوني باسكو ماش راح نديه معايا مادام وليدو معايا قادر يشكي ويجبد بلاصتيي ماشش صعيبة . هزيت كلشي ومع دراهمي  ومشيت للحظة كنت راح نتراجع بصح اصريت اني نروح درك عندي خدمة وشهريتي نتكل على روحي .هبطت وبديت نمشي رجليا تقال عليا وغير نخمم واش صرا حتا وصلت لهنى لقيت السبب الرئيسي والديا .حكمت البيس ورحت عندهم كيوصلت طبطبت فتحتلي يما .فرحت بيا واستقبلتني اول مرة ندخل لداهم لقيت راجلها قاعد على الكانابي وضعيف وحالتو حالة باين عليه المرض _ مرحبا بنتي على سلامتك _ نزلت من يدي الكابة وضياء هازاتو ماحبيتشش نقعد .بلا مانجاوبو قتلو راح نطلق _ديراكت وجوهم فسدو وسقساني علاه تطلقي واش خصك معاه _ خصني والديا يكونو على كتافي خصني صغري ليضاع فالشارع خصني التعويض على الحرمان _ بنتي ارجعي لراجلك والله مايفيدك غير هو وادا مشكل بيناتكم حلوه _ ههههه ماتخافيش ماش جاية نعيش معاك نتوما آخر ناس نخمم نجي ليهم ونتسند عليكم بصح دنبي راح يبقى في رقبتكم _ علاه تهدري هكدا رانا على مصلحتك قلنالك ماتطلقيش _ايه مصلحتي كون خممتو فيها بكري قبل ماترموني والله مانسامحكم ليوم الدين _ نضت مشيت وهيا ورايا تحاول فيا باه نقعد يهدرو معاياا بصح طنشتها ورحت ليلاصة ليقاتلي حسيبة عليها . لقيتها تستنى فيا هزت عليا ضياء _ فردوس وجهك صفر ماكيش قادرة _ ايه واش ندير ماحملتش نزيد نبقى عندو كيفاه عندكم كاش دار نكريها نقعد فيها _ عندنا بصح ماش راح نخليك وحدك مع طفل بهادي الحالة امشي معايا لداري _نن ماش حابة نتقل على حتا واحد من ليوم نتكل على روحي باسكو قادرة على شقايا مانقدرش نروح معاك _فردوس على وجه هادا الملايكة خمم فيه كون يصرالك حاجة ويبقى وحدو واشش يصرا فيه_ بقات تقنع فيا حتى غلبتني وداتني معاها لدارها عندها زوج بنات صغار يهبلو يشبهولها .دخلت دوشت وصليت وقعدت فالبيت مع ضياء ولبنات يلعبو معاه حتى سمعت صوت راجل عرفتو راجلها .شوي ودخلت عندي _حسيبة نتي جبتيني هنا وراجلك بالاك مايحبش _ نن صايي عيطتلو قبل وخبرتو وقال ماش مشكل ماتقلقيش راكي في دارك ابقاي قد ماتحبي هنا حتا تفهمي روحك واش  حابة وترتاحي _ يكتر خيرك ختي _ يكتر خير ربي .
الحلقة 109
بقلم لينا صبرينة
كنت قاعدة على كانابي ونتفرج من تاقة على برا ولولاد يلعبو فوق زربية بالألعاب قدامي حتا لقيت حسيبة قعدت قدامي وحطت يدها على رجلي _ وين سافرتي بأفكارك _ افكاري راهم يحوسو على حل _ عندك قريب شهرين ونتي هنا لوقتاه تبقاي متخبية وهاربة _ علاه قلقتك ادا ديرونجيتك نروح _ يافردوس قتلك نحطك على العين والراس بصح هادا ماش حل ليتبقاي متخبية وزيد خممي طفل واش دنبو باه تحرميه من باباه _ ماش راح نحرمو راح يجي يوم ويتلاقاو بصح ماش درك انا خديت قراري ماش راح نرجع لعندو _ بصح هو راه يحوس  عليك راجل راه مقلب عليك الدنيا نهار جاء يحوس عليه فليكول والله حالتو تشف وحتا حشمت كيكدبت عليه.وبقا مرة على مرة يجي والله غاضني باين يحبك وماش حاب يخسرك ومحتاجك _ ماعندو مايدير بيا يروح عند مرتو ليمخبيها على الناس _نتي علاش ماش حابة تصدقيه _ماقدرتش ياختي الشيئ ليعشتو معاه ماخلانيش نقدر نصدقو _عارفة بصح نتي مامديتيلوش فرصة يفهمك وهربتي _الهروب منو كان انسب حل باسكو قالي وجهك يفكرني في دنوبي يعني كان غير ضميرو ليخلاه يبقى معايا ماش حب _نتي موالفة تحكيلي انو خيرك نتي على صوفيا ولو هيا كان عندها طفل ونتي بلا ولاد وهكدا وخيرك عليها وزيد تعاملو معاك تبدل ورجع حنين وبرهن حبو بالأفعال واش يزيد كتر _عملتو الاخيرة كسرتني وحطمتني _ بصح راه قالك ماش متزوح كون سمعتيه ساع نتي برك تسرعتي_ولو كلامو صحيح وماش متزوج بصح علاه خبى عليا بلي راح معاها لفرنسا وخبى عليا بلي كرالها دار علاه ماصارحنيش انا من قبل كيصرالي مشكل مع العساس ديراكت خبرتو باه نعيشو في وسط ثقة في بعضنا وماكانش حاجة تتخبى وتفسد علينا بصح هو حطني لور وداير رايو كأني مانهموش _مانعرف انا كون ليا تروحي لعندو وتحكي معاه وتفهمو بعضكم _ لالا مانقدرش عارفة كون يشوفني غشو كامل يرجع متضاعف ويرجع بقسى عليا _بيانسور تلقايه مغشش راكي هربتي تعرفي واش يعني هربتي منو وخليتيه وزيد وليدو معاك _عارفة وهادي الخطوة نورمالمو نديرها مور زواجنا ديراكت كيكنت براسي بصح الكوراج ماكانش عندي _ وافضل ليك هاداك الوقت كييماتسرعتيش وخرجتي باسكو الشارع عمرو ولا يرحم كنتي سوفريتي كتر وتشوهت سمعتك والله اديها من عندي كان عندك عقل موازن مع ايمانك لربي صبرتي وشفتي بلي نلتي وعوضك ربي كون هاداك الوقت هربتي منو كون راكي من هاديك دقيقة ونتي تتمرددي وحياتك تشهوت _ واش الفايدة راني نشوفها نفس الشيئ تمرمدت مع هيثم _ ماش كيفكيف على الاقل هيثم من نهار جبتي رفيف تبدل معاك ومازادش ضرك جسديا وبقات غير الآثار النفسية عكس الشارع يأثر من جيهتين .شوفي ليا فردوس انا وراجلي ماعندنا حتى مشكل انك تقعدي هنا عندنا بصح زيدي خمي قبل ماترجعلك ندامة وادا حابة تطلقي ارجعي ليه واطلقي بالتراضي والتفاهم خير مايحرمك من وليدك خميي برك _ هززت براسي وسكت وبنتها قالتلها .ماما ضياء خمج فلاكوش .ناضت هيا بدلتو وبقيت نتفرج فيهم يكتر خيرها بيها براجلها عاملوني وحدة فيهم ومنهم و طول هاد الشهرين كنت كل مرة نقولها نروح نكري وحدي مايخلونيش باسكو صحتي بزااف قراف عندي فقر الدم حاد ولاطنسيو تطلعلي بزاف من تخمام وفوق هاد الشيى الدوخة ومرات حتا تجي وحدة تحطلي سيروم فدار باه نتقوى عليها ماخلاونيش نروح نكري ونبقى وحدي خافو عليا وعلى ضياء .خيرهم ووقفتهم معايا ماش راح ننساه ____بعد سمانة فليل زاد عليا الحال وطلعتلي لاطنسيو وعرفتها من تخمام ليبزاف حتا داوني لسبيطار هبطوهالي وبعتوني نروح نشوف طبيب باسكو شاكين حتا فالغدة الدرقية دير هكدا من القلقة .لصباح رحت مع حسيبة وراجلها لطبيب .فوت عندو وعطالي ساع ليزاناليز غدوا صباح لازم نديرهم .
الحلقة 110
لقلم لينا صبرينة
خرجنا خبرنا راجلها و ركبنا وخليت في حجري ضياء حتى صونا ثلفونو هز عليه وسمعت كيقال رانا راجعين لدار نتلاقاو ثما_ماحطيتش بالي معاه حتا قارا وطلعت راسي للقدام شفت هيثم واقف ومتكي على طونوبيل تاعو وحاط يديه فلجيوب ولابس كلشي قري .طلع راسو شاف لينا والطريق منين يسكنو هيا جايا طلعا كنا حنا مقاريين تحتو فلحدور وهو فوقنا بيناتنا دار ونظرة تاعو ماقدرتش نفهمها واش تعبر _سامحيني ختي بصح كان لازم عليا نخبر راجلك حالتك ماتعجبش _نطقت حسيبة تخاصم فيه علاه خبرو وبقاو يهدرو هدرة تجيب هدرة وليت انا خرجت من طونوليل وهوما بعد هبطو مديتلها ضياء ومشيت جيهتو هبط راسو للأرض وانا رجفة مشات فيا خطوة تاعي تقالت علا وليت غير نكالمي في روحي بين بين نفسي اهداي اهداي برك مكان والو افردوس مادامك هربتي منو زيدي واجهيه وهو كما عادتو كلو اناقة وهيبة وكما يقولو يالمشبح من برا واش حالك من داخل .وقفت قدامو ودخلت يديا داخل جيوب المونطو ووقفت مصمرة الوقفة بسيف حاكمتها باسكو كنت تعبانة بزااف جسديا ونفسيا وزادلي الخوف .طلع راسو ليا وحط عينيه في عينيا وعينيه من تحت كوحل وحومر من داخل باين عليه الإرهاق مع كل اناقتو الا انو وجهو كان فاضحو_ شهرين شهرين ونتي في دار راجل غريب عليك وعليا وهربتي من دارك لدارو بصح التجاهل والبرود افضل حل نديرو معاك وتستاهليه _كان راح يمشي وليت حكمتو من دراعو .واش قصدك بهادي الهدرة_ نحالي يدي منو ومشا جيهتهم صافح على راجل حسيبة وهز ضياء وجاء جيهتي وصح تجاهلني وحطو فالكرسي تاعو لور داخل طونوبيل سكر عليه ودور ليا _ نتا واش راك ديري وين مدي فيه _ ادا حابة وليدك تلقايه في دارك وادا حابة تسمعي كلامي كامل وتركزي في كل كلمة نقولها وتفهمي وتقتنعي ماش تبعي واش يقولك راسك من سلبيات ساع ارواحي لدارك تلقاي واش يساعدك وقبل ماتجي لازم تكوني واثقة من روحك باسكو الدخلة ماش كما الخرجة _ كان راح يركب رحت ليه .اييي هات وليدي هنا ماش راح نروح معاك _ صدقينيي يافردوس ماش حاب نقسى عليك بصح نتي وصلتي روحك لهنا _بعدني وركب وديراكت ديمارا وخلاني وراه مهزومة وضعييفة صورتهم بدات تضباب في عينيا في آخر لحضة كنت راح نطيح لمزية حكمتني حسيبة ودخلوني لدار بقيت غير نيبكي وهيا تهدن فيا_ ماتبقاييش تبكي قلتلك من الاول الهربة ماش حل ودرك راه حاب يغلبك ويحطك تحت الأمر الواقع بضياء_ايه موالف يديرها من قبل كيحب يتزوح بصوفيا _بصح هيثم قال لراجلي زواج ماكانش منها وراهي فاهمة غالط وخرجت من دار وخلاتني محير عليهم يعني راه حاط فيك لوم كبير _ حبيتي تقولي انا الغالطة _مانكدبش عليك تسرعتي شوي ويا ماحولت معاك باه ترجعي ماحبيتيش على الأقل افهمي مليح ومبعد قرري _ بقات مدة تهدر معايا ومبعد خرجت عند راجلها سمعتهم شغل يتهاوشو سور راهي لامتو كيخبر هيثم عليا وانا خممت وخممت واكيد نتبع وليدي ولتم تعود هدرة خلاف بصح خايفة من كلمة الدخلة ماش كما الخرجة يعني راح يطبق كلامو ويحبسنيي بصح على جال وليدي ندير الموحال .