موجات حارقة

الجزء6

الحلقة 40
بقلم لينا صبرينة
اصلا ماعنديش حل غير نتبعو على جال بنتي برك .خرجت من شومبرة سمعتهم فاللصالون يحكو بالصوت دخلت ليهم شافو معايا _عندي كلمة وحدة برك حبيت نقولهالكم ادا زوجتولو هادي الرخيسة مادابيكم طلقوني منو وتكملو خيركم وتصبحو بخير _خرجت وخليتهم يخمو بضميرهم .خرجت من دار لقيتو داخل طونبيل رحت ركبت عطالي رفيف ليدي ويتبسم معايا الخبيث. ديمارا رحنا للدار كانت رفيف ديجا راقدة حطيتها في بلاصتها ودخلت دوشت وصليت المغرب ورحت تسطحت غلبني رقاد رقدت ومازدتش شفت خليقتو _يومين وهو يدخل لدار غير يرقد وصباح ربي يخرج حتا لنهار ثالث حبيت نستفسر واش هدرو على حكاية زواجو عيطت لوداد ماردتش عليا عاودتلها شحال من مرة والو .زدت عيطت لخالتي نفس الشيئ ماتهزش مانعرف وين مخليين ثلفونات تاعهم .ماعليش منا يشوفو لابال تاعي يعاودو _حتا لعشية جوايه المغرب وانا فالكوزينة لقيتو دخل وفي يدو باطة باتيسري _هاكي حقك كوليه _واش هادا؟ _الفال تاع الخطبة تاعي مع صوفيا رحنا ليوم خطبناها رسمي والعرس هاد ليام بعد ماش مطولين _(هاديك دقيقة تمنيت الأرض تبلعني ومنتحطش في موقف كما هادا ) جسمي رجع يرجف من داخل بصح يديا قدرت نتحكم فيهم وحكمت لباط فتحتو وكليت من الباتيسري قدامو قعد وهو غير يشوف ومستغرب فيا كملت الحبة وشربت العصير موراها .بصحتي ومبروك عليك تتهنى ان شاءالله. رحت للبيت لحقني وحكم يدي _واشبيكي علاه راكي ديري هكذا علابالك بلي راح تضري روحك هكذا وبهاد البرود تاعك راني عارف بلي راكي ميتة ومكوية من داخل علاه متخبية تحت هادا القناع ماش راح يفيدك_ ماكان مدخلك فيا خليني في حالي وروح ألتى بعرسك بزايد عليك_ماعليش بصح لمكسرتلكش هذا الراس لخشين مانتسماش هيثم_روح برك يدك وماتجيب _ صار هكذا ايه نشوفوها وين راح توصلي بهاد لقساحة _راح وغلقت الباب و قعدت وحدي بلقنطة حاسة  من داخل مكوية وبركان راه يفور ويجري .أصعب شعور كينخبي آلامي ونحاول نكون باردة وقوية وأنا من داخل ندوب غير بشوي والشيئ لوجعني كتر وحسيتها صفعة ليا كيراحو والديه يخطبولو ومامبا جاو هدرو معايا ولا علموني قبل .عليها كيعيطتلهم ماهزوش عليا وهوما ترنيك كانو يخطبو في عروستهم لجديدة ومنها فهمت بلي حابين يحطوني كامل تحت الامر الواقع ونقبل بسيف عليا .شفت مع رفيف وهيا تلاغي وتلعب وحدها بقيت نتفرج فيها ونخمم انا هكداك سمعت الباب طبطب وهو راح فتح من الصوت عرفتهم والديه جاو بصح علاه جاو بعد مادارولو رايو .ماقدرتش نخرج عندهم سمعتهم قالولو وينهي فردوس عيطلها نهدرو معاها .وهو قالهم ماكاين حتا هدرة هيا موافقة بزواجي وادا بدلت رايها وحابة تطلق ادوها معاكم وحدها بنتي تبقى في هادي دار ونجيبلها مرا تربيها ماش مشكل _رخيس طحان مايسواش كان يعلي في صوتو باه نسمعو دخل عندي _ارواحي بابا ويما حابين يهدرو معاك _هزيت روحي رحت عندهم والصراحة ولاول مرة سلمت عليهم وقعدت قدامهم فوق قلبي ماعجبنيش الجاست ليداروه معايا .طلعت راسي لقيتو واقف عند باب الصالو ومربع يديه  _سوسو بنتي شوفي ياك دايما نقولك ديريني شغل باباك ماش عمك بصح زواج هيثم بصوفيا لازم يتم كاين امور حكاهملي عليها تحتمت هزيت خالتك ووداد ورحنا خطبنالو _نطقت خالتي ولله يافردوس بنتي غير رافضة هادا زواج بصح ماعندي حتا هدرة بيناتهم _بصح راكم عارفين اخر كلام قلتهولكم قبل مانخرج من دار كون على الأقل جيتو علمتوني من قبل _نطق عمي .ماش راح نستفادو حاجة هيثم مصمم على هادا زواج وماش راح يبدل رايو وانا من رايي يتزوجها وخلاص باسكو ماكانش حل ثاني _بابا قلنا الحكاية تبقى بيناتنا انا ونتا برك _شفت باباه تخنزر فيه والغش بان على وجهو(مافهمتش واش كاين بيناتهم و عمي يعرفو وحنا مانعرفوهش واش قدر هيثم يحكيلو ليه وحنا لالا بصح اكيد لعبلو بعقلو ماش جديدة عليا ) دور عمي ليا وقالي فردوس درك كما تحبي تجي معانا ولا تقعدي في دارك _شفت معاه لقيتو يستنى حتا هو فالاجابة _وين تكون بنتي نكون معاها _تنهد وناض .مالا غير بشوي وبلعقل بلا مشاكل ويرحمها ربي وتهلاي في روحك بنتي _قدمت ليا خالتي حضنتني وطلبت سماح ودموع على خدها وراحو ومن هاداك نهار مازادو جاو ولا عيطولي وهو حاكم حدو ليه وثلفونات ماش حابسين عليه يبان راح يدير عرس والشي ليسمعتو منو العرس راح يكون بالجمعة في دارهم وصايي فتح وعقد وخلص وانا دفنت الامي وحزني وقطنتي وصبري ودموعي داخلي ووعدت نفسي دمعة ماتهبط من عيني .
الحلقة 41
بقلم لينا صبرينة
دخل عليا عشية لخميس ويديه فلجيوب _غدوا عرسي ماش حابة تفرحيلي ونشوفو ابتسامتك الزينة_تبسمت في وجهو .سي بالعكس نفرحلك علاه لالا بصح لوكان تديني درك لداركم نوجدلك بيديا عرسك باه مايخصو والو_ضحك بإستهزاء اااو منك بصح _ايه ومتأكدة تاني _مالا وجدي روحك يالفحلة ونديك _ساعة تلقاني واجدة _طلع حواجبو شغل ماش مصدقني وخرج وانا وجدت روحي وماش عارفة علاه راني نتحدى في نفسي ورايحا نشوف جحيم مشاعري _رحت عندهم لقيتهم كامل لافامي مجمولين كيشافوني جيت تخلعو كامل بصح انا حكمتني وحد الحالة تاع اللا مبالاة فيها صمت وهدوء مريب لقلبي بصح مالقيت لمن نحكي ونشكي حالتي قعدت مخبية في قلبي وحتى لنفسي ماقدرتش حتا نستعرف لنفسي _مديت رفيف لخالتي هزتها وكانو لتم معاها نساء يقولو تشبه لهيثم حتا جاتني وداد في وجها علامة استغراب .فردوس علاه جيتي كون قعدتي في دارك خير _علاه نقعد في داري ياك هذا عرس راجلي ومن حقي نحضرو _حكمت يدي وداتني لشومبرتها وغلقت الباب_وشبيكي نتي وشنو هادي عرس راجلك وان شاءلله منك بصح ناوية تحضريه وتشوفي بعينك _وعلاش منحضرش ولا منيش معروضة!!_ نوضي بطلي ماتخلطي انا ونتي علابالنا بلي متقدريش ديريها صح راكي كارهتيه من عمايلو ومجروحة منو بصح في داخلك تحبيه _ واش من حب راكي تحكي عليه علاه كشما خلالي حب قتل فيا كلش . صح حبيتو ونويت الخير وتمنيتو ومبعد في الأخير شفتي واش دار خرجهالي عقلية خلاف _ علابالي بلي غلط معاك وراني في صفك اكيد وانا بدوري وصلت نعارك فيه مالغري راه كبير عليا وحتا حرشت عليه بابا بصح هو فالفترة الأخيرة تبدل معاك ودار كلشي باه تسمحيلو ونتي مقسحة قلبك عليه ياك ربي غفور رحيم و نتي علاه متحنيش قلبك عليه وتفتحي معاه صفحة جديدة_ياااوداد علاه هو حن عليا ياك انا صغيرة ويتيمة ومرحمنيش يضرب و يضرب ويخون وزنى قدام عيني وكان غير يقتل فيا بهاديك لمعيشة من غير لعمر مازال طويل وصبري عالي مامتش قوليلي نتي  واش ذنبي انا واش درتلو ياك غير حبيتو وقبلت نتزوج بيه بنية طيبة وصافية صايي وداد بركاي ماتغطي الشمس بلغربال كلش راه باين وهاهو رح يجيبلي الساقطة تاعو ضرة _ علابالك بلي نحبك ونعزك كما ختي بصح نتي ثاني مرڨتيها راجل جرى وراك شهور وهو يطلب السماح وزاد قتلو لجفاف منك ونتي رافضة يقرب ليك نتي لمديتيهولها بيدك _يااو تندب بيه زايد ناقص عندي مشفتش منو انا لخير يعني هيا راح تلقاه مانضنش _شافت معايا بشفقة وقاتلي ربي يحنن قلبك عليه وتفتحو صفحة جديدة متنسايش راه بيناتكم طفلة درك خمي فيها _ اصلا كون ماش هيا كون راني هملت و هربت منكم كامل للمجهول وزيد حتى اهل ومعنديش كي ناس باه نطلق ونرجع ليهم ويدولي حقي_ قدمت ليا حضنتني .ماتتقلقيش راني معاك والديا هوما والديك يجي نهار وتتبدل حياتك ويبراو جراحك وتعياي تتفكري هدرتي _بعدتها مني .بعدي راني مانسيتش عملتك رحتي معاهم خطبتيها بلا ماتخبريني _واش من وجه نقابلك بيه باه نقولك والله ماقدرنا كامل رحنا خطبناها تقول رايحين نعزيو بابا وهيثم حتمو علينا وهيثم مانعرف واش قال لبابا حتا قنعو ماحبش يخبرنا _تفرت درك .حنا هكداك وهيثم دخل _راكي هنا كنت نحوس عليك وعيطتلك شحال من خطرة علاه ماترفديش _ ثلفون ماهوش معايا وعلاه تحوس عليا _وداد خرجت وهو كمل دخل .هاكي ذهبك عارف بلي تحتاجيه _تنهدت وقتلو مانحتاجش خليهم ليك وجيت خارجة حكم يدي نحيتهالو وعليت صوتي عليه نحي يدك ماتقيسنيش _وشبيكي زايدة فيك قلقة ومنارفية ياك نتي قلتي عادي وهذي حياتي وبلي عدت مانهمكش ونتزوح ربعة ادا حبيت مالا واش هادي الحالة ليراكي فيها غير صارحيني وماتخبيش اوجاعك باسكو كاين ليداويهم _هبطت راسي باسكو دموعي كانو راح يغلبوني قدامو .حط يدو على لحيتي وطلعلي راسي ويشوف ليا بشفقة _وشبيكي علاه هذو الدموع متحجرين في عينيك هبطيهم وفرغيلي قلبك اهدري راني نسمع _بعد عليا واش نهدر ياك من قبل هدرت وزعما سمعتني ياك كنت غالق وذنيك وماش حاس بيا ملا درك نسكت خير باسكو ماتستاهلش _زاد زير على يدي وخبطها للحيط وخرج بالغش ماعجبوش كلامي _ لغدوة كان نهار العرس بكرت على صباح انا وداد رحنا للحفافة وعدلنا وفحفنا رواحنا رجعنا حنا لعرايس وهيا مخلوعة فيا علاه راني ندير هكدا بصح موحال تقدر تحس بيا هيا ولا غيرها حالتي من داخل يعلم بيها غير ربي كنت جثة هامدة لا احساس ولا شعور كلش فيا ميت نحاول نبين بلي مليحة غير نضحك ونڨصر بصح النفس غدارة والبركان ليفيها راح يفجرها غير الغيرة السامة__قبل الكورتاج رحت للشومبرة لبست لاغوب فلقرونة مع اكسسوار تاعها وتاج صغير تاع جوهر فوق راسي ولبست صندالة جيت مبدلة خلاص ونهبل ليوم الله بارك حوحو يشكر روحو . رحت لرفيف بسيف رقدتلي تهنيت كيجيت خارجة دخل هيثم وكان لابس آخر حطة كوستيم ازرق مع قمجة من داخل بيضاء وكرافاطا طويلة زرقاء فيها نقاط فالأبيض وكان ليه حضور جاذب وكل مظاهر الرجولة والشموخ واضحة للعلن في وقفتو الراقية تحت عنوان المظاهر الخارجية خداعة وشوفتو بهادي الاناقة والهيبة رجعتني ذاكرتي لنهار عرسي .
الحلقة 42
بقلم لينا صبرينة
لثواني بقينا نتبادلو النظرات .وحسيت قلبي يخبط لأعلى ارتفاع و يذوب من ريحتو ووقفتو والكاريزمة تاعو .سافر بيا عقلي وقلبي لأعماق موجات الغيرة وهيجانو انو هادا الانسان ليوم بهادي الأناقة راح يوقف مع غيري بما تسمى عروسة تاعو وتكون كل الأنظار والزغاريت والتباريك ليهم والأكثر قسوة الليلة وفلحلال راح يكون مع غيري ولمساتو راح تاخدهم هيا ونضراتو راح يبادلهم معاها والغزل والحب والاهتمام والعواطف والهمسات والدفئ والطمأنينة كلشي ليها وانا طلعت الخاسرة ماعندي حاجة منو من غير بنتو وبس _فقت من سهوتي كيغمزلي وقدم لرفيف مبتسم .وقتاه رقدت أميرتي ؟؟ _جاوبتو وجيت خارجة _فردوووس _ دورت ليه .واش غير لخير _راح قابل لمرايا وحط يدو على لحيتو يتلمس فيها _مقلتليش كيفاه جيتك ماش حاب نتلاقا عروستي وانا ناقص _ضحكت وقدمت ليه وربعت يديا . نتا ياهيثم ناقصك قلب صافي يعني كيدير قلب كما لعيباد ووبأخلاق طيبة ومظاهر ماش خداعة ومافيهاش خبث لتم اهدر على مظاهرك الخارجية _طلعلي حاجبو وانا شفت فيه من فوق لتحت بصح ماعليش نجاوبك ونصارحك جيت تهبل زين ربي يبعد عليك عيون الحساد _تبسم وقالي ان شاءالله _وقفت قدامو كفتي لاصق في صدرو ورايا ومقابلين لمرايا لزوج ونشوفو لبعضنا منها .اهيه وانا كيفاه جيتك باش نستقبل ضرتي _ضحك وقرب وجهو ليا و همسلي في وذني والله اليوم راكي قنبلة فتاكة فجرتي مشاعري ليكانت غاطسة وغارقة في سبات ورجعتيها لهيب مغناطيسي ونتي هيا جادبيتها الوحيدة . تبالي نخلي عروستي الليلة ونجيك نجري ماش قادر نصبر على هادا الزين ووقفتك القوية وطولك وعرضك وبشرتك البيضاء ليتبرق من بعيد وعينيك لمحوتين ليماقدرتيش تنحيهم مني وشواربك ليراهم يرجفو رجيف عليا وقلبك ليرجعت خطفتو من جديد  _كان راح يزيد يقرب كتر ويمسني وليت زربت بعدت .وانا ماش قابلاتك وموحال تزيد تدخل لقلبي باسكو عفنتو برذائتك_خرجت وخليتو مورايا سارح فيا ورحت قابلتهم بإبتسامة مزيفة اصطناعية دايما كلامو وفعلو يكون فيه تناقض وماش قادرة نفهم واش ناوي منها يتغزل فيا ومنا ليوم عرسو .شوي وراح الكورتاج وكيعادت جارتهم دوروها شوي فالولاية وطول هاديك ساعة وخالتي تطلب فسماح مني وانا قلتلها ماعليش ديرولو رايو هادي المرة وراني مسامحة _كيوصلو لدار استقبلوها كما أي عروسة وهو حاكم يدها ودخلها ولغاشي مجمعين عليهم وزغاريت دخلو للصالة وموراها عمتها ليتبان مريضة قراف وبنات فاميلتها مهولين الحالة وانا وقفت على جيهة وبقيت نتفرج عليهم وحاكمة الوقفة بسيف ونسمع فلافامي تاع هيثم كل واحد واش يهدر ورأيو في هادا زواج كاين ليقال (هذي خير كبيرة جاملة عقلها وزيد معروف اصلها عايلتها مش كما فردوس ) وحدة تقول (وشبيه هذا خلا مرتو بوبية صغيرة وجايبتلو ملايكة وراح جاب هذي الشارفة)  وحدة تقول (شوفي بعد كلشي سمعناه على سمعة صوفيا بصح داها وزاد اهلها واقفين وراها تبان غير اشاعات عليها موحال هيثم يدخل لدارو بنت حرام ) المهم بقيت نسمع لهدرتهم ومنها ليتوجع لقلب وساكتة نتفرج نوضوهم يشطحو وهو حاكم يدها والضحكة لاحقة لوذنيه بصح هادي اللقطة شايفتها في عرسي ويادرى واش مخبي من وراها بصح كيقرب وباسها من راسها باه تصورو ثما صح مقدرتش باسكو هاديك البوسة على لجبين تساوي كل الاحترام والقدر والمحبة ليمادارهاليش في وقتي ديراكت نار شعلت في قلبي وحكمتني غصة وحسيت روحي راح تخرج مني كنت حالفة منبكيش ومنضعفش بصح للأسف دموعي هبطو ماش علاجال زواجو وهادي الشوفة على جال كيشفت الفرق بلي صوفيا ولو سمعتها ماش مليحة بصح نهار الصح وقفو معاها كامل وطلعولها شانها .بكيت على خيبات الامل وطعنات لديتهم من صغري حتى لدرك والأكثرية من هيثم ليتمنيتو هو العوض الجميل خرجلي العكس _ جبدت روحي منهم باسكو لقيت روحي غير انا البرانية عليهم رحت لشمبرة رفدت رفيف كانت فاطنة وتبكي سكتها ونزلتها وبدلت قشي ولبست عباية وخمار وعيطت لعمو رابح يجيني .شوي وخرجت لقيتو يستنى عند الباب _ كيشاف حالتي هكذاك حضني ودفاني بحنانة أب . اسمحيلي مقدرتش نمنعو ومقدرتش نحميك منو _تعيش عمي اديني لداري _ ايه هيا نروحو _وصلني لدار وراح وحطيت رفيف رضعتها كيكملت خليتها تلعب ورحت توضيت صليت ركعتين طلبت ربي يقويني ويكون معايا و يرحني من همي_وصلت 12 سمعت صوت الباب تاع برا تفتح زربت نضت غلقت باب البيت بقيت نتصنت لقيتو جابها معاه كيفاه يعني راح يعيشها هنا معايا ؟؟! نسيت على هادي النقطة. نسمع فيهم يهدرو و يضحكو ودخلو لشمبرة وغلقو لباب لتم حسيت قلبي راح يحبس ماكنتش دايرة في بالي راح تجيني صعيبة وتوجعني كنت حاسبة كيكرهتو صايي يتزوج ميهمنيش بصح خرجت غالطة .هاديك ليلة ماقدرتش نرقد ودموعي ماحبسوش تمنيت نلقا أم تمسحلي دموعي وتواسيني وتقلي راني معاك بنتي متخافيش تمنيت نلقا أب أو أخ نتسند عليهم ويدافعو عليا تمنيييت بزااف بصح مكانش كاينة غير وحدتي ليتهدم قوتي المصطنعة البريئة .
____
الحلقة 43
بقلم لينا صبرينة
كيأذن الفجر نضت توضيت كيخرجت من دوش خلعني كيلقيتو فالبيت قاعد ويشوف مع بنتو وتايه وعينيه غالبينو لرقاد _خير واش دير هنا ؟_شاف ليا وناض والو جيت برك نطل على رفيف ونتي واش هذ لحالة ليراكي فيها عينيك حومر ومنفخين علاه لبكى ياك قلتي بلي قابلة وماعندكش مشكل _ اذا حسباتلك بكيت عليك عاود حساباتك مليح  _صايي يافردوس راكي تكشفتي درك ومن حالتك هذي فهمت كلش ولو راكي مخبية دموعك عليا _حنا هكداك وهاديك دخلت تتمايل تقول سكرانة وراحت ليه تحضن فيه .حبيبي واش منوضك هادا الوقت وعلاه جيت هنا _ارجعي لبلاصتك جيت نشوف بنتي وراجع نرقد _هززت براسها وشافت ليا وخرجت _هادي راح تعيش هنا معايا ؟_ايه هنا وحتا بنتي تبقى تعيش معايا وين نروح ونتي كما تحبي ماش راح نضغط عليك بصح تأكدي وأطمني ماش راح نسمحلها تتجاوز حدودها معاك _هززت براسي ورحت لبست طقم الصلاة وحطيت السجادة فالأرض _لقيتو قالي ربي يقبل وخرج _لصباح سمعتهم فالهول يهدرو قاتلو اديني لداركم فاميلتي ليوم يجيبولي صبوحي وهو عيط عليها قالها راني راح نخدم وماكاين لا صبوحي لا والو اقعدي فدار _كيفاه هادي هيثم ماتمسخرش ليوم صبوحي ولازم نديروه __علاه نتي وجه الصبوحي بركاينا من تمسخير تاعك انا ونتي علابالنا وش كاين صبوحي يديروه لمرا لي تكون نظيفة وفيارج ماش ليك رجعتي كثر من حفرة بن عكنون اتلمي درك ماتخلينيش نفزدلك خليقتك واحمدي ربي ليل ونهار كي سترتك ودرتلك عرس ماش تاع وجهك (كما توقعت ديجا بدل عقليتو معاها وبدا يلوح في سمو ودرك دالتها تدوق من نغس الكاس )__من هاداك نهار فاتو 5 ايام شهيتي مغلوقة تقريبا ماناكلش وحالتي ماش فاهمتها مليح حاسة غايضتني عمري من كلشي بصح كانت غير حالة داخلية اما خارجيا كنت غير نتظاهر بالقوة متهلية في روحي على لخر مفحفحة ومتزينة وكأنو لم يكن شيئ وهوما حسهم تقريبا غابر وهادا الشيئ ليساعدني أني ناخد راحتي التامة فالدار ومتجنبتهم هو يخرج صباح يدخل فليل يشوف بنتو يلعب معاها شوي ويروح يرقد ومتجاهلين بعضنا وهيا ماتحركش من دار تبان دات كونجي من خدمتها _صباح نضت جيت خارجة نغسل ونفطر مادام رفيف راقدة وليت رجعت كيسمعت صوتهم فالكوزينة قعدت فالسرير ونشوف للملايكة ليقدامي واش ذنبها ياربي حصلت وقعدت كون ماش هيا ليجاتني فطريق كون راني مانبقاش دقيقة معاهم بصح هو اختار انو يربطني معاه بيها وماعنديش حل ثاني مانقدرش نخلي بنتي ونروح ونضحي بيها بمقابل سعادتي موحال نرمي كبدتي كما دارو والديا نموت ومانخليهاش ورايا .يديا ورجليا مربوطين بيها الله غالب تقدرت انو نعيش حياة كما هادي وبزايد ماعندي حتا سند نتكل عليهم وحتى والديه واش عمل وليدهم راح يبقى هو وليدهم وماش راح نلقى منهم مساعدة خلاص زوجوني ليه وتفرت غير فيا مرات مانلومهمش باسكو زوجوني بيه بحسن نية اما هو كان العكس يعني انا مالقيتها مليحة في حتا بلاصة بصح قدرت نفهم بلي قوتي ليخلقتها لنفسي جابت نتيجة في معاملة هيثم معايا وشفت فيه تغيير كبير ولو صدمني في زواجو من صوفيا ومادام منا تشكوي ومنا تكوي و ماعندبش طريقة نفك روحي منو ولازم نعيش معاه وواش  يقرر هو أنا نقبل فلازم عليا ندير تغيير لهادي لمعيشة وتكون لصالحي ومنها نخلق احاسيس جدد ومعيشة جديدة ونحاول ننسى الماضي وعلى الأقل نتقدم خطوة ونفرح روحي مع حياة متهنية وسعيدة نستاهل نعيش كما ناس في جو مستقر لهادا يافردوس نوضي وقفي على رجليك  لوقتاه تبقاي تتهربي وتتجنبيهم هذا واقع تاعك لازم تتقبليه وتتعايشي معاه متهربيش منو ولازم تواجهيه بكل قوتك وتحطمي قلوبهم كما حطموك وكما خلاتلي داري  نخليها بيها بيه لازم نخليه يتحرق في نار جهنم تاعي نخليه يتشوق يلمس شعرة مني ونكويه بقوتي واناقتي غير من بعيد ودرك خلاص وفض وقت لبكى وجاء وقت الاستمتاع والضحك وادا ماخرجتكش ياصوفيا من داري مانتسماش فردوس ونتا ياهيثم نرجعك خاتم في صبعي تعود تلحس الأرض لينمشي عليها وماتلحقش ليا ولثم نكون حققت العدالة لنفسي _ نضت درت شهيق وزفير وخرجت غسلت ودخلت ليهم _ صباح لخير _ردولي ورحت حطيت كاس حليب وقعدت معاهم وهوما يشوفو في بعضهم كيشغل مستغربين كيفاش نلقاهم مع بعض ونقعد عادي _فردوس راكي مليحة!! _تبسمت وي مليحة الحمدلله ونتوما ان شاءالله راكم ملاح!!_ لاح يدو حطها على جبهتي ماكيش سخونة _ راني لباس هايلة تبانو نتوما راكم مرضى شوفو وجوهكم مخطوفين _نطقت الحرباية وتضحك بهاديك زعاقة سامطة .لالا رانا بخير و نهبلو عين ربي علينا وتحمينا .
الحلقة 44
بقلم لينا صبرينة
ياعمري ربي يدومها عليكم .قلتها وتبسمت معاها وفي قلبي اصبري عليا ونوريك الضحك الأسطوري على أصولو_قلقت مني ولات ناضت تتعوج كما لحنش لعايب وخرجت وهو قعد يشوف فيا_ وشبيك نتا كاشما تبحرلك في وجهي؟!!_ لالا بصح شكون نتي والله ماراني قادر نعرفك واش صاريلك _ مابيا والو بصح يقولو التغيير مليح ويفيد في الحياة راني جربتو ولقيتو خرج عليا خير من الروتين الباسل _ اواه قبل كنتي خير _ قصدك كما كنت نخاف منك ورجعت كوشمار لحياتي _ لالا كما كنتي تحبيني وخيرتي تكوني معايا كما قالك قلبك _ياحصراااه صايي مات كلشي هذوك ليام فاتو ولاو ماضي درك رانا فالحاضر والمستقبل راهو جاي ماتكونش قديم بزاف هكدا تسماط _قرقعت لحليب على ضربة ونضت وخليتو_ لحقني للبيت حكمني من ذراعي ودورني ليه بالقوة حتى تخبطت في صدرو وبقا يشوف ليا وهو دايما يعتمد على عينيه باش يخيلني نتراجع على حاجة باسكو قبل كان يخوفني ويوترني ونحشم كيقرب مني أما درك قدرت نتحكم في هذو المشاعر كامل ونخدم عقلي برك ونمشي بالمنطق _غمزلتلو وحشرت فيه كتر وهمستلو بصوت واطي .هيثم روح عند مرتك راهي تستنا فيك _فردوووس ماتتحداينيش خيرلك راح نكسرلك قلبك_حطيت صبعي لينشهدو بيها على خدو ونمشي وراسك هاذ المرة غير انا لينكسر قلبك ماش نتا انا ليراح نخليك تجري وتحلل فيا وانا لراح نكسر غرورك وكبريائك _(غلق عينيه وفتحهم ماش مصدق الجاست ليدرتو معاه ولا حتا كلامي وحالة وجهو تفسر انو داب فيا في وسط ذهول ماش مصدق شكون ليراهي معاه)_ضحك ضحكة فيها تردد وتوتر وزير يدو عليا_ اووو والله مني صح شكون نتي ماكنتيش هكدا _ مازال ماشفت والو يا سي هيثم .بعدت منو وهو مازال حاكمني شغل فهمتو واش حاب .هيثم ماعليش تخرج راح نبدل قشي _هزز براسو ونحا يدو ومازال يشوف ليا من فوق لتحت وليت طبعتو وغلقت لباب وقعدت حاكمة قلبي من الجرأة تاعي _فليل دوشت بيا برفيف وتعشينا وحدنا وهوما فالصالون قاعدين وليت كيكملت هزيتها ودخلت ليهم لقيتو قاعد يتفرج على لاثيلي وحاط رجل على رجل ويديه فاتحهم لزوج فوق الفوتياي وهيا قاعدة وحاشرة فيه ومقربة وجها منو كيشفتهم هكدا حسيت نار شعلت في قلبي بصح ماش راح نسمحلهم يدوني للهاوية _واش ماش موالفة تسهري فالصالون _من ليوم وين تكونو نكون معاكم نحب اللمة _هو تبسم وهيا تخنزرت وشنفت عليا _واش ماعجبكش الحال كيراح نلصقلك فالروضة مالا قولي لراجلك يديرلك دارك وحدك باه تلقاي راحتك خير من ديار الناس _هيثم راك تسمع فيها واش تقول _اتعلمي تتقبلي وتسمعي الحقيقة _ااا صار هكدا مالا نروح نرقد خير ليا من وجه النحس_اييي حسني ألفاظك .خرجت وهو قاعد _روح الحق مرتك وأرقد ترتاح _نن حاب نقعد قدامك ونرتاح كينبقى نشوف معاك _طلعت حاجبي ليه وقدم هز رفيف يلعب معاها حتا رقدت عندو داها حطها في سريرها _علاه حطيتها ثم نحبها ترقد معايا _قدم ليا .زعما قلت نعود نديرلكم دالة كما قال الشرع ليلة ليها وليلة ليك _كونك مهمي مسمحة فاليالي كامل ليها روح برك ماش محتاجاتك قدامي _كما تحبي راني رايح نحطها في حضني ونتي حضني لمخدة _لمخدة خير منك _تصبخي بخير _خرج وفهمتو حاب يغيرني _لغدوا كانت جمعة عيطت خالتي لهيثم قاتلو ارواحو تتعشاو عندنا هاديك ماتت فرحة راحت توجد روحها على بكري وانا درت لغدا وهو خدم نص نهار وجاء تغدينا كيفكيف كيكملت خليتهم ورحت لرفيف غديتها ورقدتها حتا غفيت معاها حتا فطنتي صوفيا تعيط عليا فردووس علاه هربت ارواحي تغسلي لماعن راهم جبل ماش غاسلتهم دبري راسك .نضت رايحة ليها لقيتو سبقني راح ليها وليت عسيتهم غير من لبعيد_اييي واش هادا لعياط _شوفها هيا دارت لغدا وخلاتلي لماعن حتا تاع سهرة تاع لبارح وماغسلتهمش _ ماكان مدخلك راهي ببنتها هيا وزادت دارت لغدا بزاف عليها وقبل ماتغسلي ديريلي قهوة راسي يوجع _بدات غير تخبط فلماعن وفي روحها حتى ناض ليها ضربها زوج كفوف ومرمدها من هاداك الشعر .اسمعي مزال مزادتش لبتشنف وتخبط عليا ( شح فيك تستهالي ماكتر قعدت نضحك عليها من بعيد وليت رجعت لبلاصتي قلت ندير فيها قيلولة قبل مانروحو .لقيتو دخل عندي _فردوس كاش ماتحتاجي راني خارج _مانحتاج والو يكتر خيرك_ تمنيت نهار نقلك حاجة وتجاوبي عادي _غلق لباب معاك راح نرقد _ ياه صار هكدا انا نهدر معاك ونتي تليكيدي فيا _ افهمها كما حبيت_فردووس متختبريش صبري _واش راح دير تضربني ارواح عادي ماش حاجة لتخوف _استغفر الله منك وليتي متنطاقيش بهاد البرود ليعندك  .
الحلقة 45
بقلم لينا صبرينة
غلللق لباب معاااك . غلقها وراح خرج من دار وهاديك جاتني اعصار _اسمعي نقلك هدرة ديريها منڨوشة في وذنك غيرك خافي مني وماديرينيش ساهلة راسك نطيرو وثاني حاجة ماش راح نتنازل على هيثم و..._ماخليتهاش تكمل هدرتها ونطقت _ هاو ليك انا منحبش لعفن  خليتلوك تتمتعي بيه أصلا شبع منك فلحرام واش راح تستناي منو درك درقي عليا وجهك وغلقي لباب في طريقك_ماش مربية تهدري على راجلك هكذا_ تعلمت عليك وديت تربيتك راكي نتي لقدوة تاعي ولازم نديلك راجلك كما ديتيلي راجلي وضحكتلها في وجها بقهقهة تاع تمسخير .خلاتها من داخل تفور ودخانها واضح من وجها .قعدت تشوف فيا و بصح مدارت والو فهمت باي دارلها درس وعادت تخاف منو _ياربي نص ساعة رجع لدار قالي هيا تروحي _ماش درك مازال الحال ورفيف راقدة _صوفيا راهي واجدة باه تروح حبيت نديكم مرة وحدة _ماش درك ومبعد ورجعلي _ماعليش هوما راحو وانا نضت وجدت روحي وبدلت لرفيف وجدتها وقعدت نخمم على راحتي رجعتني داكرتي ليامات سبيطار زعما نكون انا ليدخلت بيناتهم ماش هيا ماش موحال باسكو هاداك الوقت ماكانتش تعاملني مليح وزيد علاه جات سكنت قدام دار عمي وينهم والديها علاه عايشة مع عمتها وحتا عمتها نهار عرسها كانت غريبة ماش غير المرض وحتا هبثم تعامل تاعو معاها تبدلت وزيد كاينة حاجة بينز وبين باباه اوووف  ماقدرت نحل والو .خليت رفيف تلعب ورحت حطيت كاس حليب شربتو وكيكنت راجعة للبيت لحت عيني للشومبرة تاعهم مشيت جيهتها ولحت يدي نحل لباب بصح عدت نرجف مي قلت معليش نشوف برك ماش راح نموت . حليت ودخلت لقيتها نفسها متبدل فيها والو لحت عيني لسرير تفكرت كيفاه خلاني هاداك نهار نشوف خماجو وتفكرت تاني كيغرقني بدمي زوج مرات .استغفرت و رحت فتحت لخزانة تاعها لقيت لمعري كثر من لمغطي غلقت وماقدرتش نستحمل نقعد في هادي شومبرة وليت خرجت غلبوني دموعي بصح مسحتهم قبل مايطيحو مايستاهلوش دموعي غاليين عليهم _شوي وعيطلي بلي راه جاي يدينا كيوصل هبطنا ركبت وطريق كامل وهو يهدر معايا وانا كلمة وقص ولا ياكل في حوايجو من لبرود تاعي _وصلنا عندهم دخلت سلمت عليهم كامل ولقيت عمة صوفيا ومرت عمو وبناتها ثما قعدت قدامهم وبقاو يسقسو على حوالي وانا نجاوب .ومرت عمو تحب تقرعج بزاف اما عمت صوفيا غير تشوف ليا وتسمع .حتا لقيت صوفيا جات نوضتها قالتلها ارواحي قعدي بجنبي خير متواحشاتك. داتها قعدتها قدامها وتهدر معاها وانا نضت عاونت وداد وخالتي وحطينا حنا نساء نتعشاو مع بعض دايرين جو هايل نشايخو مع بعض ويحكو على لعايلات وتقاليد تاعهم وهاديك ناقصة هدرة شغل ماكانش تاكل برك .حتا نطقت مرت عمو قاتلي. فردوس مكلاكش قلبك باش تعرفي اهلك ولا تحوسي عليهم هذ لمدة كامل مخممتيش تروحي ليهم_ نو مخممتش _علاه ياك عندك نوتفامي تاعك يعني ساهلة باش تلقايهم_ ماش حابة نلقاهم ولا نتعرف عليهم _بصح يابنتي مهما صرا يبقاو اهلك حبيتي ولا كرهتي _ونتي علاه راكي حامقة عليهم _لالا غير حبيت نفهم برك _سكتت ونطقت ام صوفيا قاتلي وزعما راح يجي يوم تحوسي عليهم ؟_مايشرفنيش نتعرف عليهم وتعيشو سكرو على هادا الموضوع _ فات لعشا غسلنا لماعن ورجال كانو وحدهم فالصالة باسكو معاهم عمو وحنا قعدنا في صالة حطينا سهرة وقاعدين نهدرو على زمان وحكاية تجبد حكاية ورفيف بيناتنا ونطقت مرت عمو مع صوفيا قالتلها حتا نتي فرحينا بصغير يكون هو ولي العهد _في قلبي حتا يولي الأب كما سيادو اصلا قلقتني تهدر بزاف وتطلع الضغط لراس.هزيت رفيف قلتلهم نرقدها هاداك هو وقتها ونرجعلكم _ هزيتها ورحت لشومبرة بدلتلها لاكوش ورقدتها ان شاءالله برك يخليني نبات .خرجت من عندها تلاقيت مع هيثم فلهول _ واش ديري هنا علاه مش قاعدة معاهم _شفت معاه وكملت مشيتي وجاوبتو ماحبستش عندو _لحقني حكمني من يدي . واش هذ لجاست لدرتيه من وقتاه تقللي احترام معايا _ مادرت حتى جاست وإذا راك تحوس على سبة باش تضرب تفضل اضرب _ ماش حاب نضربك وشبيكي على حاجة صغيرة وتافهة تعاركيني وتجبدي سيرة الضرب وشبيكي هكدا _نتا علابالك مليح بلي مانيش حابة نهدر معاك وهذي ماش جديدة عليك_ والله تعبتيني معاك_ عادي ماتتعب موالو دير كما انا وجودك وعدمو كيفكيف عندي _فردووس والله غير صبري راه قليل متخلينيش ندير حوايج متحبيهمش _واش راح دير مزال غير تقتلني برك والباقي درت كلش بسلامتك .
الحلقة 46
بقلم لينا صبرينة
علاه مراكيش حابة تفهمي بلي ماش حاب نضرك غلطت صح وطلبت سماح ودرت كلش باش تحني قلبك من جيهتي ونصارحك في هادي دقيقة ولو ماش وقتها ولا حتا بلاصتها انا كنت معمي عليك قبل اما درك كلشي تبدل حطيتك في قلبي وغلقت عليك يعني حبيتك فردوس والله نحبك وضارب فيك عشقة كبيرة ماتقدريش تتوقعيها من غير الظروف تحتمت عليا باه نزيد نتزوج صوفيا ونجيبها عليك ضرة والله ماكنتش حاب نزيد نضرك ولا نخيب ضنك بصح هادا زواج كان محتم  _(اعترافو ليوم جاء متأخر بزاف وتمنيت هادا لكلام نسمعو قبل بصح كاتبة ليا نعيش آلام باه نسمعها منو ولو قالها بفمو بصح ماقدرتش نصدقو ونحط فيه الثقة ) فردووس ماتشوفيش ليا هكدا وتكدبيني والله راني نحبك و عارف راكي تعاقبي فيا وتنتقمي لجروحك برك بصح واجد لأي عقاب منك ونبقى موراك نستنى العفو _راح تستنى بزاااف صدقني وممكن حتا يجي نهار نخليلك بنتك ونهمل بلا رجعة ولتم اقعد تستنى فالفراغ_ مشيت وخليتو واقف وحاكم روحو باه مايديرش ردة فعل غالطة ومنها فهمت وحفظتو انو يكره اسلوب التحدي والتهديد والمواجهة ليرجعت نتعامل معاه بيه يعني هادا التعامل يخليه على أعصابو ومايعرف طريقو الصحيح _رحت للكوزينة سمعت من الباب صوفيا مع عمتها تعارك فيها ولحقت كيقالتها ردي بالك يسمع هيثم لازم نرجعو ليا ومبعد ساهل _رجعتلها عمتها مانيش قادرة خلينا نرجعو نقعدو ومبعد فيها هدرة _دخلت وهوما سكتو وخرجو . هنا توسوست كتر وليت عيطت لوداد وقعدنا فالكوزينة وسقسيتها على صوفيا واش تعرف عليها _صوفيا رباوها عمتها وراجلها يعني والديها ماتو وهيا صغيرة شوي وعاشت معاهم ودرك هيا متكلفة بيهم باسكو عمتها عندها غير بنات ومتزوجين كامل وحتا كاين ليماحضروش العرس وزيد وصوفيا كيكبرت هزت ورث والديها حقها وجابت معاها عمتها وراجل عمتها مريض محبوس مسكين من لفراش ماينوضش يعني هيا ليتصرف عليهم ومعيشتهم ومن جاو لهادي الحومة تولهو ليها الناس بلي تدخل وتخرج فليل لدار ولو عارفينها بلي خدمتها فالسبيطار بصح ناس راكي تعرفي مايرحموش .هادا واش نعرف عليهم ولحكاية ليبين بابا وهيثم ماش عارفينها ماتت عندهم _ماعليش كلشي مع الوقت كلشي يبان _خرجنا من الكوزينة شفت صوفيا وعمتها مع هيثم يهدرو وحنا دخلنا للصالة هزينا لماعن غسلتهم مع وداد ولبنات سيقو .جاء هيثم _هيا فردوس نروحو _ حابة نبات ليوم _راني برا نستنا فيك _قاتلي وداد .روحي فردوس بركاي ماتخشني في راسك _رحت لبست هزيت رفيف وخرجت بقيتهم على خير ولحقتو ركبت دورت راسي لور لقيت لفعى ماكانش _ لقيتو نطق .راحت مع يماها علاه تحوسي عليها تواحشتيها _نن استغربت برك _ديمارا رحنا لدار ومن زهري فطنت رفيف زدت سهرت معاها وهو معانا حتا رقدت وهو بقى يشوف ليا بساكت بسيف راح يرقد _لغدوا نضت لقيتو ديجا خرج حتا ليل رجع وانا ندوش كيماسمعتش الحس فهمت بلي ماجاتش معاه خرجت لبست بيجامة تاع ساتان بيضاء ديميمونش ونشفت شعري قلت ندير شوي مكياج منها نخرجلو قلبو منها نتعلم .هزيت المكياج ورحت قعدت في بلاصتي وقدامي مرايا .حتى لقيتو دخل تقول حس بيا بلي هدرت عليه _ الناس طبطب لباب._وشمن باب ياك داري ومرتي مكانش غريب عليا_ قرب قعد ويديه وراه فوق سرير وبقا يتفرج فيا كانت اول مرة يقعد يعسني وغارق فيا هكذاك .انتبهت بلي عقليتي معاه بدات جيب نتيجة .قرب يدو ليا ورفد لغوج مدهولي _ ديري هذا خير يخرج على شواربك ومع روبة لراكي لابستها _من وقتاه وليت تهدر على مكياجي وتتبه بيا _ عندي بزاف نتي برك مش فايقتلي _حكمتو عليه و هزيت قرعة بارفا كانت قدامو ورشيت منها (تعمدت نقرب ليه كتر)  ورجعت للمكياج مالا قتلي لغوج شباب عليا_ وي نحب لون لحمر عليك يجيك يقتل  _ااا خسارة انا منحبوش بصح معليش نفحتلي نديرو ليوم _درتو ونتماطل غير بشوي والسيد راه ذايب قدامي لعابو قريب يسيلو قدامي . كملت لمكياج  وشفت معاه بصحتي وجمعت المكياج وخبيتو في بلاصتو ورجعت تسطحت فوق سرير حكمت كتاب نقرا فيه .لقيتو جاء تسطح  قدامي ولاح يديه ورا رقبتي _ واش راك دير بعد عليا _ماتخافيش والله ماراح ناكلك _ انا ليراح ناكلك كون ماتبعدش .بعد عليا لهبيييه _فردوس نقسي صوتك طفلة تنوض وقوليلي واش من كتاب راكي تقراي فيه هاتي نقرا معاك _ مايعجبكش هذا النوع من الكتب _غير قولي برك قدمي ليا نقرا معاك باه نفهم _هيثم خليني في حالي _ مانخليكش وقوليلي واش عنوانو ممكن نقراه انا ثاني _عنوانو احببت وغدا _ شاف فيا مستغرب وتغيرو ملامح وجهو وباينا عليه تقلق _ يتسمى حبيتي تقولي كحبيتيني يعني أنا وغد هذا ليخرج معاك درك وحابة توصليلي الفكرة_ ماش كما فهمت هو عنوانو هكدا هاااه شوف بعينك .هذا لكتاب مصنف في مجال علم النفس يحكي على كيفاه تتعافى من العلاقات السامة وبتحديد الشخصية النرجسية باسكو تآذي بزاف في حياتنا وطبيعة الحال هادي الشخصية المؤذية في العلاقة بين زوج وهادا لكتاب فيه صيفات النرجسي الوغد وحتا تاني يحكي بزاف حوايج على النفس و فادوني في حياتي وايامي بزاااف .بقيت غير نشرحلو ونفهم فيه وهو مركز معايا كيكملت طلعلي حواجبو وضحك. ياعمري على مرتي المثقفة وليتي تعلميني ملا كبرتي صح وانا ماش داري بيك .
الحلقة 47
بقلم لينا صبرينة
علاه راح نقعد غير صغيرة لحياة علمتني وقراتني بزاف والتجارب لمريت بيها علموني وكبروني قبل وقتي _قرب ليا كثر فهمتو واش ناوي _هبطت راسي للكتاب .هيثم خليني في حالي وروح ترقد _وشبيكي هادا وين كنتي تحكي وتضحكي ولباس بيك علاه غير نقرب ليك تولي هاربة مني وتعامليني بنفور _وانا قتلك متقربش ليا راح نحرقك برك _ ماعليش قابل بهادا التحدي غير ارجعي كما كنتي قبل برك _طلعت راسي ليه. واش وقيل تواحشت فردوس الخوافة ليترجف منك وتذلها وتقعد غير تبكي وتحلل فيك _ لالا ماقلتش هكدا بصح قبل ونتي في أعز كرهك وحقدك عليا بصح كنتي حنينة ومافيكش قساوة وحتا وصلتي تداوي هادي اليد ليكانت تضرب فيك _كل واحد يعمل بأصلو وأخلاقو _ ودرك ماش راح تخليني نقرب ليك ماش راح تنحي هادا الحاجز ليبيناتنا _مانيش حابة وانا ماش لعبة عندك تقرب وتبعد وتحب وتكره كما يهوالك راسك بالاختصار مانيش جارية عندك تجيني غير على جال شهوتك _فردوووس ماتعاوديش هادي الكلمة مانزيدش نسمعها منك أنا كون محطيتكش في قلبي مانجيكش ونساعف ونحلل فيك من قبل كنت كيتطلعلي نجيك وندي واش حاب منك حتى ونتي ماش حابة هو نفسو لينتي تسميه اغتصاب ندير فيك واش حاب بصح راني تبدلت وكلشي تغير فيا وحاس باالذنب وحاب نعوضك على كل قساوة وعنف وأخطاء شفتيه مني وطلبت السماح الف مرة باه تمديلي فرصة ونسيك على ليفات بصح نتي راكي زايدة غير تطغاي _(رجع فكرني في لقديم ليكنت حابة ننساه وليت نرجف من داخل نضت تقعدت على سرير على ركايبي كون صبت هجمت عليه بأي طريقة المهم نفرغ غشي ).اسكت خلااااص اسكت خليني في حالي علاش راك تفكر فيا وانا نسي في روحي علااه واش ناوي حاب تزيد تمرضني وتخرجني من رحمة ربي نتاااا_فردوس والله ماقصدي نفكرك راني غير نفهم فيك برك صايي اتكالمي وقعدي وانا راح نخليك في راحتك مانزيدش نهدر معاك _ناض خرج وانا قعدت نتفكر في كلشي دارو فيا وبكيت بالصوت مقدرتش نشد دموعي وأوجاعي ليواحد مايقدر يحس بيهم في بلاصتي نفستي من داخل متشققة وغير بكلمة وحدة هادوك الشقوق يتكسرو ويجرحو الروح .وهو غير سمعني نبكي رجع ديراكت قعد جنبي وحضني. ياعمري وشبيكي تبكي والله ماقصدت نجرحك علاه هاذو الدموع_(كانت اول مرة يشوف دموعي بعد وقت طويل )بعدتو مني والو حاجة ماتخصكش _حط يدو على دراعي وبقا يتلمس فيها بشوي ويشوف ليا شفت في عنيه شفقة وفيهم حنية وممكن حتا فيهم احساس بالذنب وطالبين العفو انا برك ماش حابة نصدق .بدلت وجهي عليه وبقيت نمسح في دموعي ونتحكم في نفسي  _فردوس شوفي ليا صدقيني غير تبدلت ونتي السبة اكيد خلينيا نبداو صفحة جديدة وماش راح نخيب ضنك فرصة _دورت ليه .لالا  صايي نتا خيبت أملي فيك عندك شحااال هادي وقتلت واش كان في قلبي جيهتك من مدة طويلة _ لالا ماتهدريش هكذا مزالت لحياة طويلة ورانا عاد متزوجين متقطعيش رحمة ربي _هيثم دير في بالك انا مازلت عايشة معاك وفي هادي دار غير على جال بنتي كون ماش هيا راني رحت _عارف بلي بعد زواجي من صوفيا كون ماش رفيف راكي رحتي بصح راكي روطار درك من قبل كانت عندك ألف فرصة وحتا كنتي قادرة تشكي بيا عارف بلي درتي سارتيفيكا نهار ضربتك ووصتلك لسبيطار راني شفتها وكنت شايف وفايق لكلشي .وهاداك الوقت كون رحتي صدقيني مازدتش حوست عليك بصح ربي شاف فيها خير باه ترجعي وتدخلي قلبي من بابو الواسع جامي خممت اني نضرب فيك عشقة كنت دايرتها من الموحال وجامي تصرا باسكو كنت هاز عليك حقد كبير باسو بسبابك هاداك العام رجعت للخارج وبعدت على بلادي والديا بكل صراحة ياك يقولو الزواج لازم نكونو مقتنعين بيه بصح انا ماقدرتش نقتنع بيك وزادلي الوساس فوق هاد الشيئ كامل وكيرجعت لقيت في وجهي نفس العرض وانا كان نفسي نتزوج انسانة لينشوفها مناسبة يعني بسبابك فسدو مخطاطاتي بصح بعد كلشي صرا القلب لحمة وحساس مافهمتش كيفاه حتا رجعت نشوفك بنظرة حب واهتمام وحنية فردوس انا طيحت على راسي وحبيتك بصدق ومادابيا تخليني نصحح اخطائي ولو كانت قاسية وصعيبة بصح مادابيا نلقى فرصة منك باه نثبث اقوالي وتشوفي مني التغيير ووعد مني نفرشلك حياتك حرير وكما تبغي نتي الشيئ ليتطلبيه يحضر ونخلي حياتك كلها من كانت جحيم للجنة واش قلتي فردوس _فات الحال هيثم خلاص مابقات بنة فيك ولا نطمع في حياة متغيرة معاك ودرك تعيش خليني نرقد نعست .
الحلقة 48
بقلم لينا صبرينة
ماعليش ارواحي ترقدي عندي في حضني وماندير والو _خليني في حالي مانرقدش عندك .نضت رحت تسطحت وعطيتو بضهري وهو غطاني وراح وحتمت على روحي رقدت غير باه مانخممش في كلامو ماش خابة نضعف _لصباح ورغم كل احزاني المدفونة داخلي نضت كما موالفة مورالي طالع ونحاول ننسى واقعي المر .درت بيبرونة لرفيف شربت حليبها وبدتللها وخليتها تلعب ليوم ناضت بكري. رحت غسلت ودخلت حطيت كاس حليب شربتو بالواقفة سمعت ثلفونو صونا وشوي وخرج من شومبرة راح فتح الباب تاع برا وبقا يهدر عرفتها هاديك جات _خير واش جابك صباح ربي _باه نلحق بيك قبل ماتروح تخدم علاه ماجيتش تديني لبارح وزيد ماتردش عليا فالثلفون _هكداك تساليني نقصان هرج منك _ هيثم علاه تهدر هكدا _خرجت وشافو معايا لزوج وكملت طريقي للبيت ولاحظت انو علاقتهم متوترة من  نهار العرس .قعدت نلعب مع رفيف حتا دخل عندي لابس وتاحف روحو وريحتو سابقاتو .قعد قابلني باس رفيف _صباح الخير علاه ماصبحتيش عليا قبيل ولا كيلقيتي صوفيا معايا ماهدرتيش _ واش دخلني انا فيكم جاي صباح ربي تهدر عليها _ خلاص اسكتي ماتقلقيش ماهدرت والو اني رايح نخدم _بسلامة _الله يسلمك فردوسة _تخنزرت فيه هكا 😒 لقيتو غمزلي ولاحلي بوسة فلهواء وراح خرج _نضت من وراه نفرز البيت لقيتها واقفة عند لباب تشنف عليا _ نتي صح مذلولة راجل عفصك من قبل ودار فيك كلش ومزالك قاعدة معاه ماعندك حتا كرامة كون انا في بلاصتك مستحيل نبقى معاه بصح نتي بنت حرام واش راح يجي منك _( عرفتها حابة تستفزني مالا حكمت روحي و حسبت للعشرة وقدمت ليها )_ ايه كيتلحق دالتك نشوفك ادا تقعدي عندو ولالا _واش تقصدي انا هيثم يعشق التراب لينمشي عليها غير مكان لاه تحلمي بحاجة خلاف _ غير روحي برك راه الكاس نفسو ليذقتو وكما شربت منو انا يجي نهار وتشربي منو نتي ثاني اصلا مصيرك واضح من بداية صبوحي تاعك راه سمعك اهانة وذل ماش حتى نفكرك واش قالك وموحال توصلي نقطة من عفتي وحيائي ودرك بدلي عليا وجهك خليني نكمل شغلي _غلقت الباب في وجها وهيا ولو رخستها بصح بقات ساكتة وحاكمة روحها عليا عارفة كون ماش هيثم مخوفها كون راهي تعاملت معايا بطريقة ثانية _وهكدا فاتو يومين هيا قاعدة غير فدار مافهمتش علاه ماتروحش تخدم  بصح دايرتها شغل ماكانش وهو من يدخل لدار وهو يتغزل فيا ويحاول يقرب انا برك دايرة مسافة أمان بيناتنا ومادرتش فيه ثقة _هاديك لعشية جاء من غير دخل عيطلي رحت ليه _هيا نروحو لدارنا _علاه غير لخير _والو برك تواحشوك قالولي جبيها بيها برفيف _ايه درك نلبسو ونروحو _رحت للبيت نبدل وسمعت صوفيا قاتلو مام انا نروح نوجد روحي _أنا قلت فردوس ماقلتش صوفيا _كفاه تخليني هنا وحدي اديني معاك _قلت ماكانش وادا تحبي نوصلك لداركم هيا نوصلوك في طريقنا _لالا خلي برك نقعد هنا _بقيت نضحك عليها ونوجد في روحي وفي رفيف كيكملنا هو دخل هزها بيها بصاكة ومشا وانا هزيت صاكي وخرجت موراه لقيتها فالهول مربعة يدها وتتخنز فينا قدمت ليها وقلتلها -مسكييينة خلاك مذلووولة وضحكت من قلبي وهو ماقدرش يسمع واش قلتلها سمع غير ضحكتي_هبطنا وركبنا وشاف معايا _علاه قبيل كنتي تضحكي _والو من غير تفكرت حاجة ضحكت _ايه مليح ربي يدومها اصلا رايحين لبلاصة راح تضحكي فيها بزاااف _من كان وجهي يضحك ديراكت عبس ومشات فيا رجفة خفت بزاف من كلامو _واش قصدك وين راحين واش راح تزييد دير فيا _اششش كلمة مانسمعهاش _ديمارا وانا حاكة يدي على قلبي سور راح يزيد يحرقني حتا دموعي تحجرو في عيني من الخلعة _شوي ولقيتو قارا قدام دارهم استغربت بصح بقيت خايفة وكان وقت المغرب ظلامت الحالة برا  .جاء جيهتي فتحلي الباب وهز رفيف وحكم يدي هبطني بالقوة ودخلنا للدار والباب كان مفتوح دزو برك برجلو وزيد ظلمة في ثانية رخى يدو عليا وبقا يتلمس بحنية في يدي وشعلو ضواو خفاف والحالة مزينة وخالتي وعمي واقفين مبتسمين ووداد خرجت من الكوزينة بطارطة في يدها وفيها شموع ويغنولي في عيد ميلادي من كانو دموعي محجرين من الخلعة هبطو شلال وهاد المرة من الفرحة .شفت معاه همسلي في وذني قتلك مازال تزيدي تضحكي بزاف. عيد ميلاد سعيد فردوسة كل عام ونتي بخير ومعايا .كانت أجمل ليلة بيناتهم باسكو من شفيت على روحي بالاك هادي اول مرة يديرولي عيد ميلادي وعرفت من وداد انو هيثم ليدارلي عيد ميلادي وفضل انو نحتفلو بيه مع دارهم باه نحس بجو عائلي ومانهربش منو ونعيش الفرحة معاهم وفي لمتهم وكانت أجمل خطوة منو وفاتت ليلة معاهم ماش راح ننساها .بصح رجعتي للدار زادت غيرت مجرى حياتي .