موجات حارقة

الجزء 12 والأخير

الحلقة 111
بقلم لينا صبرينة
نضت لميت قشي فالكابة دخلت لقاتني نعدل فالخمار شافت معايا وربعت يديها وتكات على الباب _ والله ماش كرهنا منك ولا حاجة راجلي خمم في صحتك كون تتدهور وانا مادابيا ترجعي عندو تتفاهمو قبل _ ماعليش عارفة مابخلتو والو عليا وكنتو بالنسبة لياا اهلي يكتر خييركم _ بعد ماكملت خرجنا وصلوني لدار تشكرتهم وطلعت كيوصلت للباب يدي رجفت باه نطبطب ماقدرتش خفت .درت كورراج وطبطبت فتحلي الباب شاف معايا من فوق لتحت وجبد روحو رجع وانا دخلت غلقت الباب ورحت  شمبرة كارثة مخربة كامل حاجة مافي بلاصتها .شفت مع ضياء راقد غي بلاصتو بقيت نتأمل فيه شوي وررحت بدلت قشي وهو حسو ماكانش .رحت للكوزينة لقيتها مقلبة بعد .دار كامل داخلة بعضها .سمعت صوتو فالصالون رحت شفت من بعيد لقيتو قاعد ومركز يديه في ركايبو وحاط راسو للأرض .رحت ليه قعدت وبقينا ساكتين مدة من زمان ونطق _ كون جاء واحد خلاف في بلاصتي كون عطاك طريحة وطلقك ليقعدتي شهرين في دار راجل غريب بصح عندك زهر في خرايبي ماعنديش وجه نقابلك بيه ونلومك _ نتا خليتني نروح بكدبك ليا _ طلع راسو ليا .انا ماكدبتش عليك انا خبيت برك .خبيت خير درتو بيني وبين ربي كونت قادر كون نخبرك ترفضي ولا تتوسوسي .حبيت ندير خير نلقاه في آخرتي حبيت نعاون رووحي باه نرتاح شوي حتا لقيت ضربة جاتني قاوية كتر من ليقبلها وزيد مخلية ليا ورقة طالبة طلاق .يعني كلشي ندير فيه تجازيني بكلمة طلقني _ باسكو طلاقنا راح يريحنا لزوج _ومادامك جيتي مازلتي حابة تطلقي ااه .انطقي حاب جواب تطلقي ولا نو _ سكت زمان وقتلو حتا نسمع واش عندك وساع نقرر باه مانندمش باسكو ماش ساهلة عليا نسمع هاداك لكلام ليغيه حسيت صح بكسرة ضهر وبكسرة لخاطر حسيت بمرارة منك درت فيك ثقة ومبعد خرجتلي عكسة وخديعة منك ودرك راني هنا قدامك وقابلة نسمع واش عندك _  انا ماتزوجت ماوالو ولخبر ليوصلك ناقص ايناس مريضة عندي واول مرة شفتها غاضتني سيرتو عندها بنتها صغيرة وراجلها طلقها وسمح فيها ويماها لا حولا ولا قوة ماعندها والو وكون ستنينا ديرلها ليراديو وسكانار وليارام ماش راح تقدر والدولة تطول راهم الآلاف ليمراض بالكونسار .خالتها شفتني بيها بحالتهم وشفت ميزريتك ليفوتيها قبل فيها هيا .عليها قررت اني نتكفل بيها ونصرف انا تصاريف العلاج تاعها  .درت كما دار بابا معاك .وقفت معاها فالأول كانت تتعالج عادي وفي تحسن ومبعد تقلبت حالتها وحتا موالفة تدخل غيبوبة .في هاديك الفترة شفت يماها حالتها ماتعجبش وشفتها شحال من مرة تطلب فطريق مع طفيلة صغيرة كيرحت هدرت معاها قالت ماعندهاش حتا وين تسكن الكرايا خرجها كيماسلكتش لكراء .هاداك الوقت انا كريت دار ودخلتهم ليها وبعد مدة فطنت ايناس وبقيت متابع حالتها حتا برات وخرجت من سبيطار لعند يماها وبنتها وخليتهم  لتم وكل مرة كنت نروح نديلهم مصروف ولا نبعتلهم كاش واحد بصح بعد مدة قصيرة برك زاد ظهر فيها مرض خلاف كان لازم تروح للخارج تداوي _من تم وعدتها بلي نتكفل بيها وقبلت درتلها دوسي بمعرفتي وزدت كترت اتصالاتي مع صحابي لي في فرنسا وقبلوه .زدت درتلها كواغطها في مدة قصيرة لحق كلشي واجد ولازم تروح بصح وحدها ماتقدرش لازم واحد يروح معاها .
الحلقة 112
بقلم اينا صبرينة
عليها رحت انا بنفسي ومعايا وحدة فاميلتها قعدت معاعدها وحبيت نخبرك ونقولك بصح خفت تتوسوسي ويدخلك الشك جيهتي ونتي هازة زوج رواح في كرشك وصحتك ماش مليحة .قلت نروح معاها نوصلها ونطمن عليها لتم ونرجع وواحد ماسمع حتا تولدي ونخبرك ماكنتش ناوي نخبي ولا نكدب برك الظروف تاعك منعتني  .بعد مارجعت بقيت نروح عند يماها نتفقدهم وحتا دخلت يما فالنص باه تروح عندهم وهيا خافت تسمعي وتزعفي قلتلها ماكاين والو من غير تداوي ايناس وترجع بخير نديرلهم شهرية ويعودو يتكفلو برواحهم مانزيدش نروح عندهم بصح فالأخير صرا ليصرا ويماها زادت فالهدرة مع الجيران باه تبقى صورتهم نضيفة وماتشوهش هادا ماكان وسلوى ربي يسامحها جابتهالك سخونة وتفرت غير فينا خسرنا بناتنا وهادي هيا القصة ومافيها بصح نتي تسرعتي وغفلتيني ورحتي  بلا ماتفهمي كلشي_واش يضمن بلي كلامك صحيح _ طلع يدو ويمسح في وجهو وشعرو ووجهو طلع حمر وجبد ثلفونو من جيبو وحطو قدامي ودخل للمسنجر وعيط لايناس( قريت الإسم ).علاه تعيطلها؟؟ _ماردش عليا وايناس هزت شفتها مرا بشرتها سمرة وباين عليها المرض وحاطة على راسها خمار بيض من غير شافتني _ تبسمت وقاتلي فردوس هادا نتي ختي _شفت معاه وماعرفتش واش نهدر معاها ديراكت شفت دموعها طاحو قاتلي ختي سامحيني ادا كنت سبة في مشاكلكم عمي هيثم خبرني بكلشي ربي يعوضكم ان شاءالله بصح الشيئ ليوصلك كلو غالط ويما خافت من هدرة الناس وراكي تعرفي عقلية لكبار يخمو فالناس بزاف وهيا دارت غلطة ماكانش عارفتها بلي تسلك غيرها غالية .انا درك ماعندي مانقول غير تسامحيني وعمي هيثم كان واقف معايا كأب برك ماتحطي والو في بالك ويكتر خيرو كون ماش هو راهي يما وبنتي فالشارع يدورو وانا نتمرمد من سبيطار لسبيطار .فردوس حتا نتي مرضتي وراكي تعرفي واش معنتها كونسار وتعرفي الآلام والمعانات وزيد يتيمة وفقيرة وماعندي حد من غير يما وراجلك كيوقف معايا شفتو ملاك وربي بعتو ليا باه بسبتو نطمن ونعيش يكتر خير ربي وهو (كانت تهدر وتبكي وانا نبكي معاها حسيت بيها بكل كلمة قالتها )فردوس راجلك عمرو ماشفت فيه بنظرة خلاف من غير اخ واب برك مايروحش بالك لبعيد ونتي عندك حق تزعفي وسامحيني سامحيني _مسحت دموعي وقلتلها سماح  _ حاباتك تصدقيه وتسامحيني من قلبك راني هنا بعيدة عليكم بصح من سمعت وانا غير نبكي وضميري يأنب فيا اني فرقت عايلة بدون قصد  _لالا ماتلوميش روحك راكي  مسامحة دنيا وآخرة تهلاي في صحتك برك وربي يشفيك ان شاءالله وترجعي عند بنتك ويماك _ان شاءالله _كوبا وانا غلبوني دموعي وماقدرتش نحكمهم .علاه ياهيثم درت فيا هكذا علاه خبيت عليا علاه ماصارحتنيش  من الأول _ يشهد عليا ربي غير حبيت تقولك بلي رايح لفرنسا مع ايناس وماكنتش عارف شحال راح نبقى بصح خفت عليك ونتي مريضة خممت وخممت وقلت مانهدرش ماش حاب نخليك مورايا موسوسة وعلى أعصابك عارفة راح تغيري وتبقاي تطلعي وتهبطي وهيا ماكان والو _بصح شوف تخمامك وين وصلنا انا الحق من قبل شكيت فيك كيسمعتك تهدر عليها و نيميرو ليعيط وتعيطلو نتا من فرنسا بزاف وزيد لقيت عندك ورقة مخرج من البونكا 40 مليون بزاف شكوك دخلو لراسي _خرجت كتر من ربعين مليون والحمدلله جبدتهم وحطيتهم غير فالخير وماش غير انا ليندير الخير كاين طبة بزاف يديرو هاد الشيئ فالخفاء واكيد مانقدروش نتعاطفو مع الكل بصح اقسم بالله كانت نيتي صافية جيهة ايناس من غير عاونتها برك حبيت نكفر على دنوبي وندير الخيير باه ربي يسامحني ويخفف الحمل لثقيل عليا .
الحلقة 113
بقلم لينا صبرينة
ياريت كون خبرتني من قبل ياريتك ماخبيتش راه هلكتني بهاد الشيئ _سوء تفاهم وفرات وتوام كاتبة ليهم مايعيشوش بصح تمنيتك تصدقي كلامي وتبقاي في دارك بصح لقيتك رحتي حسيت بغدرة كبيرة كيجيت لدار ومالقيتكش (هبطت دمعة من عينو وناض خرج من دار ) كيناض ضياء رحت مديتلو شرب لحليب ونضفت شومبرة والدار شوي قد ماقدرت وبقيت نخمم في واش هدر مالقيتش روحي كامل بالتخمام حتا تزير عليا صدري رحت رقدت__نضت لقيتها 11 تاع ليل شوي وسمعتو دخل لدار لقاني فاطنة شاف معايا ومع ضياء وراح سمعتو كيخرج للبالون .كيطول رحت نشوفو او بالأحرى قلبي راح يحوس عليه لقيتو قاعد فالأرض ومتكي على الحطيط ويتكيف !!تعجبت ماش موالف يتكيف .رحت حطيت على راسي خمار وخرجت ليه _ واش دير نتا _كما راكي تشوفي _ من وقتاه تتكيف _من بكري نتكيف وحبستو بصح نهار رجعت لدار وقريت هاديك الورقة تهز قلبي وعقلي مع بعض هبلت جنييت خرجت كيلمهبول نسقسي عليك ونحوس ونرجع لدار على امل اني نلقاك رجعتي. خاوتي درتلهم حالة طوارئ الكل يحوسو عليك ماخليت بلاصة وانا نحوس وكل يوم نقول ليوم نلقاهم خليتيتي في يدين عداب الضمير هو يعاقب فيا .ماعندي خدمة نعرف نخدمها مانفرق بين ليل ونهار على طول هامل على أمل اني نلقاكم حطيت كامل الاحتمالات في راسي عدبتيني يافردوس بغيابك دمرتي نفسيتي انا عدبتك عام ونتي ضاعفتي عدابي طول هادو سنين _هبطت على ركايبي للأرض عندو ومسحت دموعو ماحملتش نشوفو بهادا الضعف _خلاص بركا ماتبكي قدامي_وليت مانقدرش نتحكم في دموعي وهادا يدل على ضعفي من داخل تمنيت نجدد علاقتنا بتغيير مني وفي علاقة صافية بيناتنا بصح كلشي ضاع على جال عمل خيري مادرتش حسابي بلي نخسر على جالو وزيد هربتي وديتي معاك وليدي حرقتيني بيها _انا هربت منك باسكو قلتلي وجوه بعضنا رجعت كوشمار وكلما تشوفني تتفكر دنوبك _ايه صح قلت هكدا بصح كانت ردة فعل متهورة مني غلطت في حقك كيقتلك هاديك الكلمة بصح ماحوستيش تفهمي واش وصلني حتى قلتلهالك .فردوس راني دفنت رفيف وزدت اسلام وزدت بناتي توام .نهار عيطلي رمزي قالي اجري للدار مرتك ماهيش تهز على ثلفون كاش ماصرالها .طلقت كلشي من يدي ورحت لقيت ضياء فاحم بالبكى ونتيي فالأرض والماء يجري من تحتك .هزيتك لسبيطار ولتم عيطلي رمزي حكالي بلي سلوى كيلقاتك ماترديش خافت وخبرت رمزي .لتم حطيت اللوم كلو عليها باسكو دبحتنا في بناتنا كانت قادرة تسكت وماتهدرش بصح هيا خممت في حاجة اسمها حق المرا .كيوصلتك لسبيطار كان قلبك ضعيف لاكنسيو طالعة فسماء قريب ماحبس قلبك ودارولك الايكو لقاو لبنات صاي تسممو وحبسو قلوبهم كانت وحدة عاشت كتر من ختها بصح ماطولتش وحبس قلبها .ولدوك وهزيتهم ورحت دفتتهم قدام رفيف واسلام .بقيت نشوف معاهم وغصة في قلبي كتر من قبلها .كاتبلي نتعدب هكدا وزدتي نتي ماكنتيش مليحة وكلما تفطني مع روحك وتتفكري بناتك يجيك انهيار عصبي وتطلعلك لاطنسيو تحتمت نحطولك مهدئات حتا خرجتي من سبيطار وخليت يما تراقبك وماتهدرش معاك  بزاف حتى تتحسنيي وهاداك نهار كنت معول نبدى نحكي بصح ماخليتيش الفرصة وهجتي عليا ماخليتي والو ماقلتيهش وانا من قوة الضغط قلتلك هاداك لكلام بصح يافردوس والله غير نحبك وماش قادر نخسرك _حابك تكوني قدامي وقدام عيني باه ترحيني شويي بشوفتك على الأقل .على الاقل حنيتك وحبك وعاطفتك تريحني والله غير نعشق فيك نتي برك ماكيش حابة توثقي فيا بلي تبدلت كون يحطولي عشر نساء قدامي باطل وحدة ماتدي ببلاصتك .
الحلقة 114
بقلم لينا صبرينة
ماكانش ياحبيبي ماكااانش من غيرك نتي سرقتي كلشي فيا نتي هيا الامان والحياة ماتزيديش تخليني وراك خلينا نداوو بعضنا ونتناساو خليك معايا حتى يدي ربي امانتو ونموت _ اشش اششش اسكت قطعتلي قلبي اسكت مام انا نحبك بصح الظروف كانت قاسية علينا وعدبتنا تمنيتك من قبل تحكيلي وتمنيتك ماتهدرش هاداك لكلام بصح كاتبة تصرا هكدا ماعليش صايي فاتت مانقدروش نرجعو لور مي نتا ماتبقاش هكدا ضعيف وتضر في روحك _هزز براسو وانا بقيت نمسحلو في دموعو.هيثم صورت لبنات _شاف ليا وجبد ثلفونو ورالي صورتهم من غير شفتهم هبطو دموعي بساكت وهو معايا . بسيف سكت وهو طفا الدخان وبقا شارد _والله ياناس غير حالتو شقتلي قلبي جامي شفت راجل بهادا الضعف الواضح والدمار والانهيار ليراهو فيه  .قعدت قدامو وحطيت راسي على كتفو ونبكي بالشهقة ماحكمتش روحي _حس بيا حط يدو على وجهي _علاه تبكي فردوسة _ طلعت راسي ليه وتقابلو عينينا . نبكي على حالتك ماقدرتش نشوفك هكدا _ نورمال فردوس هادو دنوب والمعاصي ليدرتهم خرجو فيا ياك يقولو كما تدين تدان عادي راني نسلك في أخطائي والحاجة لمليحة ولينشكر ربي ليل ونهار انو ضميري فطن من سباتو _هيثم راك مسامح دنيا وآخرة ومن قلبي راني مسامحاتك _تبسم وباسني من راسي وحط راسو على راسي _ربي يخليك ليا ان شاءالله _هيثم راك نتا هو قوتي ماتخلينيش نشوفك ضعيف خليك سند قوي ليا ونوعدك نكون ليك شريكة حياتك المتسامحة ومنسية الماضي _ حضني وزير عليا اعطيني شوي وقت ونرجع كما كنت بصح قبل محتاج جرعات من حبك ليا _ راني معاك وين تكون ومن ليوم حبي وحبك هوما دوانا .دخلنا هو راح دوش وجاء لقاني نتفرج في ضياء جاء قعد قدامي وجبدني لحضنو _أااه يافردوسة كنتي راح تحرميني منكم ومن هادا المنظر _الغش عمالي عيني بصح كيعاملتني صباح بهاداك التجاهل والبرود حطمتني ورجعتني ليك _ ايه كان لازم عليا نديير هكدا باه تحطي عقلك في راسك وتلحقينا بإرادة منك وساع كيتدخلي لدار موحال نزيد نخليك تروحي _طلعت راسي ليه .مالا ميساجك وصل وراني ملكك _اكيد وطول لعمر سلميلي روحك برك وحطيي كل ثقتك فيا وماش راح تندمي وخلي اسمك مربوط بإسمي فردوسة الهيثم  _هززت براسي وملكني لحضنو ليكان قاسي وتحول لدفئ وحنانة وطمأنينة .......
الحلقة 115
بقلم لينا صبرينة
بعد هاداك نهار او هاديك ليلة الباكية الحزينة الصافية تبدلت حياتنا .اسمي تربط بهيثم والمكتوب رجع جمعنا مع بعض وممكن ضياء هو كان واحد من الأسباب باه نبقاو مرتبطين مع بعض طول لعمر ومانتفارقوش وعلى جالو قادرين نتناساو على كلشي ونتسامحو ونتتازلو .عطيتلو حبي كلو وحاولنا نتحكمو في مشاعرنا وننساو واش فات علينا .انا كنت من دار للخدمة وبقيت نتابع حالتي الصحية من كل الجوانب حتى تحسنت ولولاد ادعولي ربي يرزقني ويشفيني وبالنسبة لسلوى من نهار صرات هاديك لحكاية وماتو لبنات في كرشي هيثم راح ليها وحط فيها اللوم كلو وقلب الدار ورمزي للأسف حاوزها وماقبلهاش تزيد تدخل لدارو حتا بعد 3 شهور انا ليرجعت علاقتهم من جديد وتصالحو ودرك راه عندهم طفل ولو صرات فتنة بصح ماحبيتش نخربلها دارها وفاتت. وسالم تاني تزوج واستقر ووداد زادت جابت طفلة مع رفيف ووالديا ماعنديش اخبار عليهم وماش محوسة عليهم ولو هوما مازالو حابين يتقربو مني بصح انا رافضتهم وجامي نسامحهم واهلي ليرباوني مازدتش حوست عليهم لأنو مايستاهلوش اول حاجة فرقو بيني وبين وليدهم وعاملوني بتجاهل وحرمان وثاني شيى كيلقاوني مريضة رجعوني للمركز ومازادوش حوسو عليا مام انا حقدت عليهم بصح مسامحتهم نخليهم لربي وخلاص .وايناس رجعت لبلاد وتلاقيتها وربي يشفيها مازالت مشلولة من رجليها .الحمدلله بعد طول هاد السنين ليتعدبتهم هيثم عوضني ولو هو كان نقطة سوداء فيها بصح عرف كيفاه يخليني نتناسى وعيشني ايام حلوة ورغم فارق السن بصح مايبانش بلي راه فالربعينات وتصرفاتو معايا وتعاملو كلو طفولي منها حب واهتمام ودلع وحنانة وهاد الشيئ ليساعدنا انو نجددو علاقتنا للأفضل ونكونو متفاهمين في كلش .ولو ضميرو راح يبقى يأنبو حتى يموت لأنو انا ليعايشة معاه وتعابير وجهو تخبرني والحمدلله انو فاق لروحو وتبدل للأفضل وأعمالو الخيرية مازالت متواصلة وربي يتقبل منو وكل حاجة يديرها رجع يقولهالي خوفا من تكرار السيناريو ورجعت انا في حياتو رقم واحد وأي شيئ نطلبو يحضر ولو كاين مرات اختلافات وانا نكون الغالطة بصح هو يبادر الأول و يتنازل ويطلب سماح المهم مايحبنيش نزعف ونتقلق ويرجعني نضحك بطريقتو نفسها ليقدر يملكني بيها .
وهادي هيا حكايتي من صغري وانا نتعدب دقت كل انواع العداب نفسيا وجسديا .جازو عليا مراحل مختلفة وكل وحدة اصعب من ختها .عيشت حرمان ومرض وآلام وصراع وغدر وكره وضرب وشتم والذل وفراق  ومنهم كسبت قوة وحب ونجاح .كاين بزاف قالو علياا مدلولة كون هربتي بصح انا خممت بعقلي وقبلت اني نتعدب تحت سقف مغطيني وحاميني خير مانتعدب فالشارع تحت رحمة ولاد لحرام والحمدلله صبرت ونلت وربي مافيه غير الخير _عمي رابح وخالتي يكتر خيرهم حطوني في مكانة بنتهم ونيتهم كانت صافية عمي تكفل بيا بدون مقابل مايعرفني ماوالو حب يخبي عمل خيري لآخرتو هادا ماكان وربي يكتر من أمثالو .
قصتي هيا عبرة لناس بزاف باه تشوفو بلي مرات يجو ظروف قاسية ولازم نواجهوها بعقلنا قبل قلوبنا ونصبرو على واش عطانا ربي وانا تحديت صعاب ومعانات اكبر من عمري بموجات حارقة لأنو صح حرقوني وحرقو غيري بالإبتلاءات وفي الاخير بقى اسمي مربوط تحت عنوان موجات حارقة فردوسة الهيثم .
بعض الأشياء قد تألمك ولكنها ستعلمك .وربي رحمتو واسعة وماتدري الفرج من وين يجييك والحمدلله .
       الـــــــنـــــــهـــــــايــــــــــــــة ♥️