_عَشقَ كُم _
_ (بقلمي بسمة البياتي) _
_ البارت الثامن عشر _
ليس البقاء لـ الأقوى
بل لمن إمتلك اليقين
بأنه قادر على البقاء
مهما كانت الظروف.......
.
.
صوت يصدع برأسي ( تعالي أريدج) الكلام يتكرر
تعبت جزعت إستسلمت
كافي لشوكت اظل متحملة هذا العذاب
فتحت باب السيارة
ثواني قبل لا أجرم بحق نفسي وارمي روحي منها وهي تمشي
نمدت أيد لزمتني من زندي صاح صوت قوي
فزز الكل من شافوا المنظر چلبوا بيه
كان أيهم هو إلي لزمني شلون شافني شلون گدر بسرعة البرق يصد عليه ويلزمني رغم هو الديسوق
اكيد ربنا عطف عليه وما خلاني اموت مذنبة وغاضبتة
ايهم نزل للترابي ووگف السيارة هم زين ما سوا حادث
ارافس تحت قبضة ماما وخالة اصرخ بوجوع وتعب
عوفوني أريد أروح
نغم ـ ميخالف بس لا تصرخين گوليلنا وين تريدين تروحين وإحنا نأخذج
ـ ما أريد أحد أريد اروح وحدي حرام عليكم أختنگت اتركوني بحال سبيلي
منجد ـ نزلوها خلي تغسل وجها
هبة ـ مد تشوفها متهسترة تروح تفلت من أيدنا وتشمر روحها جوة السيارات
نغم ـ إحنا يمها خلي ننزلها شوفيها گلبها راح يوگف من اليجي والصراخ
ـ نزلوني من السيارة
خطوتين وگعدت بالگاع
جابوا بطل مي بالگوة شربوني وغسلوا وجهي
ابجي بشهگة اريد اسحب روحي من قبضة ماما وخالة ما اگدر تعبت وسنحت
گمت احجي بصوت تعبان ومبحوح
ليش ما تخلوني اروح هاا شمسويتلكم وما تريدوني أرتاح
ايهم ـ وين تريدين تروحين دلينا المكان إحنا هم نريد نروح وياج
ـ ما أريد احد أريد وحدي هو يگلي تعالي
اني محد يريدني ومحد يحبني
ما إلي احد أريد اموت شعدكم جايين وياي للموت
هبة ـ بعيد الشر عنج كافي لا تعذبينا شلون منحبج عزيزة کلوبنا أنتِ الحياة بلياج شتسوى
ـ والله محد يحبني اني ما عندي مكان ولا عندي بيت عايشة بخوف لا يجي يوم اصفى بالشوارع اخاف افرغ جنطة ملابسي لأن متأكدة على ساعة لأزم اخذها واطلع
منجد ـ أخوج يحبج وما يگدر يفارگج ما تريديهم هذا هو نأخذ بيت ونطلع اني وياج نعيش مو عيب ولا حرام الأخ من يسند اختة
ـ أنت ما تعرف شي محد بيكم يعرف شي
ما تعرفون شلون عشت و بشنو أحس
مخنوگة من كلشي الدنيا كلها خانگتني
حتى الهواء إلي أتنفسه ينزل الرئتي مثل السيوف يجرح بيه
تعبت أريد ارتاح خلوني اروح
أريد اروح
گلتها وغمضت تعبانة شالوني رجعوني للسيارة
هلكت من البجي والصراخ إلى إن خلصت طاقتي و نمت ماگعدت غير لما ماما ندهتني گالت وصلنا
فتحت عيني شلت رأسي من رجل خالة
هالمرة مگعديني بنصهن
متشنطة من هاي النومة رگبتي وظهري يوجعوني
