_ عَشقَ كُم _
_ (بقلمي بسمة البياتي) _
_ البارت السابع _
نعم ،يستطيع الإنسان أن...
يسامح _ ينسى _ ويتجاوز ،
ما عدا ذلك الموقف
الذي أشفق فيه على نفسه
من شدة الأذى،
سيبقى عالقاً فيه إلى الأبد .
،
،
خالة علياء خاطبتني الـ وميض ومبلغيها
بـ رفضي
خلوني بـ موقف صعب صرت مثل وحدة محشور موس بـ بلاعيمها
وما تعرف شلون تجاوب الله يسامحهم على هـ السواية
كان على الأقل قبل لا يرفضون يبلغوني ويخلوني بـ الصورة حتى أعرف شنو أرد بـ مثله هيج مواقف
خالة حست بـ رتباكي ويمكن ظنت ضجت من كلامها خطية المرة بسرعة غيرت الموضوع
تركتها ورحت الغرفة خالة
اريد أستفسر منها
كانت دتمشط البيبي
لمياء ـ هسه ردت احاجيج علمود العشاء لا تسوين شي منجد گال اجيب جاهز من برا
ـ اي زين
اگلج خالة ممكن أستفسار خالة علياء شوكت خاطبتني
الـ وميض
شنو هاي حركاتكم ليش تخلوني بهذا الموقف المحرج ظليت ابلعم احير شلون ارد عليها
ساهرة ـ صلوات يمه وميض خوش وميض
ماتلگين احسن منه رجال والنعم منه
ـ صفنت من ردة فعل بيبي
خالة وجها خبط ألوان
ـ ام وميض شحجت وياج؟
ـ ما حجت شي گالت تمنيت تصيرين چنتي
بس أنتِ رافضة
ساهرة ـ يا بنتي وين تلگين احسن من هاي القسمة جان اجيتي أستشاريتنا ننصح (الأكبر منك بيوم أعرف منك بسنة)
ليش مستجعلة على الرفض حتى ما منطية النفسج فرصة تفكرين
ـ والله يا بيبي اني هم حالي من حالج هستوني سمعت بـالموضوع الظاهر الوحيدة التعرف هي خالة لمياء ورافضتة بالنيابة عني حتى ما كلفت نفسها تجي تسألني خلتني اصير هلگدوتني گدام
المرة
ساهرة ـ وليش ترفض بدون علمنا
شنو هـ الحجي لمياء؟
لمياء ـ اكلتوني حاصل فاصل
يمه يعني أنتِ غشيمة وما تعرفين بـ أطباگات توفيق تتوقعين يناسبها الـ هبة
لحد يلومني هسه يلا احوالي تعدلت
ما اريد مشاكل اني بغنى عنها
و أنتِ ليش ضايجة مو من البداية گتلج الولد خط احمر ( الأوله شرط أخره نور) ما غشيتج ولا عشمتج بشي ما راح يصير لو تنطبگ السماء عـ الأرض
ـ منو كالج ضايجة من الرفض؟ إلي غثني
حطيتني بموقف مو حلو اني صاحبة الشأن
عل. الاقل المفرض يكون عندي علم
ـ مصار شي وهسه هياتج عرفتي
وفضت وراحت وصفگت ايد بيد
ـ سؤال اخير ممكن أعرف شوكت طلبتني هالأيام
لو قبلها ومنو غيرج يعرف بهذا الموضوع
ـ محد بس اني من بداية جيتنا لهنا
حاجتني بقيت اماطل واتملص منها عبالي تمل وتنسى
اشو ظلت تلح زهكت كتلها ملكوت رفضت
