_ عَشقَ كُم _
_ (بقلمي بسمة البياتي) _
_ البارت الثالث والعشرون _
يحدث أحياناً أن ندفع الثمن مرتين
مرة للحصول على الشيء
وأخرى للتخلص منه....!!!.
.
.
بهذا الظرف محتاجة للقوة مو للضعف
محتاجة للتفكير السليم مو للتهور
أقل غلطة ممكن تضيعني وتضيع سمعتي
أني مو هبة أي أني مو ماما وأسكت عن حقي
وأخلي سيرتي تكون على كل لسان ويعلچون بلحمي بأفواههم القذرة
البچي وللطم مو بصالحي وما راح يساعدوني لا يقدمون ولا يأخرون
مسحت دموعي بدء رأسي ينبض خفت تجيني نوبة الشقيقة گمت أخذت علاج
وطلعت غسلت وجهي بمي بارد ظليت واگفة اطش المي بنص وجهي إلى إن دخل بخشمي وأذاني
سديت البوري رجعت للغرفة
فكري شارد
تنفست بعمق يا ربي أرشدني للصواب
نور عقلي بالحل السليم
إذا ابلغ ماما أو خالة أعرف ما راح يسكتن ويروحن البيتهم وتصير هوسة وبأخر المطاف حتى لو ثبتت برأتي لمياء راح تظل تشوه بصورتي وبكل گعدة ومناسبة راح تذمني وتذكرني بسوء
و إذا بلغت منجد أو يوسف كذلك ما راح يسكتون هما شباب ودمهم حامي متأكدة راحو توصل بينهم للضرب ويمكن واحد منهم يتأذى وأكون أني سبب أذيتة
لزمت رأسي ضغطت عليه شسوي يا رب شسوي
إلك المشتكى ومنك الفرج
اقل الدقيقة وفزيت من مكاني شلت تلفوني
إنطيت إتصال الرحمة
أعرف الوقت متأخر لكن مستحيل اصبر للصبح وللضرورة أحكام
الحمد لله بسرعة ردت
رحمة ـ هلو ملكوتة منج من الشيطان شعجب ذاكرتني اليوم لو ما اني اسأل فلا أعرف أخبارج
ـ فدوة العمرج أجلي المعاتب البعدين
اگلج عمو توفيق گاعد لو نايم؟
ـ والله ما أعرف قبل نص ساعة فاتوا للغرفة
بيج شي نبرة صوتج مد تعجبني شصاير لج؟
ـ إذا تعزيني أبد لا تسأليني دزيلي رقم عمو أكون ممنونة منج
ـ والله قلقتيني وأنشغل بالي لكن ما راح أقدر وضعج وما أضغط عليج هسه ثواني ويوصلج الرقم
ـ تمام وعندي طلب ثاني لا تحجين المنجد عن هذا الإتصال خلي الموضوع بيني وبينج فقط
ـ ماشي حبيبتي لا يظل بالج ما راح أجيبلة سيرة تطمئني
ـ سديت الخط أقل الدقيقة وصلني الرقم
سجلتة بتلفوني وإتصلت حتى لو نايم شسويلة خلي يگعد ويسمع عمايل أبنة العزيز
مبين لسة ما نايم جاوب بسرعة
مجرد سمعتة گال الوو الغصة إنحشرت ببلعومي
السلام عليكم
ـ وعليكم السلام تفضلي منو وياي؟
أني ملكوت
ـ يا هلا بملكوت شلونج عمو اخبارج
ـ والله أخباري ما تسرك لو ما ضايمني الضيم مچان أجيت أسنجد بيك واطلب مساعدتك
ـ خير يابة ظل بالي شصاير وياج و إذا اگدر اساعدج تشلعين عيوني ما راح اتأخر
ـ عمو أبنك رواد ديتمادئ هواي ومجاي يتركني بحالي إبتعدت ولسة مخلصانة من شره وحقارتة
