_ عَشقَ كُم _
_ (بقلمي بسمة البياتي) _
_ البارت التاسع _
بعض الأشياء ألتي نسعى لـ إمتلاكها
لها وجهاً آخر غير ذلك ألذي أبهرنا
.
.
عمام؟!
من شوكت صار عندي عمام
مجرجريني من الجامعة لهنا علمود هـ الخرط
ركز و إذا اكو مشاكل بعينك مو عيب لو تلبس نظارة المهم تگدر تشوف زين
بـاوعلي مو طفلة الگدامك وجايبها تهددها بـ هالملاعيب مشاكلك ويا اختك روحلها حلها وياها مو گدرتك عليه (تخاف من الأسد
تطلع قهرك بـ الأرنب)
وگف گدامي وسطرني بـ راشدي اذني صفرت من قوتة
رشيد ـ قابل عليمن تطلعين إذا امج هبة وخالتج نغم تربية گ..... شترجى منج
هذا لسان البرابيك عود طلعي گدام عمامج من تشوفيهم بلكي يطلعون زلم حوك ويعيدون تربيتج ويمشوج مثل ميل الساعة
ساهرة ـ كسر بيدك امداها
لـ بطني المخلفة عار مثلك
حيل بيه كل اليجرى من ايدي
جذبت خواتك وصدگتك
گالن هذا وراه سالفة لا تخلينة يضحك عليج
خشيت بعينهن گلت لا أبد مبين صدك ندمان ورايد يكسر الشر ويراضينا ذيل الچلب شيعدلة
شكو واكفة خابري واحد من الولد يجي يأخذنا
ـ طلعت التلفون سحبة من أيدي رگعة بالگاع وداس عليه
هو و ابنة انگلبوا وحوش مو بشر
كلما أحجي كلمة تجيني كفخة
احس راسي صار بي إرتجاج
خفت على بيبي لأن فرفحت
سكتت وأجيت حضنتها
ظل رايح جاي واني مخلية ايدي بيد بيبي
وصافنة على زماني
همست البيبي وين تلفونج السالفة مو سالفة تهديد أخاف جايب ناس مسويهم عمامي
ويحطني بيدهم
ابنج خنزير كلشي يطلع منه شوفي شكلة عبالك شيطان حتى نور الله ما باقي بي
ـ والله يمه عديم الشرف والناموس كلشي يطلع منه
المهجوم التلفون اخذة مني ضحك علية گال انطينيا احاجي نغم منه
ـ وهسه شنسوي وين انطي وجهي فهميني
وره ساعة
صار صوت بالطرمة طلع خالي وولده
بقيت اباوع بوجوه نسوانهم واستنجد بيهم
بلكي وحدة منهن عدها ضمير وتنقذني
لكن للأسف هـ العائلة كلهم من نفس الصنف
رشيد ـ گومي وياي
ـ والله فلا اتحرك منا لا تخليني اسويلك مصيبة واتهمك بخطفي
ـ هـ الحجايات المتعلمتهن من نغم مايهزن شعرة مني گومي بالطيب لا تخليني اگومج بالقوة
ـ راد يتقدم صرخت وحضنت بيبي
، بنت الكلب صوتج لا تشهرينا
فات أبن خالي يركض گال الأبو الحگ
عماتي أجني
فاتن ماما وخالة نغم من شفتهن
گمت ابجي وأصرخ من كل گلبي
هبة ـ يا كلب شمسويلها اليوم انعل شرفك يا عار يا خنثة
وصل إجرامك للخطف
رشيد ـ بنت القندرة لسانج اگصة واعلگة گلادة برگبتج
عمامها ورايدها بيج زود روحي واجهيهم وگليلهم
ليش شامرة بنتج بـ البيوت وبنص الزلم عايفة بنية شابة على حل شعرها
