حكاياتي مع المرضى

1_(إنعدام الثقة بالنفس)

بسم الله والصلاة والسلام على رسول الله

"جميعنا مرضى نفسيون لكن بنسب متفاوتة!"
في صباح يوم ما يعلم بيه إلا ربنا قررت أروح العياده... اللي طبعاً بيني وبينها خطوه!
دخلت عيادتي اللذيذة..طلبت قهوتي المزيزه..واتفرجت على السفيره عزيزه (بمزح طبعاّ..ضغط الشغل بيعمل اكتر من كده)
المهم القهوة وصلت من مساعدتي اللطيفة سحر
ودي بقي حكايه لوحدها... سحر دي واحده من اللي بتاكل اللبان(العلكه)وتقعد تطرقع على الرايحه والجايه!
بتنفعني ساعات بشخصيتها السوقية المنتشرة بكثرة..مع هدومها (ملابسها) إللي مليانه الوان (تحس انك دخلت دولاب واحد عشوائي بيحب الوان السما السابعة!)
ما علينا من سحر الببغاء دي....
الحاله الأولى وما أدراكم ما هيا الحاله الأولى!
أجلس لا بيا ولا عليا وفجأة ألاقي إللي بيقتحم عيادتي
كان شاب أراهن أنه في الثلاثين من عمره
أشارت ليه بالجلوس وقومت جلست قدامه
حطيت رجل على رجل وعملت فيها دور المهمة (مغرورة أوي انا)وأستنيته يتكلم!
كان بيبص لكل حته بتوتر وندم أنه جه هنا
لذلك قولت طب ما اديله زقه (عارفين كدا أما تلاقوا عربية في طريق صحراوي وواحد مش عارف يزقها لوحده؟ هنديله زقه؟)مظنش والله إلا لو المحتاج دا كان بنت...ساعتها الرجاله هتتميز بأحترافية الزق..
أصل الرجاله بتحب الزق أوي.... أحم أقصد المساعدة
ما علينا بدأت أتكلم معاه براحه عشان ياخد عليا
(أصل أهم حاجة في علاج المريض هيا علاقته بالمعالج):
_"صباح الخير تقدر تقولى بتعاني من إيه؟"
جمله بسيطة جداً دايماً كانت بتخلي أي حد ينفجر قدامي..ويقول كل حاجه وجعاه عشان يرتاح... وبالفعل نجحت معاه وبدأ يتكلم:
_"صباح النور حضرتك... أنا أسمي وليد..عندي 35 سنه.. الحمدلله متجوز ومخلف بنت صغيرة"
امأت له (بمعني حلو حلو جميل جداً..جميل اوي) وبعدين كلمته بنبرة حاولت فيها أكون مهتمة لأن إللي بيحكي مش هيقدر يحكي براحه غير لما يلاقي اللي قدامه قاعد منصت ومهتم بحديثه:
_"حلو جداً...كل دا جميل بس مقولتش برضوا إيه السبب إللي يخليك تيجي لعيادة نفسية؟"
سؤال يخلي الشخص يفكر في الإجابة مليون مره قبل ما يجاوب.. لكنه جاوب بنبرة لاحظت فيها كميه وجع.. وحمل تقيل على قلبه:
_"انا بعاني من قبل الجواز وحاسس إني مش هقدر أعمل حاجه..حاسس إني هفشل...حاسس إني ماليش أي لازمة في الدنيا كلها..وخايف...خايف بنتي لما تكبر وتتم التلت سنين وتبدأ تتحرك وتتكلم تطلب مني أصلح حاجه.. أو تقولي تعالي معايا يا بابي والله بجد خايف مطلعش أب كويس.. أو حتى اللعب إللي هلعبه معاها هيعجبها...عندك حل يا دكتورة ؟"
احترت حرفياً بين مرضين... وعشان أعرف أفهم هو بيعاني من ايه بالظبط سألته عن شكله هل عاجبه؟..:
_"مش عارف..حتي لو عاجبني ممكن محدش يحب شكلي دا...زوجتي كمان وقت جوازنا سألتها أنتي شايفه فيا ايه أنا مش شايفه...قالتلي إني مفيش فيا عيوب..معقول يا دكتور فيه بني ادم كامل؟ مش الكمال لله بس؟...يبقي اكيد هيا بتكدب عليا وأنا مليان عيوب"
حيرتي كادكتوره كانت هتزداد بس طبعاً عشان درست نص عمري المجال دا يبقي أكيد هقدر أعرف هو بيعاني من أيه لذلك واجهته:
_"طبعاً الكمال لله وحده والحمد لله...بس ربنا قال برضوا آيتين *خلقنا الإنسان في أحسن تقويم*...*خلق الانسان في احسن صوره*... وأكيد طالما عرفت أن الكمال لربنا يبقي هتفهم الايتين دول..محدش فينا كامل يا وليد كلنا عندنا عيوب..وعندنا مميزات برضوا..وحط تحت كلمه مميزات دي خمسين ألف خط...مشكلتك انك مش واثق في نفسك ودايما شايف أنك قليل.. أنك مش هتقدر..قيمت قدرتك على أي حاجه من غير ما تجرب..رغم أن التجارب بتخليك تعرف نفسك أكثر"

تنهد بعمق وبصلي بصه التوهان دي اللي معناها (طب أعمل ايه؟)كلنا بنسأل السؤال دا وقت لما حد ينصحنا ومنكنش عارفين نبدأ منين ولا إزاي..لذلك جاوبته:
_"عايزاك تتابع مع دكتور هديلك رقم وعنوانه دا أول حاجة..تاني حاجة نصيحتي ليك بقي... أولا هتبدأ تجرب كل الحاجات اللي قولت أنك خايف تفشل فيها..وتتحمل فشلك.. لأن الفشل بيعلم النجاح..ولو فشلت عادي جرب حاجات جديده..وحط دايماً بنتك دافع يخليك تتحسن وبس كدا الجلسه انتهت اشوفك بعد أسبوعين شخص تاني ياريت"
وقفت أسلم عليه وهو مشي من غير ما يقول اي حاجه (دا حتي مشكرنيش!)
وبس كدا خلص يومي الممل كالعادة ورجعت البيت عشان أسجل معلوماتي عن الحالة دي.....
(مرض إنعدام الثقة)
"هو فقدانك لثقتك بنفسك وبقدراتك الخاصة في فعل أي شيء...كرهك لشكل وجهك أو جسدك أو أي شيء يتعلق بك..خوفك من تجربة أي شيء تحت مسمي.. *لن أقدر على فعلها*  رغم أنك لم تقم بتجربة حقيقية ملموسة حتي تتأكد من إمكانياتك!'
(للعلم بقلمي أنا)
والسؤال هنا....
_كيف أعالج نفسي من إنعدام الثقة بالنفس؟
العلاج ينقسم إلى قسمين:_
الأول:_
"هو العلاج النفسي الديناميكي (العاطفي)هذا العلاج يعتمد على جلسات بين المريض والمعالج... من خلالها يبدأ المريض بكسب الثقة بالآخر ويتعلم كيف يشعر بأنه إنسان ذا قيمة"
الثاني:_
"وهذا تقوم به بنفسك إذا لم تكن ترغب في العلاج عند الأطباء...."
١:تحديد نقاط القوة والضعف
(عشان تعرف قدراتك كويس وتبقي فاهم أنت بتعمل ايه وهل هيناسب نقاطك أو لأ)
٢:وضع أهداف واقعية
(عشان تقدر تحقق الأهداف دي..وياريت تكون صغيرة عشان يسهل تحقيقها ولما تحققها ياريت تكافئ نفسك على قدرتك الجميلة دي)
٣:تجاهل النقد الغير بناء
(بلاش تركز في كلام الناس ما اللي يقول يقول يعني هو الكلام بيلزق؟ الكلام لا بيحسن ولا بيوحش يبقي التجاهل ثم التجاهل ثم التجاهل)
٤: وأخيراً احتضان الفشل
(يعني لو فشلت متأنبش نفسك وتقول أنا السبب وتحمل عليها خليك متقبل)
وأخيراً بقي نصيحتي ليك كادكتورة هيا:
1:لا تجلد نفسك
(كفايه تأنيب ضمير انتوا بتأذوا نفسكم مش بتتحسنوا)
2:كن الصديق المقرب لنفسك
(الدنيا فانيه والأصدقاء فترات..فيه اللي هيكمل طبعاً)
3: أعتزل ما يؤذيك
(أظن مفهومة ومش محتاجه شرح!)
4: أكتب قائمة بمميزاتك
(يعني جرب كل الهوايات وشوف أنت بارع في ايه واكتبه... شوف ايه الميزه الموجودة عندك ومش عند غيرك)
وبس كدا فل الفل عليك يازميلي!
والسلام.....
يتبع......