حكاياتي مع المرضى

12_(التنمر)

بسم الله والصلاه على رسول الله

"جميعنا خُلقنا في أحسن صورة"
موضوع النهارده أصبح منتشر بشكل مبالغ فيه في كل حته...التنمر بقي شئ عادي وطبيعي ويخليك وسط صحابك كول(رائع) ووسط صحابكِ بت جامده...ومحدش عارف أن عواقب التنمر أخطر شئ ممكن تعملوه في حق بني آدم مش ذنبه أنه مختلف عنكم... أتذكر قصه قديمة ممكن احكيهاليكم زي قصص الاطفال كدا فا بسم الله فلنبدأ:
_"كان ياما كان وفي مرحلة الإبتدائية كان فيه بنت بشرتها غامقة أو لنقل سوداء...البنت دي مكنتش بتسمع ودايماً لابسه سماعه عشان تسمع الناس بيقولوا ايه...كانت طفله بريئه وفي حالها وكان كل الاطفال بيرموا عليها الورق المتشخبط عليه...بواقي الأكل وكل شئ ممكن يترمي في الزبالة...البنت مكنتش بتعرف تنطق صح لأنها كانت تعتبر صماء وبكماء بس بتعرف تنطق بشكل كويس نوعاً ما...تعرضت لكل أنواع التنمر بس مكنتش بتعيط ولما سألتها أنتي مش بتعيطي ليه...قالتلي(عشان ماما قالتلي أن بكره هما اللي هيندموا أنهم متصحبوش عليا)وسألتني بكل براءة(ممكن نكون أصحاب؟) قلبي الطيب خلاني أوافق من غير ما أفكر...ومعرفتش ساعتها إني هكون منبوذة زي زيها ويطلعوا عليا ألقاب مالهاش علاقة بيا بس عشان قعدت معاها... كانت دايماً مبتسمة رغم أن الأطفال كانوا بيعملوا نفسهم خيفين او قرفانين ويجروا لما يشوفوها بس مكنتش بتهتم...وانا كنت من أقل حاجه بعيط...يمكن كمان أنا اللي اتوجعت ليها أكتر منها...مكنتش بتشتكي للميس لما كانوا بيرموا ادواتها على الأرض أو من الشباك...كانت في حالها ومكنتش حتي شاطره أقول بتتباهي انها أحسن منهم...مكنتش بتجاوب وكانت بتتعاقب على اجوبتها الغلط وعدم حلها للواجب...منكرش إني كنت فاشله واكتر منها كمان بس كنت معترفه هيا مكنش على بوقها غير جمله (لما أكبر هخش أحلي مدرسه وهغيظهم كلهم) ومدرسه هنا كان قصدها ثانوي بس نظراً لأننا كنا أطفال مكناش نعرف يعني ايه دي...تمر الأيام ويجي اليوم إللي الاقي البنت اللطيفة اللي كنت نفسي أكون صديقه من شلتها وتقولي (لو عايزه تنضمي لينا تعالي رخمي معانا على "ر") إسمها بيبدأ بالحرف دا فا هكتبه كدا...المهم إني مترددتش ونفذت فعلاً وحدفت عليها ورق وصرخت وجريت منها لما لمستني وشتمتها وقولت أسرارها اللي أمنتني عليها قدامهم بس نظراً لضميري وحبي ليها مقولتش أهم أسرارها قولت بس هيا كان نفسها تطلع ايه وتبقي ايه...ولكم أن تتخيلوا أن البنت اللي بتستقبل تنمر العيال بأبتسامة وعقوبتها من المدرسين بالامبالاة...تعيط بسببي أنا! تنهار وتستخبي بسببي ومتجيش المدرسة لمدة أسبوع ولما تيجي تقعد في آخر ديسك بعيد عن الكل ومتهتمش بحد ولا حتي تبتسم وكل دا بسببي...ووقت المرواح مسكت أيدي وقالتلي جمله عمرها ما تليق على طفله في تالته ابتدائي (فكرت أنك مش وحشه زييهم وهتفضلي معايا...فكرتك صحبتي بجد!) وجريت تعيط في الحوش وسط البنات رغم كبريائها إلا أنها عيطت وضعفت بسببي أنا...تمر السنين ونخش ثانوي وإذا بي الاقيها في ثانوي عام أدبي...بعد اختفاء لسنين أشوفها صُدفه لأ وكمان تيجي وتحضنني وتسلم عليا... وأنا إللي أول ما شوفتها اتوجعت ليها على إللي أنا عملته...مرت الايام وانا مش مركزه مع أي حاجه في الحياة غير أني اعتذر ليها على إللي عملته...اينعم هعتذر على ايه ولا ايه...وهعتذر إزاي بعد فوات الأوان؟...بس روحت واعتذرت وهيا ابتسمتلي نفس ابتسامتها اللي وحشتني وقالتلي(هسامحك عشان كنا أطفال ورغم أن غيرك قالي أننا كنا أطفال وأنهم ميقصدوش إلا أنك الوحيدة اللي الموضوع ضايقك وجيتي تعتذري ودا معناه أنك ندمانه وأنا عمري ما زعلت منك) تخيلوا إني كنت شخصيه كتومه بقالي سنين أقوم اعيط بكل سهولة قدامها... قد ايه أنا وحشه وكمان توقعت تتكبر عليا وتقولي شوفي أنا عندي أصحاب قد ايه وأنتي لأ أو تقول أي حاجه لكنها سامحتني وكل أما أشوفها احضنها واسلم عليها وأحاول اعوضها عن خيانتي ليها... وحالياً هيا مدرسة لغة عربية وبتدرس طلاب في ابتدائي وكلهم بيحبوها وبيزعلوا وقت غيابها...وعرفت قد ايه التنمر بيأثر سواء من شخصك المفضل أو من بعض الأشخاص اللي كنت بتشوفهم حاجه حلوه ونفسك تكون صديقهم"
التنمر وحش ومؤذي واللي بيتم التنمر عليهم مش كلهم"ر" فيه اللي زيي كنت هبقي متنمره عشان انول رضاهم...وممكن يتأذوا ويقتلوا اللي يتنمر عليهم...ممكن يكبروا وميبقوش سويين نفسياً...ممكن ينتحروا...المهم أن النهاية هتكون مؤلمة لطرف أو للطرفين...بس ليه بنتنمر ودي خلقه ربنا؟ ليه نتنمر على حد بمجرد اختلافه عننا...ما كلنا بشر وأكيد فيه حاجه بتوجعك أيها المتنمر زي ما أنت بتوجع غيرك هتلاقي حاجه بتوجعك وهتحصلك... أطفال كتير اوي بيتأثروا بكدا بسبب أطفال مش شايفين غير نفسهم...محدش يمشي بمقولة"فاقد الشيء لا يعطيه" لأن مفيش الكلام ده...دي شماعة بتعلق عليها تأنيب ضميرك...وبعدين إيه الانبساط لما تلاقي حد بيتوجع قدامك؟ إيه الممتع في كدا مانت لو شخص سايكو فأنت تروح تتعالج متطلعش بلاويك علينا...واوجع تنمر هو اللي يجيلك من أهلك... عيلتك اللي تستمد طاقتك منهم يتنمروا على شكلك عشان غيرتهم منك أو عشان اختلافك عنهم...كل دا بيؤذي وبيدمر طفولة أطفال كتير كانوا أبرياء وبقوا دلوقتي صايعين بلا مشاعر بيعاكسوا...في النهاية كما تدين تدان والدنيا دواره متجيش تأذي عشان بعدين هتتأذي... الكلمة اللي بتقول دي كلمه عادي ليها أثر زي السيف يأما يقتل يأما يعز (يعز بمعني ياخد السيف...ودي حاجه زمان كان لما الملك يعز حد ينحني بالسيف ويعطيه ليه)
في النهاية أحب أقول إن قصه"ر" حقيقه بكل ما فيها إلا أنها لسه مبقتش معلمه...لزوم الحبكه فقط.
والسلام....
يتبع.......