حكاياتي مع المرضى

7_(الرهاب الإجتماعي)

بسم الله والصلاه على رسول الله

"انعزالك عن العالم لن يغير بأنك فرداً منهم!"
وحشتوني وحشتوني... انهاردة قررت اخد إجازة... وأخرج أشم هوا كدا...لكن تأتي الرياح بما لا تشتهي السفن (حاله جديده طبعاً)
اثناء ما بودع العياده حجي(الخاصه بي) لقيت حاله
كانت بنت... دخلت المكتب بتاعي بسرعة والتنفس عندها كان عالي... مكنتش محجبه بس كانت لابسه هدوم مغطيه كل حاجه فيها حتي ملامح وشها...بمعني أصح ترتدي قبعة...كمامه...جاكيت أسود...وبنطال
مكنتش عارفالها ملامح غير أنها بنت... طبعاً رجعت على مكتبي...قعدت قدامها وقدمتلها مايه(بصراحة أنا مش كريمة لكن كان عندي فضول أشوف ملامحها)نزعت أخيراً الكمامه وتبينت ملامحها وكانت حسنه الملامح(ماهو ربك مبيخلقش حاجه وحشه!)اتكلمت معاها عن الجو (بحاول أفتح مواضيع... أصل البشر عموماً رغايين بس بييجوا عندي وصماً بكماً معرفش ليه!) نزعت القبعة بكل قوة...شدت السوستة الخاصة بالجاكيت بهمجيه(شكلها جايه تتعارك!) واخيرا ارتاحت على الشازلونج(هبيعه أصله بيجبلي وجع دماغ...وعليه أقساط) والحمد لله بدأت تتكلم:
_"اسمي ملك وعندي رهاب إجتماعي وعارفه الكلام ده...بخاف من كل حاجه حرفياً...بخاف أتكلم يفهموني غلط فبسكت...بخاف أقول رأيي في حاجه واتلغبط في حرف فبسكت...بخاف من حكم الناس عليا فبعزل نفسي عن كل الناس...جيتلك ليه بقي رغم أنك استشارية؟...مش جيالك بصراحة عشان تشخصي حالتي لأن عمتي طبيبه نفسيه وسمعتها بتقول لماما إني عندي رهاب من البشر واي حاجة بتتحرك عموماً...بس انا مكنتش فاهمه وروحت سألت جوجل عن الأعراض واكتشفت أنها نفس أعراضي...ولما فهمت محبتش أقول لعمتي يالا انا عرفت أنا بعاني من إيه ابدئي علاجي...هكون حديث العيلة لسنين قدام...ومش بعيد أي أم في عيلتي تبعد عيالها عني عشان ميكونش مرض مُعدي... عشان كدا قولت اجي استشيرك في خيارين...هل أعالج حالتي في البيت من ورا أهلي؟...ولا تقوليلي طبيب محترف ومش مهم ذكر او انثى مش بيفرق طالما هيكون كويس... وعايزه اتعالج بسرعه"

عيونها اتملت دموع...فضلت بصالي وبتحاول تكتم انفجار كنت متوقعاه (مرضتش أتكلم قولت لما تخلص كل كلامها)وكان عندي حق لسه للكلام بقيه:
"أنا معرفش ليه محدش صارحني...وليه عيلتي بتبعد بالتدريج عني...وليه محدش حاول يعالجني حتي عمتي اللي عرفت بموضوع مرضي مقترحتش تعالجني في السر حتي!...ولا والدتي اللي توقعت تقلق عليا بل بالعكس أول سؤال قالته...هو المرض دا معدي؟... للدرجه دي خايفه على نفسها وعلى كل الناس إلا أنا؟... أنا حقيقي مكنتش اعرف أنا بعاني من إيه بس كنت حاسه اني مختلفة... بخاف من كل حاجه ومش بحب الاصوات العالية...وحاسه أن ماليش أي رأي...مش بعرف أخد أي قرار دايماً خايفه... شايفه نظرات الناس زي الوحوش وانا طفل بيخاف من الضلمه...مش لاقيه حل وكل يوم المرض بيزيد...بتزيد معاه معاناتي...ارجوكِ تساعديني"
ساعات بحس إني عاجزة...بيبقي نفسي اساعدهم كلهم بس مش بقدر فيه اللي بيشفي وفيه اللي معاناتهم بتقل بس بتفضل موجوده...بس بحمد ربنا إني استشارية وبس مش دكتوره عشان أعاني وأنا بحاول اساعدهم... أو أحبط لما مقدرش أعالج حاله...مكنش ليه لازمة إني اشرحلها حالتها عشان كدا قولتلها إسم أحسن دكتورة تتابع معاها وودعتها ومشيت... لأول مرة ميبقاش عندي كلام لطيف أهون بيه عليها...رجعت البيت ونمت ومكتبتش حاجه في مذكراتي...قولت هكتب بكره بقي مانا داخله على اكتئاب دلوقتي وعايزة افضي دماغي من التفكير... وأسهل حل هو النوم...
في صباح يوم جديد... استيقظت مشرقة متفائله وسعيدة كدا... أصل أنا الزعل عندي آخره يوم أو يومين...وها أنا الآن في إجازة لمدة يوم هكتب فيه عن الحالة الجديدة...صفحه جديده بعنوان
(الرهاب الإجتماعي)
"هو خوفك من أن تقدم على أي خطوة... خوفك من الشعور بالاحراج أو الإحباط...خوفك من رد فعل البشر على أي شيء بك"
(بقلمي)
_السؤال المعتاد هنا كيف أعالج نفسي بالمنزل؟
مبدأياً كدا لازم نعرف أن مدة العلاج...
تعتمد بشكل رئيسي على مدى إستجابة المريض للعلاج...يحتاج بعض المرضى إلي أحد أشكال العلاج والدعم مدى الحياة...بينما يستجب البعض للعلاج النفسي فقط والجلسات ولا يحتاجون إلى شيء آخر.
_السؤال هنا إزاي أعرف أني بعاني من الرهاب الإجتماعي؟
هناك أشياء أن تطابقت معك تأكد بأنك تعاني من هذا المرض وهيا:ـ
1_الخوف من المواقف التي قد يحكم فيها الآخرون عليك حكماً سلبياً.
2_القلق من إحراج أو إهانة نفسك.
3_الخوف الشديد من التعامل مع الغرباء او الحديث معهم.
4_الخوف من أن يلاحظ الآخرون أنك تبدو قلقاً.
5_الخوف من الأعراض الجسدية التي قد تسبب شعورك بالحرج...بمعني احمرار الوجنتين...التعرق... الرعشة... أو ارتجاف الصوت
_أخيراً بقي شويه نصايح كدا من حبيبتكم لولا:
بعض النصائح التي قد تساعد في شفاء المريض...
1_تحكم في نفسك
(بمعني متتصرفش بسرعه تمهل)
2_بنصح بالرياضة ثم الرياضة ثم الرياضة...ليها أثر إيجابي في الموضوع
3_اخترع جوا راسك مواقف بينك وبين البشر وأبدا تفكر لو أنت في الموقف دا هتعمل ايه هيساعد برضوا
4_اتصرف على طبيعتك زي بقيت خلق الله
والسلام....
يتبع....