حكاياتي مع المرضى

13_(التوحد)

بسم الله والصلاه على رسول الله

"مرحلة الطفولة هيا ألطف مرحلة أو اسوء مرحلة"
صباح يوم جديد نشيط ملئ بالحيوية...وزي ما توقعت يا جماعة أول ما أختي مرام قالت للي أسمو طارق دا انها متعرفش حاجه عني...بطل يسأل وراح لحاله والحمد لله...ممكن اكون لسه مخلصتش منه بس مش فارق المهم إني أقدر لو شوفتوه أواجه...المهم حاجه عجيبه غريبة حصلت انهاردة...سحوره القمورة عزمتني عندها في البيت عشان اتغدي عندهم نظراً لأن جوزها مسافر الأيام دي... والصراحة مرفضتش وجهزت وقفلت العياده بدري...وروحت عندها أهو تسلي وقت فراغي ووحدتي...المهم سلمت عليها ودخلت البيت عندها وكان بيت جميل بمعني الكلمة... حقيقي نظيف ومترتب وأولادها مش بيعملوا مشاكل...صحيح نسيت أعرف عندها كام عيل بس أهو هعرف...قعدنا في الصالون وراحت هيا بعد ما ادتني كرم الضيافة وهو مشروب العناب المشهور....وقعدت اشربه أثناء تطلعي إلي الشقة وهيا بتعد الغداء لينا... وفجأة يخرج طفل صغير ممكن يكون بعمر الست أعوام...خرج مسلمش عليا ولا بصلي حتي دا مسك ريموت التلفزيون وفتح قناة عليها مسلسل تركي وقعد ولا كأني موجودة...قعدت أتفرج معاه وكان فيه مشهد بيضحك في المسلسل ضحكت وهو لأ...مشهد حزين كنت هعيط وهو لأ...مش بيتأثر بأي حاجة...قررت أبادر واسلم عليه يمكن مُحرج او حاجة:
_"ازيك عامل إيه؟"
مبصش وفكرت أنه مسمعنيش وفضل عشر دقايق كدا كأنه بيقول (هو فيه صوت جمبي ولا ايه!) ورد أخيراً بكل برود:
_"الحمدلله تمام"
أسكت على كدا؟ لأ طبعاً مسكت الريموت منه وقلبت لحد ما جبت قناة كرتون وقولتله:
_"حلو الكرتون دا؟ بتحبه؟"
أخيراً بصلي ورجع بص للتليفزيون تاني وقال برضوا بدون مشاعر أو إهتمام في نبرة صوته:
_"بابا قالي أن الكرتون بيخلي الطفل يعمل حاجات ممكن تؤدي بحياته...ممكن تقلبيه؟"
ايه ده...دا طفل ناضج وبيتكلم زي شخصية نديم في مسلسل حالة خاصة!...قلبت الكرتون وانا مذبهله ببص عليه كل شويه لحد ما صدمني وقال:
_"ممكن متبصليش كتير عشان بتوتر؟"
هو أنا لو اكلت كتله الحلويات دا حد هياخد باله؟...بصيت قدامي بسرعة تاني وضحكت عليه:
_"مكنتش ببص عليك على فكره"
وإذا به يرد بنفس النبرة إللي اكدتلي ما يدور بأذهننا جميعاً:
_"ماما قالتلي أن اللي بيكدب بيخش النار وأنتي كدبتي يبقي هتخشي النار"
هو أنا لو قتلت الطفل دا حد هيحس؟... طيب أنا لازم اكسر الشك باليقين وأعرف هو بجد عنده توحد ولا واحد بارد:
_"بقولك  أنت أسمك ايه؟"
برضوا مبصش ولا كأني سألت وفضل يرتب في هدومه كدا ودي من أعراض التوحد هبقي أكتبها في الدفتر...المهم أنه اتكلم:
_"أسمي مروان وبيقولولي ماينو"
_"مين دول اللي بيقولولك؟"
مانا مش هسكت فضولي بيحب الحاجات دي أوي:
_"ماما وبابا وصديقي المُقرب وليد"
بيتكلم بشكل آلي زي الروبوتات كدا بالظبط رغم أن كلامه ممكن يبقي فيه مشاعر بس هو مش بيتأثر مع الكلام نهائي:
_"بقولك يا ماينو... انت اتفرجت على مسلسل حالة خاصة؟"
بصلي ورجع بص للتي ڤي وخلاص دي بقت حركته المعتادة وبعدين سكت شوية بيستوعب أنا بقول ايه:
_"ايوا شوفته"
عنده لا مبالاة يحسد عليها بصراحة دانا هنفجر:
_"طب لاحظت أن فيه شبه بينك وبين نديم؟"
رد بكل لطافه:
_"ايوا فيه... نديم عنده توحد وأنا عندي توحد...نديم مش بيعرف يقول هو حاسس بأيه وانا كمان...نديم حس بالوجع وانا كمان"
هعيط والله هعيط إزاي سحر متقوليش حاجه زي كدا؟...قومت حضنته رغم عدم مبادلته ليا في الحضن بس مش مهم المهم إني عملت اللي في بالي وسألته بكل إهتمام حقيقي عندي:
_"طب وماينو حس بالوجع أمتي وليه؟"
مسك الريموت وفضل يقلب وجاب قناة المسلسل التركي تاني وقال بنفس النبرة إللي صعب تفهم منها مشاعره دلوقتي بس الكلام بيفهم عالفكرة:
_"لما اتريقوا عليا في المدرسه وانتقلت مدرسة كلهم فيها شبههي"
سألته بحُب وأنا برجع أقعد في مكاني تاني وبعدل هدومي:
_"طب وانت زعلان أن كل اللي في المدرسة شبهك؟... وايه شبهك دي مانت زيك زيي زي أي حد"
اتعصب ورمي الريموت على الأرض وقال:
_"بتكدبي تاني إحنا مش زي بعض... أنا مختلف...ووحش وماليش صحاب...ومش شبهك ولا شبه حد...بطلي تكدبي عشان الكدب وحش شبههي"
خرجت سحر بسرعة في نفس لحظة ركوض مروان إلي غرفتة:
_"فيه إيه يا أنسه ليلا؟ ماله مروان عمل ايه؟"
السبب اللي خلاها تسأل مروان عمل ايه مش أنتي عملتيه إيه إني كنت بعيط... آه والله بعيط ولا كأن حد توفي عندي:
_"أنا اللي عملت يا سحر... أنا أسفه والله مقصد أزعله...مقولتليش ليه وأنتي عارفه إني هساعدك وههتم بيه زي أبني"
دخلت سحر المطبخ ثواني ورجعت قعدت قدامي وقالتلي بحُزن في عيونها بتداريه:
_"عشان وديته كذا مرة لدكتور... اللي قالي مالهوش علاج...واللي قالي احبسيه في مدرسة داخلية... وآخر حد قالي احطه في مدرسة فيها نفس حالته أو حالات مشابهه ليه...سمعت كلامه وحطيت أبني في المدرسة دي"
طبطبت عليها وقومت حضنتها(بوزع احضان ببلاش) ومسكت أيديها ودخلنا المطبخ...لقيتها بتعمل فته باللحمة...وقفت معاها نكمل بقية الأكل وقولتلها الحل اللي دايماً عندي لكل الناس:
_"كنتي قوليلي برضوا أنا استشارية يعني هنصحك بالافضل لطفلك... وبعدين ما فيه علاج بيتعمل في البيت بين الأهل والطفل...وبجد أنا أسفه إني زعلته مني"
_"أنا مش زعلان منك أنا بس اتعصبت"
قالها مروان وهو بياخد ازازة مايه وبيخرج من المطبخ زي ما دخل بكل هدوء وبساطة... والصراحة ضحكت وسحر ضحكت... والصراحة أول مرة أشوف الجانب دا من سحوره القمورة:
_"بصي ياستي هديكي رقم دكتورة شاطره جدآ وكمان صديقة ليا عايزاكي تتابعي معاها...وتسمعي كلامها في كل حاجه تقولهالك... وأنا هتابع معاها عشان مروان أبني زي ما هو ابنك"
بصلتي بكل امتنان وأمل في عيونها:
_"مش عارفه اقولك ايه يا ليلا بجد... اطلبي مني أي حاجه والله هنفذهالك في لحظتها"
_"احترميني يا سحر...مش هطلب أكتر من كدا"
ضحكت من قلبها وقالت وهيا بتطردني من المطبخ:
_"تطلبي أي حاجه غير الطلب دا عشان مش هنفذه بصراحة"
عادت سحر إلي عادتها القديمة...اليوم عدي بسرعة اتكلمت مع مروان تاني ومشيت أنا حالفه إني هتابع معاه كأنه أبني... وعشان خاطر مش بحب أشوف نظرات سحر التايهه والحزينه دي...ورجعت البيت وطبعاً عادتي الاعتيادية
صفحه جديده بعنوان
(التوحد)
_ماهو التوحد؟
"صعوبة فهم افكار الأخريين...ومشاعرهم...عدم القدرة على تفسير الوجه ولغة الجسد... وعدم فهم طرق التلميح والمزاح المتعارف عليها...عدم استطاعة بدء حوار أو تكوين جمل إنشائية قوية مثل...الجمل السببية و الاستنتاجية...والتنبؤ...وكذلك صعوبة حل المشكلات...التحدث بوتيرة واحده"
وطبعاً لازم نعرف إيه أعراض التوحد...
_ما هيا صفات مرضى التوحد؟
_أو بمعني أصح ما الأعراض التي تدل على أن طفلي يعاني من التوحد؟
1_لا ينظر في أعين الأخريين أو يبتسم لهم في كثير من الأحيان.
2_لا يتفاعل عند توجيه الحديث إليه.
3_اهتمامه بالآخرين قليل.
4_يصعُب تهدئته.
5_قليل الكلام...أو يجد صعوبة في التحدث واستخدام اللغة.
6_لا يُفضل التنوع في اللعب.
7_يمكن أن يغضب بشده من أشياء غريبة...مثل الألوان...أو نوع الملابس.
والسؤال المهم...
_ما هو أفضل علاج للتوحد؟
"العلاج المهني: يساعد هذا العلاج طفل التوحد على تطوير مهارات الحياة اليومية...مثل ارتداء الملابس... والاعتناء بالنظافة الشخصية"
"تدخل تطوير العلاقات:يهدف هذا العلاج إلي تعزيز المهارات الاجتماعية وتعلم الإنخراط في المجتمع وتكوين علاقات"
"علاج النطق:يساعد هذا العلاج عل تحسين التواصل اللفظي وغير اللفظي وتعلم فهم لغة الجسد"
ومظنش هيكون فيه أهم من السؤال دا:ـ
_هل يمكن علاج التوحد نهائياً؟
"لم يتم إلي الآن التوصل إلى علاج يؤدي إلى الشفاء التام من مرض التوحد...ولا يوجد علاج محدد لمرض التوحد...ويتم تحديد العلاج المناسب لكل حالة على حدة بناءً على عدة عوامل...ولكن من المؤكد أن العلاج المبكر للتوحد والإلتزام بالعلاج يساهم بشكل كبير في السيطرة على أعراض المرض... وممارسة الشخص حياة شبه طبيعية"
وفي النهاية أنصحكم بأنه تعاملوا الاطفال بشكل عام بكل حُب... وخصوصاً ذوي الاحتياجات الخاصة لأنهم أكتر ناس محتاجه حنان وأمان واهتمام.
والسلام....
يتبع......