."مِدهَالك القَلب و مربَاعك ضُلوعي".

." البارت الثاني ".

•"البارت الثاني"•
....
راحوا البنات جري يتسابقن مين أول وحده توصل للبقالة .
لكن فجأه..
طلع لهن مجنون الحاره
شمس : أعوذ بالله من غضب الله وش تبي أنت ؟
ناصر : أبي حلاو
شمس : شوف هذي البقاله قدامك قم اشتري لنفسك
ناصر : لالالالاا إنتي إنتي
شمس : وش إلي أنا ؟
منال ضحكت : يبغاتس
شمس : أقول سدي فمتس لا أهفتس كفوف الحين
منال كتمت ضحكتها و صدت عنها عشان تقدر تضحك
أريام : بابا ناصر روح و قول لأخوك مازن يشتري لك
حور : أحس المسكين يحزن
شمس : تزوجيه و فكينا من شرتس و شره
حور شهقت : وعوه عليتس قالت اتزوج هالمجنون قالت
ناصر لف عليها و تعلق بعبايتها : ماني مجنون وش فيتس إنتي بس أنا أنا ابغا حلاو
حور بخوف : شوف غزل معها حلاو
غزل إلي زابنه ورا شمس : وخري عني إنتي وياه
ناصر راح و أخذ حصى و قال : بتعطوني حلاو ولا أفقع وجيهكن
شمس رفعت طرف الجلابية و قالت : بنات
البنات : هاه
شمس : وقت الهجه
و تحط رجلها و تهج
و البنات صياح و كل وحده تقول مابي أتصفق
و ناصر حالف ما يفكهن
دخلوا البنات شبك الغنم حق أبو برق و شمس ميته ضحك
منال تكش عليها: وش إلي يضحك الحين
شمس تكمل ضحك : وجيهكن تضحك
حور : لا تتنمري
شمس تعدل البرقع و الشال الي على راسها و تقول : حرام عليتس ما تنمرت
غزل بهمس : بنات بنات شوفوا شوفوا مين جا
حور تأففت بطفش : الحين تستقعد علينا
أريام ببرود : سهله لحد يرد عليها
هبه مسكت خصرها : نعم ؟ وش جابكن هنا ؟؟
منال : تبين الصدق عاد ؟ جابتنا رجولنا !!
هبه : تنكتين إنتي و وجهتس؟
منال بإستفزاز : يب و الحمدلله شايفه وجهي كيف ما يحتاج تتكلمين يا أم رأس معوق
هبه عصبت : هذا إلي يقال له شين و قوي عين !! داخله مزرعتنا و تغلطين ؟؟
شمس بحده : هيه هيه حدتس !! لا ترفعين صوتس لا اقص لسانتس
هبه بصياح : شوفوا مين يتكلممم عديمة التربية فكت لسانها
شمس بصياح و حده : على الأقل مو زيتس لابسه ثوب الشرف و إنتي كلتس دنس
حور تصفر : أوفف
أريام تسحب شمس قبل لا تصير مشكله : صلوا على النبي
شمس تدفها بحده و تلف على هبه : فكيني !! و إنتي أسمعي لا إنتي ولا عشره من أمثالتس يقدرون ينزلون من قيمتي ولا قيمة وحده من البنات و إنتبهي مني زين ولا تجربي وجهي الثاني عشان ما أحرقتس و أوديتس ورا الشمس
و حطي فبالس مين هي شمس آل سعد
غزل طبعا كانت قاعده تصور و توثق اللحظات الختامية
هبه ضحكت بسخريه : نشوف يا روح أمتس مين بيودي الثاني ورا الشمس
شمس ضحكت : خليتس قد كلامتس ! مشينا يا بنات
طلعوا من عند هبه بعد ما جابت المشاكل لنفسها و جلدوها كالعاده
****
فالمدينة | في شركه جسار .
كان مرخي جسمه لورا و قاعد يدخن و حاط رجل على رجل و قدامه واحد من المستثمرين .
جسار ببرود : أخلص علي وش عندك؟
أحد المستثمرين و إلي كان أسمه راشد .
قال بتوتر : طال عمرك إحنا كان معنا شراكه على سياره
" مورسيدس جي كلاس "
" بورش "
جسار ببرود : إيوه كمل ؟
راشد : و الباقي أنت تعرفه
جسار : أولا قد سمعنا عن شراكتكم مع ناس كثير و خسروا أرباح كثيره و الحين أنت بكل بجاحه جاي تقنعني إني أوافق على شراكتكم؟
راشد : ياخي إذا هم ما يفهموا بالشراكات؟؟
جسار وهو يطلع الدخان و يقول : أنت وش تفهم ؟
راشد : أفهم بكل شي
جسار : دامك تفهم بكل شي افهم كلامي ذا و حطه براسك !! أنا واحد جاي فالملعب عشان يأخذ المركز الأول و انتم جايين و تحاولون تسقطوني بعد تعب السنين لكن لا أنت ولا غيرك يقدر يطيح جسار آل سعد و حط في بالك إن ما أخذ شراكتكم اقدر أخذ شراكه مع ألف شركه غيركم و اقدر أجيب إلي أبيه و انا قاعد ف الحين يلا أمسك الباب ولا اشوفك جاي شركتي
راشد بيتكلم بس يجي السكرتير و يطلعه برا المكتب الإ على دخلت حاتم إلي يقول : ما تتوب أنت ؟
جسار رجع ظهره لورا و ولع زقاره جديده : زلايب ما يفهمون
حاتم : ولك روق بالمانجا
جسار يناظره بنص عين : تبغاني أتوطاك ؟؟
حاتم: تخسي !! عمك أنا
جسار : إي إي عرفنا
حاتم: أيييييوه أدبب
جسار : أنت ما قد أحد صفقك ؟
حاتم : الإ ابوي
جسار ضحك و قال : أجل صص لا الحين أدق عليه
حاتم بدأ يتغزل: أويلي على الضحكه
جسار سكت و قال : كلزق اقول
حاتم : ياخي والله إنك قليل أدب
جسار : على الأقل أنا قليل ادب لكن أنت!! خلها مستوره بس
حاتم بدأ يخزه و بدأ يلعب فالوتر الحساس : الإ تعال مين بتشوف بكره ؟؟
جسار : بشوف امك و ابوك و اخوانك و اولادهم
حاتم غمز له : فيه شخص ناقص
جسار بإستغراب : مين ؟ قصدك مشمشه؟
حاتم ينرفزه : مشمشه هاه والله لأعلم مشعل
جسار عصب : مين اجل ؟؟ أخلص لا ترفع ضغطي !
حاتم يغمز له : شمس
جسار : يع
حاتم فطس ضحك و قال : ليه يع
جسار : يبوي من و إحنا بزران نتهاوش و نشد شوش بعض وش تبغاني الحين اروح و ادق الميانه عندها؟؟ على زق انت وياها ما همتني
حاتم ضحك : بنشوف كيف ما تهمك
الا و يدق جوال جسار و يطلع المتصل أبوه.
جسار : لبيه يبه
ابو جسار بعصبيه : تعال الشركه الحين
جسار عقد حواجبه بإستغراب و قال بهدوء : أبشر
و قفل الخط و لف على حاتم و قال : الشركه بيدك بروح أشوف اخوك وش يبغى
حاتم : ولا يهمك الشركه شركتي ترا
جسار : فيه فترات تجي و اندم اني وضفتك معي
حاتم رمى نفسه على الكنبه و بدأ يدخن : على زق
جسار ضحك بهدوء و طلع بسرعه متجه لشركه أبوه يشوف وش السالفه .
****
في جامعه الملك عبدالعزيز .
في أحد الممرات كانت طيف قاعده هي و ميار ينتظرون بنت تجي و اول ما جت
جتها طيف و ضربت يدها على الدولاب و قال : و اخيرا شرفتي ؟
فوز ببرود : اخلصي وش تبين ؟
طيف : بأي حق تروحي و تبلغين المسؤول عني ؟
فوز بغنج : أوف ياخييي تدرين اني ما احب الغلط
طيف بصياح : حبيبتي إنتي أساسا وجودتس هنا اكبر غلط
ميار بسخريه : المشكله تسوي انها طالعه منها
فوز : اقول اعقلي انتي و ياها ترانا بجامعه
طيف شدتها من التيشيرت حقها : أسمعي يا روح أمتس إنتي والله ثم والله تروحي و تعلمين الناس أي شي غلط عني أو تروحي و تطلعين كلام من مختس وربي لأحفر الأرض و أدفنتس فيها فهمتي ؟؟
فوز بطفش : المفروض أخاف يعني ؟؟
ميار مسكتها من وجهها و بتهديد : أسمعي ماهو تهديد ذا هذا بس مجرد نقاش بسيط بس جربي حطي راستس براس بنات آل سعد وربي لنوديك ورا الشمس ترا باقي ما شفتي شي هذا بس بروفه الفعل بيبدأ من اليوم
فوز توترت و دفتها و قالت : وخري عني بسس تراك قاعده تهددين الشخص الغلط و ربي لتندمي إنتي وياها .
ميار : اومايقاد وش المفروض نخاف يعني ؟؟
فوز بقهر : افهمي زي ما تبين
و مشت بسرعه متجهه للكلاس
ميار فطست ضحك : حي عينتس يالساطيه
طيف بفخر : الله يحيتسس
ميار : ودي أهج
طيف : مشينا
ميار : أسمعي أسمعي معي فكره
طيف : وش
ميار : ندق على ذيب و نقول له اننا نبي نروح المول عشان نشتري هدايا لعماتي و جدتي و البنات
طيف بحماس : تممم وش رايتس نأخذ أمتس معنا ؟
ميار : يلا نسألها و نشوف وش تقول
طيف : قدامم
و يدقون على السواق عشان يمرهن و يرجعن البيت .
****
في الديره | في بيت الشعر .
بعد ما طلعوا الشيبان من المجلس تجمعوا العيال و بدوا يخططون لبكره وش يسوون من فعاليات و مقالب
الوليد : يا عيال
الشباب : هاه وش
الوليد : بالله وشلون بنقنع جدي إنه ما يسحب جوالاتنا و مفاتيح السيارات
مسفر شهق و قال بضحكه : الله ودي أشوف وجيههم أول ما يقول لهم جدي هاتوا الجوالات
نهيان : بينتحرون
مشعل ضحك : قصدك يهونون و يرجعون الخبر
إياد : يخسي واحد منهم يرجع وربي لهفه بكف ماشي 200
الوليد : تكفى أنت يالمعضل
إياد غمز له .
مسفر : بالله وش رأيكم لا جوا العيال نجهز الخيول
نهيان : من وين ؟ مافيه هنا الإ 6 خيول واحد حق جسار و ذيب و حاتم و الثاني للوليد و إياد و الأخير لجدي
مسفر ناظر مشعل : أنتم معكم 10 خيول
مشعل : ودك بواحد؟
مسفر فز : صادق؟؟
مشعل ضحك : إي صادق
مسفر بحماس : أوفففف وربي احسبك تطقطق
نهيان : وربي إنك بزر
مشعل : يلا امشوا نروح نجيب خيل لنهيان و مسفر و اعتبروها هديه مني
نهيان انصدم : وش دخلني أنا ؟
مشعل: بالله عليك يعني كل واحد فيها معه فرس الإ أنت وش بتقعد تناظرنا ؟؟
نهيان : بس ..
مشعل: أقول اص بس و امشي قدامي
الوليد : مسوي فيها كريم أنت و وجهك ؟
مشعل : كلزق
إياد ضحك : بلا هواش امشوا بس
الكل راح لإسطبل أبو مشعل إلي كان شوي بعيد ،جهت شبك النياق
**
عند الحريم .
أم مشعل : الحين متى بيوصلون ؟
أم إياد : بكره إنشاءالله بس أي وقت ما ادري
الجده منيره : ابيهم يجون بدري عشان بنسوي فعاليات شوي
الكل ناظر الجده بصدمه
أم الوليد : يمهه؟؟ عليتس حركات أشوف
الجده منيره بغرور : لا يغرتس كبر عمري تراي توي شباب
أم إياد مسكت ضحكتها و أم مشعل قالت بضحكه : ماشاءالله عليتس يا منيره وش من فعاليات بتسوين؟؟
الجده منيره : سر
أم الوليد تحمست : أما عاد !! مالتس داعي يمه تحمسينا و بعدين تقولين سر
أم إياد : وربي زحففف ! ليش أجل تقولين لنا ؟؟ حنا الحين الفضول بيقعد يأكلنا
الجده منيره : بقول بقول خلاص لحد يبكي
و جت بتتكلم و الا يطمروا عليهن البنات
شمس : عووو
الجده منيره : وي !!!وراتس قلبتي تسلب؟؟
شمس شهقت : هئئئ أنا تسلب ؟؟
الجده منيره ضحكت : محشومه
شمس ابتسمت : إي اشوى | و كانها تذكرت سالفت أعمامها : تطقطقون أنتم ؟؟ صح يمه ؟؟
أم الوليد : بوشو ؟
شمس : أعمامي بيجون صدق ؟
أم الوليد تغمز لها : إيي
شمس : أعوذ بالله وراتس تغمزين تسذا؟؟
منال تطقها : بيجي الحبيب
شمس تسوي نفسها غبيه : مين ؟؟
حور ضحكت : جسار
شمس بغت ترجع : يعععععععععععع يعع قرففف
الجده منيره هبدتها بالعصا : وش فيتس على وليدي
شمس توجعت : خير يمه وراتس تهبديني ؟؟
الجده منيره : ترا جسار بيخطبتس
شمس بجديه : ما ابغاه ياخي ؟؟ هو ما يبيني و انا ما ابيه افهموا
أريام : و حب الطفوله؟؟
شمس : وش من حب كله هبد في هبد
غزل : ترا تسذا يقال لتس "ومن الحب ما هبد "
شمس : على زق اقول
منال كانت ساكته و تفكر ..
شمس تناظرها و تكحكح
منال فزت و تناظر البنات : وش ؟؟ وش صاير ؟؟
شمس : مختس وينه ؟؟
منال : موجود
أريام من وراها : معتس ولا مع حاتم
منال قرصتها : أسكتي يالفضيحه
غزل بهمس : لازم تعترفين له بحبتس عشان تعرسون
منال استحت : وجععع؟؟؟
و الا تقوم و تقول أم مشعل : يا بنت وين بتروحي ؟؟
شمس : تبي تروح تشم هوا ، بروح معها أنا
منال : أمشي بسرعه
و راحت هي و شمس ورا البيت عند المشب يشمون هوا و يفضفضن
***
في المدينه | الخبر | و بالتحديد شركه أبو جسار .
دخل جسار مكتب أبوه و أول ما شاف راشد فهم السالفه
و قال ببرود : يبه شراكه معه ماني مشترك و أعلى ما بخيله يركبه
أبو جسار داري عن طبع ولده العنيد و قال : ممكن أعرف وش السبب ؟؟
هنا راشد جا بيتكلم الإ و يقاطعه جسار وهو يقول : أصصص !! سد حلقك ولا تتكلم يامال الوجع
أبو جسار بحده : يا ولد حشم الرجال
جسار : ماني محشمه !! هو لو يستاهل التحشيم كان حس على نفسه ولا جا يتذلل عندك ، يبه أسمع ! أنا قلت لك كلمتي .. شراكه مع السبك ذا ماني مشترك
حرفيا ماني ناقص خسارات في الشركه ، وهو قد وصله كلامي قبل لا يجيك و بعدين دامك تدري إني برفض ليه متعبني و جايبني لين هنا ؟؟
أبو جسار بطفش : خلاص خلاص ولا شي رح الله يستر عليك و انا أبوك
لف جسار عيونه جهت راشد و ناظر فيه بشماته و طلع
وهو يقفل الباب شاف ذيب بيطلع مستعجل
جسار يخزه : على وين ؟؟
ذيب مسرع : بطلع المول أخذ النسوان
جسار ضحك : نسوان أجل هاه
ذيب لف له و بفضول : وراك جاي الشركه؟
جسار رجع شعره الكثيف لورا و قال بإستهزاء: أبوك جايبني على أساس أوافق على شراكه مع واحد نصاب
ذيب : وش صار طيب ؟
جسار : أكيد ماني موافق !!
ذيب ضحك : إي أحسن
جسار طلع وهو و ذيب و إتجه جسار للشركه و ذيب للبيت
..
في الديره | عند الشيبان .
أبو مشعل : الذبيحة علي
أبو إياد لف له : أقول أركد بس قال عليه قال والله ما تسوي شي
الجد صالح وهو يمسح على لحيته و يقول : ولا واحد بيسوي شي ، الذبيحة علي و العزايم علي و كل شي تحت يدي أنا
أبو الوليد : يبه هونها عليك مب كذا الله يصلحك خلنا حنا نأخذ و نشيل نص الشغل عنك
الجد صالح بضحكه : لحد يصمل من بعدي لو سمحتم
تنهدوا الرجال واضح إن هالشايب ماله حل و إن راسه يابس
شوي و يلتفتون الإ هذول العيال داقين اللطمه "متلثمين" و راكبين الخيول
أبو مشعل أبتسم : يوه ماشاءالله تذكرت أيام زمان
أبو إياد ضحك : إيي كنت أفوز عليك دايم لا تنسى
أبو مشعل : لا يا شيخ وربي أنا إلي كنت أفوز
أبو الوليد ضحك عليهم : لا انت ولا هو انا الي كنت أكسر خشومكم و أفوز عليكم بلا هياط و بلا هذر فاضي
و قعدوا يتهاوشون مين أحسن و مين الي فاز
و الجد صالح يتأملهم بإبتسامه حنونه وهو يفكر بأيام زمان
..

أتمنى إن البارت أعجبكم لا تنسون النجمه و التعليق إلي هو الشي المحفز بالنسبه لي
و ضيفوا الحساب عشان يوصلكم كل جديد .
و اشوفكم فالبارت الجاي
..