Ka phone message ri avang chuan ka han check chhin mai mai chu, rin loh takin Thomas a chuan minlo message chu niin.
“Enge itih a? inhnuai ah rawn chhuk lawk la.”
Phur em em chuan ka hmai vel chu ka tuai fai na[wk nawk a, ka thawmhnaw hak chu in tûai mam in, inhnuai pan na lam step ah chuan ka tlan chhuk nawk nawk a ni deuh ber.
Inhnuai ka thlen chuan kan tukverh atang chuan kan varanda ah a awm tih chu ka hmu kiau thei bawk.
Kawngka ka hawn chuan, “Lo lut la” tiin a mitah tak en chung chuan ka ti a.
A lu chu thing nar nar in,“Pawnah lo chhuak zawk la.” tiin min chhang a.
Kan varanda a ka pen chhuah chuan, kan in hmachhawn ta reng a, a ngawi ta reng chu a bike dahna lam ka han en chu, a bike bula Lalhriatpuii lo ding reng chu ka hmu thei a, ka thin hnûn chu vih sawk ang mai hian ana in ka hria, sawi thiam pawh a har zawk.
“Naute, vawiin hi kan thla sarih na tur ania, rei ve viau tawh in lawmawm viau mahse, he kawng hichu ka zawhpui thei tawhlo che ani, ka tihpalh takzet, minlo hrethiam hram dawnnia.” Thomas a'n a sawi zawh hnu chuan a ngawi ta reng a, ka rin dan chiah anih vang nge eng lem sawi lovin,“Ka lawmpui a che u.” tih tê bak sawi theih ka nei silo.
Eng em ka ka atangin chhuak lo mahse, he thinlung ngei hi tawng thei sela zawng, a ka a chîp awm silo a, ka âwm chu tawt up up in, ka hrawk chu hnawhtu awm ang mai chuan ka hria a.
Ka hmel landan erawh ka nui sâng chuan ka hria, kan thla sarih lawm nana ka tih, zungbun a hming mawi taka letter hmasa ber T in ziah na ngei chu, a kutphah hlai tak ka lak hnu chuan ka dah a, a kut chu ka hum tir bawk, ka bun mek ata nena in ang tura ka siamtir chu ka phelh bawka ka ipte ah chuan ka ak nghal bawk.
Thomas a chu a kun ngul a, sawi tur rêng a hre tawh lo ani âwm e.
“Kal tawh rawh, in tlai lutuk ange, ka lawmpui a che u.” tiin a kut ka lo vawn reng na chu phelhin ka thlah ta a, ka tah chu a chhuak takzet, mahsela ka âwm hnawhtu chu a nasat em avangin kala tap thei lo.
Ka kut chu alo vuan ve renga, zawi te chuan min thlah riai riai a,“Mangtha aw naute.” tiin, kan nih laia a tih thin zia, ngaiah ka neih tak chu tiin, ka sam chu a kut chuan a chûl hliau hliau leh a, hnunglam min hawisan chuan a bike lam chu a pan ta a.
‘Naute’ tia vawikhat chiah min auh leh chu ka lung a chhe takzet ani.
Ka en veng venga, “U hriata la awm se chuan ani hi ka tawng lo tur” ka ti thâwp sat a, ka thaw hawk bawk.
Bike a an tlan liam chu en vung vung in, ka nu leh ka pa te pawh chu ka hnungah an lo ding ve renga, ka nu chuan, “Dinte, apawilo ania, mihring nihchhung chuan mangtha tur leh inthlah tur chu a awm reng dawn ania, i hnenah kan awm reng tih kha hre reng angche.” tiin ka darah chuan a kut chu a nghat a.
An tlan liam hmuh phak lovah chuan ka mittui chu a luang riai riai a, engkim hi mumang ni se kava ti em, engkim hi a lem vek nise kava ti em,
Thomas a rawn let leh tur chu ka nghah hlel ber ani a, mahse rawn let tih reng anei silo, a bike ri chu ka bengah chuan a châm reng a, awmzia a nei thui silo, aww ka lo tling lo viau ani maw, Thomas.
Ka nu darah chuan ka chal chu ka nghat a, ka in sût hlawp hlawp bawk, ka pa chuan ka hnung zâng lo chul hiau hiau in, ka rilru na pawh a nep deuh alawm.
Ka nu leh ka pa chu inchhungah chuan luh sanin, ka room ah chuan ka in kalh khum a, mittui tla tur nei tawhlo chu muthilh ka tum ta a, ka maimit chhin apianga Thomas a hmel chiang taka lo lang chu ka rilru ti na tu mai ni tawh si a.
Kan hun hman dun zawng zawng te engmah lo mai nitur chuan ka phal silo, a chang leh ka in dem viau a a chang leh Thomas a ka mawhpuh thul.
Ka book shelf chu hai kual in, thawnthu chhiar tur chu ka zawng kual a, ‘The Song Of Achilles.” tih chu ka phawrh thut a, la in khuma ka mut pah chuan ka chhiar ta a. Kan first month naa U hriata mi pek kha niin,‘Min ngaih apianga i chhiar tur.’ ti a min chah kha ani a. Ni e, ka ngai ani, ka ngai takzet.
***
Khawngkhar kikri ah chuan ka harh hlawl a, ka lehkhabu chhiar lai chuan kalo muthlu ani ngei ang, ka lehkhabu chu ka awm chungah kalo vuan renga, kawngkhar chu phur fahran lo hian ka hawng riai riai a, ka mit bui lûk nen chuan ka hmu fiahlo viau, ka eitur niawm a lang chu ka nu chuan keng reng chung chuan ka kawngkhar hmaah alo ding a.
“Nu dar engzat nge ni a.” tia ka zawh chuan.
“Riat leh li-nga,” tiin min chhang ve maia, ka mit chu ka nuai in kawngkhar chu ka hawng zau a.
Plate chu la in ka table ah chuan ka dah ta a, ka nu chu ka room a sofa awmah chuan a thu ta reng a, ka thil rilai chu lo thlir rengin, thil ngaihtuah nasa deuh hmel chu a pu. A chal chu a ti chuar a, rawn tawng chhuak in, “Dinte, bike i mamawh em?” a rawn ti thut a, ka phu chiang hle.
Ka meng phawk ngang mai, nia, ka scooty tâwng ve tawh em ani,“Scooty kha i thianpa Jacob a khan min rawn dil a, lei chhawng turin.” tia chhun zawm nghsl in, keipawh chu kalo bu nghut nghut a.
“Tha i ti a, i duh dawn chuan, i scooty hi kan hralh anga bike kan lei dawnnia.” atih chuan ka ‘yes’ rang ngang mai.
“Ka lawm e nu,” tih paha ka phur hmel chu hmuhnawm ati nia nge, a khi ve sung sung a, Thomas a awm ve talo pawh chu ka theihnghilh daih mai.
A thu sawi ang ngei chuan ka scooty chu ka thianpa Jacob a te chhung chuan an lei chhawng a, keini pawh chuan ka patea bike hlui, sport bike an tih mai chu lei chhawng leh in, kan lei zawh hnu a thil pawi ber ka hriat chhuah theihnghilh tak chu, bike ka khalh thiam loh tih chu ani.
Thomas a bike nen ala in ang em em zui. Thomas an bike khalh min zirtir lai chu namen loh chuan ka mit thlaah chuan a rawn lang zawm nghal bawk.
Bike chu a rawng thlakin, a thlak tur awm awm a part pawh chu kan thlak thar vek a, show room ami nen danglamna an nei tlem viau.
School pawh chu bike chuan ka kal ve ta reng a, hmeichhia min la hre chianglo te chuan min rawn mitmei ve zeuh zeuh.
