"U hriat!"
"U hriat!!"
"U hriat!!!"
Auh lawng lawng pah chuan ka sawi nawk nawk a, che tur a awm silo, a lu atanga thi lo chhuak chu ka thawmhnaw chuan theih tawp in ka khuh a, a pût loh nan, awmzia a nei sawt lo hle.
Ka mang chu a ang takzet ani, "U hriat," a awm ah chuan ka bei hlawp a, ka mittui chu luang riai riai in, khang hun zawng zawng laia kan in ngaih theih zia leh kan in nel zia te chu ka mithla ah chuan a in dawt chuan a rawn lang ta uar uar a.
"Naute, ti a ka naupan tet atanga min au tu, ka u, ka bialpa, ka hmangaih, ka engkim, lak sakin ka awm ta. Ava na teh lul em Lalpa." tiin a awm chungah chuan hriat theih mang loh chuan ka phun sep sep a.
Ka tah hlauava ice-cream awm apianga min leisak tu, primary ka kal chhung zawnga min thlahtu leh min hruaitu, high school ka kal min venghim a min deuhsawh tu te min sual sak tu.
"Aw engtin tak awm ang i maw, tinge Lalpa min lak ve mai loh, ani chuan unau, chhung leh kua, then rual tha chawm tu tura an ruat ani asin."
"Awi maw, hringmi awm na hmun khawvel ah i awm ve tawh lo tur chu maw, ka hrethiam lo ani, Lal Lunghnem."
"U hriat Ambulance an rawn thleng ania saw, tho ila, hospital ah kan kalpui che anga, dam takin kan chhuak leh dawn lawm, tho rawh lem, i fel kha." theihtawp chhuah chuan a ban chu ka kai a, kaihthawh ka tum, mahse a che eih silo.
"U hriat luhlul lo la, ka tan engkim i huam kha, tunah pawh ka tan tho leh ta che."
A bulah chuan thingthi hnawk in, ka chal chuan lei chu ka si a, ka tap ve thei ta, Lalpa.
U hriata chu rawn zawn in Ambulance chhungah chuan an luhpui ta a, a bike chu truck ah chuan phur in, ka nu leh ka pa chuan min rawn kuah a, ka tap nge tap lo erawh chu ka hre tawh lo.
Ambulance chu a tlan ta...
"Harh rawh, Dinpui, harh rawh!!!," tih ri chu hla tak atanga rawn chhuak ang mai chuan ka hria a.
Ka meng thei ta, mumang bawk maw.
"Dinpui, i harh tawh em." ka nu chuan mittui parawl chung chuan min en renga, a hnungah ka pa a ding bawk.
Chhang tur pawh chuan tha pawh ka nei tawh lo ani ber, engmah hi tih chet reng ka nei thei lo.
"Umm." tih chuan ka chhang ve in ka hria.
Ka pa chuan khum lu ah chuan min thut tir a, tui chu min rawn in tir bawk.
"Bawihte, i mumang pangai bawk ami anih leh pek tawh?"
Ka pa chuan beidawn hmel tak chuan rawn tiin.
Ka nu hichuan 'Dinte' tiin min ko mai thin a, ka pa erawh 'Bawihte' min ti thung, mi koh duat ve nan aniang tiin mi zingah pawh ka zahpui lem lo.
"Umm, u hriata bawk ani leh e, pa." tiin ka theihna zawng zawng sawng khawm chuan ka tawngchhuak ve ta.
"Ava pawi e aw" tih bak an sawi thei silo.
Khum atang chuan tho chhuak in, pawn varanda a kan sofa ah chuan ka thu a, tlai ni tla sen siar mawi tak chu ka thlir vawng vawng a, ni sen dan leh chhum in a hliah lo tawk leka awm te leh van boruak thiang em em te chu ka thlir vawng vawng a, ka thaw leh hawlh bawk.
U hriata ka manga ka hmuh apianga ka tih thin dan ani, ni mei ang maia sen chu thlirin ni tla chu ka thlir liam a, lehlam atanga chawrthlapui lo eng chu ka thlir chhunzawm leh a, a mawi dangdai takzet.
Mi thenkhat chuan si-ar van chung sang ami te khi hming phuahin an di ngaihlai mual liam te tan an phuah thin a, kei eirawh chuan si-ar te aia hla lo leh sang lo, thlapui chu ka chang ve ani.
Ka khabe atanga ka mittui luang chuan vawt min hriat tir a, ka thinlung na chuan sa min hriat chhuah tir bawk.
"Dinte, chaw ei ang" tiin ka nu chuan min rawn ko a, naupang thuawih ber awm zia zânga thoin kan choka dawhkan ah chuan thut hmun ka rem a, chaw chu bar ve in, seh erawh ka seh tlem hle.
Chaw ei kham meuh chuan ka rilru ngaihtuahna te pawh rawn pangai chho in, school kan lut tan tirh ti tih a, U hriata theihnghilh nan ka ti bawk nen, kan junior Thomas a chuan an board exam zo chu min try a, junior zawkin move ala lawm le tiin, keipawh chuan sawi kawi si se lovin ka aw ta anih kha, eng em chu ka beisei chuanglo.
"Naute, i tha tawh em, kan basketball inkhelh phone kalo hrelo ni, tihpalh takzet, a lehpek ah chuan ka silent tawh miah lovang." tiin Thomas a chu a rawn insawi fiah nghal a.
Ka pa in ava hrilh leh pek ani awm e.
Ka buaina hi thup ka duh lova, tu hnenah mah ka zahpui lo bawk.
"Umm, pawilo e, khel nuam maw?" tiin aw pangai tak chuan ka chhang ve bawk.
Thomas a hi kum 17 mi niin, kei ai hian tlemin a sang a, basketball khel thin mi niin, Aizawl tan a khel chhuak fo tawh bawk. An chhungkua pawh an class hlawm em em a, Mizoram chhung na na na chu an luahkhat ve chiang in ka hria.
Hang chhe em em ni lovin, a ngo lem lova, a hmui lah chu a nem in, a mitmeng pawh chu dul raih bawk, a sam chu a sei ngailo a, smart takin a meh thin avang in a sei lai ka la hmu lem lo. Mahni tawka chapo ve tak niin, hmeltha tih a hnekin haw tu hi alo nei leh daih thin.
A rilru a lian tha ve pangai em em a, a mizia erawh a chimawm thin.
