"Dinpui, Thomas a kha ilo hmu em, a bike in hmeichhia pakhat a phur ania, Lalhriatpuii kha ang ka ti hle mai." tiin Zuali chuan ka note copy lai chuan rawn sawi chhuak in.
"A hrim hrim in, enge in an zel, in tha zel tak meuh maw?" tiin a chhunzawm a.
Ni e, thla nga dawn kan lo inzui ve tawh a, tun thla, a thla sarih na August kan hmang ral leh tep tawh a, a mizia chhungril tak lo la lang chhuak chauh chu ka nat pui hle.
Khami zan atang khan weekend ah bak kan in hmu ngai meuh tawhlo, thil tih tur pawi mawh a nei ani awm e tiin ka ti buai duh lem lova, ka biak lah in ka message darkar sawmhnih pali a seen loh chang a tam ta fo, ina tih tur nei lo tan chuan hun in pek har a tih viau na chhan tur awm ka ngaihtuah tak ngial pawhin a chhan tur ka hre thei lem lo.
Chuta karah, Thomas a thiante leh ka thiante hnen atanga, hmeichhia a tawmpui te nena an tawm dun lai emaw an in phurh lai te chu namen lova dawng in, a bike leh a thawmhnaw hak atang chuan amah tih hrechiang viau mah ila, ka hai der lui a, ka HMANGAIH tawh êm vang zawk pawh ani mah na.
Ka chhungte ngei pawh chuan Thomas a rawn lang khât lutuk chu a chhan min zawt fo, chhan ngaihna ka hre silo, a zin aniang tihloh leh lehkha a zir anga a buai deuh aniang tih bakin ka chhang thei mang silo.
Rilru chu a buai ru ve takzet ani, in dawm kûnin tah chang a tam, vawi thum vawi li call chang ka ngah, a chhang thei silo.
Inthen ka rawt lah in, chhuanlam chhe te te neiin a duhlo zawk chan chu a chang ta zel si a, a chang hichuan beidawn rum rum chang ka nei ve ta fo.
Ni e, Lalhriatpuii ka class XII pui nen chuan an in phur ngei alawm, ka thiannu mai mai alawm tiin ka zawhna te chu a pumpelh ve vek si a, sawi leh tur hi ka tan a awm talo thin.
Ani, Lalhriatpuii te thian ho lah chuan kan school a hmeltha tia sawi hlawh ve ber an thian hlut em em in a neih takah chuan an langsar ta hle a, an chapo na a chhuak ka ti mai.
School canteen a Thomas an nitina min hruai lai te ngaihtuah in, brak ah te pawh a reh vung vung ta daih mai chuan ka hrilh hai na te chu an tizual hle.
Umm, hmeichhia leh mipa kan in an loh zia chu hre chiang ber keini mihring ngei ni mah ila, hmangaih naah a thliar lo tiin ka ring nghet thlat thin kha ani a, tunah erawh ka hre ve ta tiin thutawp siam mai te chu ka tum tak meuh thin, mahse ka tha ka neih ve chhun te chu Thomas a hnenah ah chuan engmah lo mai a ni thin si a.
"A thiannu ania, an inphur anih dawn kha, kan tha tluang zel alawm." tiin keipawh chuan ka chhang ve maia, ka ka atanga chhuak chu kei ngei pawh chuan ka awih lem lo.
"Ban dar a ri tawh dawn, inkhung tawh mai ila." ka hmaa thu Zuali chuan rawn tiin keipawh chuan ka pawm pui a, kan pahnih chuan kan lehkhabu te chu kan bag ah chuan kan khung tan a.
"Enge nangni pahnih kha, in thil tih lai kha tawp teh u, ding ula enge intih sawi nghal rawh u." Miss Lali chuan rawn tiin, Zuali nen chuan kan ding rual a, kan khur hlap hlap in ka hria.
"Miss, ih, kan hawn hma angaih avangin kan lehkhabu kan lo khung hma deuh a, dar rik veka chhuah nghal kan duh dawn deuh avangin." ti bah nawk nawk chung chuan ka chhang a. A lung chu a awi lem lo viau.
Minutes 10 vel la bak ah chuan min dingtir tluan ta a, kan sir vela kan thiante nui ru heu heu chuan kan nuih an la ti za zui.
Ka khi deuh suk a, ka hmui ka hup nghal, Miss chu en nghalin, chiang tak chuan min rawn la en zui, ka hmui hup ngai tawhlo khawp chuan ka hmel chu a danglam nghal vek.
Ban dar a rawn ri a, Miss Lali pawh chu a chhuak deuh nghut nghut nghal bawk. Zuali nen chuan Thomas a bike a a rawn chhuah lai chan kan tum ani. Kan pahnih chuan gate pawnah chuan tlan chhuak dun nghalin, hmuh mai mai theihloh nalai deuh ah chuan kan thu dun ta reng a.
Reilo te hnuah chuan Thomas a bike ri ngei chu ka hre ta, an rawn tlan ruala students dang hovin an lo chheih nak nak te chuan ka rilru an tina ve tak meuh mai.
Thomas a bike ri hnai te a kan hriat atang chuan a bike chu rawn lang ve nghalin, Thomas a leh Lalhriatpuii ngei an ni e, Thomas a chuan ka hmu tih a hria ani mahna, chak tak chuan tlan nghalin reiloteah chuan hmuh phak loh anni ta, Zuali chuan ka bânah vuanin," A pawilo ania, Dinpui, i bulah ka awm reng ania." tiin ka ban chu a hmer a, keipawh chuan ka mitmeng atang chuan ka lawm zia a hriat mai ka ring. Tawng ka duh mahsela ka aw a chhuak theilo ani ber mai.
Jacoba chu ka scooty nen chuan ka din nalai ah chuan an rawn ding chat a, keipawh chu chuang nghalin kan tlan ve taa, scooty a ka chuan chhung zawng chuan ka tawng mang lova, ka tawrh zia hriain Jacoba pawh chuan eng em min zawt duh lem lo.
In chu kan thlenga khumah chuan mu nghalin, ka chauh nachhan ber tur awm erawh ka hre theilo, Thomas a leh Lalhriatpuii ka hmuh vang nge, ka thinlung khawhar lutuk vang zawk hi.
