اعتزال.
أعزائي القراء والمتابعين،
أنا حبيت أشارككم رحلتي في الكتابة اللي استمرت لأربع سنين وأكثر. كل حاجة بدأت مع روايتي الأولى "جر.يمة عشق" اللي المفروض كانت هتبقى عبارة عن جزء واحد. لكن بعد مانالت اعجابكم وطلبتوا مني الاستمرارية في كتابتها واعمل منها جزء تاني! لبيت طلبكم وكنت مبسوطه جداً ، حقيقي كنت طايره في السما من فرحتي لما لقيت كم كبير حبني وحب كتباتي. وبعدها طلبتوا جزء تالت ولبيت، لحد الجزء الخامس. وكل جزء اكتر من تلاتين فصل، وفي منهم اللي معدي الاربعين فصل، وفي منهم فصول عدت ال٩٠٠٠ كلمة، وكله يهون. عشانكم.
واللي اتكتبت بحب كبير من قلبي بفضل الله ثم آنتوا وحصل تشجيع منكم حقيقي كان فوق توقعاتي.
ودعمكم كان هو السبب الأساسي اللي خلاني أكتب بشغف وحماس وحب حقيقي، وأسهر ليالي عشان أوصل قصتي بالطريقة اللي تليق بيكم وليكم.
وكم الريفيو اللي كانت بتنزل هنا ع الجروب ده، مئات الريفيو الجميلة ، وكم التوقعات والمشاركه منكم، نقلتوا قلبي في حته تانيه، حته حلوه وحبتها،
وبدأت اتعرف للناس واللهم لك الحمد كان الجروب ده من تلات سنين بس معروف ومميز لناس كتير ، كان جروب حيوي وبتنبض فيه الحياه كده، كأنه بيتنا التاني.
زائد إن عمري ما طلبت منكم مقابل مادي أو معنوي على حاجه بكتبها، ولا طلبت عدد معين من التعليقات أو التفاعل، ولا منعت عنكم فصل لحد تتفاعلوا، كان يكفيني بس أشوف أثر كتابتي في قلوبكم، وأسمع آرائكم واقتراحاتكم. والريفيو الجميلة منكم. وكنت حابه نستمر على الوضع ده.
لكن للأسف مع الوقت، ولما خلصت جر.يمة عشق، كتبت أعمال تانيه! شوفت وقتها إن التفاعل بدأ يقل، على الرغم من أنها والله أعمال كويسه وفيها غموض وانا شايفه أنها جميله وقصص تحترم، لكن راحت واختفت، زي احببت بصيرته ، وإحتلال مُحرم، وجهاد وسلامه وغيرو وغيرو، حسيت أنهم مبقوش معروفين أصلا.
وقولت مش مهم أكيد هنرجع تاني، وفضلت احط اعذار، زي الدراسة ، مشاغل البيت عندهم، اللي بتتجوز، اللي ف ثانوي، وهكذا، بس برضو للاسف بيتفاعلوا في اماكن تانيه، ودي حرية شخصية مقدرش الوم حد على حاجه ، أنا كمان أكيد قصرت، محدش فينا معصوم. وعشان أكون صريحة معاكم. ده كان صعب عليا. من إن آلاف القراء تشجعني وتكون معايا، وفجأة كل ده يتبخر و يختفي.
ولاني متعودتش أطلب حاجه من حد، فمش هطلب أنكم تقدروا تعبي، لأني عندي قناعه اللي بيخرج من القلب هو بس اللي بيوصل للقلب، مش محتاج إنك تطلب الحب والاحترام والتقدير. وكل شويه أقول تفاعلوا على فكري و قلمي.
لما كتبت روايتي الأولى، شجعتوني جداً وكنت حاسة والله بشغف كبير محستوش قبل كده ولحد دلوقتي محستوش، واتفاجئت إن الدعم بقى أقل بكتير. مكملش حتى الألف ، قولت مش مهم بكره تروق وتحلى، وحاولت أقدم ليكم أعمال متنوعة، عشان أثبت لنفسي وليكم إني أقدر أكتب في مجالات مختلفة، سواء كوميديا، فانتازيا، دراما، وحتى روايات عن متاعب الحياة اليومية. وحتى رواية عن زمنا اللي فات واللي اتحرمنا منه ومن خيره، اتفاجئ أنه لحد دلوقتي متجاوزش ال١٠٠ كومنت، ومبيجيش غير اتنين تلاته ريفيو ومن نفس الأشخاص. آنتوا متخيلين!
وده يخليني إني مستحيل أكمل.
