Three Mind One Body (Complete)

Part-26 (U&Z)

Unicode

ရက်၊လတွေလည်း ကြာသွား၍ ဆောင်းထဲဝင်လို့ ရာသီဥတုကိုချမ်းစိမ့်လာလေပြီ။ အပြင်ဘက်မှာကျဆင်းနေသော နှင်းမှုန်လေးတွေမှာလည်း ဖြူဖွေးလျက်လှပနေလေသည်။ ဥယျာဥ်ခြံထဲတွင်စိုက်ပျိုးထားသော ပန်းပင်ပေါ်တွင်မှာလည်း နှင်းစက်လေးတွေနေရာယူကာ ဖုံးလွှမ်းနေကြလေသည်။ ဒီလိုချမ်းစိမ့်လှသောရာသီဥတုမှာ နေထိုင်ရတာဟာ ခိုနားရာအတွက်အဆင်မပြေလှပါ။

ဝမ်းဗိုက်ကအတော်ကိုဖွံ့ဖြိုး၍ ရာ့အတွက်နေထိုင်ရခက်ခဲစေသည်။ ဗိုက်ကိုသယ်ရသောဒုက္ခက ရာ့ကိုမျက်ရည်ကျနိုင်လောက်အောင် ဝေဒနါကိုခံစားစေနိုင်သည်။ မွေးဖွားရက်နီး၍ မောင်ကရာ့အနားမှာအမြဲတမ်းရှိနေပေးသည်။ တစ်ခါတလေသောအချိန်အခါတွေမှာဆိုရင် မောင်ကစာကြည့်ခန်းထဲဝင်ပြီး ပြန်ထွက်မလာနိုင်တော့။

စာကြည့်ခန်းထဲကထွက်လာရင်တော့ မောင့်ရဲ့မျက်လုံးတွေကပုံမှန်ထက် ပို၍ဖောင်းအစ်နေပြီး နှာတရှုံ့ရှုံ့လည်းလုပ်တတ်သည်။ ရာ့မှာ အအေးများမိသလားဟု စိတ်ပူခဲ့ရပေမဲ့ မောင်ကစိတ်မပူဖို့ပြောကာ ရာ့လက်ကိုယူ၍ အနမ်းတွေပေးတတ်သေးသည်။ ထိုအချိန်တွင် ရာထိတွေ့ခဲ့မိသော မောင့်ရဲ့ပါးပြင်ကအေးစက်မှုကို ခံစားမိလျှင်တော့ဖြင့်.........။

ညဘက်တွေဆို မောင်သီချင်းဆိုပြမှ ရာအိပ်ပျော်တတ်တော့သည်။
ဒီနေ့မနက်မှာတော့ ရာတစ်နေရာကိုသွားရမည်။ ထိုနေရာသည် ရဲတိုက်ဟောင်းကြီးဆိုသောနေရာပေ။ Pensoraတို့၏ရန်ကိုကြောက်ရသောကြောင့် ခိုနားရာကို ထိုရဲတိုက်ဟောင်းကြီးမှာထားဖို့ဆုံးဖြတ်ထားလေသည်။ ဟိုမှာ အန်တီHunaနဲ့ဦးလေးDoprk၊ Akiiတို့ကရောက်နှင့်ပြီဖြစ်သည်။ သွားဖို့တော့ စိတ်ပူစရာမလို။ ဘဘPorxanaအစွမ်းနဲ့ နေရာကူးလိုက်ရုံသာ။ခိုနားရာတို့ရောက်ပြီး၍ မွေးခါနီးပြီဆိုရင် လေ့ကျင့်သူတွေနဲ့ ရဲတိုက်ကြီးကိုဝိုင်း၍ ကာကွယ်ထားမည်ဆိုသည်။

ခိုနားရာ ရဲတိုက်ဟောင်းကြီးသို့ရောက်သွားတော့ အလွန်ကိုအံ့သြမင်သက်ခဲ့ရသည်။ ဒီလိုခမ်းနားထည်ဝါလွန်းသော မဟူရာရဲတိုက်ကြီးကို အဘယ်ကြောင့်နေထိုင်ခြင်းမပြုရသလဲ။ ပုံမှန်ဆိုခြောက်ခြားစရာကောင်းလှသော နေရာအနေအထားဆိုပေမဲ့ ရာ့အတွက်လုံခြုံ၍ နွေးထွေးမှုကိုဆောင်ကျဥ်းပေးနေသလိုခံစားစေသည်။