طلع نمر من عند رماح وهو مايفكر بشي وكل اللي يفكر
فيه ايش يسوي بزوجته اول مايشوفها وقرب من الخيمه و
بصوت متجهم: يا مره !!!
طلع الاب وهو يناظر فيه: وش تبي ؟؟
نمر: زوجتي وين ! خلها تطلع ابيها
الاب: مالك زوجه عندنا امش من هنا
نمر: بتطلعها ولا ادخل بوسط اهلك واطلعها بالغصب
الاب: وش تبي فيها !! بعد مارميتها علينا جاي تبي ترجعها
نمر: ايه جاي ابي اراضيها وارجعها طلعها لي ولا والله
لا احرق الخيمه باللي فيها ووقتها هي بتطلع من نفسها
الاب: انت مجنون اكيد خلك هنا بناديها لك
دخل الاب وجلس نمر ينتظر وطلعت له بعد فتره وبيدها
ولدها وهي تناظر فيه بخوف: وش تبي ؟؟
ناظر فيها نمر بنظرات عصبيه : علمتي الديره كلها باللي صار؟؟
الزوجه: لا والله ماعلمت احد
قرب نمر منها ومسكها من حلقها: وكيف عرفو الرجال؟؟
الزوجه: علمت امي بس امي ماعلمت غيرها
نمر: ماقلت لك البارحه لا تعلمين احد ؟؟ ماقلت لك لا تفتحين فمك
وهددتك !! مافاد تهديدي لك؟؟
الزوجه: والله ماكان قصدي ماعرفت ان امي بتوصل الكلام
والله مادريت يا نمر
نمر: انتي ضريتي الشيخ وضريتيني قبله
الزوجه: وش دخلك بالشيخ !! خلك منه وخلنا نطلع من الديره
محد يبي يجلس هنا ولا احد يبيه انا احتاجك وولدك يحتاجك
ماتبينا انت ؟؟ كل همك الشيخ و الشيخ؟؟
نمر: ايه كل همي الشيخ وانتي طالق يامره انتي طالق ولا عاد
ابي اشوف وجهك
الزوجه وهي تناظر فيه بصدمه: تطلقني يا نمر ؟؟ لجل مين !!
لجل الشيخ؟؟ لجل اني قلت عنه شي فيه !! اخترت شيخك
علي وعلى ولدك رعد ؟؟
نمر شال ولده منها : انا هددتك اني بحرمك من ولدك
وهذي اخر مره تشوفينه مامديت يدي عليك لجل ان الشيخ
قال اللي يمد يده على مره مب رجال وانا كله ولا
يشوفني عديم رجوله
الزوجه: وفعلتك هذي من فعايل الرجال؟؟ تطلقني وتشيل
ولد من امه ؟؟ ولد ماكمل السنه محتاج لامه اكثر منك
نمر: اعرف اشربه واوكله والبسه وهالشي يكفي يعيش
