توجه نمر لبرا الديره وجلس وهو يناظر في خيمة الشيخ
من بعيد : يجوز انه يدور علي الحين او يجوز انه نام ولا اهتم
انتبه نمر للسيف اللي اعطاه رماح واخذه وجلس يقلب فيه
ويناظر فيه وابتسم: كيف مايبيني احبه وهو يسوي كل شي
اطلبه منه جاب لي سيف حتى وثمنه غالي وكثير على واحد مثلي
ليتني اقدر اسوي له كذا واكثر ، ولكني خايف عليه من قبيلته
وابوه ولا اعرف وش بيسوون حتى لو اني شجاع كثرتهم بتغلبني
واموت قبل اشوف رماح يمسه مكروه ....
في ديرة الشيخ ضاري //
ضاري وهو معصب وشاد على قبضته :يارجال !! الكلام اللي سمعتوه
عن ولدي ماهوب صحيح ، وش دليلكم ؟؟ ولدي فارس يتكلمون عنه
العربان كلها وبنشدون عن شجاعته اكيد بيكون له اعداء وحساد
وانتم ادرى برماح وادرى بتربيتي له
الرجال وهى يتكلمون مع بعضهم ورجعو ردو عليه : اجل ليه
طردته من الديره قبل فتره ؟
ضاري سكت شوي : صارت مشكله بيني وبينه والمشاكل
بين الاب وولده ماتنقال ومالها علاقه باللي صاير الحين ،
يارجال لو ولدي مثل ماتقولون كان ذبحته بيدي ولا تبريت منه
بس انا ادرى بولدي وادرى باللي يساويه ، ترا رماح من يوم
هو صغير تربى بوسطكم وبينكم مثل ولدكم كيف ترضون عليه
هالكلام !! المفروض اللي نشر هالاشاعه تقصون لسانه
الرجال: نعتذر منك ياشيخ صحيح ماعندنا دليل ولكن
العلم وصلنا وجينا نقول لك
ضاري: مالكم الا اللي يرضيكم ورماح بجيبه شاهد على نفسه
واخوياه بيشهدون له وان طلع الحق معه فواجب عليكم تعتذرون
له وان طلع الحق معكم بأنا بريء من ولدي ولا اعرفه ولا يعرفني
الرجال: اللي تبيه ياشيخ
قرب وليد من شاهين وهو يسمع كلام الرجال: وش يقولون ؟؟
رماح والله مايجي منه شر ابد
شاهين: مين بيصدقنا ياوليد ؟؟ لزوم نروح نشوفه اكيد الشيخ
هالوقت ضايق خلقه وعايف الدنيا انا شهدت بعيني يتهمون
الحريم بشرفهم اول مره اشوف رجال يتهم بشرفه وحياته
مير هالطبع مب من طبايع الرجال ورماح احنا ادرى فيه
وليد: صدقت
