"ငါ သူ့ကို တွေ့ မှဖြစ်မယ်" ဟု သူမကပြောသည်။
Hui Yin သည် တံခါးအပြင်ဘက်တွင် ခင်ပွန်းဟောင်းကိုတွေ့ရန်တောင်းဆိုနေသော လမ်းဘေးခွေးဝဲစားတစ်ကောင်ပုံစံကဲ့သို့ ဖြစ်နေသော်လည်း သူမ၏မျက်လုံးများသည် ပြူးကျယ်ပြီး မျက်၀န်းထဲတွင်မျက်ရည်အပြည့်ဖြစ်နေကာ မျက်တောင်များသည်တုန်တုန်ယင်ယင် ဖြစ်နေသည်။
သူမသည် သူမ၏အလှကို ဆုံးရှုံးသွားခဲ့ပြီဖြစ်သော်လည်း သူမ၏ စွဲမက်ဖွယ်ကောင်းသောမျက်လုံးများသည် မပြောင်းလဲဘဲရှိနေသောကြောင့် မြင်သူတိုင်းက ၎င်းတို့ထဲတွင်နစ်မြှုပ်သွားချင်လောက်အောင်ညှို့အားပြင်းလှသည်။
Nian Zhen သည် သူမ၏ အစာအိမ်ထဲတွင် အက်ဆစ်သကဲ့သို့ အမုန်းများ ပွက်ပွက်ထလာသလိုခံစားရပြီးနောက် သူမ၏ လက်ချောင်းပေါ်ရှိစျေးကြီးသောလက်စွပ်ကို ငုံ့ကြည့်လိုက်သည်။ ဖြည်းညင်းစွာဖြင့် သူမ၏နှုတ်ခမ်းများသည် အောင်ပွဲခံစွာ ကွေးလာသည်။
ဟား! မနာလိုဖြစ်စရာဘာများရှိလို့လဲ။ Hui Yin အဆင့်က ဒီလောက်တောင်နိမ့်ကျနေပြီ။ ဆင်းရဲ၊ရုပ်ဆိုးပြီး ကွာရှင်းခံထားရတဲ့သူမက ငါကိုဘယ်လိုယှဥ်နိုင်မှာလဲ။ ပြီးတော့ Lu Shen က ငါ့အပိုင်ဖြစ်နေပြီ။ ဖီးနစ်ဌက်က ကြက်တစ်ကောင်ကို ခေါင်းထဲတောင်ထည့်ဖို့လိုအပ်လို့လား။
"ငါ့မှာ သူ့ကလေးရှိနေပြီ..."
သူမ၏နားထဲသို့ ထိုစကားသံတိုးတိုးလေး ဝင်လာသည်နှင့်တစ်ပြိုက်နက် Nian Zhen အေးခဲသွားသည်။
တံခါးအပြင်ဘက်ရှိ Hui Yin ကို လှမ်းကြည့်လိုက်ရာတွင် သူမသည် ထိုမိန်းကလေးက ဗိုက်ကိုကာကွယ်ဖုံးအုပ်ထားသည်ကို ယခုမှ သတိထားမိသည်။ ထိုအခိုက်အတန့်တွင် Nian Zhen သည် ရုတ်တရက် ဒေါသထွက်လာသည်။
ဒီမိန်းမပျက်က Lu Shen ရဲ့ကလေးကို ဘယ်လိုရသွားရတာလဲ
သူမ၊ Nian Zhen ကိုယ်တိုင်သာ Lu မိသားစု ၏ အမွေဆက်ခံသူကို မွေးဖွားပေးရမည့်သူ ဖြစ်သင့်သည်။ သူမသည် ထိပ်ဆုံးသို့ရောက်နိုင်ရန် စေ့စေ့စပ်စပ် စီစဉ်ခဲ့သော်လည်း ဤမျှအရေးကြီးသောအရာကို မေ့သွားခဲ့သည်။
