المستهام

بارت التاسع والعشرون

المستهام
"شيماء الدُليمي"

من يمته«المزن» گامت تصب حالوب؟!
شابت روسنه وما شفنه هيج امثال
الميت ينطعن؟ أريد افتهم حربيش!
اليطعن بالظهر ما ينحسب كتال..

مسره:: رجعت شعري وره اذني وهمهمت، احم لا يمعوده شيگعدني هيج وقت بس سئلت مامه وهي گالتلي

ارام:: بلعت ريگي بأريحيه ورجعت تمددت وهي تلعب بشعري على كيفهه

اساور:: شصار علمود ياسر؟

مسره:: اوووف اوووف ما اعرف شحجي

اساور:: هم تعاركتو

مسره:: صاير مدري شلونه مو ياسر الاولي، صارلي شگيد ويا ابد ما عاملني هيج بس هسه ما اعرف منو گارصة

اساور:: خاف دا يسوي هيج متقصد يولي

مسره:: ليش؟

اساور:: يالطرنه، علمود ما يورط روحه خوما يگعد يبجي ويگلج يا بنت الناس اني جنت العب عليج يا اهلي ما يقبلون وهسه لازم نترك اكيد لا، ف شسوه دخلج من غير باب وهو باب المشاكل علمود تملين تملين تالي يتركج انعل حظه شلون يخطط

مسره:: بشك، هاا، لا هو ما يسوهه، مو ما يسوهه؟
ضربت ارام على راسهه

ارام:: اخخخ يوليي راسي اريده

مسره:: اسفه بس شتگولين يسويهه؟

ارام:: شيسوي؟

اساور:: هاك استلم الغباء

ارام:: يااا هاي شبيج؟

مسره:: مالج دخل بيها، بس شتگولين ياسر دا يلعب عليه

ارام:: هاا، شدراني انتي اعرف من عدنا

اساور:: اگول رجعي لصفنتج وانجبي لان انتي واضح لا تحلين ولا تربطين

ارام:: هههههه انا شمعرفني وحتى انتي شمعرفج، طبيعة علاقتهم ما نعرفها ف ما نگدر نحدد اذا جانت نيته سليمه ألج او سيئه هذا الشي انتي تحددي مسره
بس هو مازال دا يأخر بالخطبه ف غسلي ايدج منه حتى اذا جان صادق وياج راح تجي يلي تغيره وتاخذه ألها

اساور:: ضيقت عيني بشك، اعترفي منو لاعب بمشاعرج

ارام:: محد بس دا احجي كلام عابر

اساور:: ما اقتنعت احجي الله عليج عود ليش مخليه حياتج سر

ارام:: مو سر بس ماكو شي ينگال

اساور:: دحجي، حابه قبل؟

ارام:: بعدم مبالاة، مو حابه بس متعلقه ويمكن حابه مدري

مسره:: ببتسامه، احجي خلي اگلج اني اذا حابه او لا

ارام:: هو ابن خالتي جنت شبه عايشه يمهم ويعني جنت متعنفه نوعا ما من اهلي ف هو جان يعقملي ويسمعلي من احجي
تعودت على هذا الشي وصرت كلشي اگوله وزعم يخطبني بس خالتي جانت تأجلهه لان بعدني صغيره تالي تزوج صديقتي