لك يا ذا الجمال اليوسفي

بارت اضافي

رواية #لك_يا_ذا_الجمال_اليوسفي

بقلمي ... فاطمة العبادي

قراءة شيقة كيكاتي 🖤 ..

نادية ... الانسان لازم يختبئ وراء عقله مو قلبه ومشاعره ترف ليش هيج تهلكين نفسج وتكسرين عمرج بعد كم سنة تحتاجين سند تحتاجين عائلة

غمضت عيني بقلة صبر وجريت نفس عميق شمرت الادوات من ايدي ونزعت الكفوف
بعدها حجيت بقلة حيلة
ترف ... گلبي ما ينسى هذا البشر للموت جاسم ميت عدل لازم من اتلاگه ويا اكون وفيه اله

نادية ... هذا تعذيب للنفس مو وفاء

ترف ... اوكي انه اعذب بروحي ومستلذة بعذابي عوفونييي عاد فكو ياخة مني

نادية ...والله تندمين بنية شحلاتج ودكتورة اسنان والف من يتمناج بعد بس تكبرين تروح هاي الفرص الزينة الجاي تجيج هسة

ترف ... وروحتهم اوووف اوووف
جريت مبايلي دزيت رسالة للسايق يجي وحجيت متذمرة ويا زميلتي وصديقتي الدكتورة نادية
ترف ...راح اعوفج تكملين الشغل وحدج اليوم
نادية ...بس مردودة
ترف ...صار

باوعت لأظافري ورفعت رأسي اتنهد
ترف ...خايفة يطلع ميت نادية

نادية ...لا تگليلي بعد كل هاي السنين منتظرته يطلع عدل؟ مو طبيعية انتي ترف لازم تقتنعين هذا الزلمة مات كتلو داعش ما ضل

ترف بحزن ...وهذا شنو يقنعه؟ حجيتها مأشرة على گلبي

نادية ...مايقتنع طول ما انتي ضاله بنفس الشرنقة دطلعي منها يمعودة وعيشي حياتج انخطبي تزوجي كوني عائلة التهي بيها وتنسين

ترف ...تؤؤ .. مستحيل

نزعت اللابكوت ورتبت شالي
نادية ... شلون تنسين وانتي رايحة الهم وهسة تصعدين للغرفة الله يعلم شنو من ذكريات ترجعلج كعدي من هذا الحلم ترف ورجعي للواقع كافي عاد

ترف ...لازم اروح عازمين اهل العروسة للعشاء
نادية ...أيسو من جاسم وتأقلمو ويا الحزن وزوجو كاظم وانتي ظلي
ترف ...ان شاءالله

نادية زفرت بقلة صبر اجة مريض وهم زين التهت بي وعتقتني يردون يقنعون گلبي بشي رافضه يردوني انسى حبيبي وخطيبي المنتظرة رجعته حتى نتزوج ..

يمكن حجيهم صدك وجاسم ميت وحتى اذا ميت راح اضل انتظر اموت واتلاگه ويا هناك يم رب العالمين ويكون نصيبي

رمش علي السايق ودعت نادية بحركة اصابع وطلعت امشي بهمة ركبت السيارة رفعت الجامة وارتجيت على الكشن اباوع للطريق بتعب وكل كلام نادية يتكرر براسي
نفضت الافكار هاي من بالي وغمضت عيني ورجعت سرحت بذكرياته الحلوة

خجله يمي ورجفته جنت اول حب يفتح عيونه علي جنت تجربته الاولى وحبه الصادق
رفعت ايدي لصدري اتحسس لقلادة واسترجعت الشعور لمن انطانياها اول مرة رجفت ايدي وايده من تلامست ايدينا بدون قصد
نظرة عيونه وابتسامته .. وجذبته من دخلني للبيت وضل يخبط ع امي حتى تصدگ