انا وحبيبي ومغامرات بلا نهايه (يوميات فتاة السرطان)

من هنا البدايه

البطاقه الشخصيه :
الاسم:سالي علي
العمر:25سنه
الوظيفه:صيدلانيه
الهوايه:الحياكه
الحاله الاجتماعيه:متزوجه

البطاقه الشخصيه:
الاسم:كرم احمد
العمر:27سنه
الوظيفه:طبيب
الهوايه:الشطرنج
الحاله الاجتماعيه :متزوج

#الاحداث غير واقعيه وان حدث اي تطابق فهو ناتج عن صدفه

مرحبا ..معكم سالي😒
هسه ليش نحجي فصحی ..واني اساسا داكتب مذكراتي
خل اشك الورقه واعيد 😩

هلو ..اني سالي 😘
اني حبيت اشارك يومياتي وياكم ..تعرفون صديقتي اميره 😕 اذا متعرفوها روحوا اقرأوا قصتها (يوميات فتاة السرطان)

بهذي المذكرات اني رايده انقللكم حياة اليوميه بمنننتهی الشفافيه😒 اسولفلكم انتوا اي انتوا البنات الي تردون تتزوجون ومستعجلين ع الزواج 😩 احجيلكم شكد تغيرت حياتي من يوم ما اخذت كرومي الاصلع👽 اي اي زوجي اصلع بسس حلو 😍

تخرجت من الصيدله واني وبكل شرف ..حديقه 🐦🐦
اقصد ممرتبطه ولا مفكره ولا مجربه ارتبط 😑
وصديقاتي انخطبن بالمراحل الاولی واني عليه نووور 😇
ولانو بس تتخرج الصيدلانيه تنخطب😌
اجوني خطابه بعد سنه😣 اي اي شبيكم ليش شعبالكم بعد يوم؟

وشي مهندس وشي صيدلاني وشي مدرس بس اني ردت
طبيييب😷 والحمد لله بعد صبر انخطبت لكرومه ..😘
اني بالبدايه جنت ما اعرف عنه شي ..ابدا ابدا

بالخطبه جان ملاك😇😇 والاناقه والظرافه واللطافه والسخافه 😄 فجنت كأنما احلم ..معقوله اني سالي الجكمه اتزوج هذا الحلو😕 بس بعدين اكتشفت انو كرومه شاك الكاع وطالع😱 بالعراقي هاي يعني صايع 😫

ومن يومها واني اعاني من تسخيت كرم ورفضه انو يتحمل المسؤوليه 😣 شكد حاولت اسويه رجال وابو بيت ما فاد🙅

احجيلكم عن اليوم مثلا وبالايام الجايه احجيلكم عن خطبتنه ومن جان اصلي 😩 قبل لا يطلع صيني 🔜

اجه الصباااح 🕕 ولازم اكعد كرومي للشغل لازم يروح للمستشفی🏥
جريت الغطا وما لكيته لانو كرم بعيد الشر عنكم يتكلب بالنوم ودوم الكاه بالكاع😴
عاد دفرته وهو نايم برجلي لانو هو ميحس بهيج اوقات فاطلع قهري بيه وهو نايم :كرررم كرررم كرم كرم
لاحياة لمن تنادي بس لتخافون مو ميت ..
😞 تعودت علی نومه لذلك اكعد بال6 عاد ل8 كافي علی ما يكعد وصحصح ويلبس ويتأنق للممرضات😩 حضرته:
ولللك كررررم 📢
صاح بوجهي :وجع 😫
:كوم حبيبي 😇دوام
فرك عيونه وباوعلي:احنه وين😕
:بالملجأ صارت غاره واخذتك وشردت بيك جوه 😒
ضربني علی راسي وحسيت الريوك رح يطلع من خشمي😣

:بيش الساعه؟
:بالسته😧
:كومي عني لا اشمرج من الشقه
:كرم شبيك ويايه اهي اهي رح ابجي
:اي ابجي بره 😪