قهوة بنكهة الفراولة

يوم سعيد

سعيد بيروح شغلة كل يوم، شغله اللى هو مبيحبوش..
مهندس مدنى ولازم لازم يشرف عل عمال ف الموقع! بيفضل بالساعات ف الشارع..
و هو اصلا شخصية بيتوتيه ، يحب قعدة البيت و الروقان بس شاطر ف الرياضيات و بيحبها .. و دخل هندسة عل عكس رغبة اهلة اللى كانوا عايزينة يدخل الاكاديمية البحرية.
بس مكنش متخيل انه هينزل بنفسة الموقع و اتدبس بقى فى اداء وظيفتة عل حلوة و المُرة.

الموقع كان معهد خدمات تعليمي تابع للقوات المسلحة فى القاهرة .. بقالة فوق الشهرين بيعانى ف الزحمة و الحر و قرف العمال.. طلب ان يتم نقلة لموقع اخر لانه غير قادر على اداء مهامة الوظيفية بالشكل او المستوى المطلوب لان بيئة العمل غير مناسبة.
وافقوله عل طلبة بسرعة و خلال اسبوع كان جاله نقل ل اسكندرية لتنفيذ نفس المشروع هناك.. و شقق المهندسين كانت قدام البحر على طول ، سعيد كان سعيد جدا.
و مووده اتحسن خالص لدرجة بقى بيطبق بالايام فى الموقع ، و ممكن تفوت اسابيع و هو فى الموقع بكل نشاطة و مش بيروح البيت الا عشان يستحمى و ينام و يغير لبسه.
سعيد حساس جدا ، فنان ، ايدة مش بتبطل..طول ما هو قاعد ايدة شغالة.. بترسم.. بتشخبط .. بتكتب ..
بيشترى الجرايد عشان يحل الكلمات المتقاطعة و السودوكو و يقرا حظك اليوم و يشوف رسم الكاريكاتير ، و بعد ما بيخلص ، بيعمل ورق الجرنال كلة مراكب و صواريخ و اشكال مختلفة من الدبان لمجسم دبابات .. هواية.
بس يومه ميكملش منغير شوب القهوة المحترم بالحبهان ..دا فطاره و غداه و عشاه!
مبيدخنش ، بس لو شفته تقول عليه مدمن من كتر ما عينه حمرا م القهوة و السهر ..
بيقول عل نفسه كائن ليلي، بومة ، وطواط او فامباير ، بيقولها بفخر كل مرة حد م العمال يسأله "ايه با باشمهندس ، هو حضرتك مبتلحقش تنام ؟! الله يقويك و يدينا صحتك "
غير الهالات بقى ، نفس منظر الكحل لما يسيح من بنت ف الحر ! و سنانه الصفرا و بشرتة المرهقة القمحية البهتانة.. مفهاش حياة و لا نضارة..
بيقول "البنات بس اللى يهتموا بوشهم، انا راجل ، و بعدين بتتريقوا عليا ، كنتو تعالو شوفو بنات هندسة دا انا احلى منهم 😀" ،

سعيد شقتة جنب محطة سيدي جابر .. ف شارع مصطفى كامل .. اللى يعرف المنطقة يعرف اد ايه هى جنب المحطة و البحر .. و فيها كمية قهاوى و كافيهات و محلات شاورما اللى مبيطقش ريحتها.

بس لما بيبص م البلكونة بيشوف البلد كلها ، و زوار البلد و السياح و المصيفين ، متعة بالنسباله الفجر مع كوباية قهوة و طبق لب سورى و موسيقى Jackie Evancho البنت المراهقة الجميلة اللى صوتها نعمة.. نغمة من عالم سحرى خيالى بيوديه لدنيا تانية ، دنيا احلام اليقظة بتاعتة على طبقات صوتها الاوبرالية اللى بتهدى اعصابة جداااااا.