*فى المنزل*
--انى سمعت كل حاجة يا بيه.....
-انت بتقول ايه ؟!!
--ايوه يا بيه زمبؤلك أِكدة ..
-قلت لحد ؟
--لا يا باشمهندس و حياتك ...
- راجل يا اسماعيل ، اجدع راجل ف الموقع كله ، خليك كدة.. متقولش لحد ، و لما احتاجك تقول، هكلمك...سيبنى بس امخمخ ..
--انى تحت امرك يا بيه و منصور بأذن الله يا بيه..دا عالم ولاد...
-خلاص ، خلاص يا عم اسماعيل ملوش لزوم الغلط، الحق هيبان ف وقته ، دا انت ربنا بعتك ليا.. بس زى ما قلتلك بقى.. مش عايز مخلوق يعرف..
--------------------------
•الو ، سلام عليكم.
-و عليكم السلام يا حسام باشا ، انا الباشمهندس سعيد بتاع ...
•ايوا ايوا عارفك يا باشمهندس ، خير حصل جديد ؟
-ولا جديد ولا حاجة بس كنت عايز اعرف انا ايه موقفى فى التحقيق دلوقتى ؟
•و مجتليش القسم تسأل ليه ؟
-....اممم، اجيلك يا باشا ، بسيطة..
•طب يالا ، انا مستنيك و هات بطاقتك معاك .
-*بطاقتى تانى!!!!!*... مسافة السكة يا باشا.. الف سلامة.
-----------------------------
* فى القسم *
طقطقطق..
•خش
٠ استاذ سعيد واجف برا يا حسام باشا..
•خليه يخش
٠استاذ سعيد ، اتفضل..
•اهلاااااااً ، اذيك يا سعيد..
-ازى حضرتك يا حسام باشا !!!
*ايه المقابلة الحارة دى ؟! اللى يشوف كدة ميقولش ان دا الراجل اللى كان عايز يقعدنى ف التخشيبة و يروقنى! لحد مايبانلى صاحب!!!*
•ايه يا راجل فينك ، من ساعة المحضر مش باين يعنى ..
-قاعد ف بيتى من ساعتها ما حضرتك عارف ..!
•لالالا ، يعنى ايه الكلام ده ؟ يعنى انت متجيش لوحدك تشوفنى ؟ دحنا عشرة محضر يا راجل هاهاها ولا انا لازم ابعتلك بوكس يجي ياخدك ؟ هاهاها..
-*ايه دا هو فى ايه ؟!!! الراجل دا ماله ؟؟؟ اكيد فى حاجة عايزها منى..فى انّ ف الموضوع *
بصراحة كدة يا فندم كنت جاى بس اتطمن و اسأل التحقيقات وصلت لحد فين..
•الموضوع مش حلو يا سعيد... مش حلو خالص..انت يا استاذ طلع ضدك قرار بتحديد اقامتك ف العقار بتاعك اللى انت مأجرة.. يعنى لو رجلك عتبت برا الشقة بدون اذنى هتجيلى هنا تانى ...
-طيب و انا هقضى مشاويري ازاى ؟؟
•ما انت تبقى على تليفون دايما معايا بقى... و طبعا مش محتاج اقولك مفيش سفر برا اسكندرية...
-و افرض حضرتك جاتلى سفرية مفاجأة !!! انا والدتى ف اى وقت ممكن تحتاجنى !!!!
•اللى خلاها متحتاجلكش المدة دى كلها ، يخليها تنساك شوية لحد ما نبت ف القضية بتاعتك .. و احمد ربك انك مش مشرفنى هنا.. دنا المفروض اتحفظ عليك لحين انتهاء التحقيق..
-طيب افرض فعلا محتاج اسافر..!!!!!
•ساعتها بقى يا استاذ ، شفت فيلم عسكر ف المعسكر ؟
-اه....
•هكلبشك ف عسكرى من بتوعى كدة ، تروح تقضى مشاويرك و يرجعك ليا تانى....و برضو مش مسموحلك بأكتر من 24 ساعة ، دا اذا طلعلك اذن بالموافقة كمان.
-يا باشا على ايه كل دة ؟ هو انا سرقت ولا قتلتلى قتيل ؟؟؟
•انت ضربت لواء يا سعيد ، فاهمنى ؟!! لواء . يعنى رمز من رموز الدولة و اتهجمت على قيادة عسكرية .. دا غير المهندس اللى انت شتمته .. دا انت ف الحركتين بتوعك دول اتفتحلك 3 قواضى !! انت بتتكلم ازاى .. انت المحامى بتاعك مفهمكش وقعتك السودا ولا ايه ؟
•صدقنى ولا سألته حتى.....
طيب معلش عندى سؤال ... انت ليه مش متحفظ عليا ؟ ليه سايبنى فى البيت مادام الاجراء القانونى هو التحفظ..
*الضابط مرتبكاً..
•ااا..ايه..؟!! هى المشرحة ناقصة قتلى... صدقنى معزهاش عليك.. لولا بس سيادة اللوا قاللى ان الكلام بينكم مخلصش و انه متعشم فيك تعقل و تفكر تانى...
-افكر ف ايه ؟
•يعنى انت مش عارف ؟
-هو فهم حضرتك ؟؟؟؟
• فهمنى ايه بقى ؟؟؟ الراجل مستنيك تعتذر يا سعييييد و تقوله حقك عليا و اللى يرضيك هعملهولك.. الناس دى واصله يا سعيد ، و نصيحتي ليك، بلاش تتلامض معاهم..
-دا عايز يسرق حقى !!!! دا كان عايز يرشينى !!
زور فى اوراق رسمية و غيّر عقود بدون علم الاطراف المعنية !!!! اعتذر عن ايه و انا بقول لحضرتك مظلوووووم !!!
•هو اللى نعيدة نزيدة ؟ منا سمعت البوقين دول المرة اللى فاتت ، بقولك ايه ، اثبت كلامك .. فى دليل مادى على كلامك ؟
-لا.
•خلاص يبقى متوجعليش دماغى ، لحد ما تلاقى دليل على كلامك ، دا اذا كان كلامك صح اصلا مش بتحاول بس تبرأ اسمك يعنى... ابقى جبهولى ، و لحد ما تجيبه انت متهم ف قضية ..
حد غير الراجل الطيب دة 'اللواء' كان رفعك !!! بس اقول ايه ؟!! حظك كدة
.....اصبح الهواء ثقيلا فى رئتيه.. اختنق ، ضاق صدرة و فك زرار عنقة بخنقة...لم يعد يرعى انتباه لفم الضابط الكبير الثرثار ، لا يفكر سوى بمصابه ! و كيف ان الظلم قد يتجبر و كيف ان الانسان يفترس حقوق غيره الغير قادر على حماية نفسه !!متحسراً على دليل براءتة الشفهى الذى ظن لوهله انه طوق النجاة و قشة الغريق ! بلا فائدة .. كل الشهود امام سيادة اللواء المبجل ، كاذبون.*
*و بعدين بقى ؟؟؟ هووووف !!!!حلها من عندك بقى يا رب !!! *
•انت يابنى !!!!
-ايوا... ايوا يا باشا لامؤاخذة..
-مؤاخذة ايه يابنى !!! م الصبح بكلمك.. خلصنى.. هتشرب شاى ولا سحلب خلينى امشّى الراجل ؟!!!
-قهوة يا باشا... قهوة.
*معرفش منغير اسماعيل كنت هبقى عامل ازاى دلوقتى !! الحمدلله! لازمله قعدة الموضوع ده !لازم يتحل *
-متشكر يا حسام باشا..سلامه عليكم..
•و قهوتك يابنى ؟! دنا بعت ّالواد يشتريلك مخصوص..
-الف شكر يا حسام باشا ، نشربها ف بيتي لما تشرفنى بقى ، معلش افتكرت موضوع مهم.
•طيب خد الكارت بتاعى عشان ميبقالكش حجه..
لو كلمتك و قلتلك تجيلي القسم ف مرة و مجتش خلال تلت ساعة هأمر فرقة بضبط و احضار.. سامعنى..
-تمام يا باشا خلاص بقى هاهاها..
•بص يا سعيد ، الكلام دا هقولة مرة واحدة بس و مش هكررة
انا جزار المديرية اه ، بس مش غبى ، و افهمها و هى طايرة ، و العيل اللبش بقراه ، و انت شكلك ابن ناس ، م الاخر كدة ، لو عوزت مساعدة ، هتلاقيها
و لو عايز نصيحتى..
امشى بمبدأ لو ليك عند الكلب حاجة قله يا سيدي..
الراجل دا مش سهل و كونه صابر عليك يبقى عايز يزاولك.. خلى بالك .
-........ لأ ، مش هقله "يا سيدي" .
حضرتك شاب ف سنى ومعرفش اذا كنت تعرف يعنى ايه تحس ان حد بيلوى دراعك و انت مش قادر تعمل حاجة..
بس قريب هحتاج مساعدة حضرتك عشان اثبت براءتى ، بعد اذنك طبعا...سلام يا باشا.
*★*★*★*★*★**
أنت تقرأ
قهوة بنكهة الفراولة
Roman d'amour#4 IN SOCIAL 9/18/2018 #5 IN NEW STORY 3/8/2018 #6 IN SOCIAL 8/11/2018 ميكس زى الدنيا ، حلو و مر زى الطبخة اللى لو ملحها زاد متتاكلش ، و لو قل .. هتتاكل بس ملهاش طعم ! -هل كل اللى بنتمناه هو فعلا احسن...
