قهوة بنكهة الفراولة

دماغى و ماما

- تررررررررررن
-Snooze 10 mins.
- ترررررررن
-ما قلنا snooze بقى !!!!!!
يا فتّاح يا عليم عل صبح !! هفففف.. يالا .. ابتدينا اليوم !
- كالعادة ، خناقة كل يوم مع المنبة ، و المشادة الكلامية اللى بتنتهى دايما لصالح المنبة اللحوح.
-انا سعيد ، واد جان ، طول ايه و عرض ايه ، هيبة ... مش اوى يعنى.. بصراحة انا متوسط .. كنت بلعب رياضة زمان ايام تدريبات الاكاديمية البحرية بس بطلت بقالى 7 سنين اهوه...و دلوقتى بالعب ف الرمل و التراب مع العمال زى القطط..
-I just don't know ...
مش عارف امتى هلاقى الواحدة اللى تستحق تكون جنبى ، اللى احس انها تستاهل تشيل اسمى ...
-انا كلّى مميزات..مهندس ناجح و انا لسه ف العشرينات..دفعتى كلهم ع القهاوى و انا بسعى و عندى طموح..
ذكى ، امور ، لمّاح و عارف مفاتيح البنات..
قوى و حمش و نزيه ..اوى.
و ابن ناس، مش بفلوس ابويا ، لأ .. لكن بأخلاقى الشيك و الجنتلة اللى انا فيها من لبسى و اسلوبى مع الكل و بالذات الهوانم الحلوين.. و فككوا من لبس الشغل ..دا لبس المرمطة.
-مميزاتى هى لعنتى..عقلى مش قادر يستوعب انى اكون مع واحدة اقل منى فى اللياقة او التفرد ف الشخصية.. مفيش ولا واحدة تملى العين .. كلهم شبة بعض.. ميتين ع الجواز !
يموووتوا و يصاحبوا .. و يحبوا... و ينجرحوا.. !!!
مش ذوقى ولا اتجاهى خالص !!! انا ذوقى ارقى من كده بكتير..

- سارة ، كناية عن فتاة احلامى.. هااااااح هى الوحيدة اللى تستاهلنى..
جمال ايه و خفة ايه، طولها ، عينيها ، خدودها و عظم وشها المتحدد،الدلع ..
وسطها الرفيع ، صوتها الهادى، شيك .
ضوافرها !! شعرها القصير الارستقراطى.. جلدها الشفاف المتوج بالحسنات .. زى السما اللى بشوفها فيها كل ليلة..
- موضوع سارة دة ، مدايق ماما اوى ، و ياما خلانى اسيب البيت بالاسبوع اثناء الدراسة و اسافر لفادى صاحبى ف اسكندرية.. للأسف معادش بينا كلام زى زمان و اخدتنا الدنيا عن بعض..واد جدع.

-و من ضمن اسباب انى برفض اى شغل تبع المنصورة.
عشان منبقاش ف وش بعض طول اليوم انا و هى..
حتى اخر خناقة بينا ع التليفون فاكرها بالظبط.. يوميها قفلت السكة ف وشى !!
--------
-انا عارف انى بتوهم ، قولوا اللى تقولوه ، بس غير كدة مش هقبل ..حتى لو وصلت انى متجوزش لحد ما الاقى بنت بالمواصفات دى يا ماما

-يابنى حرام عليك نشفت ريقنا ! نجبلك واحدة زى دى منين ؟ الكمال لله وحده يا سي سعيد به !! لا انت كامل ولا هتلاقى واحدة كاملة !!

-نفس الكلام السلبى ، اسمعى يا ماما ، و رحمة بابا منا متجوز اى بنت من اللى بتجبيهوملى دول و هتجوز اللى عل كيفى و مش مشكلتى انكم ربتونى على كدة!!!!! انا احسن واحد.. انا مفيش زيي ..مش دا كان كلامكم.. و رفعت راسكو و بقيت مهندس و اى اهل يتمنونى ..

- مالها بسنت طيب ؟! عيبها ايه ؟! بنت زى الفل..!!! ادب و اخلاق و اهلها يشرفوا و دكتورة!!!

- دكتورة البهايم يا ماما ! اللى بتقرقض ضوافرها !! مش هيحصل.. انتى فاكرانى سوسن هتجوزينى على كيفك !!!! انا راجل و دا قرارى و حياتى انا.

-طب اسمع ، م الاخر كده ، انا عارفة تربيتي يابنى ..بس معرفش جنانك ممكن يوديك لفين .. انت دماغك جزمة و انا جزمتين.. مش هتتجوز البنت اللى على مزاجك الا لما تدخل بسلامتها مزاجى الاول .. و هنشوف كلام مين اللى هيمشى يا..ياا قليل الادب.
** تيت تيت تيت **
----------
عينة من خناقاتى الازلية انا و ماما..عادى
مش عارف تعبا نفسها معايا ليه.. اللى فى دماغى هعمله ، حتى و لو من وراها..
قال على رأس المثل " الفرصة بنت حلوة راكبة عجلة ببدال" .. و انا لو شفت بن..فرصة مش هسيبها.

*****★*****★*****