مقتل في غرفة سرية

* الفصل السابع عشر *

فاق مراد بعد ساعات لقى نفسه في المستشفي و لسه بيبص جنبه .. لقي سراج قاعد جنبه و بيتكلم في الموبايل ....
سراج:اهو فاق الحمدلله.. خدى كلميه .. مد ايده لمراد بالموبايل و هو بيكلمه .. تيليفون عشانك يا مراد
مراد بأستغراب:مين .. مين عايز يكلمنى ؟
سراج بابتسامه:مراتك
قام مراد بفزع و فرحه:تالييين ؟؟
سراج:ايوة تالين
مسك مراد الموبايل بسرعه و بدأ يتكلم بلهفه و صوته مليان رعشه و وجع ....
مراد:تالين .. وحشتينى يا تالين
تالين بعياط:انت كمان وحشتنى اوى يا مراد اوووى .. قلبي واجعنى في بعادك عنى اووى .. وحشتنى يا حبيبي
مراد:انتى كمان وحشتينى اكتر .. انتى كويسه يا تالين ؟
تالين:لا يا مراد مش كويسه .. من يوم ما غيبت عنى و انا مش كويسه .. كنت هموت و اطمن عليك و اسمع صوتك و اشوفك .. كنت عايشه منظر بس يا مراد .. كل حاجه جوايا كانت ماتت ، لكن دلوقتى حيت .. صوتك خلانى اعيش تانى يا مراد .. روحى كانت رايحه منى و ردت ليا تانى
مراد:متزعليش منى انا اسف .. ما كنش قصدى اخليكى كده ابداا
تالين:اوعى تتأسف تانى او تقول الكلام ده تانى .. وجودك في الدنيا عندى كفايه .. حمدالله على سلامتك يا احلى راجل في الدنيا يا احلى زوج و احلى اب يا حبيبي
مراد:الله يسلمك .. الله يسلمك يا تالين .. ما تبعديش عنى يا حبيبتى .. بلاش تسيبينى انا محتاجلك
تالين:انا اموت ولا اسيبك .. شد انت حيلك بس و ارجعلى و انا هخبيك من العالم كله في مكانك .. في قلبي اللى مستنيك و عايش على ذكراك يا مراد
مراد و بيعيط:انا تعبان اوى ، انا مش عارف انا مين .. انا حاسس انى تايهه .. انا محتاجلك ، هبقي كويس و انتى معايا و جنبي
تالين و دموعها بتزيد:و انا مش هسيبك ابدا .. انا بحبك يا مراد بحبك اووى و الله
مراد:انا كمان بحبك اوى و مش عايز من الدنيا غيرك
تالين:مراد
مراد:نعم ؟
تالين:اوعى يا مراد تقول انك قتلت تانى .. اوعى تفتح موضوع انك قتلت ماجده ده .. بلاش تضيع نفسك .. عشان خاطرى يا مراد اوعى تقول الكلام ده تانى .. لو بتحبنى انساه .. لو قولت الكلام ده تانى هيعدموك .. لو بتحبنى ما تقولش كده ما تسيبنيش يا مراد
مراد بكسره:حاضر
تالين:مراد انا و بنتك محتاجينلك و مش هنعرف نعيش من غيرك .. خاف علينا لو بتحبنا .. خلى بالك على نفسك عشان ترجع لنا .. خاف عليك عشان احنا من غيرك ولا اى حاجه .. حط مراتك و بنتك قدام عينيك يا حبيبي
مراد:حاضر يا تالين .. خلاص مش هقول الكلام ده تانى .. وعد مش هفتح الموضوع ده خالص .. و هخلى بالى من نفسي عشانك انتى
تالين:يارب ما تنساش كلامى ابدا يا مراد
مراد:ما اقدرش انسي اى كلمه منك ... ( سكت مراد ثواني و اتكلم بأنتباه ) .. تالين
تالين:نعم ؟؟
مراد:انتى قولتى ايه !!
تالين:قولت ايه في ايه ؟
مراد:انتى قولتى بنتك !
تالين:ايوة
مراد:بنتى ايه ؟ انا عندى بنت !
تالين:ايوة يا مراد عندك بنت عندها ٣ سنين
مراد بفرحه و استغراب:بجججد يا تالين ؟؟!
تالين:اها و الله بجد
مراد:امتى طيب ؟ ازاى ؟؟
تالين:بعد دخولك المستشفى بشهر اكتشفت انى حامل .. كان نفسي اجرى عليك و اقولك انت اول واحد و اترمى في حضنك و اقولك ان حلمنا اتحقق و هيبقي في بنا حاجه تربطنا للأبد .. بس للأسف مالقيتكش ولا عرفت اوصلك .. بس كل اللى قدرت اعمله انى احافظ على نفسي على قد ما اقدر عشان ما اخسرهاش و ما تروحش منى زى ما انت روحت منى ..كان لازم احافظ عليها عشان تجيلى بالسلامه و تفضل جنبي و تعوضنى غيابك و تفكرنى بيك
مراد بدموع:حلوة يا تالين ؟
تالين:احلى مما تتصور
مراد:اوصفيهالى
تالين:بيضه اوى و عنيها زيتى و قلبوظه و شعرها بنى و تقيل
مراد:دى شبهك يا تيلاااا
ابتسمت تالين و كملت:عندها غمازات و رموشها تقيله اوى زي رموشك و حواجبها تقيله بردو زى حواجبك .. و شقيه اوى يا مراد و لمضه اوى
مراد:هى دى اللى حلمت بيها .. نسخه منك يا تالين
تالين:لما ببصلها بشوفها شبهك انت
مراد بحزن:كان نفسي اكون معاكوا
تالين:هتكون معانا .. لسه العمر طويل
مراد:يااارب .. سمتيها ايه ؟
تالين:ترانيم زى ما كنا متافقين
مراد:بجد يا تالين ؟!
تالين:طبعا بجد
مراد:انا بحبك اوى
تالين:ما تسيبنيش يا مراد اوعى تبعد عنى ابدا
مراد:ما تبعديش انتى عنى
تالين:استحاله ابعد
مراد:عايز اسمع صوتها
تالين:هى مين ؟ قصدك ترانيم ؟؟
مراد:ايوة .. ياريت تخليني اسمعه يا تالين
تالين:من عنيا ... ترانيييم يا ترانيم
ترانيم جايه من الاوضه بتجرى شبه البطريق كده 😂😂 ...
ترانيم:نحم ماامى
تالين:عايزة تكلمى بابي ؟
ترانيم و حطت اديها على بوقها:هيييييه هو كييه من السفررر
تالين بحزن:هههههه لا ما جاش بس بيكلمنى في الموبايل .. تعالى كلميه
ترانيم:هيييييه هيييييه هكلم بااابببيي
تالين:ههههه تعالى امسكي و قولى الو
ترانيم:اااالوووو
اول ما مراد سمع صوتها اخد نفس طويل و حس بروحه ردت ليه و احساس غريب خبط في قلبه ....
مراد:الو .. ايوة يا حبيبة بابا
ترانيم:بابي حشتنى
مراد:انتى كمان وحشتيني يا قرده .. صوتك حلوو اووى
ترانيم بتلقائيه:هههههه هتيكى امتا بابي
مراد:هاجى قريب اووى .. ما تقلقيش قربت اجى خلاص
ترانيم:ككككد ؟
مراد:جد الجد كمان .. عامله ايه بقي
ترانيم:كييسه
خلصت المكالمه بينهم هما التلاته و سراج مشي .. مراد حاسس أحساس غريب .. و كأنه خف ، كأنه كان ميت و عاش من تانى .. حس بأمل غريب بيخبط على قلبه .. نام لوحده من غير ما ياخد مهدأ و من غير ما يخطرف ولا يصرخ .. تالين كمان حست الدنيا بدأت تضحك تانى .. فرحتها كانت كبيره اووى .. اخيراً سمعت صوت مراد تانى .. اخيراً فاق بعد كل السنين دى .. اخيراً الأمل رجع من تانى و رجوع مراد بقى احتمال اكيد .. حتى ترانيم البنت الصغيره .. كانت فرحانه و احساسها غريب و جميل ، زى احساس ما تكون ضايعه من مامتها و فجأه لقيتها و اخدتها في حضنها ...
كلهم مبسوطين حتى سراج روح بيته و كان مبسوط لما حس ان تالين بقيت مبسوطه .. من جواه مخنوق و بيتعذب بس في نفس الوقت مبسوط انها مبسوطه ...
ناموا كلهم ...
( روايات بسوم )
و تانى يوم الصبح صحى سراج و بعد ما فطر اتصل بتالين ....
تالين:الو
سراج:صباح النور يا تيلا
تالين:صباح الفل .. عامل ايه يا سراج
سراج:تمام الحمدلله .. انتى ايه اخبارك ؟
تالين:الحمدلله
سراج:انا متصل بيكى بقى عايز افهم كل حاجه بالتفصيل الممل .. و هربتى ليه و ازاى و حصل ايه .. و وعد منى ليكى هساعدك انتى و مراد مهما حصل
تالين:بجد يا سراج ؟
سراج:ده وعد
تالين:تمام .. انا هحكيلك على كل حاجه
سراج:و انا سامعك
تالين:انا كانت نفسيتي تعبانه اووى بسبب اهلى .. و بسبب الدراسه و بسبب ان ام مراد مش موافقه انه يتقدملى تانى .. و ظروف كتير اووى كانت فوق دماغى .. و كانت ليا صاحبه اعرفها على الفيس من المنصورة .. اتكلمت معاها كتير في موضوع انى عايزة اهرب و هى كانت بتحاول تعقلني .. لحد ما في يوم كان خلاص فاض بيا و قررت انى مش هقعد في البيت اكتر من كده .. كلمت صاحبتى دى و بردو حاولت تخليني ارجع عن اللى في دماغى .. قولتلها لو مش هتساعديني انا هتصرف لانى في كل الحالات هربانه .. كده كده ههرب .. و لأنها بتخاف عليا خافت اهرب بجد او اضيع لوحدى فوافقت انها تساعدنى .. طبعا انا كلمت مراد و قولتله .. زعقلى و هزقنى ، حلفتله انه لو ما ساعدنيش ههرب و لو ما اتجوزنيش بردو ههرب و لوحدى و مش هيعرف عنى حاجه تانى مهما حصل .. خاصمني يوم كامل عشان اعقل بس انا ما عقلتش و بقيت بعاند اكتر ، و بعتله رساله تهديد بقوله فيها انى مشيت و خلاص مش هيعرف عنى حاجه .. اول ما شافها كلمنى على طول و كان هيتجنن .. عرفته انى لسه ما نفذتش كلامى ، بس حلفتله انى هنفذه برضاه او غصب عنه .. بوجوده او من غير وجوده .. لحد ما اقتنع لان ما بقاش قدامه حل تانى .. حكيتله على بيري صاحبتي و انها هتساعدنا .. و بعدها قالى على خطه نعملها عشان كل حاجه تمشي تمام
سراج:هاا .. خطه ايه ؟؟
تالين:....
( روايات بسوم )
***********************************
في مكان تانى .....
تميم قاعد بيتكلم مع سامر في الموبايل ....
تميم:ياريتك ما رجعت المنصورة تانى و فضلت معايا في اسكندريه
سامر:اشمعنا يعني ؟؟
تميم:من يومين كده اتفتحت قضيه الشاب اللى اسمه ماجد مؤنس ده اللى انا و انت كنا شغالين فيها
سامر:بجد ؟؟ اتفحت ليه ؟ وصلته لحاجه !
تميم:لا ما وصلناش بس في امل اننا نوصل
سامر:ازاى ؟ حصل ايه ؟؟
تميم:في واحد من صحاب الشاب ده كان عنده حاله نفسيه و بقاله اربع سنين في المستشفى
سامر:و بعدين
تميم:الشاب ده فاق من يومين بعد ما كان بقاله اربع سنين في غيبوبه .. و لما فاق بيقول انه هو اللى قتل ماجد و خباه في المخزن بتاع المحل بتاعه
سامر:اااااووووووه
تميم:بس لما روحنا المحل ده و فتشنا المخزن ما لقيناش حاجه ، حتى تقارير المعمل الجنائي طلعت نتايجها سلبيه
سامر:امممممممم
تميم: تقارير حالته بتقول انه عنده بارافرينيا و بيهلوس
سامر:ايه اللخبطه دي بقى ؟! طب هو ليه هيقول كده اصلا و ايه اللى هيخلى عقله يوصله انه يفكر كده مادام ده ما حصلش بجد
تميم:مش عارف
سامر:بص انا عايز اعرف حالته بالظبط و اعرف كل اللى حصل بالتفصيل الممل
تميم:حاااضر .. اسمع ..... حكى تميم لسامر كل حاجه
سامر:انت مش ملاحظ حاجه
تميم:ايه ؟
سامر:احنا لو مشينا مع طرف الخيط اللى فاكه الشاب اللى اسمه مراد ده مش بس هنوصل لماجد احنا كمان هنوصل للبنت التانيه اللى كانت مختفيه معاه .. مش فاكر اسمها ايه
تميم:تالين .. اسمها تالين انا فاكر
سامر:ايوووة صح تالين .. احنا بقى لو ركزنا شويه في اللى بدأ يظهر دة و مشينا وراه هنوصل لماجد و لتالين كمان
تميم:تفتكر في صله بينهم ؟
سامر:ما اقدرش اقول اكيد ، و بردو ما اقدرش اقول افتكر .. احنا نمشي ورا اول دليل ، و الطرف ده هيفك لنا بكره الخيط كلهااا
تميم:انا بقول كده بردو .. سيبنى بس كده يومين اظبط افكارى و اشوف اللى اسمه مراد ده هيعمل حاجه تاني ولا لا .. و اتابع حالته كده من بعيد ، و بعد كده اقولك و افهمك هنعمل ايه
سامر:تمام اوووى و انا مستني
تميم:تمااام
( روايات بسوم )
**************************************
نرجع تانى .....
سراج:هاا .. خطه ايه ؟؟
تالين:....
( روايات بسوم )
...........................فلاش باك...........................
تالين بتكلم مراد في الموبايل .....
تالين:اخلص قوول الخطه مش هفضل اتحايل عليك
مراد:فين اتحايلتى ده .. هقول اهوو
تالين:هااااا اتفضل انجججزززز
مراد:افهمى بقى .. انا نازل اجازة كمان يومين .. في اليومين دول هتفهمى بيرى كل اللى هقولهولك و انا هفهم رامى
تالين:رامى !
مراد:ايوة رامى .. لان رامى من المنصورة زى بيري و انا ما حدش اقربلى من رامى يقدر يساعدنى و يحافظ عليكي في غيابي
تالين:امممم تمام .. ايه بقى اللى هنعمله ؟ فهمنى بالتفصيل
مراد:بصي بقي .. انا اجازتى دى ٩ ايام مش ٧ زى كل مرة .. اول يوم هرجع البيت عادى جدا تانى يوم الساعه ٥ الفجر هعدى من تحت البلكونه بتاعتك .. هتكونى محضرالى كل هدومك اللى هتحتاجيها لما تمشي و تحطيهالى في كيس كبير او شنطه على حسب اللى عندك
تالين:تمام و بعدين ؟
مراد:انا كمان هكون محضر كل هدومى اللى هحتاجها .. هاخد هدومك دي و هدومى و هديهم لرامى
تالين:هتديهم لرامي ازاى ؟
مراد:رامى كان قايلى انه نازل اسكندريه يوم الاحد يخلص ورق تبع شغله من هنا .. و هيركب من اسكندريه يوم الاتنين الساعه ٧ الصبح عشان يرجع المنصورة .. يوم الاحد ده اليوم اللى انا هنزل اجازتى فيه و يوم الاتنين اللى انا هعدى عليكي فيه الساعه ٥ الفجر .. هاخد الهدوم بتاعتنا و هكون فهمت رامى و هقابله قبل ما يسافر و هديلوا هدومنا عشان يوديها على المنصورة معاه
تالين:تمام اوووى و بعدين ؟؟
مراد:يوم التلات في ماتش مصر .. الماتش ده مهم جدا و هتكون البلد كلها مستنياه و متجمعه عشانه و انا هحضر الماتش ده ، في استاد برج العرب مع اخواتى و اصحابي و ناس قرايبي
تالين:تمام .. كمل
مراد:اليوم ده هتصحى من النوم بتموووتى
تالين:نعممم ؟؟!!!
مراد:اول ما يبتدى الماتش .. هتبقى مش قادرة تستحملى التعب و لازم باباكى ينزل بيكي المستشفى باى طريقه
تالين:امثل يعني ؟
مراد:بالظبط .. هتنزلوا المستشفى و تكون بعيده شويه .. اتصرفي لازم تكون بعيده .. و عقبال ما توصلوا و تكشفوا و تمشوا هيكون الماتش خلص .. و في حاله كسبنا او خصرنا الشوارع هتكون مليانه ناس ، و باذن الله هنكسب و الاحتفلات هتملى الدنيا عشان تسلك لنا
تالين:ياارب .. طب و بعدين اعمل ايه تانى ؟
مراد:اول ما تلاقي الناس بدأت تزيد .. قولى لباباكى عطشانه جعانه عايزة مناديل .. اى حااااجه المهم ينزل من العربيه باى طريقه .. و اول ما ينزل و تتأكدى انه دخل المحل .. تنزلى من العربيه فوراااا و تختفى بين الناس باى طريقه
تالين:و بعد كده ؟
مراد:انتى لما تنزليلي هدومك ، هحطلك فلوس تاخديها عشان تبقى معاكى و تعرفي تتحركى .. فاهمه ؟
تالين:امممم فاهمه .. كمل
مراد:بعد ما تنزلى و تختفى بين الناس ، هتركبي بسرعه اى حاجه تروحى بيها الموقف ، و من هناك تركبي اى حاجه طالعه المنصورة .. و قبلها تكونى متفقه مع بيري تستناكى في موقف المنصورة تاخدك و تخليكى عندها لحد ما انا اجى .. بس تكونى مكلماها من سنترال ما تتغابيش و تكلميها من رقمك او من الاكونت بتاعك
تالين:تمام .. و انت هتيجى امتى ؟
مراد:بعد الماتش .. بصي قبل ما الماتش يخلص بساعه هكلمك أاكد عليكي و تردى عليا على انى ليان صاحبتك او اى حد و بعد ما اقفل معاكى هكسر الخط دة  ، هو كده كده ما حدش بيكلمنى عليه غيرك و انتى اول ما تنزلى من العربيه تكسرى الخط خاالص و ترميه .. و بكده يبقى مفيش دليل حد يوصل بيه ليكي و كل الشهود هيقولوا انى كنت في الماتش وقتها يعني انتى مش معايا
تالين:تمام بس البوليس لو عمل تحريات عن رقمى هيعرف انى كنت بكلمك انت قبل ما اهرب
مراد:لا مش هيعرفوا
تالين:ازاى بقى ؟!
مراد:لأن الخط ده مش متسجل انا جايبه من غير بطاقه
تالين:يعني مجهول او بأسم حد تانى ؟
مراد:بالظبط .. سيبيني بقى اكمل الخطه
تالين:كمل سمعاك
مراد:اول ما هطلع من الماتش هجيب خط جديد بأسم اى حد من صحابي او قرايبي بحجه انى مسجل ٣ ارقام بالبطاقه بتاعتى و ما ينفعش اسجل واحد تانى بيها
تالين:و هتقول لهم بتجيب خط رابع ليه ؟
مراد:خط واحد في موبايلى و الخطين التانين كانوا في جيبي و وقعوا وسط الناس يا تيلا و انا مش بعرف امشي بخط واحد .. شغلى دماغك يا حبيبتى
تالين:اهااا صح .. تمااام اووى
مراد:انا اول ما اجيب الخط هفتح الاكونت التانى بتاعى المجهول و هبعتلك الرقم الجديد على الاكونت بتاعك الجديد اللى هعملهولك اول ما انزل ، و اكتبلك الاميل و الباسورد في الورقه اللى هلفلك فيها الفلوس
تالين:امممم و بعديين يا دماااغ
مراد:اول ما توصلى عند بيرى خليها تجيبلك خط و تسجله باسم جوزها او اخوها او اى حد مجهول ملهوش علاقه بينا .. فاهمه ؟
تالين:فاهمه و بعدين ؟
مراد:بعد ما تجيبي الرقم تفتحى الاكونت و تاخدى الرقم اللى بعتهولك و تكلميني عليه من رقمك الجديد .. و تتابعينى منه لحد ما انا انزل المنصورة بليل
تالين:هتنزل الساعه كام ؟؟
مراد:هكون عندك على ١٢ او ١ بليل
تالين:تمام اوى
مراد:اول ما اجى هاخدك و نروح المكان اللى هيكون رامى شافهولنا عشان نقعد فيه .. بس الاول فيه حاجه
تالين:ايه ؟؟
مراد:من الفلوس اللى هتبقى معاكى .. اول ما توصلى بيت بيري تبعتيها تجيبلك هدوم منقبين و ما تنزليش الشارع من غير النقاب .. فاهمه ولا لا ؟
تالين:فاهمه حاضر .. بس ليه ؟
مراد:انتى غبيييه ! يا بنتى يوم بالكتير و اهلك هينزلوا صورتك في الجرايد و على النت و كل الناس هيبقوا بيبصوا عليكى
تالين:يعني ممكن يبلغوا عنى و ارجع تانى ؟
مراد:مش محتاجه سؤال يعني .. تالين نفذي كلامى من غير نقاش و ما تعمليش حاجه من دماغك عشان ما نروحش في داهيه .. نفذي كلامى و بس
تالين:حااضر حاااضر .. هنفذ كلامك .. بس سؤال يعني
مراد:هااا ؟؟
تالين:هو احنا كده ما حدش هيعرف مكانا اكيد ؟
مراد:اكيد طبعا .. خطك و اترمى و خطي اللى كنت بكلمك منه مجهول و مالهوش اى علاقه بيا .. انتى في المنصورة و اخر وقت خطك اترمى فيه هيكون في اسكندريه .. اخر رقم كلمتيه اتقفل في برج العرب .. الخطوط اللى هنتكلم منها بعد كده هتكون بأسماء ناس تانيه مالهومش اى علاقه بينا و لا عليهم اي شبها .. وشك و هتداريه و هتلبسي نقاب .. الأميل بتاعك و هيتقفل و بتتكلمى من أميل مجهول الهويه أو باسم شخص تانى .. مكانا هيتعرف ازاى بقى !
تالين:لا مش هيتعرف صح .. كده تمام
مراد:تمام .. اول ما اجيلك بقى هنروح المكان اللى هنقعد فيه و تانى يوم هنتجوز
تالين:ازاى بقى ؟
مراد:عرفي
تالين:نعم !!!
مراد:انتى قاصر يا حبيبتي .. عندك حل تانى ؟
تالين:اممممم لا
مراد:يبقى تخرصي بقى و سيبينا نخطط للمصيبه اللى هنعملها
تالين:هههههه حاضر
مراد:كده الخطه خلصت و هتجوزك ، و هنزل اسكندريه قبل ما أرجع الجيش بيوم الصبح
تالين:اشمعنا ؟
مراد:لان الجيش بتاعى في اسكندريه و لازم اكون موجود فيها قبل ميعاد رجوعى
تالين:اممممم تمام .. و هتكلمنى ع طول ؟
مراد:اكيد و كل أجازة هنزلها تانى يوم هاجيلك و همشي قبل ما ارجع بيوم
تالين بحزن:و هقعد لوحدى كل ده !
مراد:رامى و بيري معاكى يا تيلا .. استحملى بقى معلش عشان خاطرى
تالين:حاضر يا حبيبي
مراد:كده الخطه تمام .. فاضل على التنفيذ
تالين:اعتبره حصصصل يا ريس
مراد:هههههههه ايوة كده يا معلم
( روايات بسوم )
......................................................
سراج:يا ولاد اللذييينه .. دى خطه ما تجيش في خيال ظابط ولا محامى ولا حتى سفاح
تالين:هههههههههه
سراج:نفذتوها فعلا زى ما هى كده ؟
تالين:بالحرف الواااحد
سراج:و باباكى وداكى المستشفى و نزل لما قولتيله جعانه ، نزل من العربيه و كل ده حصل ؟؟!
تالين:ايوة ودانى المستشفى ، بس ما قولتلهوش جعانه ولا عطشانه ولا اى حاجه
سراج:اومال ايه ؟؟!
تالين:سبحان الله من نفسه لسه هقوله ، لقيته بيقولى هنزل اجيب سجاير و اجى .. حسيتها جت من عند ربنا
سراج:ههههههههه ايه الصدف الحلوة دى
تالين:حظوووظ يا ابنى
سراج:هههههه فعلا .. طب و قعدتوا فين بقى ؟؟
تالين:والد رامى كان بانى لرامى بيت دورين بتاعه .. لانه الولد الوحيد على بنت واحده بردو
سراج:تمام و بعدين بقى ؟
تالين:رامى كان بيجهز الدور الاول عشان هيتجوز فيه لانه كان خاطب وقتها ، و الدور التانى كان فاضي فسابه لمراد عشان انا و هو نقعد فيه
سراج:امممم غريبه .. طب والد رامى ده ما اتكلمش في حاجه ؟ او ما اضايقش مثلا !!
تالين:لا والد رامى في الوقت ده كان مات بقاله شهر
سراج:حلوو اووى .. ده كده سهل عليكوا الموضوع خالص
تالين:جدااااا ، و خصوصا ان ام رامى ست كبيره و طيبه و في حالها و مالهاش في المشاكل ، و اخته بردو مالهاش دعوة بحد
سراج:جميل كده .. بس ماحدش بقى من اهل البلد او من الجيران اتكلم عنكوا او سأل مين دول ، او حتى واحده ست مثلا حاولت تخليكي توريها وشك ولا حاجه ؟
تالين:بص الناس هناك حشارين جدا فعلا .. بس ما كانوش يقدروا يقربوا نحيتنا لسببين .. اول واحد اننا قاعدين في بيت رامى ابن الحج عز الدين اللى البلد كلها بتعمله الف حساب حى او ميت و ما يقدروش يقربوا ناحية حد يخصوا .. تانى سبب انى ما كنتش بنزل اصلا و وقت لما انزل ما بكلمش حد و دبش اووى مع اى حد يكلمنى
سراج:عشان كده ماحدش عرف يوصل لكوا .. الخطه كانت محكمه اوووى
تالين:فعلا .. بس للأسف انا ما قضيتش مع مراد الا يوم جوازنا و كام يوم كمان .. و اول ما رجع و راح الجيش ما عرفتش عنه حاجه بعدها ، و بعد كده عرفت انه تعب و دخل المستشفى
سراج:ازاى احكيلى
تالين:قعد شهر الجيش كله ما بيكلمنيش .. ما كلمنيش الا اول يوم بس و بعد كده بقى موبايله غير متاح ،  سكت و خبيت جوايا و قولت اكيد في حاجه او مشغول ، و ما رضيتش اتكلم ولا رضيت اقول لرامى حاجه .. استنيت كتير بس بردو ما كلمنيش ، بدأت اشك انه سبنى و خيلى بيا بس بردو صبرت .. وقت أجازته جه و ما جاليش بردو .. كنت هموت من القلق ، لحد اليوم اللى كان اخر يوم في اجازته المفروض .. كنت عند بيري اليوم ده و اغمى عليا
سراج:و اكتشفتى انك حامل .. صح ؟؟
تالين:ايوة صح ، و كنت فرحانه و خايفه في نفس الوقت .. حاولت تانى اكلمه كتير بس مفيش امل و عدا اسبوع على نفس الحال و في يوم ....
( روايات بسوم )
............................فلاش باك..........................
تالين قاعده تعيط و بتتكلم في الموبايل .....
تالين:الو ....

#بسمه_ممدوح