من كتابات زهراء العراقية
اليوم قصتنا مختلفة أكثر القصص الواقعية الي دا تتنشر محزنة وتتحدث عن واقع مؤلم لكن قصة اليوم مختلفة بعض الشي.. (ملاحظة تم تغير الاسماء بناء على طلب صاحبة القصة )
اسمي زينب من محافظة النجف الاشرف عمري 25 عام غير متزوجة خريجة إدارة أعمال ...طبعا بعد التخرج كعدت وسكتت بالبيت وطويت الشهادة اني الوحيدة لأهلي من بين ثلاث أخوة الكبير أسمة حسام وعلي واني والاخ الثالث أصغر مني ب 5 سنوات .. طبعا حالتنا المادية متوسطة أبويه موظف حكومي وامي ربت بيت واني كولش محبوبة من قبل اهلي لأن بتهم الوحيدة طبعا اني ربت بيت ممتازة الان أمي مريضه واني أستلمت البيت حتى أريحة و المستشارة الخاصه لجميع اخوتي ومرات حتى أبويه .. شخصيتي عندي حضور قوي ورأي الكل يحترمة البيت من أعاد تجديدة بابا امي انطتني التصريح بتأثيثة على ذؤقي كل زاوية بالبيت بيه لمس من اديناتي والكل يشهد بندارتي طبعا اهواي يتقدمون الي وبابا يرفض ما يرضى يزوجني لناس ما نعرف عنهم شي بس سؤال يكول اكيد جيرانهم راح تمدحهم الناس ماتعرفهم الا تعاشرهم وفعلا كلامة مقنع واني هم مرتاحه بين اهلي مدللة بين اخوتي وامي وابوية لو اطلب لبن العصفور يجيبوه الي .
حياتي روتينية بشكل
من شغل البيت الى النت ومرات من اضوج اسير على بيت صديقة عمري فاطمة حب حياتي هاي البنية اهلي واهله هم تجمعهم روابط صداقة قوية لهذا عادي اسير يمه وهي هم تجي عصريات يمي ومرات ناخذ وحده من امهاتنا ونروح ندحم على تعيين لو نلطع للمجمعات ..
حياتي هادية واني بطبعي كولش هادية الى أن صار شي مو بالحسبان غير مجرى حياتي .
مرة من المرات جنت طالعة مع أمي الى عرس أحد الاقارب وابوية مفارغ يجي يرجعنه للبيت فأمي أخذت تكسي ونزلنا براس الفرع مال بيتنا واني كولش تعبانة لابسة كعب شطوله وطبعا اني البس عباية وحجاب وابد محب المكياج وخاصه اني ما حف فلهذا ماحط حتى ما يصير وجهي خارطة العراق وجان الجو حار واني دايخه وامشي صفح بهاي الاثناء دا نتقرب على بيتنا واشوف اخوية الجبير واكف يم الباب مع واحد شوصف اني عمري ما ركز على الشباب وكولش خجولة بس هذا ما كان شاب لا جان حور عين هاي اذا اكو حور عين رجال . مهما اوصف قليل بحقة يعني كلمة حلو ماتكفي ولا توفي شنو الطول شنو البياض وشنو الجمال بصراحة شكله يشبه الصور رسم الأمة عليهم السلام برسمة حواجبهم وجمال وجهم هو من هاي النوعية وجه ملائكي طبعا اني مادري اشصار بيه صرت صلفه وبس اباوع اله وهو واخوي يحجون وما منتبهين واني هم بعد بيتين الا أوصل لبيتنا وامي بطيئة بشكل بهاي الاثناء اني نزلت راسي من تقربنا منهم بس مع الأسف صار الي ما كان ع البال ويا ريت كنت انسيأ منسيا ولا صار الي صار واني اد امشي ما حس الا والكعب منكسر واختل توازني صارت حركة سريعه هي كسرة كعب هي جطلة بشارع وهي صيحة مني تدرون البنية من توكع يطلع منه صوت لا أرادي رفيع وما حس على نفسي غير اني منجطلة بألأرض وعباتي الحلوة انفتحت والبنطرون والجاكيت المجسم على جسمي كولشي طلع وامي خطيه ركضت غطتني واني من الفشلة اريد اكوم مكدر وجان اشوف الشاب هو واخي يكوم بيه اخوية واني من شفتهم شافوني مكدرت اكوم و بجيت بجي سابع جار سمعه . طبعا الولد حب يساعد ما يدري احنه أهل صديقه بس من شاف اخوية تقدم يساعدني اجه وياه من باب الرجولة واني من باب الانوثة صرت جنيي دبة ضاربين ابنه وهايجة ههههههههه اخوية كومني ودخلني لجوة شكول شوصف دخلت لغرفتي واني ميته من البجي وامي وحسام عبالهم متأذية يردون يأخذوني للطبيب مايعرفون بتهم لو دافنيه وهي حية ولا شايفني هذا الصاك منجطلة مثل دجاجة المعمل كل ما اذكر هذا الموقف انصاب بحالة لطم على حضي .. المهم بهذا اليوم اني أسببت لأخوية بألاحراج وانحرجت منه ومارويته وجهي طبعا بالليل دك عليه الباب ودخل حسام وبيده موطة سفري ونوتيلا واني واويلي عشقي هاي السوالف طبعا من شفته دنكت راسي هو حطهن بحضني وكعد يكفش بشعري بهاي الحركة كل الاخوة العراقيين يسوهه وكال يلا ولج ام اعطوب لا أتبيعين ثكل علينه مصار شي واني من ذكرني ذكرت صورة الشاب وهو واكف يمي ومتت من البجي كتله يا ماصار شي واني صاحبك شافني بنص الشارع . هذا الحجي كمت اشهك اني من نوع خجول وهو باسني وكال يلا ولج الموطة ماعت وكمت اكل الصراحة شكله مغريه اكل وابجي مثل الخبلة . وجان يجي اخويه الثاني وسولف اله حسام وخرب ضحك عليه صرت مسخره . طبعا ضليت شهر كامل ما اطلع من البيت اتعقدت وسولفت لفاطمة ماتت ضحك عليه
عدة الايام وراحت الايام . واني مرة دا أنضف بغرفتي العصريات طبعا اني بيه هوس 24وساعه انضف نزلت لجوة جانت امي رايحه من الصبح لبيت اخته المهم نزلت وجان اشوف غبار ع الاثاث واني انضف بيه حالة اغني بصوتي الشجي وطبعا اني ما أسمع غير لقيصر الغناء كظومي واني بمقطع مال غالية من وصلت للكندورة الي تفصل بين الهول (الصالة) والاستقبال(غرفة الضيوف) دا انضف المراية وحولت ع اغنية هل عندك شك صوتي يلعلع الان البيت هدوء وماكو احد واشوفلك اخوية الجبير طالع من الاستقبال وعيونة براسه وجرني لغرفة امي وكال ولج فضحتيناااااااا!!!!!!!!
كتلة ليش شكو ؟؟؟؟؟
كال ولج صديقي يمي وصوتج وصل يمنا وصرت مثل الي بحلكة موس لا اكدر اعيط بيج ولا اكدر اغلس
اني خجلت من نفسي حييييل واعتذرت وصعدت لغرفتي طبعا كمت اضحك على روحي مادري شبية من شفت ذاك الصاك بيوم الوكعه صرت وحده ثانيه ومرحه اكثر طبعا اتذكرت اخوية كولت خل انزل اشوف منو يمنا يا سعيد الحظ سمع صوتي الشجي والعكس هو الصحيح، نزلت ويااااريت ما نزلت
يتبع
