Gangnam လမ်းမကြီးပေါ် ခပ်ဖြည်းဖြည်း ရှပ်တိုက်နေသည့် ပန်းနုရောင် Sneaker တစ်ရံ။
သတိလက်လွတ် အသက်ရှူရှိုက်မိသည့် အခိုက်အတန့်၌ အာခံတွင်းထဲ ဖမ်းဆီးထားသော အခိုးအငွေ့တစ်ချို့က လေဟာနယ်ထဲ လွတ်မြောက်ပျံ့လွင့်၏။
ခါတိုင်းနှစ်တွေထက် အဆမတန် ပို ချမ်းအေးသော ဒီနှစ် ဆောင်းရာသီ။
အူတိအူကြောင် သယ်လာမိသည့် မည်းနက်နက် ဝက်ဝံရုပ်ကလေး၏ အမွှေးနုနုများသည်ပင် အအေးဒဏ် ဖြန်းပက်မှုကြောင့် စွတ်စိုစ ပြုလို့။
" L တဲ့ "
တစ်ယောက်တည်း တိုးဖွဖွ ရွတ်ကြည့်မိသည်။
" အဲ့ဒါ ဘယ်လို ထူးထူးဆန်းဆန်း နာမည်ပါလိမ့် "
ကိုယ့်အပြောနှင့် ကိုယ် ခေါင်းတခါခါ လုပ်ရင်း အခြားတစ်ဖက်အခြမ်းမှ Platform ဆီ ကူးဖို့ လမ်းမထက် ခြေချမိခိုက် အစိမ်းရောင် ပြနေသော လူကူးမီး။
ဘေးဘီတွင် တစ်စုံတစ်ဦး မရှိသော်ငြား
လမ်းမပေါ် စိတ်ဖြောင့်လက်ဖြောင့် နယ်ချဲ့မိသည့် ခြေတစ်စုံ။
ထို တစ်ခဏ။
ဟွန်းသံ မပေး ဘာမပေး အလင်းရောင်လို မြန်ဆန်သည့် ခပ်ပြင်းပြင်း အရှိန်တစ်ခုဖြင့် ဘယ်ကဘယ်လို ရောက်ချလာမှန်း မသိသော အပြာရောင် ပြိုင်ကားတစ်စင်း။
" အမေ !!!!!!!!!!!! "
မျက်လုံး စုံမှိတ်ချကာ အာခြောင်ခြစ် ဟစ်လိုက်သည့် လေသံသည် လေထုထဲ ကျယ်လောင်စွာ ပျံဝဲသွားပြီးပြီးချင်း ပြင်ဆင်မှုတစ်ခုတစ်လေ မဖန်တီးရသေးခင်မှာပဲ ကြမ်းရှရှ လမ်းမထက်၌ ပြိုလဲကာ တစ်လောကလုံး မှောင်အတိ ကျသွားခဲ့၏။
•••••
လှုပ်မရသော ညာဘက်လက်က ဆစ်ခနဲ ကိုက်သွား၏။
" အ - "
နှုတ်မှ သတိလက်လွတ် ခုန်ဆင်းလာသည့် အာမေဋိတ်တစ်ခုနှင့်အတူ မျက်ဝန်းတစ်စုံအား ပွင့်ဟရုံဆိုသလောက် အနည်းငယ် ဖွင့်ကြည့်မိသည်။
ဝေဝါးဝါး မျက်နှာကြက်။
တစ်ဖက်အခြမ်းကို မမြင်ရအောင် ကာဆီးထားသော လိုက်ကာ။
