#قصة_هوانا
اسمي شهد عمري 19 سنه.. حياتي متشبه حياه البقيه ... كلها مذله وماحصلت ابسط حق من حقوقي...
بدت مأساتي من ولادتي.. قبل ولادتي بأيام ابويه استشهد.. وماشفت ولاعرفت معنى كلمة اب.. ماشفته غير بس بصوره وحده هو وامي جانو بيها... ماعندي غير اثنين اخوات اكبر مني ... وماعندي ذكريات وياهن اله قله قليله...
امي هي الي عيشتنا ومرينه بأيام صعبه بس بيبي ام امي مجانت تعوفنا وتجيبلنا كل شي نحتاجه وجان يامحله ذاك اليوم الي تدخل بي علينا وبيدها العلاليك اشكال والوان...
طبعا من وعيت ع امي وهي حزينه ودوم تلزم صورة بابا وتبجي ومن تشوفنا تسكت ومتحجي..
واني بعمر 8 سنوات امي تمرضت ومعرفنا شنو علتها ويوم عن يوم ذبلت واتذكر بوقتها حنت بالثاني ابتدائي وكلش جانت فتره صعبه ... اروح للمدرسه مبهذله وامي متوصلني صارت لان متكدر صحيح بيبي مجانت تعوفنا بذيج الفتره بس هم جانت ملتهيه وي امي... وجنت اختل بالساحة واظل ابجي والبنات هوايه جانو يضايقوني ويضحكون عليه ...
طبعي من اني صغيره مااشكي الي بيه واظل احرك بروحي ولااحجي شي وحته الي يسألني اكول مابيه شي...
مرت ايام وامي يوم عن يوم تذبل.. بيبي عافت بيتها واجت گعدت يمنا واختي رحاب هم عافت زوجها واجت وسميه جانت مخطوبه بوقتها وخطيبها هم مجان يعوفها...
وبيوم من الايام اجيت اتمشى ع كيفي وبيه فرحه واتبسم وافكر بأمي باوعت ع محل جان قريب ع بيتنا واتمنى اجيبلها شي بس مجان عندي فلوس.. المهم كملت مشي وماانسه ذاك اليوم الاسود واني بعمر9 سنوات...
بديت اقترب من البيت وشفت اللمة والعياط رحت اركض وجنطتي بظهري دخلت وعرفت اني بعد مااكدر اشوف امي ابد...
بيبي جانت تملخ بنفسها واخواتي همين اني اباوع عليهن وازيد بجي بالزايد لان منظرهن يخوف واني بحياتي محاضره عزا..
بقيت ايام واني مااحجي من الصدمه ومن شوفة امي وهي مخليها بصندوك خشب وملتمين ويعيطون..
قلت الناس بوقتها وماعاد احد اجه لبيت امي وبيبي لمتنه بليله من الليالي وحجت وي اخواتي حجي هوايه والفهمته وقتها تنصح رحاب ترجع وي زوجها وكالت لسميه اشهر وازوجكم انتي وكاظم
وصدك رحاب وره ايام قليله راحت وي زوجهه وبقينه اني وسميه وبيبي ابيتنا خوالي هم جانو يتناوبون ويباتون يمنا... ويمكن فتره اشهر وبالليل اجه كاظم اخذ سميه وطلعت بيدها بس الجنطه وبوستني وبيبي وصت كاظم يدير باله عليها وهي مالهه احد ومن هل حجي...
ورا مراحت سميه بذيج الليله الي هي ليله عرس ع اساس... گعدت بالمطبخ ع الكاشي وبيبي ع الكرويته وماحجينه ولاشي بقت بيبي تباوع عليه وشفتها دمعت واني سويت نفسي باقيه بصفنتي ... بعدين گالت بيبي اخذج لبيتي بعد مالنه ظله هنا.. وصدك مابقينه غير بس ليله وحده بذاك البيت والصبج اجه خالي جبار الجبير ولملمنا ملابسي وطلعنا..
مشت السياره واني اباوع ع البيت من بعيد لحد مااختفى وبديت اشوف بيوت اشكال والوان ومحلات ... ودخلنا بالمنطقه الي بيها بيت بيبي وجانت منطقه راقيه والبيت كلش ضخم مال بيبي
طبعا مو اول مره اشوف بيت بيبي بس هلمره كأني اول مره اجيهم ودخلت عبالك غريبه لان بدون امي...
طبعا جدي أبو امي متوفي وبالبيت خوالي اثنينهم جبار الجبير ورحيم الاصغر منه...
خالي جبار عنده احمد وعمره بذاك الوقت الي رحتلهم بي 17 سنه واخته علا بكدي 9 سنوات وامهم الي هي كريمه جانت حامل... وخالي رحيم مجان متزوج بوقتها...
المهم بتت كم ليله يمهم واني ع نفس سكتي بس اباوع والي يسألني اجاوب غير هيج مااحجي...
علا اول مدخلت الهم جانت تباوع عليه وتخزرني عبالك راح اخذ منها شي ... واني هم ابتعدت عنها ومقربتلها ابد ... صحيح جنت اباوعلها من بعيد واكول هسه تصيحني العب وياهه بس جانت تتقصد اطلع احلى العابهه كدامي وخالي رحيم من يشوفني هيج يجيبلي حان مثل العابهه...
جانو اهلها مطيريها فوك الريح... وكل شوي تجي تبوس امها كدامي واني اتذكر امي واتمناهه يمي...
اي اتحسر ع امي واتحسد الي عنده ام.. لعد آني شنو ذنبي ماشبعت من ريحة امي...
بيبي نقلتني لمدرسه قريبه يمهم وهي جانت تودينا وتجيبنا آٌنـّ ℳέ ـّي وعلا بس كلمن بشعبه خلتنه بيبي لان تعرف بعلا متحبني ...
ورا ايام اجو عمامي الي ماجنت اعرفهم ولاشايفتهم بس عرفت من اجو وصار صياح بينهم وبين بيبي وخالي جبار...
طلعو يردون ياخذوني يمهم وبيبي انجنت مقبلت ولهسهه صوتها باذني تكله انتو كلكم عدكم ولد وهي بنيه شلون اخليها تروح يمكم!! وظلو يحجون هوايه اني جنت كاعده ع الدرج واسمع
وبعدين ايسو من شافو اصرار بيبي وراحو...
طبعا مر يمكن شهر واني بيت بيبي واكو غرف مشايفتهه ولاداخلتهه لان بيبي كل شوي تحذرني اتحرك اذا مو وياهه...
مرت ايام اكثر واجت العطله الصيفيه ومرت خالي جابت ولد وسمو هيثم وجنت دوم اكعد يم مرت خالي واباوع شلون تگمطه وشلون تلعبه وهي تكيف من اجي يمها ابقه ارتبلها الغرفه مالتهه وتبقه تتأمر عليه ... واكثر شي جانت تحب السكته الي اني بيها عكس علا الي جانت تضوج من اخوهه ومتلزمه ابد ..
مرات كريمه جانت تخلي هيثم يمي وتكمل شغلها وتجي وبعدين تنطيني شي من ثلاجتهه وافرح عبالك مطيتني جائزة نوبل...
اما احمد جان محد يوصله بغرفته ميطلع بس وقت الاكل ويرجع لغرفته وطول النهار قرايه ودراسه...
بليل جنت هوايه اخاف واتذكر ذاك المنظر شلون جانو يلطمون ويبجون واكوم ابجي فجانت بيبي تخليني بحضنها يله انام..
ويوم عن يوم تعودت وخلتلي بيبي جربايه بصفها ورتبتلي خانتين بكنتورها لكتبي وملابسي..
وهم بدت المدرسه وصارو خوالي يوصلونا وارجع مرات وحدي ومرات امشي ورا علا وصديقاتهه بدون مااحجي ولااختلط بيهن لان جانت تخليهن يصنفن عليه بس وحدة منهن جانت متضحك من يصنفن عليه... اسمها مريم وبعدين صرنا صديقات وهي عافت علا...
جنت اخذ مصروفي من بيبي هي بكيفها شكد تنطيني.. مرات تخليلي لفه من البيت لو صمونه هي جانت تسوي بلبيت...
ماجنت اصرف هوايه ع كد الحاجه ولميت يوم ع يوم لحد ما مره تفاجئت بيبي من طلعتلها 5 الالاف بذاك الوقت هوايه... هي كيفت وبوستني وكالت هيج اريدج تبيضين وجهي ...
ومرت الايام وخلصت امتحانات وبعدهه البيت دخل انذار لان احمد يمتحن وزاري وامتحانه مصيري ... الكل جان حاير شنو يسويله ويحطله والبيت كله هدوء علموده وحته من جان يروح للامتحان ابو وبيبي يرحون ويا وينتظرو لحد ميخلص...
وخلص امتحاناته وهم جان ميكعد وي احد لو يجو اصدقاءه للبيت لو هو يروحلهم... وطلعت نتيجته ودرجاته جانت كلش زينه وعرفت بعدهه انقبل هندسه وبيبي سوت عزيمه جبيره واهله وبيبي غركو بالهدايه...
اني جنت من اشوفهم فرحانين افرح ولو هو محد مشاركني فرحته بس ع واهسهم...
مرت سنوات وصرت ثالث متوسط وكملت امتحانات وطبعا حان الكل متنك من ادخل للبيت جايه من الامتحان وحسيت بيهم ميردوني اكمل وصدك بَس استلمت النتيجة ودرجاتي كلش زينه بيبي كالت كافي لتكملين شسوين بالشهاده آٌنـّ ℳέ ـّي ادللج وماتحتاحين احد واني موجوده... بالبدايه عارضت وبعدين صارت تهددني وشوفتني وجه ثاني ..وجه قاسي ونظرات تخوف من تحجي ويايه فگعدت ومكملت..
بينما علا نجحت ودرجاتهه اقل مني وطبعا جانت كله مدرسين وخصوصي ... دخلت اعداديه وجنت اباوع واتمنه اروح وياهه بس منو الي يخليني...
نسيت اكلكم خالي رحيم تزوج وزوجته كلش حبابه ومتفوت من يمي اذا متسألني محتاجه شي..
من جنا نخلص شغل اني وياهه جانت تگلي تعالي ويايه للغرفه..
وصدك تبقه تسولفلي ع اخواتهه وشلون جانن عايشات واني همين قبل لااطلع من غرفتها اعزلها وحتى مرات ملابس خالي اني اغسلهن لان جانت تتعب من الحمل... وهي تستاهل...
يوم ع يوم وتقريبا كل شغل البيت صار عليه وجنت اخلص الصبح ويه بيبي تعلمني الطبخ وصدك ماطولت اشهر وبديت اني اطبخ وطبعا تحت اشراف بيبي...
مرت خالي رحيم(تماضر) جابت بنيه ومن جابتهه بيبي دلغمت عليها ومعجبهه...
طبعا احمد تخرج بهل الفتره وحصل شغل مااعرف وين بالضبط
والصبح مجان يبقى احد بلبيت كلمن بشغله... خالي جبار جان يشتغل مقاولات ومحلات ذهب عنده همين.. وخالي رحيم هم يساعده وحته كريمه نسيت اكلكم هي معلمه وتماضر مضمده...
وبيوم رجع احمد طاير من الفرح وسلم عليه وراح ركض لبيبي...
كللها بيبي طلعتلي دراسه بالخارج بلندن ومراح افوتهه...
بيبي بجت لان جان احمد روحهه من الدنيا حته اعز من خوالي يمكن... بعدين كالتله اني عود ردت افرح بيك وازوجك تالي تكلي دراسه هو كلله بيبي يازواج اني اريد اكمل مو وقتها هسه..
وصدك كلمه منا وكلمه منا وقنعهه وجان اذا اقتنعت بيبي يعني اقتنع خالي بس تبقه امه هاي بحث ثاني...
وهم كعدو ورا العشا وحجالهم السالفه مال دراسه ابو قبل مكال شي وامه هم اول شي مقبلت وبعدين سكتت ...
ومرت ايام وبده يحضر لروحته للندن حتى يدرس ماجستير هناك وجان من فرحته شكو شغله يحيبها يراوينيها ويكلي ها شنو رأيج وسافر وبيوم سفرته صار كانه يوم عزا.. محد اكل ولاشرب وبيبي بس تبجي... ومن ضوجتها اخذتني ورحنا للمقبره وزرنا امي بوست تراب گبرها وحجيت هوايه وكتلها رجعي متحتاجتلج .... بس هيهاااات!
ووبعد اشهر بيبي جابت عمال ورممت البيت وسوته شكل ثاني وهو منا حلو جبير صار يجنن... كل هذا حته محد يكللها من ولدها اريد اطلع ... جانت تكلهم عود من اموت طشو... هسه اريدكم كدام عيني...
وطبعا بيت امي انباع وخواتي اخذن حصصهن واني حصتي يم بيبي بقت... خواتي مشفتهن غير مرات تنعد بالاصابع...
وكل وحده خلفت كومه جهال وصارن ميجن بحجه جهالهن ...
