#قصة_هوانا
@nada hs
الجزء6
6
جنت بالغرفه يم بيبي اعزل بملابسهه متعوده بين فتره وفتره...
ودخلت كريمه علينه بدون لااحم ولادستور... اول مدخلت كالت شهد اطلعي منا عندي حجي ويه الحجيه...
طلعت وبگلبي الف لجمه... بقيت كاعده ع الدرج وجان صوتهم واضح واسمع شنو تحجي... كلتله ع احمد وعليه وهي تريدله بنت خاله اساور الدكتوره لان تناسبه واني زعطوطه ومو يمه ولا ملائمه اله... آٌني خليت راسي بين ركبي وبجيت وبعد ماسمعت بيبي شنو ردت عليها بس اكيد توكف وياهه...
نزلت تماضر وشافتني ابجي وكلتلي تعالي احجيلي شبيج ولحت اله تعرف وحجيتلها وهي انقهرت عليه وكالت ياريت بيدي شي اساعدكم... المهم سكتت ورحت كملت الكرب اليومي مالتي...
ورا شويه اجتني بيبي للمطبخ... واني اشتغل هي تفتر ورايه وتهدد(اذا كعدتي يم احمد بعد اكسر رجلج.. اذا حجيتي ويا اكص لسانج.. بالج اطلعين من الغرفه وهو هنا.. جنت عايزه ضيمج اني شوكت يجي واحد ياخذج واخلص منج!)
جنت اسمعها ومستمره اشتغل ودموعي تصب!
ليش هيج حظي اسود! ولشوكت حبقه هيج نصيبي...
ظلت اليوم كله مخنوكه وع اوامر بيبي ماطلعت من الغرفه ورا مكملت الغدا ووقت العشا هنه سونه وماخلتني بيبي اكل وياهم لحد ماخلصو كلهم وهي دخلت الغرفه كالت روحي اكلي ...
كعدت بالمطبخ وعود اكل ووي كل لگمة الف غصه تنبلع...
كملت وحسيت روحي تريد تطلع طلعت تمشيت بالكراج وكعدت بالمرجوحه وجان كلمن بغرفته واني بودي اصرخ بعالي صوتي واطلع الي بداخلي... كعدت ع المرجوحه ودمعه تنزل ورا الثانيه
ومادري منين طلع احمد وشافني اجه كعد يمي ويحاول يعرف شبيه وشفته شلون جان عصبي وضايج بنفس الوقت...
-مابيه شي بَـس مشتاقه لامي..
وورا مطلعت هلحجايه مني آٌنـي انفجرت بجي هنا...
ماحسيت نفسي اله بين اديه واحمد حاضني... شكد جنت اتمنه ابجي واحد يسمع الي بداخلي...
هو حيل انقهر وحجه حجايات بحياتي مراح انساهه..
-اني امج وابوج وكل اهلج... اموت ولااشوف دمعتج...
-كلتله وبصوت مشرح من البجي...احمد اني احبك ...
-هههه ياروحي انتي واخيرا سمعتها منج..
خله اديه ولمساته الناعمه ع وجهي ومسح دموعي وبقه يسولف ويايه ويهدي بيه وصدك هديت لان هو ساحر بهيج امور...
ماطولنا برا وكلي روحي نامي ولتفكرين بشي...
ورحت عود انام بس مكدرت بقيت اتگلب لوجه الصبح...
مر اليوم الثاني بسلام وهدوء وماحجينه اني واحمد وبس نظرات جانت وابتسامات اكو...
واليوم الي بعده هم دخلت كريمه ع بيبي وسدن الباب بس مسمعت شنو حجن... ورا مطلعت كريمه لدوامهه نزلت علا وانطتني نظره عجيبه غريبه مال شامت ...
الكل طلع اجت بيبي للمطبخ آٌنـي جنت اغسل مواعين وجان تلزمني من شعري!
-ولج انتي خزيتيني ! ولج لوميته مكان امج وخلصت منج!
-بيبي شكو شعري! بيبي!!
اني انداريت عليها وجان يجيني راشدي ولاجنها مره جبيره متكدر تمشي ع قوة الراشدي الي طلع منها..
اني متحملت وعطت بوجهه
-كافي! كافي! شتردين مني! اني شسويتلكم ليش هيج تسوين بيه!
جان تنزع نعالهه وتبدي تكفخ بيه من كل مكان يعجبها ع وجهي وع ظهري وع خاصرتي الي زوركت من الضرب ... اني موخرت كلت خليها تريح كلبها هي من زمان هاويه كتلتي...
حان تضرب وتصيح سودتي وجهي! الله يسود وجهج الله ياخذج شعندج تالي الليل وي احمد ومخليج بحضنه ! ولج شنو انتي بعدج بگد النعال وهيج تسوين بيه..
بقت تضرب واني مستسلمه الها لحد متعبت وتفلت بوجهي وعافتني .. كمت وكل جسمي يون رحت ع فراشي ومطلعت بقيت ابجي واكمش الفراش حيل عبالك هو سبب حزني ..
بعدين اخذت ثوبي من الكنتور ومنشفتي ورحت للحمام واول مفتحت باب الغرفه احمد صار بوجهي..
هو شاف حالتي وشعري منكوش وعيوني مورمه بقه يسألني شبيج احجي منو وياج.. محجيت شي وعفته ورحت للحمام فتحت المي وبقت دموعي تصب واختلطت بالمي طبعا اسمع صوت صياح احمد بس مافهم شنو يكول ولا جان ابالي افهم شنو الصار لان تعبت ومالي خلك احد...
طولت بالحمام حتى ميبقى ينتظرني وصدك من طلعت ملكيته لفيت شعري بالمنشفه بدون مامشط ونمت...
