#قصة_هوانا
nada hs
الجزء 13
وصدك مرت الايام وبيبي بدت تسوء حالتهه ونامت بالفراش .. يوم زينه وعشره لا... جنت اتگطع عليها وبس اسمع صوتها بالتلفون ومشايفتها صار اشهر من ولدت ولهسه...
لحد ما توسلت بصادق وامه هم قنعته ورحنالهه اني وخالتي ...
دخلت عليها للغرفه الي مدخلتها من يوم العرس وشصار بذاك اليوم رخت لبيبي وحظنتها حيل وهي بفراشهه وشبعت بجي... اه يابيبي شگد طيبه ريحه شيلتج.. جنهه الجنه..
.
بقيت مگابلتها وابجي ومااكدر احجي شي... حته ابني يبجي شالته تماضر مني... ورا شويه دخلت كريمه للغرفه وسلمت ورديت عليها واني بمكاني مكمتلها... بعدين بيبي گالت خلونه وحدنا... وبقينا وحدنا وگالت اريد تحالليني بيبي اعرف نفسج باحمد هو هم نفسه بيج بَـس موبيدي يايمه... وسامحيني من ضربتج لان ماتدرين شعيرتني بيج مرت خالج.. ظليت بس ابجي ومااعرف شگول لوبيدي عمري انطي الها مو بس اسامحها واعرف هي مرادت هيج بس جانت تتأثر لأقل كلمه تنكال وكريمه عرفت نقطه ضعفهه .... مسحت ع راسي وگالت حصتج من بيت امج بالبنك وخليتلج فوگاهن هم ... الامانه هاي يم خالج رحيم ومحد يدري بس هو...
انمردت مرد بذاك اليوم...
والحطمني اكثر من طلعت ودخل احمد ووياه خطيبته... سلمت عليه وهو عرفنا ع بعض وعيونه اوف عيونه موتني...
رجعت للبيت حالتي حاله وبقيت طول اليوم ابجي...
وبعد اسبوعين خابرتني تماضر وكالت بيبتج خربانه وتريد تشوفج
رحت مثل المخبله ولگيتها منتهيه... باقيه جلد وعظم! باسبوعين هيج صار بيها! تخبلت من شفتها بوست حته رجليها واكولها ارجعي لحيلج بيبي بدونج اضيع اني ... خابرني صادق بليل وگلي راح يجيكم جاسم ياخذكم گلتله مااجي بيبي تعبانه وهو صار عصبي وتعارك ويايه غلقت تلفوني وعفته كلت شيصير خل يصير...
صار العشا وشفت اكل بيبي! مي التمن بس! وتكمل منا تستفرغ منا... شنو الي اكدر اسوي يربي...
جانت تماضر وعلا يتناوبن ع بيبي وبذيج الليله گلتلهم اني ابقه طبعا من وصلت ولهسه حته ابني مشايفته كله بيد تماضر فدوه لعينها... صار الليل وراقبت بيبي لحظه بلحظه اريد اشبع منها قبل متروح... حته بنفسها ركزت... جان بطيء وساعات يسرع اديها بارده رجليها تحر وتبرد ... گعدت بالگاع وخليت راسي ع الجربايه يمها واشتم ريحتها ع كيفي حته ويه المرض بعدها ريحتها تخبل گرنفل ومسك وسعد جان ميفارك ملابسهه...
شويه وانفتح الباب وجانت علا باوعت وراحت وبعدين اجت تماضر كالت نامي موزين عليج السهر ... راح الكل وصفه البيت سنطه رحت للمطبخ وتذكرت ذيج الايام الي كضيتها بي..
التفت وشفت احمد... هم بنفس ذيج الوگفه والطول الحلو واديه شابكهن ع صدره...
-نستي الي بينا ؟
-احمد! كافي اني متزوجة الي دتسوي حرام عليك وعليه همين..
قرب حلگه من اذني وطبگ سنونه بكل عصبيه وكال:
-شايفه هذا زوجج اكتله كتلت الچلب واشمره... عوفي ورجعي هنا تره ارملج وترجعين غصبا عنج!
-انت تخبلت شنو! زوجي اريده وهو ابو ابني واياك تتعرضلي مره ثانيه!
لساني يگول شي وگلبي شي... لشوكت ابقه جبانه... بس ارجع وافكر ابني، خطيبته، اهله ... السالفه مرهمت من اولها تجي هسه ترهم....
